Tolu Koga: Tou Fai He ʼu Ako Tohi-Tapu ʼe Tuputupu

Tou Fakaʼaogaʼi Lelei Te ʼu Vaega

1. He koʼe ʼe tonu ke tou fakaʼaogaʼi tāfito ia te Tohi-Tapu ʼi tatatou ʼu ako Tohi-Tapu?

¹ Ka tou fai te ʼu ako Tohi-Tapu ʼe tou fakatuʼutuʼu ke tou “fai ni ʼu tisipulo,” ʼo tou tokoni ki te hahaʼi ke nātou mahino pea mo tali ia te ʼu akonaki ʼo te Folafola ʼa te ʼAtua, pea mo nātou maʼuliʼi. (Mat. 28:19, 20, MN; 1 Tes. 2:​13) Koia ʼe tonu ke fakatafito ia te ako ki te Tohi-Tapu. ʼI te kamata, ʼe lagi ʼaoga ke ako ki te kau ako ia te kumi ʼo te ʼu vaega ʼi tanatou Tohi-Tapu. Kae ʼe tou lava fakaʼaogaʼi feafeaʼi ia te Tohi-Tapu moʼo tokoni kiā nātou ʼaia ke nātou tuputupu ʼi te faʼahi fakalaumālie?

2. ʼE tou lava filifili feafeaʼi ia te ʼu vaega Tohi-Tapu ʼaē ka tou lau pea mo fai palalau anai kiai?

² Tou Filifili Ia Te ʼu Vaega ʼAē Ka Tou Lau. ʼI takotou teuteuʼi te ako, koutou vakaʼi peʼe ko te ʼu vaega Tohi-Tapu fea ʼo te kapite ʼe pipiki ki te manatu ʼaē ʼe koutou talanoa kiai, pea koutou filifili leva te ʼu vaega ʼaē ka koutou lau pea mo fai palalau anai kiai ʼi te ako. ʼI te agamāhani, ʼe lelei ia te lau ʼo te ʼu vaega Tohi-Tapu ʼaē ʼe fakatafito kiai tatatou ʼu akonaki. ʼE lagi mole ʼaoga anai ke tou lau te ʼu vaega ʼaē ʼe fakahā ai he tahi ʼu manatu. Koutou vakaʼi te ʼu faʼahi ʼaē ʼe ʼaoga ki te kau ako takitokotahi pea mo tonatou ʼu ʼaluʼaga.

3. He koʼe ʼe ʼaoga ke tou fai he ʼu fehuʼi, pea ʼe tou lava fakahoko feafeaʼi ia te faʼahi ʼaia?

³ Tou Fai He ʼu Fehuʼi. ʼAua naʼa koutou fakamahino te ʼu vaega Tohi-Tapu kiā ia ʼaē ʼe ako, kae koutou tuku ke ina fakamahino atu. Kapau ʼe koutou fakaʼaogaʼi fakapotopoto te ʼu fehuʼi, pea ʼe koutou uga anai ia ia ke ina fakamahino atu. Kapau ʼe faigafua te fakamahino ʼo te vaega, pea koutou fehuʼi age peʼe fakamoʼoni feafeaʼi e te vaega ki te manatu ʼo te palakalafe. ʼI he tahi ʼu ʼaluʼaga, ʼe lagi tonu anai ke koutou fai he tahi ʼu fehuʼi ke ina maʼu te manatu ʼaē ʼe totonu. Kapau ʼe tonu ke fai he tahi age ʼu fakamahino, pea ʼe feala ke fai ʼi te ʼosi tali atu e ia ʼaē ʼe ako.

4. ʼE tonu ke tou fakamahino feafeaʼi ia te ʼu vaega ʼaē ʼe tou lau?

⁴ Tou Faka Faigafua Ia Te Ako. Ko te tagata kapu faiva ʼe ina fakaʼaogaʼi pe te kauʼi nahau e tahi moʼo matehi ʼo he manu. ʼO toe feiā aipe, ko he tahi ʼe poto ʼi te faiako ʼe mole ʼaoga anai ke ina fai he ʼu tuʼuga palalau moʼo faka maʼuhigaʼi he manatu. ʼE feala ke palalau ki te faʼahi ʼaia ʼaki ni ʼu palalau ʼe faigafua, mo matala lelei, pea mo totonu. ʼI ʼihi temi, ʼe lagi tonu ke koutou fai he ʼu kumi ʼi te ʼu tohi faka Kilisitiano ke koutou mahino ai ki he vaega ke koutou fakamahino fakalelei. (2 Tim. 2:​15) Kae ʼaua naʼa koutou faiga ke koutou fakamahino te ʼu faʼahi fuli ʼo te ʼu vaega ʼi te ako. Koutou talanoa pe ki te manatu ʼaē ʼe ʼaoga moʼo faka maʼuhigaʼi te puani ʼaē ʼe vakaʼi.

