“Te Mālohi ʼAē ʼe Laka Age ʼi Te Mālohi Mahani”

ʼE FEAFEAʼI koa he faʼa kataki ʼa he kilisitiano te mamahi? Ia ʼaho nei, ko te kau kilisitiano ʼi te kele katoa ʼe natou tau mo te masisiva, mo te tahi mavete ʼo te famili, mo te hahaʼi ʼaē ʼe kua heʼia, mo te mahahaki, mo te ʼu tau, pea mo te fakataga. ʼE feala koa ke fakaʼamu ʼe natou ʼaē ʼe nofo agatonu logope te ʼu mea fuli ʼaia? Neʼe ʼui e te ʼapositolo ko Paulo ʼe natou feala ki ai. Neʼe ina tohi fēnei: “ ʼE ʼau maʼu te mālohi ki te meʼa fuli mai ia ia ʼaē ʼe ina foaki mai te mālohi”. — Filipe 4:13.

Ko te hisitolia neʼe ina fakahā ko te mālohi ʼo Sehova ʼe feʼauga moʼoni ki te ʼu meʼa fuli. Ohage la, lolotoga ʼo te temi pule ʼo Itilele ʼi Siamani, ko te kau Fakamoʼoni ʼa Sehova neʼe natou lainoa, ʼi te ʼu fakataga fakamamahi. Neʼe natou faʼa kataki koa? Ko te tohi Les Bibelforscher et le nazisme neʼe ina ʼui: “Māʼia pe la te ʼu ta, te ʼu gaohi koviʼi, pea mo te ʼu ʼave pilisoni natou ki te tahi ʼu kogā fenua, ko te ʼu meʼa fuli ʼaia ohage ko te ʼu fakalainoa ia muʼa ʼo te hahaʼi, te ʼu faka pilisoni pea mo te haʼi ʼonatou ʼi te ʼu lotoʼā fakamamahi, ko te kau Ako ʼo te Tohi-Tapu [kau Fakamoʼoni ʼa Sehova] neʼe mole natou tuku ia natou ‘ke toe akoʼi ki te ʼu meʼa faka politike’ ”. — Les Bibelforscher et le nazisme.

ʼI te ʼu lotoʼā fakamamahi, ko te kau Fakamoʼoni ʼa Sehova ʼe natou feʼiloʼiʼaki natou ʼaki te ʼu kiʼi moʼi kie tapa tolu lanu huʼa lotuma ʼi tonatou ʼu nimaʼi kofu pea neʼe natou liliu ko te ʼu tali mamahi makehe. Neʼe lotovaivai koa ia natou ʼi te fahaʼi ʼaia? Ko te tagata sivi ʼatamai ʼo te tagata ko Bruno Bettelheim neʼe ina ʼui ʼo ʼuhiga mo natou “neʼe natou fakahā ʼe natou kehe age natou ʼi tanatou ʼu aga pea mo tanatou ʼu manatu ʼi te ʼu hahaʼi ʼaē, kae neʼe hage ia neʼe ʼoʼofaki natou ʼi te koga meʼa fakamamahi ʼaē neʼe to ai te kaugā malie.”

ʼE moʼoni, ʼe natou ‘mālohi ki te ʼu meʼa fuli’. He koʼe ʼe feiā? He neʼe natou falala kia Sehova. Neʼe ʼui ʼe Paulo: “Kae ko te koloa ʼaia, ʼe tou maʼu ʼi te ʼu ipu kele, koteʼuhi ko te mālohi ʼaē ʼe laka age ʼi te mālohi māhani ʼe ko te mālohi ia ʼo te ʼAtua kae mole ko te mālohi ʼaē ʼe haʼu mai ia tatou” (2 Kolonito 4:7). Kapau ʼe koutou tau mo he ʼu ʼaluʼaga mamahi, koutou falala kia Sehova ʼe ina tokoniʼi koutou. Fakaloto mālohiʼi ʼaki te mālohi ʼaē ʼe laka age ʼi te mālohi māhani ʼaē ʼe ina foaki mai, ʼe koutou faʼa kataki ānai. — Luka 11:13.

ʼE Koutou Loto Koa Ki He ʼAʼahi?

ʼI te malamanei ʼaē ʼe maveuveu, ʼe feala ha kotou fiafia ʼaki he ʼiloʼi lelei ʼo te Tohi-Tapu ʼo te ʼAtua, tona Puleʼaga, pea mo tana fakatuʼutuʼu neʼe ina fai ki te malamanei. Kapau ʼe koutou fia ʼiloʼi tona tahi ʼu naunau peʼe koutou loto ki he tahi moʼo taki he ako Tohi-Tapu mo koutou, faitohi ki te Sosiete “Les Témoins de Jéhovah”, B.P. 787, Nouméa, Niu-Kaletonia, peʼe vakaʼi te lisi ʼaē ʼi te pasina 2.