Kapite 101

ʼI Petania, ʼi Te ʼApi ʼo Simone

ʼI TANA mavae ʼi Seliko, neʼe fakahaga te fagona ʼo Sesu ki Petania. Neʼe ʼaho katoa te loaloaga ʼo tana ʼalu, koteʼuhi ʼe tonu ke hake ʼi te ala ʼe tokakovi ia kilometa e ʼuafulu. Koteʼuhi, ʼe tuʼu te kolo ko Seliko ʼi te ʼu meta e 250 ki lalo ifo ʼi te nivo ʼo te fuga tai, pea ko Petania ʼe tuʼu ʼi te ʼu meta e 760 ki ʼoluga ʼi te nivo ʼo te fuga tai. ʼE tou manatuʼi, ko Lasalo pea mo tona ʼu tokolua ʼe nonofo ʼi Petania. Ko te kiʼi kolo veliveli ʼaia e kilometa tolu tona vaha mo Selusalemi ʼi te potu hahake ʼo te moʼuga ʼo Oliveto.

Kua tokolahi foki te hahaʼi ʼi Selusalemi ʼuhi ko te Pāsikate. Neʼe ʼōmai fakatomuʼa te hahaʼi fagona ke feala hanatou fakamaʼa ia nātou ʼo mulimuli pe ki te ʼu fakatotonu ʼo te Lao. E lagi neʼe nātou fāfā ʼapē ki he sino kua mate pe neʼe nātou fai he meʼa ʼo feala ai ke nātou heʼemaʼa. ʼE nātou mulimuli foki ki te ʼu akonaki ʼo ʼuhiga mo te fakamaʼa ke feala ai hanatou kau ki te Pāsikate ohage ko tona fakatuʼutuʼu. ʼI te lolotoga ʼo te uhuuhu mai ʼa te hahaʼi ʼo fakatahitahi ʼi te fale lotu, neʼe tokolahi ia nātou ʼe nātou feʼuiʼaki peʼe haʼu anai ia Sesu ki te Pāsikate peʼe kailoa.

ʼI Selusalemi, neʼe fai ai te fihi ʼo ʼuhiga mo Sesu. Neʼe kua ʼiloʼi lelei ia ko te kau takitaki lotu ʼe nātou fia puke ia ia ke matehi. Neʼe kua nātou fai foki te fakatotonu ʼaenī: Ko ʼaē ʼe ina ʼiloʼi te koga meʼa ʼaē ʼe nofo ai ia Sesu ke haʼu ʼo fakahā age kia nātou. ʼO tuʼa tolu ʼi te ʼu māhina ʼaē e tolu kua hili — ʼi te lafeti ʼo te ʼu Tapenakulo, ʼi te lafeti ʼo te Tetikase pea mo te ʼosi fakatuʼuake ʼo Lasalo —, neʼe faigaʼi e te kau takitaki lotu ʼaia ke nātou matehi ia ia. Ko te tupuʼaga la ʼaia ʼo te feʼuiʼaki e te hahaʼi peʼe toe hā anai ia Sesu ki te hahaʼi. “Koteā takotou manatu? ” ko tanatou feʼuiʼaki ʼaia.

ʼI te lolotoga ʼo te temi ʼaia, ia ʼaho e ono ʼi muʼa ʼo te Pāsikate, ʼaē ʼe tō ʼi te ʼaho 14 ʼo Nisani ʼi te kaletalio faka sutea, neʼe tau ia Sesu ki Petania. Neʼe hū ki ai ʼi te afiafi ʼo te feliaono, ʼi te kamataʼaga ʼo te ʼaho 8 ʼo Nisani. Neʼe mole feala ia ke ina fai te fagona ʼaia ʼi te moeaki, heʼe faka tuʼakoi e te lao faka sutea te ʼu fai fagona ʼi te lolotoga ʼo te sapato, ʼi te tō ʼo te laʼā ʼi te feliaono ki te tō ʼo te laʼā ʼi te moeaki. E lagi ʼalu ia Sesu ki te ʼapi ʼo Lasalo, ohage ko tana fai talu mai ai, ʼo moe ai ʼi te po ʼo te feliaono.

ʼI te moeaki afiafi, neʼe fakaafe ia Sesu pea mo tona ʼu kaumeʼa ki te kai e te tagata ʼo Petania. Ko te tagata ʼaia ko Simone, ko te tagata neʼe kilia pea neʼe lagi fakamālōlō e Sesu ʼi he temi ki muʼa atu. Ohage pe ko tana agamāhani, ʼe gāue ia Maleta ki te kau fakaafe. Kae, ko Malia, ohage pe ko te agamāhani, neʼe tokaga ia kia Sesu, pea neʼe ina fai te meʼa neʼe malaga ai te fihi.