5, 6. ʼE tou lava tokoni feafeaʼi ki te kau ako ke nātou maʼuliʼi te Folafola ʼa te ʼAtua, kae koteā ʼaē ʼe mole tonu ke tou fai?

⁵ Tou Ako Age Ke Ina Maʼuliʼi Te ʼu Manatu ʼAē ʼe Ina Ako ʼi Te Tohi-Tapu. Kapau ʼe feala, pea koutou tokoni kiā ia ʼaē ʼe ako ke mahino ki te faʼahiga maʼuliʼi ʼo te ʼu vaega Tohi-Tapu. Ohage la, ka koutou vakaʼi te vaega ʼo Hepeleo 10:24, 25 mo he tahi ʼe ako kae mole heʼeki kau ki te ʼu fono, ʼe feala ke koutou palalau ki he fono e tahi pea mo koutou fakaafe ia ia ke kau kiai. Kae ʼaua naʼa koutou fakakinauʼi ia ia. Koutou tuku ki te Folafola ʼa te ʼAtua ke ina uga ia ia ke ina fai te meʼa ʼaē ʼe leleiʼia e Sehova.​—Hep. 4:​12.

⁶ ʼI tatatou fakahoko te fakatotonu ʼaē ke tou fai ni ʼu tisipulo, ʼofa pe ke tou fakaʼaogaʼi lelei te Tohi-Tapu moʼo “lagolago ki te fakalogo ki te tui.”​—Loma 16:26, MN.

He ʼu Manatu ʼo ʼUhiga Mo Te ʼu Nusipepa

Te Tule Leʼo ʼaho 15 ʼo Nov.

“ ʼE loto e te hahaʼi ke nātou hāo mai te mahaki pea mo nātou maʼuʼuli fualoa. Kae kapau la neʼe ko he faʼahi neʼe feala, ʼe ke fia maʼuli anai koa ʼo heʼegata? [Tuku ke fai mai hana tali. Pea koutou lau age ia Soane 17:3.] ʼI te nusipepa ʼaenī ʼe talanoa ai ki te maʼuli heʼegata ʼaē ʼe fakapapauʼi mai ʼi te Tohi-Tapu. ʼE toe talanoa ai ki te faʼahiga maʼuli ʼaē ka maʼu anai ʼi te temi ʼaē ka hoko ai ia te fakapapau ʼaia.”

Réveillez-vous! ʼaho 22 ʼo Nov.

“ ʼI te ʼu taʼu e 20 ki muʼa atu, neʼe mahino te kau tōketā ki te mahaki ʼaē ko te SITA, pea mo nātou maʼu tona ʼu faʼahiga faitoʼo. Kae tokolahi te hahaʼi ʼe mole nātou ʼiloʼi lelei te mahaki ʼaia. [Fakahā age te fakamatala ʼaē ʼe ʼātakai ʼaē ko tona kupu tāfito “Te ʼu Manatu Hala ʼo ʼUhiga Mo Te SITA,” pea tuku ke ina fakahā atu tana manatu.] ʼE fakahā ʼi te nusipepa ʼaenī te ʼu meʼa ʼaē ʼe tonu ke fai e te ʼu mātuʼa moʼo puipui tanatou ʼu fānau ʼo ʼuhiga mo te mahaki ʼaia.” Lau age ia Teutalonome 6:​6, 7.

Te Tule Leʼo ʼaho 1 ʼo Tes.

“ ʼE kehe te tagata mo te ʼu manu heʼe lava ʼiloʼi e te tagata te meʼa ʼaē ʼe lelei pea mo te meʼa ʼaē ʼe kovi. Kae tokolahi te hahaʼi ʼe nātou fai te meʼa ʼaē ʼe kovi. ʼI tau manatu, koteā tona tupuʼaga? [Tuku ke fai mai hana tali. Pea koutou lau age ia Selemia 17:9 peʼe ko Apokalipesi 12:9.] ʼI te nusipepa ʼaenī ʼe fakahā ai peʼe koteā ʼaē ʼe lava tokoni mai ke tou ʼiloʼi pea mo fai te meʼa ʼaē ʼe lelei.”

Réveillez-vous! ʼaho 8 ʼo Tes.

“Logola te ʼu meʼa foʼou ʼaē kua faʼu e te tagata, kae ʼe ʼi ai te meʼa ʼe ʼaoga ʼaupito kiā ia: ko hona ʼu kaumeʼa. Kae neʼe ke tokagaʼi koa, ʼaki te ʼu fetogi ʼaē ʼe hoko ʼi te malamanei kua faigataʼa iā ʼaho nei te maʼu ʼaē ʼo he ʼu kaumeʼa? [Tuku ke fai mai hana tali. Pea koutou lau age ia Tāʼaga Lea 18:4.] ʼE fakahā ʼi te nusipepa ʼaenī peʼe feafeaʼi hatatou maʼu pea mo taupau he ʼu kaumeʼa moʼoni.”