Kapite 11
He koe nee faka gafua ete Atua te agakovi?
1. a) E feafeai te agaaga ote temi nei? b) Kotea te tukuga kovi e fai e ihi?
ITE POTU fulipe ote malamanei, eiai te u fakapo, te u loto fehia pea mote u tokakovi. Kote tagata agalelei e tautau to kiai te u kovi aia. Ko ihi e natou tukuga kovii te Atua, o natou lau: “Kapau eiai he Atua, he koe eina faka gafua te agakovi?”
2. a) Koai ae eina fai te mea ae e kovi? b) Kotea te faahiga mea e tonu ke fai ete hahai ke feala ai hanatou mole mau he u mamahi?
2 Kae koai ae eina fai te mea ae e kovi? Kote tagata mole kote Atua ia. Koia, nee fealape kite hahai ke mole natou mau he u mamahi mo kanapau e natou fakalogo kite u lao faka atua. E faka totonu mai ete Atua ke tou ofa. Eina tapui te fakapo, te kaihaa, te folonikasio, te manumanu, te konahia pea mo ihi age gaue kovi ae e faka tupu aki ai te u mamahi (Loma 13:9; Efese 5:3, 18). Nee foaki ete Atua kia Atama mo Eva he uto pea mohe sino haohaoa pea mohe fealagia foki kena fiafia aupito ite mauli. Nee mole ina loto foki ke mauli mamahi te taumatua aia mo ana fanau.
3. a) Koai ae nee tupu ai te agakovi? b) Kotea ae e ha mai ai ko Atama mo Eva nee fealape kena tekei te u fakahala ate Tevolo?
3 Ko Satana te Tevolo ia te tupuaga ote agakovi. Kae ko Atama mo Eva e feala ke toe tukuga kovii mo naua. He nee fealape ke na tekei te Tevolo lolotoga tana faka halai ia naua. O hage kote tagata haohaoa ko Sesu, nee fealape ke na uiage kiai: “Alu-kehe!” (Mateo 4:10). Ka nee mole na fai feia. O na liliu ai leva o agahala. Ko tana u fanau fuli, o kau ai mo tatou, nee natou mau ai te agahala aia ae e tupu ai te mahaki, te loto mamahi pea mote mate (Loma 5:12). Kae kotea te tupuaga ote faka gafua ete Atua te mamahi?
4. Kotea ae e feala ai ke mahino kia tatou te faka gafua faka temi ete Atua ia te agakovi?
4 E fealape ke lau e mole he uhiga ote tuku ke hoholo ai te agakovi lolotoga he u sekulo. Kae kohe manatu faka potopoto koa aia? Kohe u matua ofa e mole anai koa na tuku tana tamasii keina tali te mamahi o hona tafa ke feala ai he lelei o hona maimoa? E mahino papau ia, pea i tana faka gafua e naua te mamahi faka temi aia, e na tokoni ai ki tana tamasii keina mau hona mauli lelei ki amuli. Kotea te aoga ote faka gafua ote kovi ete Atua?
KOHE FEHUI MAUHIGA E TONU KE FAKA TOKA
5. a) Nee fulihi feafeai te palalau ate Atua e Satana? b) Kotea te faka papau ia a Satana kia Eva?
5 Kote agatuu kite Atua i Eteni nee malaga ai te fehui mauhiga e tonu ke vakavakai faka lelei ke mahino lelei mai ai te faka gafua ote kovi ete Atua. Nee uiage e Sehova kia Atama ke aua naa kai kite akau e tahi ote oloto. Kapau e kai kiai, kotea ka hoko ai anai? Nee tala fenei ete Atua: “E ke mate mooni ai anai.” (Senesi 2:17). Kae nee tala kehei ia e Satana. Nee ina faka neke Eva ke kai kite akau aia nee tapu. “Mooni atu e mole koulua mamate ai”, ko tana ui age aia. O ina toe hoko atu: “Hee iloi ete Atua, kote aho pe ae e koulua kai anai kiai, e ala mooni ai o kolua u mata pea e koulua liliu mooni ai o hage kote Atua, o iloi te lelei pea mote kovi.”—Senesi 3:1-5.
6. a) He koe nee talagataa ia Eva kite Atua? b) Kotea te faka uhiga totonu ote kai kite fua ote akau ae nee tapu?
