Ko Te Faka Mafola ʼo Te Puleʼaga ʼe Ko He Pilivilesio Maʼuhiga

¹ ʼI te ʼaho fuli, ko te lauʼi miliale hahaʼi ʼe nātou fakaʼaogaʼi ia te ʼu meʼa ʼofa ʼo te maʼuli, ʼaē ʼe foaki mai e te ʼAtua. (Mat. 5:45) Kae ko te tokosiʼi pe ʼe nātou maʼu ia te pilivilesio makehe ʼaē ko te faka mafola ia te logo lelei ʼo te Puleʼaga ʼo te ʼAtua moʼo fakahā ia tanatou loto fakafetaʼi ʼaē ki tonatou Tupuʼaga. (Mat. 24:14) Kae kiā koutou, ʼe koutou faka ʼuhigaʼi feafeaʼi koa ia te pilivilesio maʼuhiga ʼaia?

² ʼAki te faka mafola ʼo te Puleʼaga, ʼe fakavikiviki ai ia te ʼAtua pea mo maʼu te ʼamanaki pea mo te tokalelei e te hahaʼi ʼaē ʼe mafasia ʼi te ʼu ʼaho maveuveu ʼaenī. (Hep. 13:15) Pea kiā nātou ʼaē ʼe nātou tali ia te logo ʼo te Puleʼaga, ʼe nātou maʼu anai ia te maʼuli heʼegata. (Soane 17:3) Kofea he tahi age gāue ʼi te malamanei ʼe ina lava foaki atu ia te ʼu lelei ʼaia? Maʼa te ʼapositolo ko Paulo, neʼe hage kiā ia tana minisitelio ko he koloā, pea neʼe ʼiloga ia te faʼahi ʼaia ʼi tana fakahoko ia tana minisitelio.​—Gaue 20:​20, 21, 24; 2 Ko. 4:​1, 7.

³ Tou Loto Fakafetaʼi Ki Totatou Pilivilesio Maʼuhiga: Tou tōkakaga ke lelei tatatou selevisi, heʼe tou fakahā ai tatatou leleiʼia ia te pilivilesio ʼaē ko te fai faka mafola. ʼE tou filifili fakaleleiʼi koa he ʼu ʼuluaki palalau ke malave ki te loto ʼo te hahaʼi ʼaē ʼe tou faka mafola ki ai? E feafeaʼi hatatou hikihiki totatou ʼu fealagia ʼaē moʼo fakaʼaogaʼi ia te Tohi-Tapu pea mo tatatou ʼu fai palalau mo te hahaʼi? ʼE tou gāueʼi fakaleleiʼi koa te telituale ʼaē neʼe tuku mai ke tou fai faka mafola ai? E feafeaʼi koa hatatou kamata pea mo fai he ako Tohi-Tapu? Ohage ko te kau Kilisitiano agatonu ʼo te temi muʼa pea mo te temi nei, ʼe tou fai mo totatou loto kātoa ia te gāue ʼaia, pea ʼe tou leleiʼia totatou pilivilesio.​—Mat. 25:​14-23.

⁴ Kapau kua tou vaivavai ʼuhi he kua tou mātutuʼa, mo mahahaki, peʼe tou tau mo he tahi age ʼu ʼaluʼaga, ʼe ko he meʼa fakaloto mālohi hatatou ʼiloʼi ʼe kei maʼuhiga ʼaupito tatatou ʼu faiga mālohi ʼo kau ki te minisitelio. ʼE fakapapau mai ʼi te Folafola ʼa te ʼAtua, ko Sehova ʼe ina leleiʼia te ʼu taʼi faiga ʼaia moʼo tauhi kiā te ia, tatau aipe peʼe hage ʼe mole faʼa maʼuhiga ki te hahaʼi tatatou ʼu faiga ʼaia.​—Luka 21:​1-4.

⁵ ʼE ko he meʼa fakatupu fiafia ʼaupito ia te faka mafola ʼo te Puleʼaga. Neʼe ʼui fēnei e te tuagaʼane e taʼu 92: “ ʼE au fiafia pea ʼe mole au fakahemala mokā au fakasiosio ki te ʼu taʼu e 80 tupu ʼaē neʼe au gāue ai maʼa te ʼAtua! Kanapaula neʼe feala ke au toe kamata toku maʼuli, ʼe au toe fai pe anai te meʼa ʼaia, heʼe ‘ko te lotoʼofa ʼo te ʼAtua ʼe lelei age ia ʼi te maʼuli.’ ” (Pes. 63:3) ʼOfa pe mo tatou ke tou loto fakafetaʼi ki te pilivilesio maʼuhiga ʼaia neʼe foaki mai e te ʼAtua​—ia te faka mafola ʼo te Puleʼaga.

