Ko Te ʼOfa ʼAē Kia Sehova ʼe Ina ʼEke Ke Tou Tauhi Kia Te Ia
“Ko te ʼuhiga ʼo te ʼofa ki te ʼAtua: ke tou tauhi tana ʼu fakatotonu.”—1 Soane 5:3.
1, 2. Koteā ʼaē ʼe tonu ke ina ʼeke ai tatou ki te gāue kia Sehova?
KO TE kau folau e 80 tona hahaʼi mai Saponia neʼe ʼomai ʼo ʼaʼahi te fale ʼo te kau Fakamoʼoni ʼa Sehova ʼi Kalifonia, ʼi Amelika. Ko te koga meʼa ʼaia neʼe ʼi ai te ʼoloto ʼe maʼuli ai te ʼu manu lele matalelei, ʼo toe hage aipe kia natou ko he tahi faʼahi ke natou ʼofa aipe ki tonatou Tupuʼaga Lahi, ko Sehova ʼAtua. Ko te tagata ʼaē neʼe ina taki natou neʼe ina fakatokagaʼi ko natou fuli ʼaia ʼe natou pionie. Pea ina fai age te fehuʼi ʼe tautau fai tuʼumaʼu age pe: “He koʼe koa ʼe tokolahi te ʼu pionie katoa ʼi Saponia?” Pea mole gū he tahi. Pea tali age ʼe te fafine kei finemui ʼe pionie: “Heʼe matou ʼofa kia Sehova.”
2 Ko te ʼofa ʼaē kia Sehova—ko ia ʼaia ka ina ʼeke tatou ke tou gāue lahi kia te ia! ʼIo, ʼe mole feala ke tou pionie fuli. Tokolahi ʼi te kau fā milio hahaʼi faka mafola ʼo te Puleʼaga ʼe mole feala hanatou kau ki te gāue ʼaia ko te pionie. Kae ʼi te ʼu fealagia ʼo ʼihi ʼe natou fai te faʼahi gāue ʼaia. Ko ʼihi ʼia tatou ʼe feala “ke falala pea mo fai he meʼa lelei kia Sehova”, ʼo tou fakahā aipe totatou ʼofa ʼo tou fai totatou maʼua ʼaē ko te fai ʼo ni kau tisipulo (Pesalemo 37:3, 4). Pea ko te kau ʼatolasio fuli ʼa Sehova ʼe feala ke natou fakaloto mālohiʼi ia natou ʼe pionie ʼo lagolago natou ʼi ʼanatou ʼu faiga ʼi tanatou gāue ʼaia. —Mateo 24:14; 28:19.
3. He koʼe ʼe mole tatau te kau Fakamoʼoni ʼa Sehova pea mo natou ʼaē ʼe ʼui ʼe natou Kilisitiano?
3 ʼE tokolahi te ʼu hahaʼi ʼe ʼui ʼe natou Kilisitiano kae ʼe mole natou tuku ki muʼa te lotu ʼi tonatou maʼuli. Kae, ko te kau Fakamoʼoni ʼa Sehova ʼe natou fakahā tāfito tonatou ʼofa ʼo ʼuluaki “kumi muʼa te Puleʼaga pea mo tana faitotonu”. Heʼe tonu ke fai ki te faʼahi ʼaia he ʼu sakilifisio, pea ko te ʼu sakilifisio ʼe mole ʼalu noa! (Mateo 6:33; 16:24) Heʼe ʼalu tahi mo te ʼuluaki fakatuʼutuʼu lahi neʼe fakahā kia Moisese, pea toe fakahā age kia Sesu Kilisito: “Ko Sehova totatou ʼAtua, ʼe Sehova tokotahi pe ia, pea ʼe maʼua keke ʼofa kia Sehova, tou ʼAtua, ʼaki tou loto katoa, pea mo tou nefesi katoa, pea mo tou ʼatamai katoa pea mo tou mālohi katoa”. —Maleko 12:29, 30; Teutalonome 6:4, 5.
4, 5. Ko ai te faʼifaʼitaki aga lelei ʼo ʼuhiga mo te agatonu, pea ʼe feafeaʼi koa hatatou fakahā tatatou agatonu?
