Te Fai Faka Mafola ʼi Te ʼu Telituale ʼo Te ʼu Matani Gāue

1. He koʼe ʼe lelei te fai faka mafola ʼi te ʼu fale gāue ʼo totatou telituale?

¹ ʼE koutou fia fai faka mafola koa ʼi he telituale ʼe tali lelei ai koutou e te hahaʼi pea mo koutou maʼu tuʼumaʼu ni ʼu hahaʼi? ʼE feala ke koutou maʼu te ʼu ʼaluʼaga ʼaia ʼi tokotou telituale. ʼO feafeaʼi? Kapau ʼe koutou ʼaʼahi te ʼu fale gāue ʼaē ʼe tuʼu ʼi tokotou telituale. ʼI te agamāhani ʼe maʼu e te kau fai faka mafola he ʼu fua lelei ʼi tanatou gāue ʼi te ʼu fale gāue.

2. ʼE fakatuʼutuʼu feafeaʼi te fai faka mafola ʼi te ʼu matani gāue?

² ʼE maʼu e ʼihi kokelekasio te ʼu telituale ʼo te ʼu matani gāue. Ko te tēhina ʼaē ʼe tokaga ki te ʼu telituale ʼe feala ke ina teuteuʼi he ʼu mape makehe ʼo te ʼu matani gāue. Kapau ʼe tuʼu ʼi te ʼu kate ʼo te telituale ʼaē ʼe fai ai te ʼu ʼapi he ʼu matani gāue kua ʼosi fai tonatou kate, pea ʼe tonu ke tohi fakalelei ai ke mole fai te ʼu fale gāue. ʼI te tahi ʼu telituale, ko te ʼu faʼahi ʼo te ʼu matani gāue ʼe feala ke fai fakatahi mo te ʼu ʼapi. Kapau neʼe mole heʼeki koutou fai faka mafola ʼi te ʼu matani gāue, pea koutou kamata fai faka mafola ʼi he ʼu kiʼi fale gāue liliki.

3. Koteā ʼaē ka tokoni anai ke fua lelei ia te fai faka mafola ʼi te ʼu fale gāue?

³ Ke Faigafua Takotou ʼu ʼUluaki Palalau: Ka koutou fai faka mafola ʼi te ʼu fale gāue, pea ʼe maʼuhiga ke koutou teuteu ohage ko hakotou ʼolo ki he fono ʼi te Fale ʼo Te Puleʼaga. ʼE toe lelei foki ke koutou filifili te temi ʼaē ʼe mole maʼumaʼua ai te fale gāue. Kapau ʼe feala, koutou ulu kiai ʼi te temi ʼaē ʼe mole talitali ai he tahi ke ʼavage hana fakatau. Koutou kole ke koutou palalau ki te patolo peʼe ki te tagata ʼaē ʼe ina takitaki te gāue. Koutou palalau fakanounou pea ke matala lelei. Koteā te ʼu palalau ʼe feala ke koutou fai?

4-6. Koteā ʼaē ʼe feala ke tou ʼui mokā tou fai faka mafola ki he tagata ʼe gāue peʼe ki te patolo?

⁴ Ka koutou fai palalau mo he tahi ʼe gāue ʼi te fale gāue peʼe ko te patolo, ʼe feala ke koutou ʼui fēnei: “ ʼE maʼumaʼua ʼaupito te hahaʼi gāue, pea ʼe mole feala ke mātou maʼu nātou ʼio nātou. Koia ʼe mātou ʼaʼahi ai koutou ʼi takotou gāue. ʼE talanoa tamatou ʼu nusipepa ki te ʼu meʼa ʼaē ʼe hoko ʼi te temi nei.” Pea koutou fakahā he manatu nounou mai te nusipepa e tahi.

⁵ Peʼe feala ke koutou ʼui fēnei: “ ʼE tokolahi te hahaʼi ʼe nātou fia ʼiloʼi he ʼu meʼa ʼe lahi age ʼo ʼuhiga mo te Tohi-Tapu kae ʼe mole maʼu honatou temi. ʼE fakamahino e te pepa lotu ʼaenī he ako ʼe feala ke tokoni atu ke ke maʼu te ʼu tali ʼa te Tohi-Tapu ki tau ʼu fehuʼi.” Pea koutou fakahā age te ʼu pasina 4 mo te 5 ʼo te kiʼi pepa lotu ʼE Koutou Fia Mahino Lahi Koa Ki Te Tohi-Tapu?

