Kapite 15

Ko Te Faʼufaʼu ʼo He Famili ʼe Ina Faka Maʼuhigaʼi Te ʼAtua

1-3. He koʼe ʼe mole lava fakatokatoka e ʼihi taumatuʼa te ʼu faigataʼaʼia ʼi te nofo ʼohoana pea mo te akoʼi ʼo te fānau, kae he koʼe ʼe feala ke tokoni te Tohi-Tapu ki te faʼahi ʼaia?

KAPAU ʼe koutou fakatuʼutuʼu ke koutou laga hokotou ʼapi, ko te meʼa ʼe koutou ʼuluaki fai ko te totogi ʼo te moʼi kele. ʼI takotou holi fakatomuʼa ʼaē kiai, ʼe feala hakotou fakakaukauʼi tokotou ʼapi foʼou. Kae koteā te meʼa ka hoko mo kapau ʼe mole ʼi ai hakotou ʼu meʼa gāue pea ʼe mole koutou poto ʼi te laga ʼo te ʼapi? ʼE feala ke fuanoa takotou ʼu faiga!

² Tokolahi te ʼu taumatuʼa ʼe nātou kamata tonatou ʼohoana ʼaki tanatou ʼaē holi ke nātou maʼu he famili fiafia, kae ʼe mole nātou maʼu te ʼu meʼa gāue peʼe ko te poto ʼaē ʼe ʼaoga moʼo faʼufaʼu ʼo he famili fiafia. ʼI te hili pe ʼo te fakatapu, pea kamata hā ai leva tanā ʼu aga. ʼI te ʼaho fuli ʼe hoko ai te ʼu kē pea mo te fuhu. Ka tupu mai he fānau, ʼe tokagaʼi e te tāmai pea mo te faʼe foʼou ʼaia ʼe mole nā popoto ʼi te fakahoko ʼo tonā maʼua ʼaē ʼi tona ʼuhiga mātuʼa, ohage pe ko tanā mole maʼu ia te poto ke nā maʼu ai te fiafia ʼi te nofo ʼohoana.

³ Kae, meʼa lelei pe la heʼe feala ke tokoni te Tohi-Tapu ki te ʼu taumatuʼa. Ko tana ʼu pelesepeto ʼe tatau ki he ʼu meʼa gāue ʼe ʼaoga kia koutou moʼo faʼufaʼu ʼo he famili fiafia. (Tāʼaga Lea 24:3) Tou vakaʼi peʼe feafeaʼi te fai ʼo te faʼahi ʼaia.

TE ʼU MEʼA ʼE ʼAOGA MOʼO FAʼUFAʼU ʼO HE NOFO ʼOHOANA FIAFIA

4. He koʼe ʼe mole ko he meʼa fakapunamaʼuli mokā hoko he ʼu faigataʼaʼia ʼi te nofo ʼohoana, pea ko te ʼu tokoni fea ʼaē ʼe foaki mai e te Tohi-Tapu?

⁴ Tatau aipe peʼe hage ʼe felogoi he taumatuʼa, kae ʼe nā kehekehe ʼi te meʼa ʼaē ʼi tonā loto, pea mo te ʼu meʼa neʼe nā fai ʼi tanā kei veliveli, pea ʼe nā ʼōmai mai te ʼu famili kehekehe. Koia, ʼe mole ko he meʼa fakapunamaʼuli mokā hoko kia nāua he ʼu faigataʼaʼia ʼi te hili ʼo tonā ʼohoana. ʼE feafeaʼi anai hana fakatokatoka te ʼu faʼahi ʼaia? Ka laga he fale e te kau tagata fai fale, ʼe nātou fakasiosioʼi muʼa te ʼu plans ʼo te ʼapi. ʼE tonu ke nātou mulimuli ki te ʼu plans ʼaia. ʼE tuku mai e te Tohi-Tapu te ʼu tokoni ʼa te ʼAtua moʼo faʼufaʼu ʼo he famili fiafia. Tou vakaʼi ʼi te temi nei he ʼu tokoni ʼi te ʼu tokoni ʼaia.

5. ʼE fakahā feafeaʼi mai e te Tohi-Tapu te maʼuhiga ʼo te agatonu ʼi te nofo ʼohoana?