4 Ko te tahi tehina ʼi te Fale lahi ʼo te kau Fakamoʼoni ʼa Sehova neʼe ina ʼui kia F. W. Franz, e taʼu 98 ko te pelesita ʼo te Sosiete Watch Tower neʼe ina foaki kia Sehova taʼu e 70 ʼo tona maʼuli ʼo pionie: “Neʼe ko koe ko he faʼifaʼitakiʼaga lelei ʼo te faitotonu, tehina Franz.” Pea tali age e te tehina ko Franz: “ ʼE moʼoni! ʼE tonu ke agatonu”. Ko tona fakanounou pe ʼaia. Logo aipe he faʼahiga gāue ʼe tou fai ʼi totatou minisitelio ʼo te Puleʼaga, ʼe feala aipe ke tou agatonu.—1 Kolonito 4:2; Kalate 3:9.
5 ʼE moʼoni, tokolahi anai ʼi te kau kilisitiano ʼe fia gāue lahi kia Sehova, kae ʼe toe fakahā foki ʼe te Tohi-Tapu ko ʼihi ʼe mole feala anai ʼuhi ko honatou ʼu maʼua pe ʼe e natou mahamahaki. ʼAua leva naʼa tou ʼui ko natou ʼaia ʼe vaivai tanatou tui. Tokolahi ia natou ʼaia neʼe natou agatonu logo aipe he ʼu faigataʼa ia neʼe tau fualoa mo natou. ʼEi, ʼe feala ke tou ʼui ʼe natou agatonu! ʼE natou fakahā aipe tonatou ʼofa ʼaē kia Sehova pea mo natou kaugana mo tonatou loto katoa ʼo natou lagolago aipe ki tana ʼu fakatuʼutuʼu fakateokalatike. ʼE natou tokaga ʼaupito ki te gaūe pionie pea mo natou fakaloto mālohiʼi ai ia natou ʼaē ʼe fealagia ki te faʼahi ʼaia, tāfito ki tanatou ʼu fānau totonu, ke haga faiga ke liliu te faʼahi ʼaia ʼo maʼuhiga age ʼi te ʼu gāue fuli ʼo tona maʼuli.—Fakatatau kia Teutalonome 30:19, 20.
6, 7. ʼE feafeaʼi te maʼuliʼi ʼo te meʼa ʼaē neʼe hoko ia 1 Samuele 30:16-25 ʼi te temi nei?
6 Ko te ʼu gāue faifaitahi ʼaē ʼe ʼiloga ʼi te ʼu hahaʼi fuli ʼa te ʼAtua ia ʼaho nei ʼe feala ke fakata ki te hisitolia ʼaē ia 1 Samuele 30:16-25. ʼI te tau ʼaē neʼe hoko mo te kau Amalesite, “ko Tavite neʼe ina tauʼi natou, talu mai te uhu ki te afiafi” pea neʼe lahi tonatou ʼu koloa neʼe ina tae. ʼI tana toe liliu mai ki te nofoʼaga mo ʼihi tagata neʼe tau fakatahi mo ia neʼe natou ʼui age ke ʼaua naʼa foaki age he ʼu koloa kia natou ʼaē neʼe mole kau ki te tau. Kae neʼe tali age ʼe Tavite: “Pea ko ai ānai ka fakalogo kia koutou ʼo ʼuhiga mo te palalau ʼaia? Heʼe ohage pe ko te vahe ʼo ia ʼaē neʼe ʼalu ʼo tau, ʼe toe feiā pe anai mo te vahe ʼo ia ʼaē neʼe nofo ōvi ʼi te uta. ʼE natou kau fakatahi ānai ki te vahe”.
7 ʼE toe tatau pe tona maʼuliʼi ia ʼaho nei. Ko te ʼu pionie ko natou ʼaē ʼe tuʼu ki muʼa ʼi te tau fakalaumālie. Kae ko te ʼu hahaʼi ʼo te kokelekasio ʼe lagolago natou fakalelei pea mo agatonu ʼi te tau ʼaia. Ko ia ʼaē ʼe ʼiloga mai ʼi te tānaki ʼo te gāue lolotoga ʼo te taʼu 1991 ʼaē ka tou vakaʼi age nei.
