ʼE Tonu Koa Ke Koutou Faifakalelei?

‘ ʼE MOLE heʼeki ʼau fai he faifakalelei,’ ko te tohi ʼaia ʼa George Bernard Shaw. ʼE feala ke ʼui e ʼihi ‘Ko te meʼa ʼaē kua fai, kua ʼosi fai ia.’

Lagi ʼe tou lotolotolua ʼi te fakahā ʼo hatatou hala ʼuhi ʼe tou matataku naʼa puli tokita matagafua. Lagi ʼe tou tukugakoviʼi he tahi ʼo ʼuhiga mo te fihifihia ʼaia. Peʼe feala ke tou fakatuʼutuʼu ke tou faifakalelei kae ʼe tou holomuli ʼo aʼu ki te temi ʼaē ʼe tou ʼui ai kua tauhala.

Koia, ʼe ʼaoga koa te ʼu faifakalelei? ʼE feala koa ke hoko moʼoni ai he meʼa?

Ko Te ʼOfa ʼe Ina Fakamaʼuaʼi Tatou Ke Tou Faifakalelei

Ko te ʼofa fakatautehina ʼe ko te fakaʼiloga ʼaia ʼo te kau tisipulo moʼoni ʼa Sesu Kilisito. Neʼe ina ʼui fēnei: “ ʼAki te meʼa ʼaia, ʼe ʼiloʼi ai anai e te hahaʼi fuli ko koutou ko taku ʼu tisipulo, mo kapau ʼe koutou femaʼuʼaki te ʼofa.” (Soane 13:35) ʼE fakaloto mālohiʼi te kau Kilisitiano e te Tohi-Tapu ke nātou “feʼofamamahiʼaki mālohi ʼaki te loto.” (1 Petelo 1:​22) Ko te ʼofa moʼoni ʼe ina fakamaʼuaʼi tatou ke tou faifakalelei. Koteā tona tupuʼaga? Koteʼuhi ko te tagata heʼe haohaoa ʼe feala ke ina fakatupu he ʼu lotomamahi pea kapau ʼe mole faitoʼo te ʼu lotomamahi ʼaia ʼe feala ke nātou tāʼofi he tahi ke mole ina fakahā te ʼofa.

Ohage la, kapau ʼe hoko he fihifihia mo he tahi ʼi te kokelekasio faka Kilisitiano, ʼe lagi mole tou fia palalau anai mo ia. Kapau neʼe tou fai he meʼa ʼo tupu ai he lotomamahi ʼa he tahi, ʼe lava feafeaʼi koa he toe fakahoko ʼo he ʼu felogoi ʼaki te ʼofa? ʼI te agamāhani, ko te faifakalelei pea mo te faiga ʼaē ke tou palalau faka lotomāfana ʼe ko he meʼa lelei. ʼE tonu ke tou ʼoʼofa ki ʼotatou ʼu kaugā fagona, pea kapau ʼe tou ʼui ʼe tou fakahemala ʼi tatatou fakatupu te lotomamahi ʼaia, ʼe fakamaʼamaʼa anai totatou maʼua.​—Loma 13:8.

Ohage la: ko Mari Carmen pea mo Paqui ko te ʼu fafine Fakamoʼoni e lua neʼe kua fualoa tanā fakakaumeʼa. Mai tona ʼaluʼaga ʼaē neʼe tui ia Mari Carmen ki he laukovi, koia neʼe vaivai ai tana fakakaumeʼa mo Paqui. ʼO mole ina fai he fakamatala, neʼe fakamamaʼo ʼosi ia ia Paqui. Neʼe teitei pe ke hili te taʼu katoa, pea neʼe ʼiloʼi ai e Mari Carmen neʼe hala te laukovi ʼaia. Neʼe koteā te meʼa ʼaē neʼe ina fai? Neʼe uga ia ia e te ʼofa ke ʼalu kia Paqui pea ke ina fakahā ʼaki he agavaivai tona loto fakahemala ʼo ʼuhiga mo tana aga kovi ʼaupito ʼaia. Neʼe nā fetāgihi ai, pea talu mai te meʼa ʼaia neʼe nā toe kaumeʼa lelei ai.

