“Koutou Nofo Teuteu”

¹ ʼI tana lea faka polofeta lahi ʼo ʼuhiga mo te fakaʼosi ʼo te tuʼu ʼo te ʼu faʼahiga meʼa ʼaenī, neʼe fakatokaga mai e Sesu ke ʼaua naʼa tou tokaga fau ki te ʼu meʼa māhani ʼo te maʼuli. (Mat. 24:36-39; Luka 21:34, 35) ʼE mole tou ʼiloʼi peʼe kamata anai ʼāfea te mamahi lahi, koia ʼaē ʼe maʼuhiga ai ke tou tokagaʼi te fakatotonu ʼaenī ʼa Sesu: “Koutou nofo teuteu, koteuhi e haele mai te Foha ʼo te tagata i te hola e mole koutou manatu ki ai.” (Mat. 24:44) Koteā ʼaē ʼe lava tokoni kia tatou ʼi te faʼahi ʼaia?

² Tou Tokakaga Ki Te ʼu Tuʼania Pea Mo Te ʼu Fakafiafia: ʼI te ʼu hele fakalaumālie ʼaē ʼe tonu ke tou tokaga kiai, ʼe kau ai “te ʼu tuʼania ʼo te maʼuli.” (Luka 21:34, MN ) ʼI ʼihi fenua, ʼuhi ko te masiva, te mole maʼu gāue, pea mo te totogi kovi ʼo te maʼuli, ʼe faigataʼa ai hakita maʼu te ʼu meʼa ʼaē ʼe ʼaoga ki tokita maʼuli. ʼI te tahi ʼu fenua, ʼe lahi te hahaʼi ʼaē ʼe maʼu koloā. Kapau ʼe kita kamata tuʼania fau ʼo ʼuhiga mo te ʼu koloā faka mālama, pea ʼe mole tou tokaga tāfito anai ki te ʼu moʼoni ʼo te Puleʼaga. (Mat. 6:19-24, 31-33) Ko te ʼu fono faka Kilisitiano, ʼe tokoni mai ke tou tokakaga tuʼumaʼu ki te ʼu faʼahi ʼaia. ʼE koutou fakatuʼutuʼu koa ke koutou kau ki te ʼu fono fuli?​—Hep. 10:24, 25.

³ Ia ʼaho nei, ʼe lahi te ʼu fakafiafia ʼi te mālama ʼe feala ke nātou kaihaʼa totatou temi maʼuhiga. Ko te fakaʼaogaʼi ʼo te olotinatea ʼe lava liliu ko he hele, mo kapau ʼe kita fakaʼaogaʼi he temi lahi ʼi te vakaʼi ʼo te Internet, mo lau pea mo momoli te ʼu e-mail, peʼe kita gaoʼi ʼaki te ʼu gaoʼi ʼo te olotinatea. ʼE lahi te ʼu hola ʼe feala hakita pulihi ʼi te sioʼi ʼo te televisio pea mo te ʼu ʼata, mo te fai ʼo te ʼu meʼa ʼaē ʼe kita manako ai, mo te lau ʼo te ʼu tohi ʼo te mālama pea mo te ʼu faigaoʼi, kae veliveli tokita temi pea mo tokita mālohi ki te ʼu meʼa fakalaumālie. Ko te ʼu fakafiafia pea mo te ʼu mālōlō ʼe nātou lava foaki mai he ʼu lelei faka temi, kae ko te ako Tohi-Tapu takitokotahi pea mo faka famili, ʼe ina foaki mai he ʼu lelei ʼe heʼegata. (1 Tim. 4:7, 8) ʼI te ʼaho fuli, ʼe ʼi ai koa hokotou temi moʼo metitasio ki te Folafola ʼa te ʼAtua?​—Ef. 5:15-17.

⁴ ʼE feala ke tou fakafetaʼi ki te kautahi ʼa Sehova, ʼi tana fakatuʼutuʼu he polokalama ako fakalaumālie, moʼo tokoni kia tatou ke ‘tou hāo ʼi te ʼu meʼa fuli ʼaē ʼe tonu ke hoko mai, pea mo tou tutuʼu ia muʼa ʼo te Foha ʼo te tagata’! (Luka 21:36) ʼOfa pe ke tou mulimuli lelei ki te ʼu fakatuʼutuʼu fakalaumālie ʼaia pea mo ‘tou nonofo teuteu’ ke feala ki tatatou tui ke liliu “ko he meʼa ke vikiʼi, mo faka kolōliaʼi, pea mo faka maʼuhigaʼi ʼi te temi ʼo te fakahā ʼo Sesu Kilisito.”​—1 Pet. 1:7, MN.