⁶ Kapau ʼe maʼumaʼua te tagata gāue, pea ʼe feala ke koutou foaki age te kiʼi pepa lotu pea mo koutou ʼui age fēnei: “ ʼE ʼau toe liliu mai anai ʼi he temi ʼe ke faigamālie ai. ʼE ʼau fia ʼiloʼi tau manatu ʼo ʼuhiga mo te kiʼi pepa lotu ʼaenī.”

7. ʼE tou lava taupau feafeaʼi te fia logo ʼi te ʼu telituale ʼo te ʼu matani gāue?

⁷ Koutou Taupau Te Fia Logo: ʼE feala ke koutou fai he ako Tohi-Tapu ʼi te ʼu telituale ʼo te ʼu matani gāue. Neʼe ʼaʼahi tuʼumaʼu e te pionie makehe te tagata gāue pea mo ina tuku age tana ʼu nusipepa. ʼI te fakahā age e te tagata tana leleiʼia te meʼa ʼaē neʼe ina lau, neʼe fakahā age e te pionie te faʼahiga fai ʼo he ako Tohi-Tapu, ʼaki te kaupepa lahi Fakamaʼua. Neʼe kamata ai te ako Tohi-Tapu ʼi te fale gāue ʼa te tagata. ʼO mulimuli ki te ʼu ʼaluʼaga ʼa te tagata ʼaia, neʼe fai e te pionie te ako ia minuta e 10 peʼe 15. ʼOfa pe ke tou haga kumi mo tatou te ʼu hahaʼi ʼaē ʼe tau mo te fai faka mafola ʼi te ʼu telituale ʼo te ʼu matani gāue.

He ʼu Manatu ʼo ʼUhiga Mo Te ʼu Nusipepa

Te Tule Leʼo ʼaho 15 ʼo Sūlio

“Kapau ko te meʼa ʼaenī [te paki ʼaē ʼe tuʼu ʼi te nusipepa] neʼe hā ʼi te ʼu tala logo ia ʼaho nei, ʼe mahino ia tokolahi te hahaʼi ʼe mole nātou tui anai kiai. Koteā tau manatu? [Tuku ke fai mai hana tali. Lau age ia Maleko 4:​39.] Koteā te ʼu faʼahi ʼe nātou fakamoʼoni ai neʼe hoko moʼoni te ʼu milakulo ʼaē neʼe fai e Sesu? ʼE vakaʼi ʼi Te Tule Leʼo ʼaenī te fehuʼi ʼaia.”

Réveillez-vous! ʼaho 22 ʼo Sūlio

“ ʼI te malamanei, ʼe fakakaukauʼi tuʼumaʼu pe e te hahaʼi agakovi he ʼu faʼahiga fakatuʼutuʼu foʼou moʼo kākāʼi te hahaʼi ʼaē ʼe mole mahalohalo kovi. Neʼe ke tokagaʼi koa te faʼahi ʼaia? [Tuku ke fai mai hana tali.] ʼE foaki e te Réveillez-vous ! ʼaenī he ʼu tokoni ke mole kākāʼi ai tatou.” Koutou lau age ia Tāʼaga Lea 22:3.

Te Tule Leʼo ʼaho 1 ʼo ʼAuk.

“ ʼUhi ko te maveuveu lahi ʼo te malamanei, ʼe manatu e ʼihi ko te puleʼaki pe e tahi moʼo fakatuʼu te tokalelei ʼe ko he puleʼaga e tahi ʼe pule ki te malamanei katoa. ʼE ke manatu koa ʼe feala ke hoko he meʼa feiā? [Tuku ke fai mai hana tali. Pea koutou lau age ia Taniela 2:​44.] Ko te nusipepa ʼaenī ʼe talanoa ki te ʼu meʼa ʼe lolotoga fakahoko e te Puleʼaga ʼo te ʼAtua pea mo tana vave fakatuʼu ia te tokalelei ʼi te malamanei.”

Réveillez-vous! ʼaho 8 ʼo ʼAuk.

“Ko tatou fuli ʼe tou lotomamahi mokā tou logo ki te gaohi koviʼi ʼo te fānau. Neʼe kua ke lagi fai te fehuʼi ʼaenī: ‘ ʼE tokaga moʼoni koa te ʼAtua kia tatou?’ [Tuku ke fai mai hana tali. Pea koutou lau age ia Pesalemo 72:12-​14.] ʼE fakahā ʼi te alatike ʼaenī te manatu ʼa te ʼAtua ʼo ʼuhiga mo te fānau, pea mo tana kua vave foaki he fakafimālie heʼegata kia nātou fuli ʼaē ʼe gaohi koviʼi.”