Koga Hogofulu-Ma-Lua: Tou Fai He ʼu Ako Tohi-Tapu ʼe Tuputupu

Tou Tokoni Ki Te Kau Ako Ke Nātou Kamata Pea Mo Fai He ʼu Ako Tohi-Tapu

¹ Ka kamata kau tatatou kau ako ki te minisitelio, ʼe lagi nātou tuʼaniaʼi te kamata pea mo te fai ʼo he ʼu ako Tohi-Tapu. E feafeaʼi hatatou tokoni kiā nātou ke nātou fia fai ki te koga maʼuhiga ʼaia ʼo tatatou minisitelio?​—Mat. 24:14; 28:​19, 20.

² Ka liliu hata ako Tohi-Tapu ko he kaugā fagona, lagi kua kau ki te Ako ʼo Te Minisitelio Faka Teokalatike. ʼI tana teuteuʼi pea mo fai tana kiʼi akonaki, ʼe feala ai anai kiā ia ke ina fakatuputupu tona ʼu fealagia ʼaē ke liliu ko “he tagata gaue e mole ufiufi, e ina ave fakahagatonu te folafola o te mooni.”​—2 Tim. 2:⁠15.

³ Koutou Tuku Age He Faʼifaʼitaki Lelei: Ko Sesu neʼe ina akoʼi fakalelei ia tana ʼu tisipulo pea neʼe ina tuku age he faʼifaʼitaki lelei. Neʼe ina ʼui fēnei: “Ko ʼaē ʼe akoʼi fakalelei, ʼe liliu anai ia ohage ko ia ʼaē ʼe faiako kiā te ia.” (Luka 6:​40, MN ) ʼE tonu ke koutou faʼifaʼitaki kiā Sesu, ʼo koutou tuku he faʼifaʼitaki lelei ʼi takotou minisitelio. ʼAki te faʼifaʼitaki ʼaē ka koutou tuku anai ki takotou ako ʼi te minisitelio, ʼe mahino anai kiā ia ʼe fai te ʼu ʼaʼahi ki te hahaʼi ke feala hana kamata he ʼu ako Tohi-Tapu.

⁴ Fakahā age ki takotou ako, ʼi te agamāhani ʼe mole tonu leva ke ina fakamahino fuli age te ʼu faʼahi kehekehe ʼo te ako. ʼE lagi lelei ʼaki he tohi ako ke fakaʼaogaʼi he palakalafe pe e tahi peʼe lua moʼo fakahā ki ai ia te faʼahiga fai ʼo he ako. Moʼo fai te faʼahi ʼaia, ʼe koutou maʼu anai te ʼu tokoni ʼi te pasina 8 ʼo Te Minisitelio ʼaenī pea mo Te Minisitelio ʼo Te Puleʼaga ʼo Sānualio 2002 ʼi te pasina 6.

⁵ Kapau kua kaugā fagona, pea koutou fakaafe ia ia ke kaugā ʼolo mo koutou ki he ʼu ako Tohi-Tapu, peʼe ʼalu mo he tahi age tēhina peʼe ko he tahi age tuagaʼane faiva. ʼE feala anai hana fakamahino he palakalafe peʼe ko he vaega faka Tohi-Tapu. Koia ʼi tana mulimuli ʼaia ʼi takotou ʼu fai ako, ʼe lahi anai te ʼu meʼa ʼaē ka ina ako moʼo fai ʼo he ʼu ako Tohi-Tapu ʼe tuputupu. (Taag. 27:17; 2 Tim. 2:2) Koutou fakamālo ki tana ʼu faiga, pea mo fakahā age ki ai te ʼu faʼahi ʼaē ʼe feala ke ina gāueʼi.

⁶ Ko te akoako ʼo te ʼu kaugā fagona ke nātou liliu ko he kau faiako ʼo te Folafola ʼa te ʼAtua, ʼe ʼaoga anai kiā nātou moʼo fai te “gaue lelei” ʼaē ko te kamata pea mo fai ʼo he ʼu ako Tohi-Tapu e nātou totonu. (2 Tim. 3:17) ʼI meʼa fakafiafia hatatou kaugā gāue mo nātou moʼo tala ia te fakaafe ʼofa ʼaenī: “Ko ae e loto ki ai, ke ina too noa te vai mauli”!​—Apk. 22:17.