Te Annuaire — Ko He Koloā Fakaloto Mālohi
1 Ko te ʼu fakamatala pea mo te ʼu hisitolia ʼo te ʼu gāue fakaofoofo ʼa Sehova ʼe fakatupu fiafia tuʼumaʼu ki te ʼu kaugana ʼa te ʼAtua (Sopo 38:4, 7; Taag. 25:25; Luka 7:22; Gāue 15:31). Koia la ʼaē ʼe ʼui ai ko te Annuaire des Témoins de Jéhovah ʼe ko he koloā fakaloto mālohi.
2 Ko te ʼu Annuaire fuli ʼe nātou fakahāhā he ʼu fakamatala fakamālohi ʼo te ʼu gāue ʼi te malamanei pea mo te ʼu meʼa neʼe fakahoko e te kau Fakamoʼoni ʼa Sehova. Ko te ʼu hisitolia fakaloto mālohi ʼe fakahāhā ai te tokoni ʼa Sehova, tana taupau, pea mo tana tapuakina tana hahaʼi. ʼE talanoa te Annuaire ki te ʼu tagata pea mo te ʼu fafine faiva neʼe nātou tuku tonatou famili, tonatou ʼu kaumeʼa, pea mo tonatou fenua kae nātou ʼave te ʼu moʼoni ʼo te Tohi-Tapu ki te hahaʼi ʼo te ʼu ʼatu fenua mo te ʼu motu ʼo te kele.
3 Neʼe uga e te Annuaire te tokolahi ʼi te kau lautohi ke tuputupu tanatou gāue ki te ʼAtua. Neʼe tohi fēnei e te tahi ʼi te kau lautohi: “ ʼE mole feala taku lau fakavilivili te tohi. Ko te meʼa ʼaē ʼe ʼau lau neʼe lahi tona fakaloto mālohi. ʼO lave loto kia te ʼau ʼo feala ai ke lahi taku faka mafola te logo lelei ʼi taku sio ki te meʼa neʼe fai e ʼihi moʼo tauʼi ʼo te faigataʼaʼia.”
4 ʼI te taʼu fuli talu mai te taʼu 1927, ko te Annuaire des Témoins de Jéhovah neʼe ko he koloā moʼoni ʼo te ʼu fakamatala pea mo te ʼu hisitolia ʼe fakatupu uga. ʼE koutou fakaʼaogaʼi katoa koa te matapuna ʼaenī e tahi ʼo te lotomālohi? Moʼo fai ʼo te faʼahi ʼaia, ʼe tonu ke koutou lau te Annuaire ʼi te temi pe ʼaē ʼe koutou maʼu ai. Pea ʼi te lolotoga ʼo te taʼu, koutou toe vakaʼi te ʼu manatu tāfito ʼi te tohi moʼo fakaloto mālohiʼi ai ʼo koutou pea mo ʼaoga ki tokotou famili.