Tou Fakaafe Te Hahaʼi Ke Nātou Mulimuli Ki Te Tagata ʼAē ʼe Lahi Tokotahi

¹ Ohage ko tona fakamatala ia Mateo 5:14, neʼe ʼui fēnei e Sesu ki tana ʼu tisipulo: “Ko koutou ko te malama ʼo te malamanei.” Ko te kau tisipulo ʼa Sesu neʼe tonu ke nātou tala ki te hahaʼi ʼi te potu fuli pe, te Puleʼaga ʼo Sehova pea mo Tona fakatuʼutuʼu ʼofa ʼaē ke hāofaki te hahaʼi ʼaki ia Sesu. ʼE tou manatuʼi te fakatotonu ʼaia, ʼi te lolotoga ʼo te māhina ʼo Fepualio ʼaē ʼe tou tufa ai anai te tohi Te tagata ʼaē ʼe lahi tokotahi ʼo te ʼu temi fuli. Koʼeni he ʼu faʼahiga fakahā ʼo te tohi ʼaia ʼe lagi koutou fia fakaʼaogaʼi anai.

² ʼI takotou ʼosi fakahā age tokotou higoa, ʼe feala ke koutou fai te ʼu palalau ʼaenī:

◼ “Ko te tokolahi ʼe nātou feʼekeʼaki pe neʼe feafeaʼi ʼapē te maʼuli ʼa Sesu ʼi te kele. ʼI tau manatu, koteā te ʼu faʼahi ʼaē neʼe kehe ai Sesu mo te hahaʼi? [Koutou tuku ke ina fai hana tali.] Ko te tohi lelei ʼaupito ʼaenī, Te tagata ʼaē ʼe lahi tokotahi ʼo te ʼu temi fuli, ʼe ina fakamatala mai te ʼu meʼa maʼuhiga ʼaē neʼe hoko ʼi tona maʼuli pea mo tona minisitelio, pea ʼe ina fakahā mai pe neʼe ko te tagata feafeaʼi. Ko ʼihi, ʼi tanatou ʼosi lau te tohi ʼaenī, neʼe hage maʼa nātou neʼe nātou fakatahi totonu mo ia, mo nātou kau ki tona ʼu mamahi, pea mo sio tonu ki tona minisitelio.” Koutou fakahā age te ʼuluaki paki ʼo te tohi, ʼaē ʼe tuʼu ai te kupu tāfito. Koutou fuli age te ʼu ʼuluaki palalau ʼo te tohi, pea mo koutou lau age te lua palakalafe ʼo te kupu “Tou ako ke tou ʼiloʼi ia ia, ke fua lelei kia tatou.” Kapau ʼe ina tali lelei, pea koutou foaki age te tohi ki te 400.

³ Peʼe feala ke koutou ʼui fēnei:

◼ “Lolotoga te Po Tapu, ʼe manatu te hahaʼi kia Sesu. Kae, ʼi te kua lahi ʼaupito ʼo te ʼu meʼa kovi ʼaē ʼe hoko ʼi te malamanei katoa, ʼe feʼekeʼaki ʼihi peʼe tokaga moʼoni koa ia Sesu kia tatou. Koteā tau manatu ki te faʼahi ʼaia?” Koutou tuku ke ina fai he tali. Koutou fuli age te kapite 24 ʼo te tohi Te tagata ʼaē ʼe lahi tokotahi, pea koutou fakamahino fakanounou age pe koʼe neʼe haʼu Sesu ki te kele. Pea koutou lau age ia Soane 15:13, ʼo koutou fakahā lelei te ʼofa fakamalotoloto ʼa Sesu ki te hahaʼi. Koutou manatuʼi ʼo ʼave mo koutou te ʼu nusipepa foʼou, he kaupepa lahi, peʼe ko he kiʼi pepa lotu ke koutou foaki ki ai mokā fakafisi atu ki te tohi.

