ʼE Nātou ʼAmo Tanatou ʼAkau Toho ʼi Tonatou Temi Tūpulaga
ʼI TE ʼu “temi maʼuhiga ʼaupito mo faigataʼa” ʼaenī, ko te ʼu fihifihia lahi ʼaē ʼe tau mo te kau tūpulaga. (2 Timoteo 3:1) ʼI te ʼaho fuli, ʼe nātou logo ki te ʼu meʼa ʼe nātou fakaneke nātou ke nātou fai te ʼu aga heʼeʼaoga, ohage ko te suluka, pea mo te tahi ʼu aga ʼe fakatupu kovi kia nātou. Ko nātou ʼaē ʼe nātou mulimuli ki te ʼu pelesepeto faka Tohi-Tapu, ʼe lagi vāʼi nātou ʼuhi ko tanatou mole fia mulimuli ki te ʼu meʼa ʼaē ʼe fai e te hahaʼi, pea ʼe lagi manatu anai e ʼihi Kilisitiano, ʼe lelei age ke nātou fakagata tanatou ʼu faiga.
ʼI te koga fakaʼosi ʼo te fitu sēkulō ʼi muʼa ʼo totatou temi, neʼe tohi fēnei e Selemia: “ ʼE ko he meʼa lelei ki te tagata mālohi ke ina ʼamo tona ʼakau toho lolotoga tona temi tūpulaga.” (Tagilāulau 3:27) Neʼe koteā te faka ʼuhiga ʼo tana ʼu palalau? Ko tona faka ʼuhiga, kapau ʼe faiga he tahi ke ina tauʼi tona ʼu fihifihia ʼi tona temi tūpulaga, pea ʼe tokoni anai te faʼahi ʼaia kia ia ke ina tauʼi te ʼu fihifihia ʼo tona maʼuli mokā lahi anai. Ko te ʼu fihifihia, logope la ʼe mole ko he ʼu meʼa ʼe tou leleiʼia, kae ʼe tonu ke hoko ki te kau Kilisitiano ʼaē ʼe kei tūpulaga pea mo te hahaʼi lalahi. (2 Timoteo 3:12) Kae ko te ʼu fua lelei ʼo te agatonu ʼe lelei age ia ʼi te fīmālie faka temi ʼaē ʼe lagi tou maʼu ʼi te faifaitahi mo te mālama ʼaenī.
Kapau ʼe kei koutou tūpulaga, koutou kātakiʼi te ʼu ʼahiʼahi ʼo takotou tui, ʼo koutou nonofo agatonu. Kapau ʼe fakaneke koutou ke koutou fai he aga ʼe kovi, pea ʼaua naʼa koutou fai te meʼa ʼaia, heʼe fakafeagai ki takotou tui. Logope la ʼe lagi faigataʼa te fai ʼo te faʼahi ʼaia ʼi te moʼi temi pe ʼaia, kae ʼaki te temi ʼe mole koutou faʼa tuʼania anai. Neʼe fakapapau fēnei e Sesu: “Koutou toʼo kia koutou taku ʼakau toho . . . , pea ʼe koutou maʼu anai he fīmālie ki ʼokotou nefesi. Heʼe ko taku ʼakau toho ʼe mālū pea ko taku kavega ʼe maʼamaʼa.”—Mateo 11:29, 30.
Koutou tali te ʼu faigataʼaʼia ʼaē ʼe hoko kia koutou ʼuhi ko takotou mulimuli ki te ʼu pelesepeto faka Tohi-Tapu. Kapau ʼe koutou fai te faʼahi ʼaia, pea ʼe lelei anai tokotou maʼuli ʼi te temi nei, pea mo koutou maʼu he ʼamanaki moʼoni ki te ka haʼu. Ohage ko tona ʼui e te Tohi-Tapu, “ ʼe mole te malamanei pea mo tona loto, ka ko ʼaē ʼe ina fai te finegalo ʼo te ʼAtua ʼe nofo maʼu ia ʼo talu ai.”—1 Soane 2:17.