Tou Kamata He ʼu Ako Tohi-Tapu ʼi Te ʼu Muʼa Matapā ʼa Te Hahaʼi Pea Mo Tou Fakaʼaogaʼi Te Telefoni

1, 2. Koteā te fakatuʼutuʼu ʼaē ʼe tou lava fai ʼi tatatou polokalama ako Tohi-Tapu moʼo tokoni ki te hahaʼi ʼaē ʼe maʼumaʼua?

¹ Ko te hahaʼi ʼi te temi nei ʼe nātou maʼumaʼua. Kae tokolahi ʼe nātou fia logo ki te ʼu meʼa fakalaumālie. E feafeaʼi hatatou foaki kiā nātou ia te meʼa kai fakalaumālie ʼaē ʼe ʼaoga kiā nātou? (Mat. 5:3) Tokolahi te ʼu kaugā fai faka mafola ʼe nātou lava kamata he ʼu ako Tohi-Tapu mo te hahaʼi ʼi ʼonatou muʼa matapā peʼe nātou fakaʼaogaʼi te telefoni. ʼE feala koa hakotou fakalahi feiā takotou minisitelio?

² Moʼo kamata he ʼu ako Tohi-Tapu, ʼe tonu ke tou teuteuʼi fakalelei moʼo fai he ako Tohi-Tapu ʼi he faigamālie pe ʼe tou fēlaveʼi mo ia. E feafeaʼi te fai ʼo te faʼahi ʼaia, pea ʼe fai ʼi te potu fea?

3. He koʼe ʼe lelei ke fakahāhā peʼe feafeaʼi ia te fai ʼo he ako Tohi-Tapu ʼi te ʼuluaki fēlaveʼi, pea e feafeaʼi hona fakahoko?

³ ʼI Te ʼu Muʼa Matapā: Ka tali lelei koutou ʼi he ʼapi ke koutou fai palalau ki te Tohi-Tapu, koutou kamata fakahā age he palakalafe neʼe koutou teuteuʼi fakatomuʼa, ohage la ko te ʼuluaki palakalafe ʼo te ako 1 ʼo te kaupepa lahi Fakamaʼua. Koutou lau age, mo fai tona fehuʼi, pea koutou vakaʼi fakatahi he vaega faka Tohi-Tapu e tahi peʼe lua. ʼI te agamāhani, ʼe feala ke fai ia te fai palalau ʼaia ʼi te muʼa matapā lolotoga minuta e nima peʼe hogofulu. Kapau ʼe ina leleiʼia te fai palalau, koutou toe liliu mai ʼo vakaʼi mo ia te palakalafe e tahi peʼe lua ʼaē ʼe hoa mai kiai.​—Kapau ʼe koutou loto ki he tahi ʼu tokoni ʼo ʼuhiga mo te kamata ʼo he ʼu ako Tohi-Tapu ʼi te ʼuluaki fēlaveʼi, koutou vakaʼi Te Minisitelio ʼo Te Puleʼaga ʼo Sānualio 2002 ʼi te pasina 6.

4. E feafeaʼi hatatou kamata he ako Tohi-Tapu ʼi te muʼa matapā mokā tou fai he ʼu ʼaʼahi?

⁴ ʼE tou lava kamata he ʼu ako Tohi-Tapu mokā tou toe liliu ʼo ʼaʼahi ia te hahaʼi. Ohage la, ʼe lagi koutou kamata anai ia te fai palalau ʼaki te kaupepa lahi Fakamaʼua pea mo fakahā age te huafa ʼo te ʼAtua, ʼi te ako 2, ʼi te palakalafe 1 pea mo te 2. ʼI te tahi ʼaʼahi, ʼe feala hakotou vakaʼi te ʼu palakalafe 3 mo te 4, peʼe koteā ʼaē ʼe ʼui ʼi te Tohi-Tapu ʼo ʼuhiga mo te ʼu kalitātē ʼa Sehova. ʼI te ʼaʼahi ʼaē ʼe hoa mai kiai, ʼe feala hakotou vakaʼi te ʼu palakalafe 5 mo te 6, pea mo te pāki ʼi te pasina 5, ke mahino kiā ia ʼaki te Tohi-Tapu ʼe feala ke ina ʼiloʼi ai ia Sehova. Ko te ʼu faʼahi fuli ʼaia, ʼe tou lava fai ʼi te muʼa matapā ʼo te hahaʼi.

5, 6. (a) He koʼe ʼe leleiʼia age e ʼihi hahaʼi ke fakaʼaogaʼi te telefoni moʼo fai ʼaki hanatou ako Tohi-Tapu? (b) Koteā te faʼahiga fakatuʼutuʼu ʼe tou lava fai mo kapau ʼe tou fia fakaʼaogaʼi te telefoni moʼo fai ʼaki he ako?

