Kapite 104

Ko Te Tuʼa Tolu Leva ʼAē ʼo Te Logoʼi ʼo Te Leʼo ʼo Te ʼAtua

ʼI TE fale lotu, ko te ʼosi pe ʼaē ʼo te fakahā e Sesu te tuʼania ʼe ina maʼu ʼo ʼuhiga mo tona mate. Ka ko te meʼa tāfito ʼaē ʼe hoha ki ai tana fakakaukau, ko te faka ʼuhiga anai ʼo tona mate ki te logona ʼo tana Tāmai. Koia neʼe ina fai ai te kole ʼaenī: “Tāmai, faka kolōliaʼi tou huafa.”

ʼI tana ʼu palalau ʼaia, neʼe ʼui fēnei e te leʼo mālohi mai te lagi: “Neʼe kua ʼau ʼosi faka kolōliaʼi pea ʼe ʼau toe faka kolōliaʼi anai.”

Ko te hahaʼi ʼaē neʼe tutuʼu ʼi ai neʼe mole nātou ʼiloʼi he meʼa ke nātou haga kiai. Neʼe ʼui maʼa ʼihi: “Neʼe palalau age te ʼaselo kia te ia.” Neʼe ʼui e ʼihi ko te mana. Kae, ko Sehova totonu ia ʼaē neʼe palalau. ʼE mole ko he hoki logo ʼaia ʼo tona leʼo ʼo ʼuhiga mo Sesu.

Koteʼuhi, ia taʼu e tolu vaelua ki muʼa atu, ʼi te papitema ʼaē ʼo Kilisito, neʼe logo ia Soane Patita ki te ʼui ʼaē ʼa te ʼAtua ʼo ʼuhiga mo ia: “Ko ia nei ko toku ʼAlo, ʼofaina, ʼaia ku ʼau fiafia ʼaupito ia te ia.” Pea, ʼi he kiʼi temi siʼisiʼi age ʼi te ʼosi ʼo te Pāsikate ʼaenī talu mai ai, ʼi te temi ʼaē neʼe fetogi ai ia Sesu ʼi ʼonatou muʼa, neʼe logo ia Sake, Soane pea mo Petelo ki te ʼui fēnei ʼa te ʼAtua: “Ko ia nei ko toku ʼAlo, ʼofaina, ʼaia ku ʼau fiafia ʼaupito ia te ia; ke koutou fakalogo kia te ia.” Pea ʼi te ʼaho nei, te ʼaho 10 ʼo Nisani, ʼaho e fā ʼi muʼa ʼo te mate ʼo Sesu, ko te tuʼa tolu leva ʼaē ʼo te logo ʼa te ʼu tagata ki te leʼo ʼo te ʼAtua. Kae, ʼi te meʼa leva ʼaenī, neʼe palalau ia Sehova ke feala tona logoʼi e te hahaʼi tokolahi.

“Neʼe mole logo mai te leʼo ʼaenī, ʼuhi ko ʼau, kae ʼuhi ko koutou”, ko te fakamahino age ʼaia ʼa Sesu. Ko te leʼo ʼaia ʼe ina fakamoʼoni ko Sesu ko te ʼAlo ʼo te ʼAtua, te Mesia ʼaē neʼe fakapapauʼi mai. “ ʼE ko te temi ʼaenī, ko te hoko atu ʼaia ʼo te palalau ʼa Sesu, ʼaē ʼe fai ai te fakamāu ʼo te mālama ʼaenī; ʼi te temi leva ʼaenī ko te pule ʼo te mālama ʼaenī ʼe lī anai ki tuʼa.” ʼIo, ko te maʼuli agatonu ʼaē ʼo Sesu ʼe ina fakamoʼoni ai ko Satana te Tevolo, te pule ʼo te mālama ʼaenī, ʼe tonu “ke lī ia ki tuʼa” ko tona faka ʼuhiga ke fakaʼauha ia.

ʼI tana palalau ʼo ʼuhiga mo tona mate ʼo ia totonu, ʼaē kua ōvi mai, pea mo tona ʼu ikuʼaga, neʼe ʼui fēnei e Sesu: “Pea ko ʼau foki, kapau ʼe hiki ake ʼau mai te kele, pea ʼe ʼau ʼaumai anai kia te ʼau te ʼu faʼahiga tagata kehekehe.” Ko tona mate ʼe mole ko he meʼa ia ʼe fakahā ʼaki ai kua lavā, heʼe ʼaki te meʼa ʼaia ʼe ina ʼaumai anai kia te ia ni hahaʼi ke feala ai hanatou maʼu ia te maʼuli heʼegata.

Kae neʼe mole ʼalu te hahaʼi ʼi te tonu ʼaia: “Neʼe mātou logo ʼi te lao, ko Kilisito ʼe nofo ʼo heʼegata; he koʼe ia ʼe ke ʼui koe ko te Foha ʼo te tagata ʼe tonu ke hiki ake? Ko ai koa te Foha ʼaia ʼo te tagata?”

Logope la te ʼu fakamoʼoni fuli ʼaia, ʼaē ʼe kau ai mo te leʼo totonu ʼo te ʼAtua, e tokolahi te kau Sutea neʼe mole nātou tui ko Sesu ʼe ko te Foha moʼoni ʼo te tagata, te Mesia ʼaē neʼe fakapapauʼi mai. Kae, ohage pe ko tana fai ʼi te ʼu māhina e ono ki muʼa atu ʼi te lafeti ʼo te ʼu Tapenakulo, neʼe toe tala e Sesu ko ia “ko te mālama” pea ina fai age kia nātou ʼaē ʼe fagono kia te ia te ʼekenaki ʼaenī: “ ʼI takotou kei maʼu te mālama, koutou tui ki te mālama, ke koutou liliu ai ko he ʼu foha ʼo te mālama.” Pea ʼi te ʼosi pe ʼo tana ʼui age te manatu ʼaia, neʼe mavae ia pea ʼalu ʼo nono, he neʼe lagi faigaʼi ke tāmateʼi ia ia.