6 Nee talagataa ai Eva kite Atua, koteuhi kua tui ia kia Satana. Nee manatu ia e aoga anai kia ia tana talagataa. Nee ina ui ia, e mole anai, toe fakamauii ia Atama mo ia e tona Tupuaga mo toe faka logo ki ana lao. E na fili totonupe anai e naua te mea ae e “lelei” mo ae e “kovi”. Ko Atama nee mulimuli pe kia Eva o ina kai te fuai akau ae nee tapu. Kote Tohi-Tapu o Selusalemi eina fai te talanoa aeni (nota i lalo ote pasina) o uhiga mote agahala olesinale ate tagata kite Atua: “Kote fealagia ia ote vakai tonupe e kita te mea ae e lelei pea mo ae e kovi pea mo kita faipe he mea o mulimuli kiai, e kohe fia faitaliha osi ia. (. . .) Kote uluaki agahala nee kohe faka feagai ia kite pule ate Atua.” Nee kohe faka feagai ia kite maua ae ote Atua ke pule faitaliha kite tagata.
7. a) Kote fehui fea ae nee malaga ite talagataa ate tagata? b) Kote u fehui feafeai ae e tonu ia ke fai he tali kiai o uhiga mote fihi aia?
7 Koia, i tana kai kite fuai akau ae nee tapu, nee mavae mai ai leva Atama mo Eva mai te pule ate Atua. I tana kua liliu o faitaliha, nee na fili tonupe leva kia naua te mea ae e “lelei” pee “kovi”. Kote fehui mauhiga leva aeni e tonu ke fai ai: Kote Atua e tonu koa ke pule faitaliha kite tagata? I tona tahi faahiga ui, e tonu koa kote Atua ae eina vakai tonu te mea ae e lelei pea mo ae e kovi kite tagata? E aia koa te faka mahino mai ote aga ae e lelei pea mo ae e kovi? Pee lelei agepe te hahai ia ite pulei tonu o natou? I tonatou takitaki faka pulipuli e Satana, e natou lavai koa te takitaki o natou o laka lelei, ite ateina mai te Atua? Pee kote takitaki ia ate Atua ae e aoga ia kihe faka tuu ohe puleaga fai totonu ka ina faka nofo anai o heegata ia te tokalelei ite kele? Koena la te u fehui ae nee lagai ite faka feagai aia kite pule ate Atua, te totonu ia ote maua ae o ia ke pule faitaliha kite hahai fuli.
8. He koe nee mole pulihi e Sehova te kau agatuu ite temi pe aia?
8 E mahino ia, ko Sehova nee feala noa keina matehi ite moi lakaga pe aia ia te toko tolu aia nee agatuu. E mole he toe mahalo ia, kote Atua e malohi age ia ia natou. Kae kohe puleaki lelei koa tonatou pulihi moo motuhi ote fihi? E mole leva feala ai ke mau he tonu o uhiga mote fehui ae pee kote tagata eina lavai te takipe o ia o laka lelei, ite ateaina mai te Atua. Ko Sehova nee ina faka tuu foki he tuakoi moo faka toka ote fehui mauhiga aia nee lagai.
TE FAKA TOKA OTE FEHUI AE NEE LAGAI
9, 10. Kotea ae e ha mai ai ite u faiga ate hahai moo pulei pe o natou ite ateaina mai te Atua?
9 Kotea ae e ha mai aki te alu ote temi o uhiga mote fehui ae nee lagai? Kote u tau e 6 000 ote Hisitolia e natou faka mooni mai koa kote hahai nee natou pulei pe ia natou o laka lelei, ite ateina mai te pule faka atua? Kote hahai nee natou faka tuu koa he u puleaga lelei ke fimalie ai te hahai fuli? Pee faka mooni mai ia ete Hisitolia te totonu ote u palalau aeni ate polofeta ko Selemia: “E mole ate tagata ae e haele te fili o tona ala.”—Selemia 10:23.
10 Ite u sekulo fulipe, nee ahiahi ete hahai te u faahiga puleaga kehekehe, kae mole he faahiga puleaga nee ina aumai he fimalie mooni. E ui anai e ihi, kua fai foki te faahiga mea kehekehe aki te poto mauhiga. Kae feala koa ke tou lau kohe poto mauhiga ia te kua fetogi ote kalolo mote nahau ete pulu tu fenua, pea mote kua mauli ote malamanei ite tuania ohe tahi tau ate malamanei katoa? E mahino ia, kote hahai e olo kite mahina, kae mole natou lavai te mauli ite tokalelei ite kele. Kotea tona aoga kia natou tanatou faka tuu he u fale mo ona mea lelei kehekehe, mo kapau kote u famili ae e nonofo ai e natou fekeaki? I tatatou sio kiteu toka kovi, te maumaui ote u gaue, te maumaui ote u mauli ote hahai, te meanoai ote lao, e mole feala ke tou lau kote tagata nee ina fai he mea e lelei. Kailoa ia! Kae, kote u fua foki aia e faka tupu ete u puleaga ae e natou lau e fealape tanatou mole faka aoga ia te Atua.—Taagalea 19:3.