Ko te tānaki ʼo te gāue fakatalakitupua
8. a) Koteā ʼaē ʼe ʼiloga mai ʼi te tānaki ʼo te gāue ʼi te malamanei ʼo te kau faka mafola pea mo te ʼu hola ʼo tanatou ʼu gāue kia Sehova? b) Koteā te ʼu meʼa maʼuhiga neʼe hoko ʼo ʼuhiga mo te ʼu fenua foʼou hoki hokoe tona fakahā ʼi te tānaki ʼo te gāue?
8 ʼI te ʼu pasina ʼaeni ʼe fā kua hili atu ʼo te nusipepa neʼe ʼiloga mai ai ko te fakatahiʼi ʼo te ʼu gāue ʼa te kau Fakamoʼoni ʼa Sehova ʼaē neʼe kau ki te folahi fakatalakitupua ʼo te gāue ʼi te taʼu 1991. Ko te hahaʼi ʼo te kau faka mafola foʼou ko te toko 4 278 820—Neʼe fakalaka ʼi te 6,5 %. Ko natou ʼaia neʼe natou fai ko hola e 951 870 021 (neʼe teitei ki te tahi miliale!) ʼi te gāue. Pea kua feala te fakahā ʼi te tānaki ʼo te gāue, te ʼu hola gāue ʼo ʼotatou ʼu tehina ʼi te ʼu fenua ʼaē neʼe tapuʼi ai te faka mafola—Akola, Pulukalia, Sekosolovakia, Lumania, U.S.S.R.
9, 10. a) ʼE feafeaʼi te tauʼi e te kau pionie te ʼu faigataʼa ia ʼo te temi? b) Koteā ʼaē ʼe fakaloto mālohiʼi tatou ke tou pionie?
9 ʼI te temi nei kua mafola te gāue pionie ʼi te malamanei. Tatau aipe ʼi te ʼu fenua ʼaē neʼe tapuʼi fualoa ai te gāue ʼaia, kua lahi ai pe mo te ʼu pionie. Ko te ʼu faigataʼa ia ʼo te temi ʼe mole fakaloto gaʼegaʼe te kau Fakamoʼoni ʼaia, ʼaē ʼe hoko ai tanatou ʼu gāue ki te tauhi ʼaē kia Sehova. (Fakatatau 2 Kolonito 11:23, 27.) ʼI te mahina fuli, ko te 14 % ʼi te kau faka mafola ʼo te Puleʼaga neʼe natou pionie. Ko te hahaʼi ʼo te ʼu pionie ko te toko 780 202, ko he fua lelei, heʼe ko te 18 % ʼaia ʼo te kau faka mafola.
10 ʼI te ʼiloga ʼaē ʼo te fiafia ʼo te kau pionie, ʼe toe fakaloto mālohiʼi aipe niʼihi ki te gāue ʼaia. Kapau ʼe mole heʼeki koutou pionie, he koʼe koa ʼe mole ʼeke ai koutou e tokotou ʼofa ke koutou ʼui, ohage ko te meʼa ʼe tou lau ia Isaia 6:8, “Koʼeni ʼau! Fekauʼi ʼau”? Peʼe lagi ko takotou ako te Tohi-Tapu, ko te Folafola ʼa te ʼAtua ohage ko he afi vela ʼe ina uga tokotou loto, ke koutou haga fai he meʼa ke feala hakotou fakahoko te gāue pionie ʼaia. Ohage ko Selemia, ʼi te temi faigataʼa neʼe uga aipe ia ʼe te Folafola ʼa Sehova, ke mole gaʼegaʼe tana tui.—Selemia 20:9.
