Tou Foaki Kia Sehova Te ʼu Meʼa Lelei ʼAupito ʼAē ʼe Tou Maʼu

¹ Neʼe ʼui ʼi te Lao ʼaē neʼe foaki e Sehova ki te kau Iselaele, ko te ʼu manu ʼaē neʼe nātou sakilifisioʼi neʼe tonu ke “heʼe mele.” Neʼe mole tali te manu ʼaē neʼe ʼi ai hana mele. (Lev. 22:18-​20; Mala. 1:​6-9) Tahi ʼaē meʼa, ka nātou fai he sakilifisio, ko te gako fuli​—te koga ʼaē ʼe lelei ʼaupito​—neʼe tonu ke foaki kia Sehova. (Lev. 3:​14-​16) ʼI tona ʼuhiga Tāmai pea mo ʼAliki Lahi ʼo Iselaele, neʼe tonu ke foaki kia Sehova te ʼu meʼa ʼaē ʼe lelei ʼaupito.

² Ohage ko te temi muʼa, ʼe tokagaʼi e Sehova peʼe feafeaʼi te ʼu mōlaga ʼaē ʼe tou foaki age kia te ia ia ʼaho nei. ʼE tonu ke hā ʼi tatatou gāue, tatatou fakaʼapaʼapa ʼaupito kia Sehova. ʼE moʼoni, ʼe kehekehe totatou ʼu ʼaluʼaga. Kae ʼe tonu ke tou vakavakaʼi lelei ia tatou totonu ke tou ʼiloʼi papau peʼe tou foaki kia te ia te ʼu meʼa lelei ʼaupito ʼaē ʼe tou maʼu.​—Ef. 5:​10.

³ He Gāue ʼAki He Loto Katoa: Kapau ʼe tou fia faka maʼuhigaʼi ia Sehova ʼi tatatou minisitelio, pea mo malave ki te loto ʼo te hahaʼi ʼaē ʼe tou palalau ki ai, pea ʼe tonu ke tou tokaga ʼo fai ʼaki totatou loto katoa, mo he loto fakafetaʼi ki totatou ʼAtua pea mo tana ʼu fakatuʼutuʼu lahi. (Pes. 145:7) Koia ʼe maʼuhiga ai kia tatou takitokotahi, ke tou fai fakalelei hatatou polokalama moʼo lau pea mo ako ia te Tohi-Tapu.​—Taag. 15:28.

⁴ Ko te foaki kia Sehova te ʼu meʼa lelei ʼaupito ʼaē ʼe tou maʼu, ʼe toe faka ʼuhiga ke tou faʼifaʼitaki ki tana ʼofa ki te hahaʼi. (Ef. 5:​1, 2) Ko te ʼofa ki te hahaʼi, ʼe ina uga anai tatou ke tou faigaʼi mālohi ke tou fakakaku ki te tokolahi, te logo ʼo te moʼoni ʼaē ʼe ina foaki te maʼuli. (Mko. 6:​34) Ko te ʼofa ʼaia ʼe ina fakaloto mālohiʼi tatou ke tou ʼoʼofa ki te hahaʼi ʼaē ʼe tou fai faka mafola ki ai. ʼE ina toe uga tatou ke tou manatuʼi nātou ʼi tatatou mavae pea mo tou foimo liliu ʼo ʼaʼahi nātou. ʼE ina uga tatou ke tou faiga mālohi ʼo tokoni kia nātou ke nātou tuputupu lelei ʼi te faʼahi fakalaumālie.​—Gaue 20:24; 26:28, 29.

⁵ “He Sakilifisio Fakavikiviki”: Ko te tahi ʼaluʼaga ʼe tou foaki ai kia Sehova te ʼu meʼa lelei ʼaupito ʼaē ʼe tou maʼu, ʼe ko tatatou gāue lelei ʼi te minisitelio. Kapau ʼe tou fakatuʼutuʼu lelei tatatou minisitelio pea mo tou tokaga tāfito kiai, pea ʼe feala anai hatatou fai he ʼu gāue lahi ʼi te temi ʼaē ʼe tou fealagia ai. (1 Tim. 4:​10) Kapau ʼe tou teuteuʼi lelei te gāue, pea ʼe tou fai anai he ʼu fakamahino lelei ʼe tou tui papau kiai, pea ʼe feala anai ke tali leleiʼi. (Taag. 16:21) ʼI tatatou faka mafola ia te logo lelei ki te hahaʼi, ʼe feala hatatou ʼui papau ko tatatou ʼu loto fakafetaʼi ʼe ko “he sakilifisio fakavikiviki.”​—Hep. 13:15, MN.

Kau Tūpulaga​—Koutou Lau Te Folafola ʼa Te ʼAtua!