⁵ Tou Fakaʼaogaʼi Te Telefoni: Ko ʼihi hahaʼi ʼe nātou tali lelei ke fakaʼaogaʼi te telefoni moʼo fai tanatou ako Tohi-Tapu. Koutou fakatokagaʼi te faʼifaʼitaki ʼaenī: ʼI tana fai faka mafola ʼi te ʼu ʼapi, neʼe felāveʼi te tuagaʼane mo te fafine kei finemui, neʼe maʼu fānau pea neʼe ʼi ai tana gāue papālagi. ʼI tana toe ʼalu ʼo ʼaʼahi, neʼe mole maʼu e te tuagaʼane te fafine ʼaia, pea neʼe telefoni leva ki ai. ʼI tanā fai telefoni, neʼe fakahā age e te fafine ki te tuagaʼane, ʼe mole maʼu hona temi ke nā fai palalau ki te Tohi-Tapu. Neʼe ʼui age e te tuagaʼane: “Ia minuta pe e 10 peʼe 15, ʼe tā lava fakaʼaogaʼi te telefoni ke ke ako ai he ʼu manatu foʼou.” Pea neʼe tali age e te fafine: “ ʼIo pea tā fai ʼaki mo kapau ʼe tā fakaʼaogaʼi te telefoni moʼo fai ʼaki tatā fai palalau!” Mole tuai, pea neʼe fakaʼaogaʼi te telefoni moʼo fai ʼaki tana ako Tohi-Tapu.

⁶ ʼE ʼi ai koa he ʼu hahaʼi ʼe koutou ʼaʼahi ʼe nātou tali lelei ke fakaʼaogaʼi te telefoni moʼo fai ʼaki hanatou ako? Koutou mulimuli ki te faʼifaʼitaki ʼa te tuagaʼane, peʼe koutou lava ʼui fēnei: “Kapau ʼe ke loto kiai, ʼe feala pe hatā fakaʼaogaʼi te telefoni moʼo fai ʼaki tatā fai palalau ki te Tohi-Tapu. Lagi ʼe ke leleiʼia age te fakatuʼutuʼu ʼaia?” Kapau ʼe tou fai tatatou ʼu ako Tohi-Tapu ʼo mulimuli ki te ʼu temi faigamālie ʼa te hahaʼi, ʼe tou lava tokoni anai kiā nātou ke nātou ‘maʼu te ʼatamai mālama ʼo ʼuhiga mo te ʼAtua.’​—Taag. 2:5; 1 Ko. 9:⁠23.

He ʼu Manatu ʼo ʼUhiga Mo Te ʼu Nusipepa

Te Tule Leʼo ʼaho 15 ʼo ʼAuk.

“Ka mate he tahi, tokolahi ʼe nātou feʼekeʼaki pe koteā ʼaē ʼe hoko ʼi te hili ʼo te mate. ʼI tau manatu, ʼe feala koa ke tou mahino ki te mate? [Tuku ke fai mai hana tali.] ʼE fakahā ʼi te nusipepa ʼaenī, te manatu ʼa te Tohi-Tapu ʼo ʼuhiga mo te kau mate. ʼE ina toe fakamahino mai te fakapapau ʼa te ʼAtua ʼo ʼuhiga mo te fakatuʼuake ʼo totatou ʼu kāiga ʼaē kua mamate.” Lau age ia Soane 5:​28, 29.

Réveillez-vous! ʼaho 22 ʼo ʼAuk.

“ ʼE ke ʼiloʼi koa ko te fai tulisi ʼe ko te matani gāue lahi pe ʼaia ʼi te malamanei? [Tuku ke fai mai hana tali.] Ko te tuputupu ʼa te fai tulisi ʼe ʼi ai tona ʼu fua lelei pea mo tona ʼu fua kovi. ʼE fakahā ʼi te nusipepa ʼaenī te manatu ʼa te hahaʼi ʼo ʼuhiga mo te fai tulisi. ʼE ina toe fakahā mai ia te ʼu tokoni ʼe ʼaoga ke mulimuli ki ai ia nātou ʼaē ʼe fai folau ʼi te malamanei.”

Te Tule Leʼo ʼaho 1 ʼo Sep.

“Ia ʼaho nei, ʼe ko he agamāhani ʼi te malamanei ʼe lahi tāfito te vikiʼi ʼo te agatonu kae tahitahiga tona maʼuliʼi. ʼE ke fiafia koa mo kanapaula neʼe hage te hahaʼi ko te ʼu kaumeʼa ʼaē ʼe talanoa ki ai ʼi te vaega ʼaenī? [Lau age ia Tāʼaga Lea 17:17. Pea tuku ke fai mai hana tali.] ʼE fakahā ʼi te nusipepa ʼaenī te ʼu fua lelei ʼaē ʼe tou maʼu ʼi tatatou agatonu ki totatou famili pea mo totatou ʼu kaumeʼa.”

Réveillez-vous! ʼaho 8 ʼo Sep.

“Lagi ʼe ke punamaʼuli ʼi te felogoi tahi ʼa te ʼu meʼa ʼaē neʼe faʼu e te ʼAtua. [Koutou talanoa ki he ʼu faʼifaʼitaki ʼe tuʼu ʼi te alatike.] Kae ʼe ko he meʼa fakaʼofaʼofa tatatou mole kei sio ki te felogoi tahi ʼaia ʼi te hahaʼi. Koteā tau manatu ki te faʼahi ʼaia? [Tuku ke fai mai hana tali.] ʼE fakahā ʼi te nusipepa ʼaenī te ʼu gāue ʼaē ka vave fakahoko e te ʼAtua moʼo ʼaumai ia te tokalelei pea mo te felogoi ki te kele.” Lau age ia Isaia 11:9.