⁵ Te agatonu. Neʼe ʼui fēnei e Sesu: “Ko te meʼa ʼaē neʼe fakatahiʼi e te ʼAtua ʼi te ʼakau toho e tahi, ke ʼaua naʼa veteki e te tagata.”a (Mateo 19:6) Neʼe tohi fēnei e te ʼapositolo ko Paulo: “Ke fakaʼapaʼapa te hahaʼi fuli ki te nofo ʼohoana pea ke ʼaua naʼa ʼulihi te moeʼaga faka taumatuʼa, heʼe fakamāuʼi anai e te ʼAtua te kau fai folonikasio pea mo te kau tono.” (Hepeleo 13:4) Koia la ʼaē, ʼe tonu ai ke ʼiloʼi e te hahaʼi ʼohoana ʼe fakamaʼua e Sehova ke nātou nonofo agatonu ki tonatou ʼohoana.—Senesi 39:7-9.

6. ʼE feafeaʼi anai te tokoni ʼa te agatonu ki te puipui ʼo te nofo ʼohoana?

⁶ Ko te agatonu ʼe ina faka fealagia te fakaʼapaʼapa pea mo te fīmālie ʼi te nofo ʼohoana. ʼE ʼiloʼi e te taumatuʼa agatonu, logope la he faigataʼaʼia ʼe feala ke hoko, ʼe nā fekātakiʼaki anai. (Tagata Tānaki 4:9-12) ʼE kehe ia mo nātou ʼaē ʼe mavete ʼi te ʼuluaki hoko pe ʼaē ʼo he kiʼi fihifihia! Ko te faʼahiga hahaʼi ʼaia ʼe nātou ʼui fakavilivili neʼe ‘mole lelei te fili ʼo tonatou hoa,’ ‘ ʼe mole kei nā femanakoʼaki,’ pea mo nātou ʼui ko te puleʼaki moʼo fakatokatoka ʼo te faigataʼaʼia ʼaia ʼe ko he toe ʼohoana mo he tahi kehe. Kae ko te faʼahi ʼaia ʼe mole ina faka fealagia ai ki te taumatuʼa ke nā tuputupu ʼo ʼuhiga mo te ʼu meʼa ʼaē ʼi tonā loto. Ko te meʼa ʼe hoko, ko te hahaʼi heʼe agatonu ʼaia ʼe feala pe ke nātou toe lagaʼi te ʼu faigataʼaʼia pe ʼaia ki tonatou ʼohoana foʼou. Kapau ʼe nofo he tahi ʼi he ʼapi matalelei pea ina tokagaʼi ʼe tutulu te ʼato, ʼe mahino ia ʼe faiga anai ke ina gaohi. ʼE mole mavae anai ia ʼo ʼalu ki he tahi ʼapi. ʼO toe feiā aipe, ʼe mole ko te fetogi ʼohoana ʼaē ʼe feala ai ke fakatokatoka te ʼu faigataʼaʼia ʼi te nofo ʼohoana. Ka hoko mai he ʼu faigataʼaʼia, ʼaua naʼa koutou faiga ke koutou mavete mo tokotou ʼohoana, kae ke koutou gāue mālohi moʼo puipui ʼo tokotou nofo ʼohoana. Ko ʼaē ʼe ina fakahā te agatonu ʼe ina tokagaʼi te nofo ʼohoana ohage he meʼa maʼuhiga ʼe ʼaoga ke puipui, ke taupau, pea mo fakapelepeleʼi.

7. He koʼe ʼe tautau faigataʼa te felogoi ʼa te hahaʼi ʼohoana, kae ʼe lava tokoni feafeaʼi te kofuʼi ʼo “te ʼuhigaʼi tagata foʼou” ki te faʼahi ʼaia?