¹ Ko te temi tūpulaga ʼe ko he temi faigataʼa, pea ʼe ʼi ai te ʼu tonu maʼuhiga ʼe tonu ke koutou fai. ʼI te ʼaho fuli, ko koutou kau tūpulaga Kilisitiano ʼe koutou felāveʼi mo te ʼu fakahala ke koutou maumauʼi ai takotou agatonu ki te ʼAtua. ʼI muʼa ʼo hakotou fai he ʼu tonu ʼo ʼuhiga mo te ako, mo te gāue pea mo te ʼohoana, ʼe tonu ke koutou ʼuluaki fai hakotou ʼu fakatuʼutuʼu fakalaumālie. Kapau ʼe koutou fai feiā, pea ʼe koutou maʼu anai he ʼu tapuakina ʼi tokotou maʼuli. Ko he ʼu fakatuʼutuʼu fakalaumālie kua tukupau, ʼe tokoni atu anai ke koutou aga fakapotopoto pea ke fua lelei tokotou maʼuli. Kapau ʼe koutou lau pea mo metitasio tuʼumaʼu ki te Folafola ʼa te ʼAtua, pea ʼe tupu anai hakotou fia mulimuli ki te ʼu tokoni fakaʼatua, pea ʼe tapuakinaʼi anai takotou faiga.​—Sos. 1:8; Pes. 1:​2, 3.

² Koteā Anai Tona ʼAoga Kia Koutou? ʼI te mālama ʼa Satana, ʼe lahi ai te ʼu fakahala moʼo fakaneke ʼo koutou ki te ʼu meʼa ʼaē ʼe kovi. (1 Soa. 2:​15, 16) ʼE lagi koutou ʼiloʼi hokotou ʼu kaugā ako peʼe ko he tahi kau tūpulaga neʼe hoko kia nātou he ʼu faigataʼaʼia he neʼe mole nātou lava teteke te ʼu fakahala ʼo tonatou ʼu kaumeʼa. Kae kapau ʼe koutou mulimuli ki te ʼu tokoni ʼa te Tohi-Tapu, pea ʼe koutou maʼu ai anai te mālohi fakalaumālie moʼo teteke te agahala. Tahi ʼaē meʼa, ko te ʼu tokoni ʼa te Folafola ʼa te ʼAtua ʼe lava tokoni atu ke koutou fakamamaʼo mai te ʼu kākā ʼa Satana. (2 Ko. 2:​11; Hep. 5:​14) Kapau ʼe koutou haʼele ʼi te ʼu ala ʼa te ʼAtua, pea ʼe koutou fiafia moʼoni anai ʼi tokotou maʼuli.​—Pes. 119:​1, 9, 11.

³ Ko te ʼu pelesepeto heʼegata ʼa te Folafola ʼa te ʼAtua, ʼe laka age ia ʼi te poto fakatagata. (Pes. 119:98-​100) Kapau ʼe koutou ʼiloʼi lelei te ʼu pelesepeto ʼa te Tohi-Tapu, mo koutou metitasio ki te ʼu fakatuʼutuʼu ʼaē neʼe fakahā mai e Sehova, pea mo koutou faikole fakamalotoloto, ʼe feala ai anai hakotou felogoi lelei mo Sehova ʼAtua, te Tupuʼaga ʼo te poto katoa ʼaē ʼe maʼu ʼi te Tohi-Tapu. ʼE ina fakapapau fēnei mai: “ ʼE ʼau fakaliliu anai koe ko he tahi ʼe fakasiosio tonu pea ʼe ʼau akoʼi anai koe ʼi te ala ʼaē ʼe tonu ke ke haʼele ai. ʼE ʼau tokoniʼi anai koe, ʼo sio maʼu toku mata kia te koe.”​—Pes. 32:8.

⁴ Koutou Fakatuʼutuʼu Hokotou Temi Moʼo Lau Te Tohi-Tapu: Ko te finemui Kilisitiano neʼe ina fakatuʼutuʼu ke ina lau te Tohi-Tapu katoa, pea neʼe ina lau katoa ʼi te taʼu e tahi. Koteā te ʼu fua lelei neʼe ina maʼu ai? ʼE ina ʼui fēnei: “Neʼe lahi te ʼu meʼa neʼe ʼau ako ai ʼo ʼuhiga mo Sehova​—pea ko te ʼu meʼa ʼaia neʼe nātou fakaōvi ʼau kia te ia, pea mo fakatupu hoku loto manavasiʼi kia te ia ʼi toku maʼuli katoa.” (Skp. 4:8) Kua koutou lau koa te Tohi-Tapu katoa? Kapau ʼe mole heʼeki koutou fai ia te faʼahi ʼaia, he koʼe koa ʼe mole koutou fakatuʼutuʼu ke koutou fai te faʼahi ʼaia? ʼE mahino ia, ko Sehova ʼe ina tapuakina anai takotou ʼu faiga, pea ʼe koutou maʼu anai he ʼu fakapale lahi.