11. Kotea ae e aoga kite tagata?
11 Kua mahino lelei kite hahai fuli. Kote u faiga ate tagata keina pulei tonupe ia ia o ateaina mai te Atua nee mole lava lelei ia. Nee natou faka to te malamanei katoa kite malaia. “E pule te tagata kite tagata o tupu ai tona malaia”, kote ui aia ate Tagata tanaki (8:9). Tou faka hagatonu, kote tagata e mole feala keina pulei pe ia ia o ateina mai te takitaki faka atua. Nee haga te Atua o ai kite tagata te fia kai pea mote fia inu, kae toe feia foki mote fia faka logo ki ana lao. Kapau e mole tokaga te tagata kiai, pea e feala ai ke kinakina mooni ai o hagepe ko hana mole tokaga kite kai pee kite inu.—Taagalea 3:5, 6.
HE KOE NEE TUKU KE FUALOA?
12. He koe nee tuku ete Atua ke fualoa te temi ia mua o tana motuhi te fehui aia?
12 “Kae, ui anai, he koe nee talitali te Atua ke osi tau e 6 000 tupu moo motuhi ote fehui aia? Nee mole koa feala ke foimo faka tokatoka kei tautonu?” Kanapaula nee fai ete Atua te mea aia ite temi mua, nee fealape ke tukuga kovii o ui nee mole ina tuku mai kite hahai ke natou ahiahi mua te pule. Koia, kote hahai nee mau noa tonatou temi ke natou faufau ai he u faahiga puleaga e feala keina faka katoa te u mea e aoga ki ana hahai, pea mo fai te u mea faka poto lalahi e feala ke lava ai te mea fulipe ate hahai fuli. Nee natou ahiahi te u faahiga puleaga kehekehe pea ko onatou u poto ite faahi ote u mea faka poto lalahi nee mauhiga aupito. Kua natou lavai te faka aoga ote atome pea kua natou olo kite mahina. Kae kite atu mea fuli aia nee feala ai koa he faufau ohe faahiga mea foou ke mauli fiafia ai te hahai?
13. a) Logope te mauhiga ote poto ote hahai, kotea te agaaga ia ote temi nei? b) Kotea ae e ha mai ai?
13 Nee kua tou sio koa kihe tuuga mamahi i mua atu ke hage kote temi nei? Kote fakapo, te uli ote kele, te u tau, te u loto fale e mavetevete kua asili kovi age o feala ai ke lau ete kau poto lalahi kote tagata e fealape ke puli ite kele ihe temi. Io, ite kua hili o tau e 6 000 ote faifaitaliha pea mote kua logo pe ote kua maoluga aupito ote u poto lahi kua mau, kote malamanei e amanaki nei keina maumaui tonupe ia ia. E ha lelei mai ia, kote hahai e mole natou lavai te pulei o natou o ateina mai te Atua! E feala koa ke tou tukuga kovii te Atua o ui nee mole ina tuku mai he temi ke feauga moo faka gata te fifili? Kailoa.
14. He koe e faka loto malohii tatou ke tou vakai te tahi fehui mauhiga tafito ae nee lagai e Satana?
14 E mahino lelei ia, nee tonu osi te haga ate Atua o tuku kite hahai ae e pulei e Satana ke natou faka nofo te kovi ite kele talu mai fualoa. I tana agatuu, nee haga Satana o lagai te tahi fehui pea ko tona faka toka e tonu ke toe iai mo hona temi. Kote vakai ote fehui aia e mau ai anai he tahi malama foou o uhiga mote faka gafua ote kovi ete Atua. E tonu ke koutou tokaga lelei kiai, koteuhi hee kote mea ia o uhiga mo koutou taki toko tahi.
[Paki ʼo te pasina 100]
E faka gafua anai ehe fae ke tali e tana tamasii he tafa mamahi. E feia mote Atua e iai foki te u tupuaga tafito o tana tuku te hahai ke mamahi faka temi pe
[Paki ʼo te pasina 101]
I tana kai kite fuai akau ae nee tapu, ko Atama mo Eva nee na mavae mai leva mai te pule ate Atua. Nee na fili tonu pe leva kia naua te mea ae e lelei pee kovi
[Paki ʼo te pasina 103]
Kote tagata e ia ia te fia kai mote fia inu, pea toe feia foki mote fia takitaki o ia ete Atua