Kapite 133

Neʼe Fakaʼosi e Sesu Te Gāue ʼAē Neʼe Tuku Age e Te ʼAtua Ki Ai

ʼI LAHI leva ʼo te ʼu tupuʼaga ke tou fiafia ai mokā pulihi anai e te Hau ko Sesu Kilisito ia Satana pea mo tona malamanei heʼe faitotonu! Ko te ʼAfio tokalelei ʼaē ia taʼu e afe ʼa Sesu kua kamata leva.

ʼAki te takitaki ʼa Sesu pea mo tana ʼu hau ʼaē ʼe fakatahi mo ia, ko te kau maʼuʼuli ʼo Halamaketone ʼe nātou fakamaʼa anai te kele ʼi te ʼu maumau ʼo te tau faitotonu. Pea ʼi te lolotoga ʼo he temi ka faka tuʼakoi anai, ʼe mahino ia ko te kau maʼuʼuli ʼo Halamaketone ʼi te kele ʼe nātou fakatupu anai hanatou ʼu fānau pea ʼe kau anai mo te ʼu fānau ʼaia ki te gāue fakatalakitupua ʼaē ko te fakaliliu ʼo te kele ko he ʼōloto taulekaleka.

ʼAki te temi, ʼe fakatuʼuake anai e Sesu mai te ʼu falemaka te hahaʼi ʼe mole feala honatou lau ke nātou maʼu mo nātou te ʼu lelei ʼo te palatiso matalelei ʼaia. ʼE ina fai anai te faʼahi ʼaia moʼo fakahoko ʼo tana fakapapau ʼaenī: “Heʼe haʼu te hola, ʼaē ʼe ko nātou fuli ʼe ʼi te ʼu loto falemaka fakamanatu ʼe nātou logo anai ki tona leʼo pea ʼe nātou hū mai anai ki tuʼa.”

Ia nātou fuli ʼaia ʼe fakatuʼuake, ʼe kau ai anai mo te tagata kaihaʼa ʼaē neʼe mate ʼi ʼona tafa ʼi te pou fakamamahi. Koutou manatuʼi te fakapapau ʼaē neʼe fai age e Sesu kia ia: “ ʼE ʼau tala moʼoni atu kia te koe ʼi te ʼaho nei: ʼE ke ʼi te Palatiso anai mo ʼau.” Ko te tagata ʼaia ʼe mole ʼave anai ki selo ke hau ia tafa ʼo Sesu; pea ʼe mole toe liliu anai ia Sesu ko he tagata ke maʼuli ʼi te palatiso ʼi te kele mo te tagata ʼaia. Kae, ko te faka ʼuhiga ʼo te nofo ʼa Sesu mo ia, ko tana haga anai ʼo fakatuʼuake ia ia ke maʼuli ʼi te Palatiso pea mo tana tokaga anai ke ina maʼu katoa te ʼu meʼa ʼaē ʼe ʼaoga ki ai, tatau pe ʼi te faʼahi fakasino mo te faʼahi fakalaumālie, ohage ko tona hā mai ʼi te paki ʼo te pasina ʼe hoa mai.

Koutou fakakaukauʼi muʼa! ʼI te tokaga manavaʼofa ʼa Sesu, ko te famili katoa ʼi te kele — ʼaē ko te kau maʼuʼuli ʼo Halamaketone, tanatou ʼu fānau pea mo te ʼu lauʼi miliale hahaʼi ʼaē ka fakatuʼuake ʼaē ka nātou fakalogo anai kia te ia — ʼio, ko nātou fuli ʼaia ʼe nātou tuputupu anai ʼo aʼu ki te maʼuli haohaoa. ʼAki tona ʼAlo ʼaliki ko Sesu Kilisito, ʼe nofo anai ia Sehova mo te malamanei ʼi tona faka ʼuhiga fakalaumālie. “Pea, ohage ko tona tala e te leʼo ʼe haʼu mai te ʼafioʼaga ʼaē neʼe logo kiai Soane, ʼe ina holoholoʼi anai te ʼu loʼimata fuli pe ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he tagilāulau, he mamahi.” ʼI te kele, ʼe mole he tahi anai ʼe toe mamahi peʼe toe mahaki.