⁷ Te felogoi. “ ʼE mole lava he ʼu fakatuʼutuʼu mokā ʼe mole ʼi ai he ʼu felogoi,” ko te ʼui ʼaia ʼa te tāʼaga lea ʼa te Tohi-Tapu. (Tāʼaga Lea 15:22) Kae, ko te felogoi ʼe faigataʼa ki ʼihi ʼu taumatuʼa. Koteā tona tupuʼaga? Koteʼuhi ʼe kehekehe te felogoi ʼa te hahaʼi. Ko te faʼahi ʼaia ʼe tupu ai te femahino kehekeheʼaki pea mo te lotomamahi. Ko te faʼahiga ako ʼaē neʼe fai age kia nātou ʼi tanatou kei veliveli, e lagi ko he tahi tupuʼaga ʼaia ʼo te mole haʼele lelei ʼaē ʼo te felogoi. Ohage la, e lagi ko ʼihi neʼe sisio ki tanatou ʼu mātuʼa ʼe kē tuʼumaʼu ʼi te temi ʼaē kei nātou liliki ai. ʼI te temi nei ʼaē kua nātou lalahi ai pea kua nātou ʼohoana, ʼe mole lagi nātou ʼiloʼi peʼe feafeaʼi he palalau ki tonatou ʼohoana ʼaki te agalelei pea mo te ʼofa. Kae, ʼe mole ʼaoga ke liliu tokotou ʼapi ʼo kovi ʼosi ohage ‘he ʼapi ʼe fonu ai te kē.’ (Tāʼaga Lea 17:1) ʼE fakamālohiʼi mai e te Tohi-Tapu ke tou kofuʼi “te ʼuhigaʼi tagata foʼou,” pea ʼe mole ina fakagafua te lotokovi, te kalaga, pea mo te leakovi.—Efesi 4:22-24, 31.

8. Koteā te meʼa ʼe feala ke koutou fai mokā ʼe mole koutou lototahi mo tokotou ʼohoana?

⁸ Koteā te meʼa ʼe feala ke koutou fai mokā hoko mai he ʼu faigataʼaʼia? Kapau kua puli ia koutou te loto lolomi, ʼe lelei anai hakotou muliʼi te tokoni ia Tāʼaga Lea 17:14: “ ʼI muʼa ʼo te hoko ʼo te kē, mavae mai ai.” ʼIo, ʼe koutou toe hoko atu anai te fai palalau ʼi he tahi lakaga, mokā kua fīmālie tokotou loto. (Tagata Tānaki 3:1, 7) Logope la he faʼahiga meʼa ʼe feala ke hoko, koutou faiga “ke [koutou] vave ʼi te fagono, ke [koutou] tuai ʼi te palalau, pea mo tuai ʼi te ʼita.” (Sake 1:19) ʼE tonu ke koutou fakatuʼutuʼu ke fakatokatoka te meʼa ʼaia, kae ʼe mole koutou faiga anai ke tuʼu takotou tonu. (Senesi 13:8, 9) Koutou fai he ʼu faʼahiga palalau ʼe ina fakatokatoka anai ia koulua. (Tāʼaga Lea 12:18; 15:1, 4; 29:11) Tahi ʼaē meʼa, ʼaua naʼa koutou taupau takotou ʼita, kae ke koutou kumi tokoni ʼaki hakotou felogoi mo te ʼAtua ʼo faikole fakatahi ʼaki he loto agavaivai.—Efesi 4:26, 27; 6:18.

9. He koʼe ʼe feala ke ʼui ko te felogoi ʼe kamata ʼi te loto?

⁹ ʼE ʼui fēnei e te tāʼaga lea faka Tohi-Tapu: “Ko te loto ʼo te tagata poto ʼe ina akoʼi tona gutu ke fakasiosio loloto, pea ki tona ʼu laugutu ʼe ina toe tuku kiai te mālohi ʼo te fakalotoʼi.” (Tāʼaga Lea 16:23) ʼE moʼoni, ko te kalavi ʼo te felogoi lelei ʼe ʼi te loto ʼo te tagata, kae ʼe mole ʼi tona gutu. E feafeaʼi takotou aga ki tokotou ʼohoana? ʼE fakaloto mālohiʼi e te Tohi-Tapu te kau Kilisitiano ke nātou “femahinoʼaki.” (1 Petelo 3:8) ʼE feala koa hakotou fai te faʼahi ʼaia mokā ʼe felāveʼi tokotou ʼohoana mo te loto tuʼania? Kapau ʼe koutou fai feiā, pea ʼe koutou mahino anai ki te faʼahiga palalau ʼaē ʼe tonu ke koutou fai.—Isaia 50:4.