⁴ Koʼeni te tahi faʼahiga palalau:

◼ “Tokolahi te kau tūpulaga ʼe nātou kumi he faʼifaʼitaki lelei ke nātou mulimuli kiai, kae ʼe faigataʼa te maʼu ʼo he ʼu faʼifaʼitaki lelei. Neʼe tuku mai e Sesu Kilisito te faʼifaʼitaki haohaoa kia tatou fuli. [Koutou lau ia 1 Petelo 2:21.] Ko tona maʼuli katoa neʼe fakatafito ki te tauhi ʼaē ki tana Tāmai ʼaē ʼe ʼi selo. Koteā tau manatu mo kanapaula neʼe tokolahi te hahaʼi ʼaē neʼe nātou faiga ke nātou muliʼi tana faʼifaʼitaki?” Koutou tuku ke ina fai atu hana tali. Koutou fakaʼaogaʼi te fā palakalafe ʼo te pasina fakaʼosi ʼo te tohi, ʼaē ʼe talanoa ai ki tona ʼu kalitate makehe. Koutou fakamahino ki ai peʼe tokoni feafeaʼi mai te tohi Te tagata ʼaē ʼe lahi tokotahi ke tou liliu ko he kau Kilisitiano ʼe lelei age.

⁵ ʼE lagi koutou fia fakaʼaogaʼi te faʼahiga manatu ʼaenī:

◼ “Mokā talanoa he tahi kia Sesu Kilisito, ko te tokolahi ʼe nātou manatu ʼe ko he kiʼi tamasiʼi peʼe ko he tagata ʼe maʼuli mamahi he kua vave mate. ʼE gata pe tanatou mālama ki te fānauʼi ʼo Sesu pea mo tona mate. ʼI te agamāhani ʼe mole nātou ʼiloʼi te ʼu meʼa taulekaleka ʼaē neʼe talanoa kiai pea mo te ʼu meʼa ʼaē neʼe ina fai lolotoga tona maʼuli. Ko te ʼu meʼa ʼaē neʼe ina fai ʼe ʼi ai tona ʼuhiga kia tatou fuli ʼaē ʼe tou maʼuʼuli ʼi te kele. Koia la ʼaē ʼe maʼuhiga ai ke tou ako he tahi ʼu meʼa ʼo ʼuhiga mo te ʼu meʼa fakaofoofo ʼaē neʼe ina fai maʼa tatou.” Koutou lau ia Soane 17:3. ʼI te ʼu ʼuluaki palalau ʼo te tohi Te tagata ʼaē ʼe lahi tokotahi, koutou lau age te palakalafe fā. koutou foaki te tohi pea mo koutou fakamahino age peʼe feafeaʼi tona fakaʼaogaʼi ki te ako takitokotahi.

⁶ Tou tokaga ʼo tohi fakalelei te ʼu higoa ʼo nātou ʼaē ʼe fia logo pea mo te ʼu tohi ʼaē neʼe tou tufa ke feala ai hatatou fai te ʼu ʼaʼahi. ʼE kei maʼu totatou temi faigamālie, koia tou gāue lahi ʼo kumi te hahaʼi ʼaē ʼe fakamalotoloto, pea mo tokoni kia nātou ke nātou liliu ko he ʼu tisipulo ʼo totatou Fakamaʼuli, ko Sesu Kilisito.​—Mateo 16:⁠24.

ʼE Lava Feafeaʼi Ki He Famili Ke Felagolagoʼaki​—ʼI Te Ako Tohi-Tapu?

¹ ʼAki te moʼoni, ʼe maʼu e te maʼuli faka famili hona ʼuhiga moʼoni pea mo hona fakatuʼutuʼu, kae ʼe ʼi ai te ʼu meʼa ʼe tonu ke fai e te ʼu famili ke lava lelei tanatou tauhi kia Sehova. ʼE ʼaoga kiai he temi loaloaga pea mo he faiga lahi moʼo laga he loto fale ʼe mālohi ʼi te faʼahi fakalaumālie. ʼE ʼaoga ʼaupito ke gāue fakatahi te famili katoa ʼi te faʼahi ʼaia. Ko te ʼuluaki alatike ʼaenī ʼo te ʼu alatike e tolu, ʼe talanoa anai ki te ʼu famili, peʼe lava feafeaʼi ke nātou felagolagoʼaki moʼo fakatuputupu he ʼu agamāhani lelei ʼo ʼuhiga mo te ako.