Ko he gaūe ʼofa ki te hahaʼi katoa
11. Kua feafeaʼi te mafola ʼo te ʼu ako Tohi-Tapu?
11 ʼE fakatokagaʼi foki ʼi te tānaki ʼo te gāue ʼo te taʼu ʼaia ko te tuputupu ʼo te ʼu ako Tohi-Tapu neʼe fai ʼi te mahina, ko te toko 3 947 261 ʼi te kele katoa. Ko he fakatuʼutuʼu ʼofa ʼaia ʼe feala ai ki te kau Fakamoʼoni ʼa Sehova ke natou tokoni kia natou ʼaē ʼe fia mahino ki te logo mokā ʼe natou faka mafola ʼi te ʼu ʼapi. ʼE tou fiafia ʼi te fai ʼo he ʼu ako Tohi-Tapu mo ni ʼu hahaʼi kehekehe pea mo lea kehekehe, ohage ko te ʼapositolo ko Paulo neʼe ina fai te gāue ʼaia mo tona loto katoa. Neʼe ina ʼui ‘neʼe ʼau faka mafola faka malotoloto ʼi muʼa ʼo te kau Sutea pea mo te kau Keleka’. Neʼe mole ina tokagaʼi ia te temi ʼaē ʼe ina akonakiʼi natou ki te moʼoni (Gāue 20:20, 21). ʼE toe tatau aipe mo te temi nei. Ko te kau Fakamoʼoni ʼa Sehova ʼe natou tokoni “te ʼu hahaʼi fuli ke hāofaki natou pea ke natou aʼu ʼo maʼu te mālama totonu ʼo te moʼoni.”—1 Timoteo 2:4.
12-14. Koteā te ʼu meʼa fakatupu fakafiafia neʼe hoko ʼi ʼihi fenua ʼo te Eulopa?
12 ʼE tou fakafiafia ʼi te kua lahi ʼo te ʼu ako Tohi-Tapu ʼi te Eulopa ʼo te potu Hahake! Lolotoga taʼu e hogofulu ko ʼotatou ʼu tehina ʼo te ʼu fenua ʼaia neʼe natou fakatahi fakaveliveli pe, pea kia natou fuli ʼaia neʼe ko te Tule Leʼo pe ʼe tahi kua ʼafea. Kae, ʼi te temi nei kua lahi te ʼu Tohi-Tapu pea mo ʼihi age ʼu tohi kua hu ki te ʼu fenua ʼaia. ʼE fakamanatu foki ki te katiko ʼaē ʼa Salomone 2:4, King James Version: “Neʼe ina [Kilisito Sesu] fakahu ʼau ki te [fakalaumālie] fale ʼo te vino, pea neʼe ina fakamalumalu ʼau ʼaki te fuka ʼo te ʼofa”. Kua natou takitahi pe mo tana nusipepa, tokolahi kua liliu ʼi te temi nei ʼo teuteu fakalelei ke natou faiva ʼi te “folafola ʼo te moʼoni”.”—2 Timoteo 2:15.
13 Ko te kau faka mafola ʼe 103 ʼo te kokelekasio ʼo St. Petersburg, ʼi Lussia, neʼe natou fakahā kua natou taki te ʼu ako Tohi-Tapu e 300. ʼI mahina pe e valu, ko te ʼu faiga ʼaia neʼe fua manuʼia, heʼe neʼe feala papitema te toko 53 kau Fakamoʼoni foʼou. Ko te vaelua ʼo te kokelekasio neʼe natou ʼiloʼi te moʼoni ʼia mahina pe e valu pe ʼe lagi toe nounou age pela! ʼE mole ʼi ai he ʼu tagata ʼafea—ko te faifekau faka minisitelio pe ʼe tahi moʼo tokoni kia natou ʼi te ʼu faʼahi fakalaumālie.
14 ʼI Estonia, neʼe kole age e te fafine kia ia ʼaē ʼe fai tana ako, pe ʼe feala hana fakaafe tona ʼu kaumeʼa ki tana ako Tohi-Tapu. ʼI te aʼu mai ʼa te Fakamoʼoni ʼa Sehova ʼi te vahaʼa ki muli mai, neʼe ko te toko 50 hahaʼi ʼaē neʼe nonofo age! ʼIo, neʼe fai foki te ʼu fakatuʼutuʼu makehe moʼo tokoni ki te hahaʼi fuli ʼaia neʼe fia mahino ki te logo.