10, 11. ʼE lava feafeaʼi ki he tagata ʼohoana hana muliʼi te tokoni ʼaē ia 1 Petelo 3:7?

¹⁰ Te faka maʼuhiga pea mo te fakaʼapaʼapa. ʼE fakaafe te ʼu tagata ʼohoana Kilisitiano, ke nātou nonofo mo tonatou ʼohoana “ ʼo mulimuli ki te ʼatamai mālama, ʼo tuku kia nātou te fakaʼapaʼapa ohage ko he ipu ʼe vaivai age, te ipu fakafafine.” (1 Petelo 3:7) Moʼo faka maʼuhiga ʼo te ʼu fafine ʼohoana, ʼe ʼaoga ke ʼiloʼi e tonatou ʼohoana tonatou maʼuhiga. Ko he tagata ʼe nofo mo tona ʼohoana “ ʼo mulimuli ki te ʼatamai mālama” ʼe ina tokagaʼi tāfito te ʼu meʼa ʼe ʼi tona loto, tona ʼu kalitate, tona ʼatamai, pea mo tona matagafua. ʼE tonu foki ke ina akoʼi pe koteā te manatu ʼa Sehova ʼo ʼuhiga mo te hahaʼi fafine pea mo tana manatu ʼo ʼuhiga mo te faʼahiga aga ʼaē ʼe tonu ke ina fai kia ia.

¹¹ ʼI tokotou ʼapi ʼe ʼi ai te ipu ʼe ʼaoga ʼaupito pea mo fakaʼeteʼete. ʼE mole lahi anai koa takotou tokakaga kiai? ʼIo, ko te kupu ʼaē ko he “ipu ʼe vaivai age” ʼaē neʼe fakaʼaogaʼi e Petelo ʼe tatau tona faka ʼuhiga, koia ʼe tonu ai ke ina uga he tagata ʼohoana Kilisitiano ke ina fakahā he tokaga lelei ki tona ʼohoana ʼofaina.

12. ʼE lava fakahā feafeaʼi e he fafine ʼohoana tana fakaʼapaʼapa loloto ki tona ʼohoana?

¹² Kae koteā te tokoni ʼe foaki e te Tohi-Tapu ki te fafine ʼohoana? Neʼe tohi fēnei e Paulo: “Ko te fafine ʼe tonu ke ina maʼu he fakaʼapaʼapa loloto ki tona ʼohoana.” (Efesi 5:33) Ohage pe ko te fafine ʼaē ʼe ʼaoga ke faka maʼuhigaʼi pea mo ʼofa ki ai tona ʼohoana, ʼe toe ʼaoga foki mo te tagata ke ina logoʼi te fakaʼapaʼapa ʼo tona ʼohoana. Ko he fafine ʼe aga fakaʼapaʼapa ʼe mole ina fakamatala anai te ʼu hala ʼo tona ʼohoana, tatau aipe pe ko he Kilisitiano peʼe kailoa. ʼE mole tonu anai ke ina meʼa noaʼi tona ʼohoana, ʼo ina fatufatuʼi pea mo fakamālaloʼi ia ia mokā nā toko lua peʼe ʼi muʼa ʼo te hahaʼi.—1 Timoteo 3:11; 5:13.

13. ʼE lava feafeaʼi he fakahā ʼo te ʼu manatu ʼi te tokalelei?

¹³ Kae ʼe mole faka ʼuhiga leva ʼe mole feala ke fakahā e te fafine tana ʼu manatu. Kapau ʼe ʼi ai he meʼa ʼe hoha ki ai, ʼe feala ke ina fakahā tana manatu ʼaki he aga fakaʼapaʼapa. (Senesi 21:9-12) Ko te fakahā ʼo he manatu ki tona ʼohoana ʼe feala ke fakatatau ki he lī ʼo he foʼi fiti kia ia. ʼE feala ke ina lī māmālie te foʼi fiti ʼo faigafua ai tona hapo e tona ʼohoana, peʼe feala ke ina lī fakamālohi ki ai ʼo tupu ai tona mamahi. ʼE lelei age hanā fepalalauʼaki, ʼaki te agaʼofa pea mo te agamālū ʼi hanā fetukugakoviʼiʼaki!—Mateo 7:12; Kolose 4:6; 1 Petelo 3:3, 4.

