Koutou Tokaga ʼo Fakaʼaogaʼi Lelei Tokotou Temi

1. Ia ʼaho nei, ko te fihifihia fea ʼaē ʼe tau mo te hahaʼi ʼi te potu fuli pe?

¹ Ia ʼaho nei ʼe lahi te ʼu masini hila ʼe nātou faka faigafua tatatou gāue, kae ʼe hage ʼe toe lahi age te ʼu meʼa ʼaē ʼe tonu ke fai pea mole feʼauga he temi moʼona fai. ʼE faigataʼa koa hakotou taupau he polokalama moʼo fai takotou ʼu maʼua fakalaumālie? ʼE koutou loto koa ke lahi age tokotou temi ʼi te minisitelio? Koteā koa ʼaē ʼe tonu ke tou fai ke feala hatatou fakaʼaogaʼi lelei totatou temi?​—Pes. 90:12; Filp. 1:9-11.

2, 3. Ko te ʼu fihifihia fea ʼaē ʼe hoko ʼaki te ʼu meʼa hila foʼou kehekehe ʼaē kua faʼu, pea koteā ʼaē ʼe tonu ke tou vakaʼi ʼo ʼuhiga mo tatou takitokotahi?

² Koteā Te ʼu Meʼa ʼAē ʼe Fakapuli Temi? Ko tatou fuli, ʼe tonu ke tou vakavakaʼi ʼi te temi fuli peʼe tou fakaʼaogaʼi feafeaʼi totatou temi. ʼE fai mai e te Tohi-Tapu te fakatokaga ʼaenī: “Koutou tokakaga fakalelei ki takotou faʼahiga haʼele: ke mole hage ko he kau vavale, kae ke hage ko ni kau popoto, ʼo koutou [fakaʼaogaʼi lelei] te temi faigamālie, heʼe kua kovi te ʼu ʼaho.” (Ef. 5:15, 16, MN ) Koutou fakakaukauʼi ki te ʼu fihifihia ʼaē ʼe hoko ʼaki te ʼu meʼa hila foʼou kehekehe ʼaē kua faʼu. ʼE ʼaoga te ʼu olotinatea pea mo te tahi ʼu masini hila, kae ʼe feala ke nātou liliu ko he ʼu hele mo kapau ʼe mole tou tokakaga ʼo fakaʼaogaʼi lelei totatou temi.​—1 Ko. 7:29, 31.

³ Tou fai kia tatou takitokotahi ia te fehuʼi ʼaenī: ‘ ʼI te ʼaho fuli, ʼe ʼau fakaʼaogaʼi koa toku temi moʼo lau pea mo tali ki te ʼu e-mail ʼaē ʼe mole hona ʼaoga? ʼE ko he agamāhani koa haku fai telefoni peʼe ʼau momoli ʼi te olotinatea he ʼu logo ʼo ʼuhiga mo he ʼu meʼa ʼe mole maʼuhiga? (1 Tim. 5:13) ʼE ʼau hoko fakaʼaogaʼi koa te Internet, peʼe ʼau hoko sioʼi koa te ʼu ʼata kehekehe ʼo te televisio? Kua kaihaʼa koa e te ʼu gaoʼi viteo, toku temi ako ʼo te Folafola ʼa te ʼAtua?’ Kapau ʼe mole tou tokakaga, pea ʼe feala māmālie ki te ʼu meʼa ʼaia ke nātou maumauʼi totatou maʼuli fakalaumālie.​—Taag. 12:11.

4. Koteā te fetogi ʼaē neʼe fai e te tūpulaga, pea koteā tona tupuʼaga?

⁴ Tou Fakaʼaogaʼi Fakapotopoto Totatou Temi: Ko te meʼa ʼaē ʼe tau hoko ʼaki te ʼu meʼa hila foʼou, ko tatatou fakaʼaogaʼi lahi kiai totatou temi pea mo tatatou tokakaga tāfito kiai. Neʼe ʼui fēnei e te tūpulaga neʼe manako ki te ʼu gaoʼi ʼi te olotinatea: “ ʼI ʼihi temi, kapau neʼe ʼau gaoʼi ʼi muʼa ʼo taku ʼalu ʼo fai faka mafola peʼe ko he fono faka Kilisitiano, neʼe faigataʼa ʼaupito haku fakalogo lelei. Tuʼumaʼu pe neʼe ʼau manatu, kapau ʼe ʼau toe liliu ki toku ʼapi, ʼe feafeaʼi anai haku fakaʼosi te gaoʼi ʼaē neʼe ʼau kamata. Neʼe mole kei ʼau fai fakalelei taku ako Tohi-Tapu pea mo tona lau tuʼumaʼu. Neʼe kua fakahaʼuhaʼu ʼo puli taku fiafia ʼi te tauhi ki te ʼAtua.” ʼI tana sio ʼaē neʼe tonu ke ina fai he ʼu fetogi ʼi te faʼahi ʼaia, neʼe ina pulihi tana ʼu gaoʼi fuli ʼi te olotinatea.” ʼE ina ʼui fēnei: “Neʼe faigataʼa ʼaupito taku fai ia te faʼahi ʼaia. Neʼe mole ʼau tokagaʼi, kae neʼe kua ʼau manako ʼaupito ki taku ʼu meʼa gaoʼi ʼaia. Kae ʼe ʼau ʼiloʼi ʼe ko haku mālo lahi, he neʼe ko he puleʼaki lelei ʼaē neʼe ʼau fai.”​—Mat. 5:29, 30.