ʼI te fakaʼosi anai ʼo te Hau ʼa Sesu ia taʼu e afe, ʼe toe tatau anai te agaaga ʼo te maʼuli ʼi te kele ohage ko te temi ʼaē neʼe ʼui age ai e te ʼAtua ki te ʼuluaki taumatuʼa ia Atama mo Eva ke nā fanaunau pea ke nā fakafonu te kele. Ko te kele ʼe fonu anai ko te ʼu hahaʼi faitotonu pea mo haohaoa. ʼE hoko anai te meʼa ʼaia, koteʼuhi heʼe fakaʼaoga anai te ʼu lelei ʼo te sakilifisio ʼa Sesu ki te hahaʼi fuli. Ko te mate ʼaē neʼe tupu ʼuhi ko te agahala ʼa Atama kua ʼosi puli anai ia.

ʼE fakahoko anai e Sesu te ʼu meʼa fuli ʼaē neʼe loto te ʼAtua ke ina fai. Koia, ʼi te ʼosi ʼo tana Hau ʼaē ia taʼu e afe, ʼe ina tuku leva anai te Puleʼaga ki tana Tāmai pea mo ina ʼaumai kia te ia te famili fakatagata katoa kua haohaoa. Pea ʼe toe tuku age anai e te ʼAtua ia Satana pea mo tana kau temonio mai te vanu, ʼaē ko te mole kei fai ʼo he meʼa ʼo tatau mo te mate. Koteā tona tupuʼaga?

ʼI te fakaʼosi ʼo te ʼu taʼu e afe, e tokolahi ia nātou ʼaē ʼe maʼuʼuli anai ʼi te Palatiso ʼi te kele neʼe ko te hahaʼi neʼe fakatuʼuake ka ko tanatou tui neʼe mole heʼeki ʼahiʼahiʼi. ʼI muʼa ʼo tanatou mamate, neʼe mole nātou ʼiloʼi te ʼu fakapapau fakaʼatua, koia neʼe mole heʼeki feala ai ke nātou fakahā tanatou tui ki te ʼu fakapapau ʼaia. Pea ʼi tonatou fakatuʼuake pea mo tanatou ako ʼo ʼiloʼi te ʼu moʼoni faka tohi-tapu, neʼe faigafua ia kia nātou ʼi te Palatiso tanatou tauhi ki te ʼAtua he neʼe mole nātou felāveʼi mo he ʼu fakafeagai kia nātou. Kae kapau ʼe feala ke ʼahiʼahiʼi ia nātou e Satana ke ʼaua naʼa nātou kaugana ki te ʼAtua, ʼe nātou nonofo agatonu anai koa ʼi te ʼahiʼahiʼi ʼaia ʼo nātou? ʼE ko te tali la ki te fehuʼi ʼaia ʼaē ʼe toe tuku age ai anai ia Satana.

Ko te fakahā ʼaē neʼe tuku age kia Soane ʼe hā mai ai ʼi te hili ʼo te Hau ʼa Sesu ʼaē ia taʼu e afe, ʼe lavaʼi anai e Satana te fakahēhēʼi ʼo te tokolahi mai te tauhi ʼaē ki te ʼAtua. Kae, ʼi te hili anai ʼo te ʼahiʼahi fakaʼosi ʼaia, ko Satana, mo tana kau temonio pea mo nātou fuli ʼaia neʼe ina lavaʼi tonatou kākāʼi ʼe fakamole anai ia nātou ʼo talu ai. Kae, ko nātou ʼaē neʼe nātou lavaʼi ʼo nonofo agatonu ʼi te ʼahiʼahi ʼaia, te kau maʼuʼuli agatonu, ʼe nātou maʼuʼuli anai ke nātou maʼu ʼo heʼegata te ʼu tapuakina ʼaē ʼe foaki age e tanatou Tāmai ʼe ʼi selo.

ʼE ʼiloga lelei mai, neʼe gāue ia Sesu pea ʼe toe hoko atu pe anai tana gāue ʼi te tuʼulaga tāfito ʼo te fakahoko ʼo te fakatuʼutuʼu faka kolōlia ʼa te ʼAtua. ʼI ʼapogipogi fakatalakitupua leva ʼaē ʼe foaki mai kia tatou ʼuhi ko te ʼu meʼa fuli ʼaē ʼe ina fakahoko ʼi tona ʼuhiga Hau ʼi selo ʼaē neʼe fakanofo e te ʼAtua! Kae mole galo te ʼu meʼa fuli ʼaē neʼe ina fai ʼi te temi ʼaē neʼe tagata ai.