14. Koteā te meʼa ʼe tonu ke koutou fai mo kapau ʼe mole loko fia fai tokotou ʼohoana ki te ʼu fakatuʼutuʼu ʼa te Tohi-Tapu ʼo ʼuhiga mo te nofo ʼohoana?

¹⁴ Ohage ko te meʼa neʼe tou vakaʼi, ko te ʼu pelesepeto ʼo te Tohi-Tapu ʼe feala ke tokoni kia koutou ke feala ai hakotou faʼufaʼu he nofo ʼohoana fiafia. Kae ʼe feafeaʼi anai mo kapau ʼe mole faʼa fia logo tokotou ʼohoana ki te meʼa ʼaē ʼe talanoa kiai te Tohi-Tapu? ʼE koutou maʼu anai he ʼu fua lelei mo kapau ʼe koutou maʼuliʼi te ʼatamai mālama ʼo ʼuhiga mo te ʼAtua ʼi tokotou tuʼulaga. Neʼe tohi fēnei e Petelo: “[Ko] koutou fafine, koutou fakalogo ki ʼokotou ʼohoana totonu, koteʼuhi, kapau ʼe ʼi ai niʼihi ʼe mole fakalogo ki te folafola, ke nātou tafoki mai, ʼuhi ko te aga ʼo tonatou ʼu ʼohoana, ka heʼeki fai he palalau, he neʼe nātou sio mata ki takotou aga ʼaē ʼe maʼa ʼo fakatahi mo te fakaʼapaʼapa ʼe lahi ʼaupito.” (1 Petelo 3:1, 2) ʼE mahino ia, ko te tokoni ʼaenī ʼe toe ʼaoga pe foki anai ki he tagata ʼe mole fia fai tona ʼohoana ki te Tohi-Tapu. Tatau aipe pe koteā te aga ʼo tokotou ʼohoana, ke koutou tuku te ʼu pelesepeto ʼo te Tohi-Tapu ke nātou fakaliliu koutou ko he tagata peʼe ko he fafine ʼohoana ʼe lelei age. Ko te ʼatamai mālama ʼo ʼuhiga mo te ʼAtua ʼe toe feala foki ke ina fakaliliu koutou ko he tāmai peʼe ko he faʼe ʼe lelei age.

AKOʼI TE FĀNAU ʼO MULIMULI KI TE ʼATAMAI MĀLAMA ʼO ʼUHIGA MO TE ʼATUA

15. ʼI ʼihi temi, neʼe fakahoko feafeaʼi e te ʼu mātuʼa te faʼahiga ako ʼaē neʼe nātou fai ki tanatou fānau, kae e feafeaʼi te fetogi ʼo te faʼahi ʼaia?

¹⁵ Ko te maʼu ʼo he tutuʼu peʼe ko he hāmale ʼe mole fakaliliu aipe he tahi ko he tagata tufuga ʼakau ʼe poto lelei. ʼO toe feiā aipe, ko te maʼu fānau ʼe mole ina fakaliliu ai he tahi ko he tāmai peʼe ko he faʼe kua faiva ʼi te gaohi fānau. Peʼe nātou ʼiloʼi peʼe kailoa, ko te ʼu mātuʼa ʼe nātou tautau akoʼi tanatou fānau ʼaki te faʼahiga ako ʼaē neʼe fai age kia nātou e tanatou ʼu mātuʼa. Koia, ʼi ʼihi temi, kapau neʼe kovi te faʼahiga ako ʼaē neʼe fai ki te fānau, pea ʼe kovi anai te faʼahiga ako ʼaē ka fai e te fānau ʼaia ki te taʼi tupu ki muli age. ʼE ʼui fēnei e te tāʼaga lea ʼāfea ʼa te kau Hepeleo: “Ko te ʼu tāmai ʼe nātou kai te ʼu fuaʼi vite ʼaē ʼe kei mumui, kae ko te ʼu nifo ʼo te ʼu foha ʼaē ʼe maninia.” Kae, ʼe fakahā mai e te Tohi-Tapu ʼe mole tonu ke muliʼi e he tahi te faʼifaʼitaki ʼa tana ʼu mātuʼa. ʼE feala ke ina fili he tahi age ala, he ala ʼe mulimuli ki te ʼu fakatuʼutuʼu ʼa Sehova.—Esekiele 18:2, 14, 17.

