ʼE Lava Feafeaʼi Ki Te Kau Kilisitiano Ke Nātou Logo Tahi Moʼoni?

¹ Koteā ʼaē ʼe logo tahi ai te toko ono miliona tupu hahaʼi mai te ʼu fenua e 234 pea mo lea e 380? Ko te tauhi ʼaē kia Sehova ʼAtua. (Mik. 2:12; 4:1-3) ʼAki te ʼu fetogi ʼaē kua hoko ʼi tonatou maʼuli, kua mahino ki te kau Fakamoʼoni ʼa Sehova ko te logo tahi faka Kilisitiano ʼe hoko moʼoni ia ʼaho nei. ʼUhi ko tatou ko te “faga ōvi pe e tahi” ʼe tou fakalogo ki te “tagata tauhi ōvi pe e tahi,” ʼe tou loto mālohi ai ke tou teteke te manatu fakatupu maveuveu ʼo te mālama ʼaenī.​—Soa. 10:16, MN; Ef. 2:2.

² Ko te fakatuʼutuʼu ʼaē ka fakahoko moʼoni anai e te ʼAtua, ko tana fakaliliu tana ʼu fakatupu popoto fuli, ke nātou logo tahi ʼi te tauhi moʼoni. (Apk. 5:13) ʼI tana ʼiloʼi te maʼuhiga ʼo te faʼahi ʼaia, neʼe faikole tāfito ia Sesu ke logo tahi tana kau tisipulo. (Soa. 17:20, 21) ʼE lava feafeaʼi kia tatou takitokotahi ke tou lagolago ki te logo tahi ʼa te kokelekasio faka Kilisitiano?

³ ʼE Fakahoko Feafeaʼi Te Logo Tahi: Kapau ʼe mole maʼu e te kau Kilisitiano te Folafola ʼa te ʼAtua pea mo tona laumālie, pea ʼe mole feala ke nātou logo tahi. Ka tou maʼuliʼi te ʼu meʼa ʼaē ʼe tou lau ʼi te Tohi-Tapu pea ʼe tou tuku ai te laumālie ʼo te ʼAtua ke gāue lahi ʼi totatou maʼuli, pea ʼe ina faka fealagia mai ke tou “taofi te faifaitahi o te Laumalie aki te noo o te tokalelei.” (Ef. 4:3) ʼE ina ʼeke tatou ke tou fekātakiʼaki ʼi te ʼofa. (Kol. 3:13, 14; 1 Pet. 4:8) ʼE koutou lagolago koa ki te logo tahi ʼaki takotou metitasio ki te Folafola ʼa te ʼAtua ʼi te ʼaho fuli?

⁴ Ko te fakatotonu ʼaē ke tou fai faka mafola pea mo fai he ʼu tisipulo ʼe toe tokoni mai ke tou logo tahi. Ka tou gāue mo ʼihi ʼi te minisitelio faka Kilisitiano, ʼo tou “tau fakatahi maʼa te tui ʼo te logo lelei,” pea ʼe tou liliu ko he ʼu “kauga gaue i te mooni.” (Filp. 1:27, MN; 3 Soa. 8) Ka tou fai te faʼahi ʼaia, pea ʼe fakaloto mālohi ai te ʼu noʼo ʼo te ʼofa ʼaē ʼe tupu ai te logo tahi ʼi te kokelekasio. He koʼe ʼe mole koutou kole ki he tahi kua fualoa takotou mole heʼeki gāue mo ia, ke koutou kaugā fai faka mafola ʼi te vāhaʼa ʼaenī?

⁵ ʼE ko he pilivilesio lahi ia ʼaho nei tatatou kau ki te fale tautēhina faka malamanei ʼaē ʼe moʼoni tokotahi ʼi te kele! (1 Pet. 5:9) Mole heʼeki faʼa fualoa, tokolahi neʼe nātou sio mata ki te logo tahi faka malamanei ʼi te Fakatahi Faka Malamanei ʼaē ko tona kupu tāfito “Koutou Faka Kolōlia Ki Te ʼAtua.” ʼOfa pe ke tou lagolago takitokotahi ki te logo tahi maʼuhiga ʼaia, ʼaki tatatou lau te Folafola ʼa te ʼAtua ʼi te ʼaho fuli, mo tou fakatokatoka te ʼu fihifihia ʼi te ʼofa, pea mo faka mafola te logo lelei “ ʼaki he loto e tahi.”​—Loma 15:6, MN.