15. Koteā hatatou lea ki te hahaʼi neʼe kau ki te ʼaho Fakamanatu pea mo te ʼu papitema?
15 Tokolahi ia natou ʼaē ʼe ako te Tohi-Tapu, ko te ʼuluaki felāveʼi mo te ʼu fakatahi Fakakilisitiano ʼe kamata ʼi te ʼaho Fakamanatu ʼo te mate ʼo Sesu. ʼI te taʼu ʼaeni kua hili atu, ko te toko 10 650 158 hahaʼi ʼi te ʼu kokelekasio ʼe 66 207 ʼi te malamanei neʼe kau ki te ʼaho Fakamanatu fakafiafia ʼaia; ko te hoki hokoe ʼo te fakalake ʼi te 10 000 000 ʼo te hahaʼi neʼe kau ki te ʼaho Fakamanatu. Tokolahi te ʼu fenua ʼo Amelika Latina, Afelika, pea mo te Eulopa ʼo te potu Hahake, neʼe lakamaumau ʼia natou neʼe kau ki te ʼaho ʼaia ʼi te kau faka mafola ʼo te Puleʼaga. ʼE tou teuteu atu nei ki te ʼaho Fakamanatu ʼaē ka fai ʼi te feliaono 17 ʼo apelili. ʼE tou ʼamanaki foki ko te kau ako fuli foʼou ʼo te Tohi-Tapu ʼaē ka kau ki te ʼaho Fakamanatu ʼaia ʼe hoko atu aipe tanatou ʼu faiga ki te papitema. Pea ki te ʼu papitema ʼaē ʼo te taʼu 1991, neʼe ko te toko 300 000 hahaʼi neʼe mōlaga tonatou maʼuli kia Sehova ʼo uku ʼi te vai.
Ko te ʼu kaumeʼa moʼoni ʼo te ʼateaina
16. Koteā te ʼu logo fakafiafia neʼe hoko ʼi te ʼu fakatahi faka tisitilike ʼo te ʼu “Kaumeʼa ʼo te ʼateaina”?
16 ʼI te ʼu meʼa maʼuhiga ʼo te taʼu gāue 1991, ko te ʼu akonaki ʼaē ʼo te ʼu “Kaumeʼa ʼo te ʼateaina” lolotoga ʼo te ʼu fakatahi faka tisitilike, neʼe fai fuli te ʼu akonaki ʼaia ʼi te potu ʼo te Tokelau ʼo toe hoko atu ʼi te taʼu 1992 ʼi te potu Toga. Hoki hokoe te fakahā katoa ʼo te polokalama ʼo te fakatahi ʼi ʼihi fenua ʼo te Eulopa ʼo te potu Hahake, ʼaē kua fakafiafia ai ʼotatou ʼu tehina ʼi tanatou feala te fakaʼaoga ʼo tonatou ʼateaina moʼo fakavikiviki kia Sehova. ʼI oketepeli 1991, ko te tānaki ʼo te hahaʼi neʼe kau ki te ʼu fakatahi ʼaia e 705 ʼi te ʼu fenua e 54 neʼe ko te toko 4 774 937.
17, 18. a) Ko te ʼu ʼateaina fea koa kua feala ke maʼu ʼe te kau Fakamoʼoni ʼa Sehova ʼi te temi pea mo ʼihi ki he temi ka haʼu ? b) Koteā ʼaē ʼe kehekehe ai te ʼateaina mai te ʼAtua pea mo te ʼateina ʼaē mai te malamanei?
17 Neʼe ʼui ʼe Sesu ki tana kau tisipulo: “Ko te moʼoni ʼe ina faka ʼateaina ānai koutou” (Soane 8:32). Ia ʼaho nei, ko te ʼu moʼoni ʼo te Tohi-Tapu neʼe ina faka ʼateaina te ʼu miliona hahaʼi neʼe tui ki te akonaki ʼo te ʼu lotu loʼi. Ko te ʼu miliona hahaʼi ʼaia kua natou mahino ko Sehova neʼe ina foaki faka sakilifisio ia Sesu ke feala ai ki te hahaʼi katoa ke natou “ ʼateaina mai te kaugana ʼo te tatago ke natou maʼu ai te ʼateaina manuʼia ʼo te ʼu fānau ʼa te ʼAtua.” (Loma 8:19-22) ʼIo, ko he ʼateaina lahi anai te—maʼuli heʼe gata ʼi he palatiso ʼi te kele ko he meʼa neʼe fakatuʼutuʼu ki ai Sehova!—Isaia 25:6-8; fakatatau mo Gāue 17:24-26.