Te ʼu Fakavikiviki ʼe Fakaloto Fiafia

¹ Neʼe tagi te kiʼi taʼahine ʼi tana palepale ʼo ina ʼui fēnei: “Neʼe mole ʼau agalelei koa ʼi te ʼaho nei?” Neʼe punamaʼuli tana faʼe ki te fehuʼi ʼaia. Logola neʼe ina tokagaʼi te faiga mālohi ʼo tana kiʼi taʼahine ke mole pago ʼi te ʼaho ʼaia, kae neʼe mole ina fai pe la he palalau fakavikiviki e tahi kia ia. Ko te tagi ʼa te kiʼi taʼahine ʼaia, ʼe ina fakamanatuʼi mai, ʼe ʼaoga he fakavikiviki kia tatou fuli, tūpulaga pea mo matutuʼa. ʼE tou fakaloto fiafia koa ia nātou ʼo te kokelekasio ʼaki he ʼu fakavikiviki ki te ʼu gāue lelei ʼaē ʼe nātou fai?​—Taag. 25:11.

² ʼE lahi te ʼu tupuʼaga lelei ke tou fakavikiviki ai ki totatou ʼu tēhina mo tuagaʼane ʼi te tui. Ko te kau tagata ʼāfea, te kau faifekau faka minisitelio, pea mo te kau pionie, ʼe nātou gāue kinakina moʼo fakahoko tanatou ʼu gāue. (1 Tim. 4:10; 5:17) Ko te ʼu mātuʼa ʼaē ʼe manavasiʼi ki te ʼAtua, ʼe nātou faiga mālohi ke nātou akoʼi ki tanatou fānau te ʼu ala ʼo Sehova. (Ef. 6:4) Ko te kau Kilisitiano tūpulaga ʼe nātou faiga mālohi ke nātou tekeʼi “te manatu ʼo te mālama ʼaenī.” (1 Ko. 2:12, MN; Ef. 2:1-3) Ko ʼihi, logola kua nātou matutuʼa, peʼe nātou mahahaki, peʼe nātou tau mo he tahi ʼu fihifihia, kae ʼe nātou tauhi agatonu pe kia Sehova. (2 Ko. 12:7) ʼE tonu ke tou fakavikiviki kia nātou fuli ʼaia. ʼE tou ʼiloʼi koa tanatou ʼu faiga pea mo tou fakavikiviki kia nātou?

³ He ʼu Fakavikiviki Kia Nātou Takitokotahi: Ko tatou fuli ʼe tou leleiʼia mokā tou logo ki he ʼu fakavikiviki ʼe fai mai muʼa. Kae ʼe toe fakaloto fiafia age mokā fai mai kia kita totonu. Ohage la, ʼi te kapite 16 ʼo te tohi ʼa Paulo ki te kau Loma, neʼe fakahā lelei e Paulo tana ʼu fakavikiviki ʼo ʼuhiga mo Foepene, mo Pilisika pea mo Akila, mo Tolufano mo Tufosa, pea mo Pelesita. (Loma 16:1-4, 12) ʼE mahino ia neʼe fiafia te ʼu hahaʼi agatonu ʼaia ʼi tanatou logo ki te ʼu palalau ʼaia! ʼAki te ʼu fakavikiviki ʼaia ʼe ʼiloʼi ai e totatou ʼu tēhina mo tuagaʼane ʼe nātou ʼaoga pea ʼe feala ai hatatou toe ōvi age kia nātou. ʼE ʼi ai koa he tahi neʼe koutou fai ki ai he ʼu fakavikiviki ʼi te ʼu ʼaho ʼaenī?​—Ef. 4:29.

⁴ He ʼu Fakavikiviki Fakamalotoloto: Ke fakaloto fiafia moʼoni te ʼu fakavikiviki, ʼe tonu ke fakamalotoloto. ʼE ʼiloʼi e te hahaʼi mokā kita fai he fakavikiviki fakamalotoloto peʼe ka kita ‘fai he ʼu laupisi.’ (Taag. 28:23) Kapau ʼe tou faigaʼi ke tou tokagaʼi te ʼu kalitate ʼa ʼihi, ʼe faigafua anai ki totatou loto ke ina fai he ʼu fakavikiviki. ʼAua naʼa tou fakatātāʼofi ʼi te fai ʼo he ʼu fakavikiviki fakamalotoloto, heʼe tou ʼiloʼi ko “he palalau ʼi tona temi totonu, ʼe ko he meʼa lelei!”​—Taag. 15:23.