Tou Kumi Te Hahaʼi ʼAē ʼe Tāu Mo Nātou

¹ Ko te ʼu fakatotonu ʼa Sesu ke fakahoko te gāue fai faka mafola ʼe lagi faigataʼa kia tatou. Neʼe ina ʼui fēnei: “ ʼI he kolo lahi, pe ko he kolo veliveli ʼe koutou hū kiai, koutou kumi pe ko ai ʼaē ʼe tāu mo ia.” (Mat. 10:11, MN ) Kua tahitahiga te maʼu atu ʼa te hahaʼi ʼi tonatou ʼapi. Koia, koteā ʼaē ʼe tou lava fai ke fua lelei tatatou kumi ʼo nātou?

² Koutou Vakavakaʼi Takotou Telituale: ʼUluaki, koutou vakavakaʼi takotou telituale. Ko te temi fea ʼaē ʼe nonofo ai te hahaʼi ʼi tonatou ʼapi? Kofea ʼaē ʼe tou lava maʼu ai nātou lolotoga te ʼaho? ʼE ʼi ai koa he ʼaho ʼi te vāhaʼa peʼe ko he hola ʼi te ʼaho ʼaē ʼe feala ke nātou tali lelei ai tatou? Koutou fetogi takotou minisitelio ʼo mulimuli ki te ʼu agamāhani pea mo te ʼu ʼaluʼaga ʼo te hahaʼi ʼo tokotou telituale, pea ʼe koutou sio anai ʼe ʼi ai tona ʼu fua.​—1 Ko. 9:23, 26.

³ Tokolahi te kau fai faka mafola neʼe fua lelei tanatou maʼu te hahaʼi ʼi te afiafi. Ko ʼihi hahaʼi ʼi tonatou loto fale ʼe nātou tokalelei pea mo nātou fia logo ʼi te temi ʼaia. Ka hoko mai te temi ʼaē ʼe tō vave ai te afiafi, pea ʼe lagi lelei anai te fai faka mafola ʼi te telefoni (ʼi te ʼu potu ʼaē ʼe fakagafua ai). Ko te gāue ʼi te telituale ʼo te ʼu matani gāue pea mo fai faka mafola ʼi te ʼu koga meʼa ʼaē ʼe kaugamālie ai te hahaʼi, ʼe ko te tahi faʼahiga fai ʼaia ke logo te hahaʼi ki te logo lelei.

⁴ Lolotoga te māhina ʼaē neʼe fai ai te faka mafola makehe, neʼe fakatuʼutuʼu e te kokelekasio ke nātou fai faka mafola ʼi te ʼu afiafi ʼo te ʼu Moeaki pea mo te ʼu ʼAhotapu, pea mo te ʼu pōʼuli ʼo te ʼu Feliafā pea mo te ʼu Felianima. Neʼe nātou fai te tahi fakatuʼutuʼu ko te fai faka mafola ʼi te telefoni pea mo nātou gāue ʼi te telituale ʼo te ʼu matani gāue. Neʼe fiafia ʼaupito tanatou minisitelio ʼaki te ʼu fakatuʼutuʼu ʼaia, koia neʼe fakatotonu ai e te kokelekasio ke nātou haga fai te ʼu fakatuʼutuʼu ʼaia.

⁵ Tou Faiga Mālohi ʼo ʼAʼahi Te Hahaʼi: Kapau ʼe faigataʼa ʼi takotou telituale te maʼu ʼo te hahaʼi mokā koutou toe ʼaʼahi nātou, koutou faiga ʼi te ʼu temi fuli ʼaē ʼe koutou palalau ai mo he tahi, ke koutou fakatuʼutuʼu lelei te ʼaho ʼaē ka koutou toe liliu age, māʼia pe la ʼi takotou ʼuluaki fai palalau mo ia. Pea koutou ʼolo ki ai ʼi te ʼaho ʼaē neʼe koutou fakatuʼutuʼu kiai. (Mat. 5:37) Kapau ko he meʼa ʼe feala, koutou kole ki ai tona numelo telefoni. ʼE toe tokoni atu anai ke koutou toe maʼu ia ia.

⁶ ʼE koutou maʼu moʼoni anai te ʼu tapuakina mai ia Sehova, ʼi takotou ʼu faiga mālohi ʼaia moʼo kumi te hahaʼi ʼaē ʼe tāu mo nātou, pea mo taupau tanatou fia logo ki te logo lelei.​—Taag. 21:5.