Tou Haʼele ʼAki Te Tui
1 Ko te lauʼi miliona hahaʼi ʼe nātou fakatafito tonatou maʼuli ki tonatou ʼu koloā fakamālama, ʼo nātou falala fakavale ki te mālohi fakakākā ʼo te ʼu koloā. (Mat. 13:22) ʼE ko he meʼa faigataʼa kia nātou mokā puli tonatou ʼu koloā peʼe kaihaʼa peʼe mole feala hana hāofaki nātou. ʼE fakaloto mālohiʼi tatou ke tou aga fakapotopoto, ʼo tou faiga ke tou maʼu he ʼu koloā fakalaumālie. (Mat. 6:19, 20) Ko tona faka ʼuhiga ke tou “haʼele ʼaki te tui.”—2 Ko. 5:7.
2 Ko te kupu “tui” ʼe fakaliliu mai te kupu faka Keleka ʼe faka ʼuhiga ki te falala, pea mo te mole mahalohalo. Ko te haʼele ʼaki te tui ko tona faka ʼuhiga, ko te tauʼi ʼo te ʼu ʼaluʼaga faigataʼa ʼaki te falala ʼaē ki te ʼAtua, te falala ki tona fealagia ʼaē ke ina takitaki tatou, pea mo te falala ki tana lotolelei ʼaē ke ina foaki mai te ʼu meʼa ʼaē ʼe ʼaoga kia tatou. Neʼe tuku mai e Sesu te faʼifaʼitaki haohaoa; neʼe tokaga tāfito ia ki te ʼu meʼa ʼaē neʼe maʼuhiga moʼoni. (Hep. 12:2) ʼO toe feiā aipe, ʼe tonu ke tou taupau maʼu totatou loto ke haga tokaga ki te ʼu meʼa ʼaē ʼe mole hā, ki te ʼu meʼa fakalaumālie. (2 Ko. 4:18) ʼE tonu ke tou manatuʼi ko te mālama ʼaenī, ʼe ko he mālama faka temi pe ia, pea ke mahino kia tatou ko meʼa fuli ʼaē ʼe ʼaoga kia tatou ʼe foaki mai e Sehova.
3 Tahi ʼaē meʼa ʼe tonu ke tou ʼiloʼi papau ko Sehova ʼe ina taki tatou ʼaki tana kautahi fakahāhā, ʼaē ʼe takitaki e “te tagata kaugana agatonu mo poto.” (Mat. 24:45-47) ʼE tou fakahā tatatou tui ʼi tatatou “fakalogo kia nātou ʼaē ʼe nātou takitaki” ʼi te kokelekasio. (Hep. 13:17) ʼE tou fakahā ʼe tou falala kia Sehova, mokā tou gāue ʼaki te agavaivai, ʼo faifaitahi mo te fakatuʼutuʼu faka teokalatike. (1 Pe. 5:6) ʼE tonu ke uga tatou ke tou lagolago ʼaki totatou loto katoa ki te gāue ʼaē ʼe tonu ke fakahoko e tatatou kautahi. Ko te faʼahi ʼaia ʼe ina fakaōvi anai tatou ki ʼotatou ʼu tēhina ʼi te noʼo ʼo te ʼofa pea mo te logo tahi.—1 Ko. 1:10.
4 E Feafeaʼi Te Fakamālohiʼi ʼo Te Tui: ʼE tonu ke tou fakagāueʼi tuʼumaʼu tatatou tui. ʼE tonu ke tou faiga mālohi ke tou fakatuputupu tatatou tui. Ko te ako tuʼumaʼu ʼo te Tohi-Tapu, te faikole, pea mo te kau ki te ʼu fono, ʼe tokoni anai kia tatou ke tou fakamālohiʼi tatatou tui, pea ʼaki te tokoni ʼa Sehova, ʼe feala anai ke ina tauʼi te ʼu ʼahiʼahi. (Ef. 6:16) Neʼe koutou fakatuʼutuʼu koa he polokalama ke koutou lau te Tohi-Tapu ʼi te ʼaho fuli pea mo koutou teuteuʼi te ʼu fono? ʼE koutou tautau metitasioʼi koa te ʼu meʼa ʼaē ʼe koutou akoʼi, pea mo koutou faikole kia Sehova? ʼE ko hakotou aga māhani koa te kau ki te ʼu fono fuli pea mo hakotou fai he ʼu tali mo kapau ʼe fealagia te faʼahi ʼaia?—Hep. 10:23-25.
5 Ko te tui mālohi ʼe fakamoʼoni ʼaki te ʼu gāue ʼaē ʼe lelei. (Sake 2:26) Ko te faʼahi lelei ke tou fai moʼo fakahā tatatou tui, ʼe ko te fakahā ʼo tatatou ʼamanaki ki te hahaʼi. ʼE koutou kumi koa he ʼu faigamālie moʼo fakahā ʼo te logo lelei? ʼE feala koa ke koutou fai he ʼu fetogi ʼi takotou ʼu fakatuʼutuʼu, ke lahi age takotou kau ki te minisitelio? ʼE koutou maʼuliʼi koa te ʼu tokoni ʼaē ʼe foaki mai kia tatou moʼo hikihiki te lelei ʼo totatou minisitelio? ʼE koutou fai koa hakotou ʼu fakatuʼutuʼu fakalaumālie pea mo koutou faiga mālohi ke koutou fakahoko te ʼu fakatuʼutuʼu ʼaia?
6 Neʼe fakatokagaʼi tatou e Sesu ke ʼaua naʼa lahi fau tatatou tuʼania ki te ʼu meʼa ʼo te maʼuli, pea ke ʼaua naʼa faka nenefu tatatou sio fakalaumālie ʼi tatatou manako ki te ʼu meʼa fakamālama pea mo tatatou tokaga pe ʼaē kia tatou. (Luka 21:34-36) ʼE tonu ke tou tokakaga maʼu ki tatatou faʼahiga haʼele ke ʼaua naʼa higa tatatou tui. (Ef. 5:15; 1 Tim. 1:19) Ko tatou fuli ʼe tou ʼamanaki ʼi te fakaʼosi ke feala hatatou ʼui neʼe tou kau ʼi te ‘tau matalelei, kua ʼosi tatatou lele, pea neʼe tou taupau tatatou tui.’—2 Tim. 4:7.