² Koutou Lau Te Tohi-Tapu ʼi Te ʼAho Fuli: ʼE ʼui ia Tāʼaga Lea 24:5 ko “he tagata ʼe ʼatamai mālama, ʼe ina fakaʼāsili tona mālohi.” Ko te ʼatamai mālama ʼaē ʼe maʼu e he tahi ʼi tana lau tuʼumaʼu te Folafola ʼa te ʼAtua, ʼe ina maʼu ai te mālohi ʼaē ʼe ʼaoga kia ia moʼo tauʼi te ʼu ʼohofi ʼa Satana ʼi te faʼahi fakalaumālie. (Pes. 1:​1, 2) ʼE koutou lau fakatahi koa mo takotou famili te Tohi-Tapu ʼi te ʼaho fuli? ʼE tuʼu ʼi te Polokalama Ako ʼo Te Minisitelio Faka Teokalatike te “Polokalama ʼo Te Lau ʼo Te Tohi-Tapu” ki te vāhaʼa fuli ʼo te taʼu. Moʼo mulimuli kiai ʼe ko minuta pe e hogofulu ʼe ʼaoga ki te famili ʼi te ʼaho fuli moʼona lau. Koutou filifili te temi ʼaē ʼe lelei ai, ohage la ko te temi ʼinu kafe, peʼe ʼi te hili ʼo te kai afiafi, peʼe ʼi muʼa ʼo te moe, ʼo koutou lau ai te Tohi-Tapu pea mo vakaʼi te vaega ʼo te ʼaho ʼi te tohi Tou Vakaʼi Te Tohi-Tapu ʼi Te ʼAho Fuli. Koutou fai ke liliu te faʼahi ʼaia ko he meʼa māhani ʼe koutou fai ʼi te ʼaho fuli.

³ Koutou Ako Fakatahi ʼi Te Vāhaʼa Fuli: ʼI te vāhaʼa fuli, ʼe tonu ke maʼuhiga ki te famili tanatou ako te Tohi-Tapu. ʼE tonu ke lagolago fuli te famili kiai, ʼo nātou fai he ʼu tali fakamalotoloto ʼi te ako. Ko te pule famili ʼe ina vakaʼi anai te ʼu meʼa ʼaē ʼe ʼaoga ki tona famili, ʼo ina filifili te tohi ʼaē ka nātou ako pea mo te ʼaho, te hola pea mo te loaloaga ʼo te ako. Koutou fakamuʼamuʼa te ako faka famili ʼi takotou polokalama ʼo te vāhaʼa. ʼAua naʼa koutou tuku he ʼu meʼa ʼe mole maʼuhiga ke nātou tāʼofi te fai ʼo takotou ako faka famili.​—Filipe 1:​10, 11.

⁴ Neʼe telefoni tuʼumaʼu age te ʼu hahaʼi ki te tāmai, ʼuhi ko tana gāue, pea ko te meʼa ʼaē neʼe ina fai neʼe ina unuhi te kauʼi filo ʼo te telefoni lolotoga te temi ʼaē ʼe fai ai tanatou ako faka famili. Ka ʼōmai he ʼu hahaʼi ʼo ʼuhiga mo tana gāue, pea neʼe ina fakaafe nātou ke nātou kau ki te ako peʼe ke nātou atalitali ki tona fakaʼosi. Neʼe mole loto e te tāmai ke ʼi ai he meʼa ʼe ina fakaleluʼi tanatou ako faka famili. Neʼe malave mālohi te faʼahi ʼaia ki te loto ʼo tana fānau pea neʼe fua lelei tana fai ʼaia, ʼo toe fua lelei foki ki tana gāue.

⁵ ʼE ko he meʼa fakafiafia lahi mokā felagolagoʼaki te famili katoa ki te ʼu gāue fakalaumālie! Kapau ʼe tou agatonu ʼi tatatou faiga ʼaē ke tou kau ki te ako faka famili ʼo te Tohi-Tapu, pea ʼe tou maʼu ai anai te tapuakina ʼa Sehova.​—Pes. 1:⁠3.