Neʼe haʼu ia Sesu ki te kele ʼi tona loto tokotahi pea, ʼaki tana ʼu akonaki, neʼe ina fakahā mai kia tatou tana Tāmai. Pea tahi ʼaē meʼa, neʼe ina fakatātā mai te ʼu kalitate maʼuhiga ʼaupito ʼo te ʼAtua. Koia ʼe lave loloto ʼaupito kia tatou mokā tou fakakaukau atu ki tana kātaki fakaofoofo, tana aga fakatagata, tona poto ʼaē ʼe mole hona fakatatau, tona poto ʼaē ʼi te akonaki ki te hahaʼi, tona lotomālohi, tona ʼofa mamahi pea mo tana ʼiloʼi te agaaga ʼo te hahaʼi ʼaē neʼe ina fakahā ʼi tana nofo ʼi te kele. ʼE mahino papau ia, ʼe feala pe ke fonu totatou ʼu loto ʼi te loto fakafetaʼi kia te ia mokā tou manatu atu ki te lahi ʼo te mamahi ʼaē neʼe ina tali moʼo foaki ʼo te totogi pe ʼaē ʼe tou maʼu ai te maʼuli.

ʼE mahino papau ia, ʼe ko he tagata ʼe makehe ʼosi age ia ʼi te tagata fuli pe ʼaē neʼe tou maʼu ʼi tatatou ako te maʼuli ʼo Sesu! Ko tona lahi ʼe ʼiloga lelei ia pea ʼe mole feala he fakafisi ki ai. Koia ʼe tupu ai ia tatou hatatou toe fia fai mo tatou te ʼu palalau ʼa te kovana loma ko Posio Pilato: “Koʼeni te tagata!” ʼIo, ia “Te tagata”, te tagata ʼaē ʼe lahi tokotahi ʼo te ʼu temi fuli!

Kapau ʼe tou tali te maʼuhiga ʼo tana sakilifisio faitotogi, pea ʼe feala ke faka ʼāteaina tatou mai te kavega mamafa ʼaē ko te agahala pea mo te mate ʼaē neʼe maʼu mai ia Atama, pea ko Sesu ʼe feala ke liliu ko tatatou “Tāmai heʼegata”. Ko nātou fuli ʼaē ʼe nātou holi ke nātou maʼu te maʼuli heʼegata, ʼe mole tonu foki ke nātou ʼiloʼi pe te ʼAtua, kae tonu foki ke nātou toe ʼiloʼi mo tona ʼAlo, ia Sesu Kilisito. ʼOfa pe ke tokoni te ako pea mo te lau ʼo te tohi ʼaenī kia koutou ke koutou maʼu ai te mālama ʼaē ʼe maʼuhiga tāfito ki te maʼuli! 1 Soane 2:17; 1:7; Soane 5:28, 29; 3:16; 17:3; 19:5; Luka 23:43; Senesi 1:28; 1 Kolonito 15:24-28; Fakahā 20:1-3, 6-10; 21:3, 4; Isaia 9:6.

▪ Koteā te pilivilesio maʼuhiga ʼaupito ʼaē ka maʼu anai e te kau maʼuʼuli ʼo Halamaketone pea mo tanatou ʼu fānau?

▪ Ko ai ʼaē ka nātou toe fakaʼaoga anai mo nātou ia te Palatiso ʼo fakatahi mo te kau maʼuʼuli ʼo Halamaketone pea mo tanatou ʼu fānau, pea ʼe faka ʼuhiga feafeaʼi te ʼui ʼaē ʼe nofo anai ia Sesu mo nātou?

▪ Koteā anai te agaaga ʼo te maʼuli ʼi te kele ʼi te hili ʼo taʼu ʼaē e afe, pea koteā anai te meʼa ka fai e Sesu ʼi te ʼosi ʼaia ʼo taʼu e afe?

▪ He koʼe ʼe toe tuku age anai ia Satana mai te vanu, pea koteā anai te meʼa ka hoko kia ia pea mo nātou ʼaē ka muli anai ia ia?

▪ ʼE feala feafeaʼi te liliu ʼa Sesu ko tatatou “Tāmai heʼegata”?