Logope la ʼe mole tou logoʼi neʼe tou fai he meʼa ʼe kovi, kae ko te faifakalelei ʼe feala ke ina fakatokatoka te mole femahinoʼaki. ʼE manatuʼi fēnei e Manuel: “ ʼI te hili ʼo te ʼu taʼu e lahi ʼaupito, neʼe ʼau nofo mo toku ʼohoana ʼi te ʼapi ʼo tomā tuagaʼane fakalaumālie lolotoga tana nofo ʼi te lopitali. Neʼe ma fai ia meʼa fuli moʼo tokoni kia ia pea mo tana ʼu tamaliki lolotoga tona mahaki. Kae ʼi tana mavae mai ai, neʼe ina ʼui age ki hona kaumeʼa neʼe mole ma tokakaga fakalelei ki te totogi ʼo te ʼu meʼa ʼo te loto fale.

“Neʼe ma ʼaʼahi ia ia pea neʼe ma fakamahino age ki ai lagi neʼe hoko te ʼu meʼa ʼaia ʼuhi ko tomā tūpulaga pea ʼi te mole manatu fakapotopoto, ʼo mole ma tokakaga ai ki te ʼu meʼa ohage ko tana fai. Neʼe foimo tali mai aipe, ʼo ina ʼui mai ko ia ʼaē ʼe ʼi ai tona maʼua kia māua pea neʼe fakamālo mai ʼo ʼuhiga mo te ʼu meʼa fuli ʼaē neʼe ma fai maʼa ia. Neʼe fakatokatoka ai te fihifihia ʼaia. Ko te meʼa ʼaia neʼe hoko, neʼe ina akoʼi mai te maʼuhiga ʼo te agavaivai ʼo fai fakamolemole mokā ʼe mole femahinoʼaki.”

Neʼe tapuakina e Sehova te taumatuʼa ʼaia ʼi tanā fakahā tonā ʼofa pea mo tanā ‘haga fai te ʼu meʼa ʼi te tokalelei.’ (Loma 14:19) Ko te ʼofa ʼe toe pipiki foki kiai mo te tokagaʼi ʼo te ʼu meʼa ʼaē ʼe ʼi te loto ʼo te hahaʼi. ʼE tokoniʼi tatou e Petelo ke tou fakahā te “manavaʼofa.” (1 Petelo 3:8) Kapau ʼe tou manavaʼofa, lagi ʼe tou ʼiloʼi lelei ai anai te mamahi ʼaē neʼe tou fakatupu ʼaki he ʼu palalau pe ko he ʼu aga ʼe fai fakavale pea ʼe uga ai anai tatou ke tou faifakalelei.

“Ke Koutou Noʼo Te Loto Agavaivai”

Tatau aipe mo he ʼu tagata ʼāfea Kilisitiano ʼe agatonu ʼe feala ke nātou tautau fai he ʼu palalau ʼita. (Vakaʼi ia Gāue 15:​37-​39.) ʼI te ʼu ʼaluʼaga ʼaia ʼe ʼaoga ʼaupito ke fai he faifakalelei. Kae koteā te meʼa ʼe tokoni anai ki he tagata ʼāfea peʼe ko he tahi Kilisitiano ʼe faigataʼa ki ai te faifakalelei?

Ko te kalavi ʼe ko te agavaivai. Neʼe tokoni fēnei te ʼapositolo ko Petelo: “Ke koutou noʼo ʼaki te loto agavaivai ia koutou.” (1 Petelo 5:5) ʼE moʼoni, logope la ʼe lahi te ʼu kē ʼe ko te hala ʼa te toko lua, kae ko te Kilisitiano agavaivai ʼe ina tokagaʼi tana ʼu hala pea ʼe ina tali lelei.​—Tāʼaga Lea 6:​1-5.

Ko ia ʼaē ʼe fai ki ai te faifakalelei ʼe tonu ke ina tali ʼaki he agavaivai. Tou vakaʼi te faʼifaʼitaki ʼo he ʼu tagata e lua ʼe nā tutuʼu ʼi te ʼu tumutumu ʼo te ʼu moʼuga kehekehe e lua pea ʼe tonu ke nā felogoi. Ko te faʼahi ʼaia ʼe mole feala tona fakahoko. Kae kapau ʼe hifo ifo he tahi ia nāua ki te mato pea muli mai ai mo ia ʼaē, pea ʼe feala ai leva ke faigafua tanā felogoi. ʼO toe feiā aipe, kapau ko he ʼu Kilisitiano e toko lua ʼe tonu ke nā fakatokatoka he fihifihia, ʼe tonu ke nā felāveʼi ʼi te agavaivai ʼi te mato ohage ko te faʼifaʼitaki, pea ʼe ʼaoga ke fai he ʼu faifakalelei.​—1 Petelo 5:6.