18 Ko te ʼu ʼateaina fakafiafia ʼaē ʼe tau mo te kau Fakamoʼoni ʼa Sehova ʼi te temi nei pea mo ʼaē ʼe natou ʼamanaki ki ai ʼi te faʼahiga meʼa ʼo te tuʼu foʼou ʼe fakahoko ʼe totatou ʼAtua ko Sehova. (2 Kolonito 3:17). Heʼe ko te ʼu ʼateaina ʼaia ʼe mole fakalogo ki he politike pe ko he fakatuʼutuʼu fakafeagai (Sake 1:17). Ke mole hoko he fihi ki te faʼahi ʼaia, ʼi te fakatahi ʼaē ʼa te kau Fakamoʼoni ʼa Sehova ʼi te ʼu fenua ʼo te Eulopa ʼi te potu Hahake ʼi te taʼu 1991, neʼe natou tau te ʼu kiʼi fakaʼiloga ʼi tonatou ʼu kofu ʼe tohi ai: “Kaumeʼa moʼoni ʼo te ʼateaina fakaʼatua” kae ʼe mole tohi pe “Kaumeʼa moʼoni ʼo te ʼateaina.”
Ko te ʼofa fakamalotoloto kia Sehova
19. ʼE feafeaʼi te lagolago ʼotatou mokā ʼe tou faikole kia Sehova?
19 Ko totatou ʼofa ʼaē kia Sehova pea mo tatatou falala ʼaē kia te ia ʼaē ka ina ʼeke tatou ke tou ōvi kia te ia ʼaki te faikole. Heʼe ko te meʼa ʼaia neʼe fakaloto mālohiʼi ai totatou ʼu tehina ke natou katakiʼi ʼonatou ʼu faigataʼa ia pea mo ʼonatou ʼu gaohi koviʼi (Pesalemo 25:14, 15). Neʼe maʼu e Sesu tona loto mālohi aki te faikole ʼaē ki tana Tamai (Luka 22:39-46). Ohage pe ko Etiene, neʼe toe tokoni aipe te faikole kia te ia ʼi tona lakaga puluhia. Lolotoga ʼo tona siligi, neʼe hiki ʼona ʼu mata ki te lagi ia muʼa ʼo tona mate pea ina ʼui: “Koʼeni ʼe ʼau mamata ki te lagi kua matagaki pea mo te Foha ʼo te tagata ʼe tuʼu ʼi te nima toʼomataʼu ʼo te ʼAtua.”—Gāue 7:56.
20-22. Koteā te meʼa neʼe hoko ʼe ʼiloga mai ai ʼe fakalogo ʼe te ʼAtua te ʼu faikole?
20 Ohage ko te ʼu meʼa kua tou mahino ki ai mai te kau ʼatolasio ʼa Sehova, ko Sehova ʼe fakalogo pe ki te ʼu faikole ʼaē ʼe ʼalu tahi mo tona finegalo. Ohage la ko te fenua ko Afelika ʼe tapuʼi ai te faka mafola ʼa te kau Fakamoʼoni ʼa Sehova, ko te pionie makehe neʼe folau ki ai ʼi te potu tokelau ʼi te kā mo te foʼi taga ʼe fafaʼo ai te ʼu tohi ʼo te Puleʼaga pea mo te ʼu sila. Ko te tagata taki ʼo te kā neʼe ina fehuʼi age ki te tehina: Koteā ʼaē ʼe fafaʼo ʼi te taga?” Neʼe hoko tali age pe ʼe te tehina te meʼa ʼi tona ʼatamai: “ko te meli.”