16. He koʼe ʼe maʼuhiga ke koutou foaki te meʼa ʼaē ʼe ʼaoga ki tokotou famili, pea koteā te meʼa ʼaē ʼe kau kiai?

¹⁶ ʼE ʼamanaki ia Sehova ke foaki e te ʼu mātuʼa Kilisitiano he takitaki ʼe lelei ki tanatou fānau pea ke nātou tokakaga lelei kia nātou. Neʼe tohi e Paulo: “ ʼIo, kapau ʼe mole tokaga he tahi ki tona ʼu kāiga, kae tāfito ia nātou ʼo tona loto fale, ʼe kua fakafisi ia ki te tui pea ʼe kovi age ia ʼi he tagata ʼe mole tui.” (1 Timoteo 5:8) ʼE ko he ʼu palalau mālohi ʼaia! Ko te foaki ʼo te ʼu meʼa ʼaē ʼe ʼaoga ki takotou fānau ʼi te faʼahi fakasino, ʼi te faʼahi fakalaumālie, pea mo te ʼu meʼa ʼaē ʼe ʼaoga ki tonatou loto, ʼe ko he pilivilesio pea ʼe ko te maʼua ʼaia ʼo te hahaʼi ʼaē ʼe aga faka lotu. ʼE tuku mai e te Tohi-Tapu te ʼu pelesepeto ʼe feala ke tokoni ki te ʼu mātuʼa ke nātou faʼufaʼu he ʼaluʼaga fakafiafia maʼa tanatou fānau. Tou vakaʼi he ʼu manatu ʼi te ʼu pelesepeto ʼaia.

17. Koteā te meʼa ʼe ʼaoga ke koutou fai ke feala ai he tohi ʼo te lao ʼa te ʼAtua ʼi te loto ʼo takotou ʼu fānau?

¹⁷ Koutou tuku he faʼifaʼitaki ʼe lelei. Neʼe fakatotonuʼi fēnei ki te ʼu mātuʼa Iselaelite: “ ʼE tonu anai ke ke akoʼi [te ʼu folafola ʼa te ʼAtua] ki tou foha pea mo ke talanoa kiai mokā ke heka anai ʼi tou loto fale, mokā ke haʼele anai ʼi te ala, mokā ke takoto anai, pea mokā ke tuʼu ake anai.” Neʼe tonu ke akoʼi e te ʼu mātuʼa te ʼu pelesepeto ʼa te ʼAtua ki tanatou fānau. Kae ko te fakatotonu ʼaia ʼe kamata ʼaki te talanoa ʼaenī: “Ko te ʼu folafola ʼaenī ʼaē ʼe ʼau fakatotonu atu kia te koe ʼi te ʼaho nei, ʼe tonu anai ke nofo ʼi tou loto.” (Teutalonome 6:6, 7) ʼIo, ʼe mole feala anai ke foaki e te ʼu mātuʼa he meʼa ʼe mole nātou maʼu. Kapau ʼe koutou loto ke tohi te ʼu lao ʼa te ʼAtua ʼi te loto ʼo takotou ʼu fānau, pea ʼe tonu ke koutou ʼuluaki tohi muʼa ʼi ʼokotou loto.—Tāʼaga Lea 20:7; vakaʼi ia Luka 6:40.

18. ʼO ʼuhiga mo te fakahā ʼo te ʼofa, ko te faʼifaʼitaki lelei fea ʼaē neʼe tuku e Sehova ki te ʼu mātuʼa?