ʼE Maʼuhiga Te ʼu Faifakalelei ʼi Te Nofo ʼOhoana

Ko te ʼohoana ʼa he toko lua ʼe heʼe haohaoa ʼe hoko ai he ʼu faigamālie moʼo fai ʼo he ʼu faifakalelei. Pea kapau ʼe fakahā e te tagata ʼohoana pea mo te fafine te ʼofa, ʼe uga anai nāua ke nā faifakalelei mokā nā fai he palalau pea mo he aga fakavale. ʼE fakahā fēnei ia Tāʼaga Lea 12:18: “ ʼE ʼi ai ia ia ʼaē ʼe palalau vale ohage ko te ʼu tā ʼo he heletā, kae ko te ʼalelo ʼo te kau popoto ʼe ko he fakamālōlō ia.” Ko te ʼu ‘tā fakavale’ ʼe mole feala ia ke ina fakatokatoka, kae ʼe feala ke faitoʼo ʼaki he faifakalelei fakamalotoloto. Koia, ko te faʼahi ʼaia ʼe fakamaʼua tuʼumaʼu kiai he mahino pea mo he faiga.

ʼI tana palalau ʼo ʼuhiga mo tana nofo ʼohoana, ʼe ʼui fēnei e Susan:a “Neʼe ʼau ʼohoana mo Jack* talu mai te ʼu taʼu e 24, kae ʼe kei ma ako pe te ʼu meʼa foʼou ʼo ʼuhiga mo māua. ʼI te hili ʼo he temi, neʼe hoko he meʼa fakaʼofaʼofa, neʼe ma mavete pea neʼe ma tahi nonofo lolotoga he ʼu vāhaʼa. Kae, neʼe ma mulimuli ki te tokoni faka Tohi-Tapu ʼaē neʼe foaki mai e te ʼu tagata ʼāfea pea neʼe ma toe nonofo fakatahi. ʼI te temi nei, kua ma ʼiloʼi ʼe kehekehe ʼaupito tomā ʼu ʼulugaaga, koia ʼe feala ke hoko te ʼu fihifihia. Mokā hoko te faʼahi ʼaia, ʼe ma faifakalelei fakavilivili pea ʼe ma faiga moʼoni ke ma femahinoʼaki. ʼE ʼau fiafia ʼi taku ʼui ko tomā ʼohoana kua lelei age.” ʼE toe ʼui fēnei e Jack: “Neʼe ma toe ako foki ke ma ʼiloʼi te ʼu temi ʼaē ʼe faigafua ai ke ma liliu ʼo fītaʼa. ʼI te ʼu temi ʼaia ʼe ma fetokaga leleiʼaki ʼaupito.”​—Tāʼaga Lea 16:⁠23.

ʼE tonu koa ke koutou faifakalelei mo kapau ʼe koutou manatu ʼe mole hakotou hala? Mokā ʼe pipiki kiai te ʼu meʼa ʼaē ʼe ʼi te loto, ʼe faigataʼa takita ʼiloʼi papau peʼe ʼa ai te hala. Kae ko te meʼa ʼaē ʼe maʼuhiga ʼe ko te tokalelei ʼi te nofo ʼohoana. Tou vakaʼi ia Apikaela, ko te fafine Iselaelite ʼaē neʼe gaohi koviʼi e tona ʼohoana ia Tavite. Logope la ʼe mole feala ke tukugakoviʼi ia ia ʼo ʼuhiga mo te agavale ʼo tona ʼohoana, kae neʼe ina fai te faifakalelei. Neʼe ina ʼui fēnei: “Fakalelei mai kae ke fakamolemole ia te talagataʼa ʼo tau kaugana fafine.” Neʼe tali e Tavite ʼaki tana gaohi fakalelei ia ia, ʼo ina fakahā fakalelei kanapaula neʼe mole gū, ʼe ina liligi anai he toto ʼo he tahi ʼe agatonu.​—1 Samuele 25:​24-28, 32-​35.