21 Neʼe vave foki te fakalaka ʼa te kā ʼi te ala ʼe fai ai te gāue ʼa te kau polisi, ʼo liu fakatuʼu ai te kā, heʼe natou mahalohalo ko te kā ʼe ina fetuku he ʼu meʼa kovi. Neʼe natou fekau ke hihifo fuli te kau folau ʼi te kā pea ke tu fuli tanatou ʼu pasikete. Ko he meʼa fakamanavahe! Neʼe ai te kiʼi ʼunuʼunu ʼa te tehina ʼi te ʼu hahaʼi, pea tuʼutuli ʼo faikole kia Sehova. ʼI tana hoho mai ki te kaugā malie, ko te ʼu pasikete fuli ʼa te kau folau neʼe fufuke fakalelei. ʼI te temi neʼe kamata avahi ai te taga ʼa te tehina, neʼe ina pāuʼi ʼi tona loto kia Sehova ke tokoni mai kia te ia.
22 “ ʼA ʼai te taga ʼaeni, pea koteā ʼaē ʼe fafaʼo ʼi loto?” ko te fehuʼi ʼaia ʼa te polisi. ʼE mole heʼeki tali mai e te tehina, kae tali age e te tagata taki ʼo te kā: “Ko te meli mai —te fale meli ki te—fale meli.” “Kua lelei”, ko te tali ʼaia ʼa te polisi. Pea ina toʼo te taga ʼo foaki age ki te tagata taki ʼo te kā. “Tokaga ʼo tuku fakalelei ki hona lapalasi”, ko te ʼui age ʼaia ʼa te polisi ki te tagata taki ʼo te kā. ʼO toe tuʼutuli aipe te pionie makehe ʼo fakamālo kia Ia ʼaē ʼe Fakalogo ki te ʼu faikole.—Pesalemo 65:2; Tāʼaga Lea 15:29.
23. Koteā ʼaē neʼe fakahā ʼe Sehova, pea he koʼe ʼe ina tuku ʼi ʼihi temi he ʼu fakataga?
23 ʼAua leva naʼa ʼui ko te kau ʼatolasio ʼa Sehova ʼe mole kei hoko kia natou he ʼu tuʼutamaki. ʼI ʼihi faʼahi, ʼi te temi ʼafea pea mo te temi nei, neʼe fakahā aipe ʼe Sehova ʼe ina faʼa haofaki tana hahaʼi. Kae, ki he feala ʼo he fakatokatoka ʼo te fehuʼi ʼaē ki te nofo agatonu, ʼe ʼiloga mai ia ʼe ina tautau tuku hoko te fakataga, ohage la ko te meʼa ʼaē neʼe hoko ki tona ʼAlo. (Fakatatau mo Mateo 26:39.) Logo aipe te maʼuliʼi fakalelei ʼo te Tohi-Tapu, ko Sehova ʼe mole ina haofaki tuʼumaʼu tana kau Fakamoʼoni ʼi he ʼu tuʼutamaki, he ʼu fihifihia tuʼulaga pe ʼe fakapo (Tāʼaga Lea 22:3; Tagata Tānaki 9:11). Tatau aipe, pe ʼe mole hāofaki tatou ʼi he faʼahiga meʼa, kae ʼe tonu ke tou falala ko tatatou agatonu ʼe toe fakapale aipe, pea kapau ʼe tou mate ʼe toe fakatuʼuake anai tatou.—Mateo 10:21, 22; 24:13.