¹⁸ Koutou fakahā kia nātou tokotou ʼofa. ʼI te papitema ʼo Sesu, neʼe ʼui fēnei e Sehova: “Ko koe ko toku ʼAlo ʼofaina; kua ʼau fiafia ʼaupito ia te koe.” (Luka 3:22) Koia, neʼe fakamoʼoni ia Sehova ki tona ʼAlo, ʼo ina fakahā fakalelei ai tona fiafia ʼo ʼuhiga mo ia, pea neʼe ina fakahā ki ai Tona ʼofa. Ki muli age neʼe ʼui fēnei e Sesu ki tana Tāmai: “Neʼe ke ʼofa kia te ʼau ʼi muʼa ʼo te fakatupu ʼo te malamanei.” (Soane 17:24) ʼU mātuʼa aga faka lotu, ke koutou fakahā ki takotou fānau he ʼu palalau pea mo he ʼu aga ʼe fakahā ai tokotou ʼofa ʼaē kia nātou—pea ke koutou fai tuʼumaʼu te faʼahi ʼaia. Koutou manatuʼi tuʼumaʼu ko te “ ʼofa ʼe fakaloto mālohi.”—1 Kolonito 8:1.

19, 20. E feafeaʼi te fai fakalelei ʼo te akonakiʼi ʼo te fānau, pea koteā te fua lelei ʼe maʼu e te ʼu mātuʼa mai te faʼifaʼitaki ʼa Sehova?

¹⁹ Koutou akonakiʼi nātou. ʼE fakatokagaʼi mai e te Tohi-Tapu te maʼuhiga ʼo te akonakiʼi ʼaki te ʼofa. (Tāʼaga Lea 1:8) Ko te ʼu mātuʼa ʼaē ʼe mole nātou fai tonatou maʼua ʼaē ko te takitaki ʼo tanatou fānau ʼi te temi nei, ʼe nātou felāveʼi moʼoni anai mo he ʼu fua kovi ʼi te temi ka haʼu. Tahi ʼaē meʼa, ʼe toe fakatokagaʼi te ʼu mātuʼa ke ʼaua naʼa nātou aga fefeka fau. Neʼe tohi fēnei e Paulo, “ ʼU tāmai, ʼaua naʼa koutou fakatupu ʼita ki takotou fānau, naʼa feala ai hanatou lotovaivai.” (Kolose 3:21) ʼE mole tonu ke akonakiʼi fakavalevale e te ʼu mātuʼa tanatou fānau peʼe nātou fakamanatuʼi tuʼumaʼu age tanatou ʼu hala pea mo nātou fatufatuʼi tanatou ʼu faiga.

²⁰ Ko Sehova ʼAtua, tatatou Tāmai ʼe ʼi selo, ʼe ina tuku mai te faʼifaʼitaki ʼo ʼuhiga mo te akonakiʼi ʼo te fānau. Ko tana akonakiʼi ʼe mole fai fakavalevale. Neʼe ʼui e te ʼAtua ki tana hahaʼi, “ ʼE tonu anai ke ʼau tautea koe ʼi he fakafuafua ʼe totonu.” (Selemia 46:28) ʼE tonu ke faʼifaʼitaki te ʼu mātuʼa kia Sehova ʼi te faʼahi ʼaia. Ko te akonakiʼi ʼaē ʼe fai fakavalevale peʼe fakalaka ʼi te fakatuʼutuʼu tāfito ʼo te akonaki, ʼe fakatupu ai te ʼita.

21. ʼE lava feafeaʼi ki te ʼu mātuʼa hanatou ʼiloʼi peʼe lelei te faʼahiga akonaki ʼaē ʼe nātou fai ki tanatou fānau?

²¹ ʼE ʼiloʼi feafeaʼi anai e te ʼu mātuʼa peʼe lelei te akonakiʼi ʼo tanatou fānau? ʼE feala ke nātou fai te fehuʼi ʼaenī, ‘Koteā te ʼu fua ʼo te akonakiʼi ʼaē ʼe ʼau fai?’ ʼE tonu ke liliu te akonakiʼi ʼo te fānau ko he ako. ʼE tonu anai ke mahino takotou tamasiʼi ki te tupuʼaga ʼo tona akonakiʼi. ʼE tonu ke tokakaga te ʼu mātuʼa ki te ʼu ikuʼaga ʼo tanatou akonakiʼi ʼo tanatou fānau. ʼE moʼoni, ʼi te kamata ʼe tokolahi te fānau ʼe nātou ʼiʼita mokā ʼe akonakiʼi nātou. (Hepeleo 12:11) Kae ʼe mole tonu anai ke matataku te tamaliki peʼe ke nātou ʼui kua līaki nātou e tanatou ʼu mātuʼa, ʼo feala ai hanatou ʼui ʼe nātou agakovi talu tanatou tupu. ʼI muʼa ʼo te akonakiʼi ʼo tana hahaʼi, neʼe ʼui age e Sehova: “ ʼAua naʼa ke mataku, . . . heʼe ʼau nofo mo koe.” (Selemia 46:28) ʼIo, ʼe tonu ke koutou akonakiʼi takotou fānau ke mahino kia nātou ko tanatou ʼu mātuʼa ʼe ʼoʼofa pea mo tokoni kia nātou.