ʼO toe feiā aipe, ko te fafine Kilisitiano ʼe higoa ko June, ʼaē kua ʼohoana talu mai te ʼu taʼu e 45, ʼe ina ʼui ko te fua lelei ʼo te nofo ʼohoana ʼe fakamaʼua kiai ke ʼuluaki faifakalelei ʼaki te lotolelei. ʼE ina ʼui fēnei: “ ʼI taku fakakaukau ko tomā ʼohoana ʼe maʼuhiga age ia ʼi te ʼu meʼa ʼaē ʼe ʼi toku loto. Koia mokā ʼe ʼau faifakalelei, ʼe ʼau ʼiloʼi ʼe ʼau fai he meʼa lelei ki tomā nofo ʼohoana.” Ko te tagata kua matuʼa ʼe higoa ko Jim ʼe ina ʼui fēnei: “ ʼE ʼau faifakalelei ki toku ʼohoana tatau aipe pe ko he meʼa ʼe mole faʼa maʼuhiga. Talu mai tona tafa, ʼe lotomamahi gafua. Koia neʼe ʼau fakapelepeleʼi pea mo ʼau ʼui age fēnei, ‘Fakalelei mai. Neʼe mole ʼau fia fakamamahiʼi koe.’ Ohage ko he ʼakau ʼe fakavai, ʼe lotomālohi atu aipe.”

Kapau ʼe tou fakaloto mamahiʼi he tahi ʼe tou ʼofa mamahi ai, ʼe fua lelei anai mokā tou foimo faifakalelei. ʼE manatu feiā ia Milagros, ʼo ina ʼui fēnei: “ ʼE ʼau mamahi heʼe mole ʼau falala kia ʼau, pea ko te palalau fefeka ʼo toku ʼohoana ʼe tupu ai taku lotovaivai. Kae ʼi tana faifakalelei, ʼe ʼau logo fīmālie aipe.” Koia, ʼe ʼui mai e te Tohi-Tapu kia tatou: “Ko he ʼu palalau ʼe lelei ʼe ko he meli ʼe ʼaoga ki te nefesi pea ʼe ko he faitoʼo ki te ʼu hui.”​—Tāʼaga Lea 16:⁠24.

Tou Fakahā Te Faifakalelei ʼi Totatou Maʼuli

Kapau ʼe tou fakahā te faifakalelei mokā ʼe ʼaoga, ʼe lagi tou maʼu anai te hahaʼi ʼaē ʼe nātou tali lelei. Pea lagi ʼe feala anai ke nātou fakahā totonu te faifakalelei. Mokā ʼe tou manatu neʼe tou fakaloto mamahiʼi he tahi, he koʼe koa la ʼe mole tou fakamāmāhani ʼo faifakalelei ʼo mole fakaʼaogaʼi he temi pea mo he faiga moʼo tekeʼi ʼo he hala? ʼE feala ke ʼui e te mālama ko te faifakalelei ʼe ko he fakaʼiloga ia ʼo te vaivai, kae ʼi tona fakahagatonu ʼe ko te fakamoʼoni ʼaia ʼo te fakapotopoto faka Kilisitiano. ʼE mahino ia, ʼe mole tou loto anai ke tou hage ko nātou ʼaē ʼe nātou ʼiloʼi tanatou hala kae ʼe nātou meʼa noaʼi tonatou ʼu maʼua. Ohage la, ʼe feala koa hatatou ʼui ʼe tou fakahemala mokā ʼe mole tou fai fakamalotoloto? Kapau ʼe tou tuai mai pea mo fai he ʼu tuʼuga faifakalelei, ʼe tou fakapapau koa ke tou tauʼi te faʼahi ʼaia?

Pea kapau koia ʼaia, ʼe ʼaoga moʼoni koa ke tou faifakalelei? Ei, ʼe ʼaoga ke tou faifakalelei. ʼE tonu ke tou fai te meʼa ʼaia ʼo ʼuhiga mo tatou pea mo ʼihi age. Ko he faifakalelei ʼe feala ke tokoni ʼo fakafimālie te mamahi ʼaē neʼe hoko ʼuhi ko te heʼe haohaoa, pea ʼe feala ke fakahoko ai he ʼu felogoi lelei. Ko te ʼu faifakalelei fuli ʼaē ʼe tou fai ʼe ko he ako ʼo te agavaivai pea ʼe ina akoʼi tatou ke tou liliu ʼo tokagaʼi tāfito te ʼu meʼa ʼaē ʼe ʼi te loto ʼo ʼihi. ʼUhi ko te faʼahi ʼaia, ko te ʼu kaugā fagona ʼi te tui, te ʼu taumatuʼa, pea mo ʼihi age ʼe nātou tokagaʼi anai tatou ohage ko ni hahaʼi ʼe tau mo tonatou ʼofa pea mo tanatou falala. ʼE tokalelei anai totatou ʼatamai, pea ʼe tapuakina anai tatou e Sehova ʼAtua.

[Nota ʼi te lalo pasina]

[Paki ʼo te pasina 23]

Ko te ʼu faifakalelei fakamalotoloto ʼe fakahoko ai te ʼofa faka Kilisitiano