24. Koteā te mōlaga ʼofa neʼe foaki ʼe Sehova, pea ʼe tou fakafetaʼi feafeaʼi ki tona ʼofa ʼaia?
24 Ko te ʼu mōlaga ʼofa ʼa Sehova ʼe taulekaleka! Neʼe ina foaki te kele pea mo meʼa fuli ʼe tuʼu ʼi ai, ko te fakahā ʼaia ʼo tona ʼofa (Pesalemo 104:1, 13-16; 115:16). ʼI tona manavaʼofa, neʼe ina mōlaga tona ʼAlo ko Sesu Kilisito, ke totogi ai te hahaʼi mai te agahala pea mo te mate, ko te mōlaga ʼofa ʼaia ʼe mole ʼi ai hona fakatatau aga. “Koʼeni te meʼa neʼe fakahā ai te ʼofa ʼo te ʼAtua kia tatou: neʼe fekauʼi mai ʼe te ʼAtua tona ʼAlo ʼulu tokotahi ki te malamanei, ke feala hatatou fakaʼau ki te maʼuli, māʼia te ia. Ko te ʼofa ʼi te faʼahi ʼaia, neʼe mole ko tatou ʼaē neʼe ʼofa ki te ʼAtua, ka ko ia ia ʼaē, neʼe ʼofa kia tatou pea mo ina fekauʼi mai tona ʼAlo ko he sakilifisio fai fakalelei moʼo ʼatatou ʼu agahala”. (1 Soane 4:9, 10). Ka ʼe tou fakafetaʼi ki te ʼofa ʼaia, ʼe tonu ke tou tui fakapapau ki te meʼa ʼaeni “ ʼe mole ʼi ai he mate, he maʼuli, he kau ʼaselo, he ʼu puleʼaga, mo he ʼu meʼa ʼo te temi nei, mo he ʼu meʼa ʼo te temi ka haʼu, mo he mālohi, mo he maʼoluga, mo he loloto, mo he tahi age meʼa ʼe ina faʼa fakamavae ia tatou mai te ʼofa ʼo te ʼAtua, ʼaē ʼe ʼia Sesu Kilisito totatou ʼAliki.”—Loma 8:38, 39.
Fakamanatu te alatike ʼaenī
◻ Koteā te ʼuhiga ʼo te agatonu?
◻ Ko te ʼu gāue fea ʼe feala ai hatatou fakafetaʼi kia Sehova?
◻ Koteā te ʼu meʼa maʼuhiga ʼo te tānaki ʼo te gāue ʼi te taʼu neʼe koutou fakatokagaʼi tāfito?
◻ ʼE feafeaʼi hatatou fakahā tatatou fakafetaʼi kia Sehova ʼo ʼuhiga mo tana ʼu mōlaga ʼofa?
[Talanoa ʼo te pasina 15]
HE KOʼE ʼE LAHI TE ʼU PIONIE?
Kua ʼosi ʼiloʼi pe foki, lolotoga taʼu e 2,600 ko te kau sapone neʼe natou tauhi fakamalotoloto ki tonatou tui. ʼI te ʼu tau ʼo te 20 sekulo, neʼe ko te tolu miliona sapone neʼe natou sakilifisioʼi tonatou maʼuli, heʼe ʼi tanatou manatu ko he fakaʼapaʼapa lahi ʼaia ʼe feala ke natou fai maʼa tonatou tui-ʼatua. Kae ko te kau tau Putisi-Sinitoisi neʼe natou lavā ʼi te II tau fakamalamanei, ʼo fakafisi ʼai te tui ki tona tuʼulaga ʼatua. Koteā ʼāe neʼe ina toe foaki kia natou ʼaia he ʼuhiga ki tonatou maʼuli? Ko te ʼu ako Tohi-Tapu ʼaē neʼe fai ʼe te kau Fakamoʼoni ʼa Sehova misionea pea mo ʼihi kau Fakamoʼoni ʼo te fenua pe ʼaia ʼo tokoni ki niʼihi ke natou mahino ki te moʼoni ʼo ʼuhiga mo te ʼAtua ko Sehova, pea mo foaki tonatou maʼuli kia te ia. Ko te mōlaga ʼaia ʼe maʼuhiga tāfito ki te kau Fakamoʼoni Sapone. ʼI muʼa atu neʼe lagi natou sakilifisioʼi tonatou maʼuli ki he tui-ʼatua, pea ʼi te temi nei kua toe lahi age tanatou sakilifisio ʼo ʼave fuli tonatou mālohi ʼo pionie ʼi tanatou tauhi ʼi tonatou maʼuli ki te ʼAtua he ko te Tupuʼaga ia ʼo te malamanei katoa—ia te ʼAliki Pule Maʼoluga Tokotahi ko Sehova!
[Tānaki ʼo te taʼu gāue, pasina 10-13]
1991 TĀNAKI ʼO TE GĀUE FAKA MALAMANEI ʼA TE KAU FAKAMOʼONI ʼA SEHOVA
(Vakaʼi te nusipepa)
[Paki ʼo te pasina 16]
Ko te ʼu kaumeʼa moʼoni ʼo te ʼateaina—kau atolasio ʼa Sehova ʼi te fakatahi ʼi Prague, mai te ʼaho 9 ki te ʼaho 11 ʼo ʼaukusito 1991