Neʼe ina avahi te hina, ko te kiʼi hina alepate, neʼe ʼai ai te paona lolo magoni e tahi, “ko te naʼato moʼoni”. ʼE ko he meʼa totogi kovi ʼaupito ia, heʼe ko tona totogi ʼe fakatatau ki te totogi ʼo he tagata gāue ʼi te teitei taʼu katoa! ʼI te liligi ʼaē e Malia te lolo ki te ʼulu pea mo te ʼu vaʼe ʼo Sesu pea ina holo tona ʼu vaʼe ʼaki tona lauʼulu, neʼe mafola te magoni ʼo te lolo ʼi te fale katoa.

Neʼe ʼiʼita te kau tisipulo ʼo ʼui maʼa nātou: “Moʼoā te maumau noa ʼaia?” Pea neʼe ʼui e Sutasi Isikaliote: “He koʼe neʼe mole fakatau te lolo magoni ʼaenā ki te tenalio e tolugeau pea foaki maʼa te kau māsisiva?” Neʼe mole manatu moʼoni ia ki te kau māsisiva, heʼe talu mai te kiʼi temi heʼeki faʼa fualoa mo tana kaihaʼa ʼi te kesi ʼa te kau tisipulo.

Neʼe kau ia Sesu mo Malia ʼo ʼui maʼana. “Koutou haganoa kia te ia, ko tana fakatotonu age ʼaia. He koʼe ʼe koutou faiga ke koutou fakakinakinaʼi ia ia? ʼE ko he gāue lelei ʼaē neʼe ina fai kia te ʼau. Koteʼuhi, ko te kau māsisiva, ʼe koutou maʼu tuʼumaʼu pe ia koutou, pea ka ʼe koutou loto kiai, pea ʼe feala tuʼumaʼu pe takotou fai he meʼa ʼe lelei kia nātou, kae ko ʼau, ʼe mole koutou maʼu tuʼumaʼu anai ʼau. Neʼe ina fai te meʼa ʼaē ʼe ina lavaʼi; neʼe ina fia ʼai fakatomuʼa te lolo magoni ki toku sino moʼo teu ki toku ʼavaifo. ʼE ʼau tala moʼoni atu kia koutou: ʼI te potu fuli pe ʼe faka mafola ai anai te logo lelei ʼi te malamanei katoa, ʼe toe fakamatala ai anai foki, moʼo fakamanatu kia te ia, te meʼa ʼaē neʼe fai e te fafine nei.”

Kua laka leva te temi nei ia hola e 24 te fualoa ʼo te nofo ʼa Sesu ʼi Petania, pea kua ʼiloʼi e te kolo katoa kua ʼi ai. Koia, neʼe tokolahi te hahaʼi neʼe ʼōmai ki te ʼapi ʼo Simone ko tanatou fia sisio kia Sesu, kae ʼe nātou toe ʼōmai foki ʼo sisio kia Lasalo, ʼaē ʼe toe ʼi ai mo ia. Pea, neʼe fono ai te kau pelepitelo pule ke matehi ia Sesu pea, mo Lasalo. Koteʼuhi, e tokolahi te hahaʼi neʼe tui kia Sesu he neʼe nātou sisio kia ia ʼaē neʼe ina fakatuʼuake mai te mate. ʼI agakovi moʼoni leva, ʼe maʼu e te kau takitaki lotu ʼaia! Soane 11:55 ki te 12:11; Mateo 26:6-13; Maleko 14:3-9; Gāue 1:12.

▪ Koteā te meʼa ʼaē ʼe palalau kiai te hahaʼi ʼi te fale lotu ʼo Selusalemi, pea koteā tona tupuʼaga?

▪ Koteā ʼaē ʼe ʼui ai neʼe tau ia Sesu ki Petania ʼi te feliaono ka mole ko te moeaki?

▪ ʼI tana tau ki Petania, ko te koga meʼa fea ʼaē neʼe lagi nofo ai ia Sesu ʼi te ʼaho ʼo te sapato?

▪ Koteā te meʼa ʼaē neʼe fai e Malia ʼo malaga ai te fihi, pea koteā te meʼa neʼe ʼui e Sesu moʼo kau ki te fafine ʼaia?

▪ Koteā te meʼa ʼaē ʼe hā mai ai te agakovi moʼoni ʼo te kau pelepitelo pule?