5. Ko te puleʼaki fea ʼaē ʼe tou lava fai moʼo fai tatatou ʼu gāue fakalaumālie, pea koteā anai tona ʼu fua lelei kia tatou?

⁵ ʼE lagi tonu anai ke koutou fai he ʼu tonu feiā mo kapau ʼe ʼi ai he ʼu faʼahi ʼe tonu ke koutou fetogi. ʼI te ʼaho fuli, ʼe feala koa ke koutou fakaʼaogaʼi lelei age he vaeluaʼi hola ʼi takotou ʼu gāue ʼaē ʼe mole faʼa maʼuhiga? ʼE fakafuafua, ʼaki te temi ʼaia ʼe feala hakotou lau te Tohi-Tapu katoa ʼi te taʼu e tahi. ʼE koutou maʼu ai anai he ʼu tapuakina lahi ʼi te faʼahi fakalaumālie! (Pes. 19:7-11; 119:97-100) Koutou fakatuʼutuʼu he temi moʼo lau ia te Tohi-Tapu, moʼo teuteuʼi te ʼu fono, pea mo te minisitelio. (1 Ko. 15:58) Kapau ʼe koutou fai feiā, ʼe mole koutou maumauʼi anai tokotou temi, pea ʼe feala anai hakotou “haga mahino pe koteā te finegalo ʼo Sehova.”​—Ef. 5:17, MN.

He ʼu Manatu ʼo ʼUhiga Mo Te ʼu Nusipepa

Te Tule Leʼo ʼaho 15 ʼo San.

“Ia ʼaho nei, kua faigataʼa tatatou falala ki te hahaʼi, koteʼuhi neʼe lahi tanatou ʼu fakapapau neʼe mole fakahoko. ʼI tau manatu, ʼe ʼi ai koa he tahi ʼe feala ke tou falala ki tana ʼu fakapapau? [Tuku ke fai mai hana tali. ʼOsi ʼaia, pea koutou lau age ia Sosue 23:14.] Ko te nusipepa ʼaenī ʼe ina fakahā mai peʼe tou lava fakatupu feafeaʼi tatatou falala ki te ʼu fakapapau ʼa te ʼAtua ʼaē ʼe tuʼu ʼi te Tohi-Tapu.”

Réveillez-vous! ʼaho 22 ʼo San.

“ ʼI te lea faka Hepeleo ʼe tohi fēnei te huafa ʼo te ʼAtua. [Fakahā age te takafi ʼo te nusipepa.] Ko ʼihi ʼe nātou tui mālohi ʼe mole tonu ke fakaʼaogaʼi te huafa ʼaia. Ko ʼihi ʼe nātou fakaʼaogaʼi lahi. Ko te Réveillez-vous! ʼaenī ʼe talanoa ʼo ʼuhiga mo te ʼu faʼahi ʼaia. ʼE toe talanoa foki ki te faʼahi ʼaē ʼe tonu ke tou fai, ke feala hatatou ʼiloʼi te huafa ʼo te ʼAtua.” Lau age ia Pesalemo 83:18.

Te Tule Leʼo ʼaho 1 ʼo Fep.

“Ko te tokolahi ʼo tatou ʼe tou faiga ke tou taupau lelei totatou maʼuli fakasino. Kae ʼe mole heʼeki faʼa fualoa, neʼe fai te ʼu sivi ʼe nātou fakahā ai, ko te lelei ʼo totatou maʼuli fakasino ʼe ʼi ai tona pikipikiga mo totatou maʼuli fakalaumālie. ʼI tau manatu ʼe moʼoni koa te manatu ʼaia? [Tuku ke fai mai hana tali. Pea koutou lau age ia Mateo 5:3.] Ko Te Tule Leʼo ʼaenī ʼe ina fakamahino mai peʼe feafeaʼi hatatou maʼu te ʼu meʼa ʼaē ʼe ʼaoga kia tatou ʼi te faʼahi fakalaumālie.”

Réveillez-vous! ʼaho 8 ʼo Fep.

“Ko te tokolahi ia ʼaho nei ʼe nātou maʼumaʼua ʼaupito ʼi tanatou ʼu gāue, kae ʼe tonu ke maʼu honatou temi mālōlō. E lagi tatau anai tau manatu mo te ʼu palalau ʼaenī neʼe tohi kua hili kiai taʼu e 3 000. [Lau age ia Tagata Tānaki 4:6. Tuku ke fai mai hana tali.] Ko te Réveillez-vous! ʼaenī ʼe ina tuku mai he ʼu tokoni ʼaoga ke tou ʼiloʼi pe koʼe ʼe faigataʼa tatatou momoe pea mo ina tuku mai tona ʼu puleʼaki.”