Ko te hahaʼi Sutea ʼe mole nātou tui kia Sesu; koia neʼe fakahoko ai te ʼu palalau ʼa Isaia ʼi tana ʼui ʼaē ko te ‘ ʼu mata ʼo te hahaʼi ʼe pipiki anai pea ko tonatou loto ʼe liliu ia ʼo mahino tuai, ke ʼaua naʼa nātou toe liliu mai pea ke nātou maʼu ai te mālōlō’. Neʼe sio ia Isaia ʼi te meʼa ʼe hā mai ki te ʼafioʼaga ʼo Sehova ʼi te lagi, pea mo Sesu ia tafa ʼo Sehova, ʼi te kolōlia ʼaē neʼe ina maʼu ia muʼa ʼo tana tupu tagata. Kae, ohage pe ko tona ʼui ʼi te lea faka polofeta ʼa Isaia, ʼe fakafisi fakamalotoloto te kau Sutea ki te ʼu fakamoʼoni ʼaē ʼe fakamoʼoni ʼaki ko Ia ʼaia ʼe ko tonatou Fakamaʼuli ʼaē neʼe fakapapauʼi mai.

Kae, e tokolahi ʼe tui kia Sesu, māʼia mo te ʼu pule (e lagi ko he ʼu tagata ʼo te Sanetualio, te Telepinale lahi ʼo te kau Sutea), ia nātou ʼaia neʼe kau ai ia Nikotemo mo Sosefo mai Alimatea. Kae, ʼi te temi ʼaia, neʼe mole fakahā e te ʼu pule tanatou tui, ko tanatou tuʼania ʼaē naʼa kapu ia nātou ʼi te sinakoka pea mo puli tonatou tuʼulaga. ʼI lahi leva ʼo te ʼu meʼa ʼe nātou fakafisi kiai!

Neʼe toe fai ake e Sesu te fakatokaga ʼaenī: “Ko ʼaē ʼe tui kia te ʼau, ʼe mole gata ʼaki pe tana tui ʼaē kia te ʼau, kae toe tui foki kia ia ʼaē neʼe ina fekauʼi mai ʼau; pea ko ʼaē ʼe sio kia te ʼau, ʼe toe sio ia kia ia ʼaē neʼe ina fekauʼi mai ʼau. (...) Kae kapau ʼe logo he tahi ki taku ʼu folafola pea ʼe mole ina taupau, ko ʼau ʼe mole ʼau fakamāuʼi ia ia; koteʼuhi neʼe mole ʼau haʼu ko te fakamāuʼi ʼo te malamanei, kae ko te hāofaki ʼo te malamanei. (...) Ko te palalau ʼaē neʼe ʼau fai, koʼena te meʼa ka ina fakamāuʼi anai ia ia ʼi te ʼaho fakamuli.”

ʼAki tona ʼofa ki te hahaʼi ʼo te malamanei, neʼe fekauʼi mai e Sehova ia Sesu, ke feala ai te hāofaki ʼonatou ʼaē ʼe tuku tanatou tui kia te ia. Ko te hahaʼi ʼe nātou hāo anai peʼe kailoa ʼo mulimuli pe ki tanatou fakalogo peʼe kailoa ki te ʼu meʼa ʼaē neʼe tala e Sesu ʼi te fakatotonu ʼa Sehova. Ko te fakamāu ʼe hoko anai “ ʼi te ʼaho fakamuli”, ʼi te lolotoga ʼo te Hau ʼa Kilisito ia taʼu ʼaē e afe.

Neʼe fakaʼosi e Sesu ʼaki te ʼu palalau ʼaenī: “Neʼe mole ʼau palalau ʼi toku loto tokotahi, kae ko te Tāmai, ʼaē neʼe ina fekauʼi mai ʼau, neʼe ina foaki totonu mai kia te ʼau te fakatotonu ʼo ʼuhiga mo te meʼa ʼaē ʼe tonu ke ʼau ʼui pea mo fakahā. Pea tahi, ʼe ʼau ʼiloʼi ko tana fakatotonu ʼe faka ʼuhiga ia ko te maʼuli heʼegata. Koia, ko te ʼu meʼa ʼaē ʼe ʼau ʼui, ʼe ʼau ʼui ohage pe ko tona ʼui mai kia te ʼau e te Tāmai.” Soane 12:28-50; 19:38, 39; Mateo 3:17; 17:5; Isaia 6:1, 8-10.

▪ Koteā te ʼu ʼaluʼaga ʼaē e tolu neʼe logoʼi ai te leʼo ʼo te ʼAtua ʼo ʼuhiga mo Sesu?

▪ Neʼe feafeaʼi te sio ʼa te polofeta ko Isaia ki te kolōlia ʼo Sesu?

▪ Ko ai te ʼu pule ʼaē ʼe tui, kae koteā te tupuʼaga ʼo tanatou mole fakahā fakahagatonu ia tanatou tui kia Sesu?

▪ Koteā te “ ʼaho fakamuli”, pea ʼe fakatafito anai kiteā ia te fakamāuʼi ʼo te hahaʼi?