TOU MAʼU HE “POTO LELEI ʼI TE TAKITAKI”

22, 23. E feafeaʼi hakotou maʼu he poto lelei ʼi te takitaki moʼo faʼufaʼu ʼo he famili fiafia?

²² ʼE feala ke tou fakafetaʼi kia Sehova ʼi tana foaki mai te ʼu meʼa ʼe ʼaoga ke tou faʼufaʼu ai he famili fiafia. Kae ʼe mole feʼauga pe ʼi te maʼu ʼo te ʼu meʼa ʼaia. ʼE tonu ke tou fakaʼaogaʼi fakalelei. Ohage la, ko he tagata laga fale e lagi ʼe ina fakatuputupu he ʼu agamāhani ʼe mole lelei ʼo ʼuhiga mo te fakaʼaogaʼi ʼo tana ʼu meʼa gāue. Peʼe lagi mole lelei tana fakaʼaogaʼi tana ʼu meʼa gāue. Kapau ʼe ina fai feiā, pea ʼe mole fua lelei anai tana gāue. ʼO toe feiā aipe, e lagi ʼi te temi nei kua koutou tokagaʼi he ʼu aga ʼe mole lelei kua tali māmālie tokotou famili. Ko ʼihi ʼu agamāhani e lagi kua tauaka ia nātou pea ʼe faigataʼa tona fetogi. Kae, koutou mulimuli ki te tokoni ʼaenī ʼa te Tohi-Tapu: “Ko te tagata poto ʼe fagono anai pea ʼe ina fakatuputupu anai tana ako, pea ko te tagata ʼatamai ʼe ko ia ʼaē ʼe ina maʼu te poto lelei ʼi te takitaki.”—Tāʼaga Lea 1:5.

²³ ʼE feala hakotou maʼu te poto lelei ʼi te takitaki mo kapau ʼe koutou haga ako ke koutou maʼu ia te ʼatamai mālama ʼo ʼuhiga mo te ʼAtua. Koutou tokakaga ʼo maʼuliʼi te ʼu pelesepeto ʼa te Tohi-Tapu ʼo ʼuhiga mo te maʼuli faka famili, pea ke koutou fai he ʼu fetogi mo kapau ʼe ʼi ai he ʼu faʼahi ʼe ʼaoga ke koutou fetogi. Koutou tokagaʼi te kau Kilisitiano fakapotopoto ʼaē ʼe nātou tuku he faʼifaʼitaki lelei ʼo ʼuhiga mo te nofo ʼohoana pea mo te ʼuhiga mātuʼa. Koutou palalau mo nātou. Ia meʼa fuli, koutou fakahā kia Sehova ʼi te faikole tokotou ʼu faigataʼaʼia. (Pesalemo 55:22; Filipe 4:6, 7) ʼE feala hana tokoni atu kia koutou ke koutou maʼu he maʼuli faka famili fiafia ʼe faka maʼuhigaʼi ai ia ia.

[Nota ʼi te lalo pasina]

TE SIVI ʼO TOKOTOU ʼATAMAI MĀLAMA

ʼE lagolago feafeaʼi te nofo agatonu, te felogoi, te faka maʼuhiga, pea mo te fakaʼapaʼapa ki te fiafia ʼi te nofo ʼohoana?

Ko te ʼu faʼahi fea ʼaē ʼe feala ai ke fakahā e te ʼu mātuʼa tonatou ʼofa ki tanatou fānau?

Koteā te ʼu meʼa ʼe kau ki te fai ʼo he akonaki ʼe lelei?