ʼE ʼAoga Takotou Tokoni

¹ “ ʼE mātou fakamālo atu ʼo ʼuhiga mo te ʼu meʼa fuli ʼaē ʼe koutou fai maʼa mātou. ʼE fua lelei moʼoni kiā mātou takotou gāue.” ʼE hā lelei ʼi te ʼu palalau ʼaia tatatou loto fakafetaʼi ki tatatou ʼu tagata ʼāfea pea mo te kau faifekau faka minisitelio. ʼI te tuputupu ʼo te kautahi ʼa te ʼAtua, ʼe ʼaoga tuʼumaʼu ke ʼi ai he ʼu tagata kua fotufotuʼa moʼo fai ʼo te ʼu gāue ʼi te ʼu teitei kokelekasio e 100 000 ʼi te malamanei kātoa. Kapau ko koe ko he tēhina kua papitema, pea ʼe ʼaoga tau tokoni.

² Koutou Fakaʼamu Kiai: ʼE feafeaʼi hakotou fakahā ʼe koutou fakaʼamu ki he tahi ʼu pilivilesio? (1 Tim. 3:1) ʼE tonu tāfito ke koutou tuku he faʼifaʼitaki lelei ʼi te ʼu faʼahi fuli ʼo tokotou maʼuli. (1 Tim. 4:12; Tito 2:6-8; 1 Pet. 5:3) Koutou lagolago lelei ki te gāue fai faka mafola, pea mo tokoni ki niʼihi ke nātou fai feiā mo nātou. (2 Tim. 4:5) Koutou tokaga moʼoni ke maʼuli fiafia tokotou ʼu tēhina mo tuagaʼane. (Loma 12:13) Koutou ako fakalelei te Folafola ʼa te ʼAtua, pea mo koutou maʼu te ‘poto ʼi te faiakonaki.’ (Tito 1:9; 1 Tim. 4:13) Koutou fakahoko fakalelei te ʼu maʼua ʼaē ʼe foaki atu e te kau tagata ʼāfea. (1 Tim. 3:10) Kapau ko koutou ko te pule famili, ‘koutou takitaki fakalelei tokotou loto fale.’—1 Tim. 3:4, 5, 12.

³ Ko he tagata faifekau faka minisitelio peʼe ko he tagata ʼāfea ʼe tonu ke faʼa gāue pea mo ina maʼu he manatu faka sakilifisio. (1 Tim. 5:17) Koia, kapau ʼe koutou fakaʼamu ki te pilivilesio ʼaia, pea koutou tōkakaga tāfito ʼo tauhi ʼaki he agavaivai ki te kokelekasio. (Mat. 20:25-28; Soa. 13:3-5, 12-17) Koutou metitāsio ki te manatu ʼaē neʼe maʼu e Timoteo, pea koutou faigaʼi ke koutou faʼifaʼitakiʼi. (Filp. 2:20-22) Ohage ko ia, ʼe tonu ke vikiʼi koutou e te ʼu tēhina mo tuagaʼane heʼe koutou tuku he faʼifaʼitaki lelei. (Gaue 16:1, 2) ʼE “ ʼiloga [anai takotou] ʼu faiga ki te hahaʼi fuli”, ʼi takotou faiga ʼaē ke koutou maʼu te ʼu kalitātē ʼaē ʼe ʼaoga moʼo fakahoko ni ʼu pilivilesio pea mo koutou maʼuliʼi te ʼu tokoni fuli.—1 Tim. 4:15, MN.

⁴ ʼU Mātuʼa, Koutou Akoʼi Ki Takotou Fānau Ke Nātou Tokoni Ki Niʼihi: ʼE feala ke akoʼi te fānau ke nātou tokoni ʼi tanatou kei liliki. Koutou akoʼi nātou ke nātou fakalogo lelei ʼi te ʼu fono, ke nātou fai faka mafola pea mo tuku he faʼifaʼitaki lelei ʼi te Fale ʼo te Puleʼaga pea mo te faleako. Koutou akoʼi age kiā nātou ke nātou fiafia ʼi te tauhi ki te hahaʼi, ohage la ke nātou tokoni ki te fakamaʼa ʼo te Fale ʼo te Puleʼaga, mo tokoni ki te kau tagata ʼāfea pea mo te tahi atu ʼu gāue. Koutou tokoni kiā nātou ke nātou maʼu te fiafia ʼi te foaki. (Gaue 20:35) Ko te ako ʼaia ʼe feala ke tokoni kiā nātou ke nātou liliu ʼi te temi ka haʼu ko he ʼu pionie, mo he ʼu tagata faifekau faka minisitelio pea mo he ʼu tagata ʼāfea.

Fā Koga: Ko He ʼu Ako Tohi-Tapu ʼe Tuputupu

Tou Akoʼi Ke Nātou Teuteuʼi Tanatou Ako

¹ Kapau ko ia ʼaē ʼe ako ʼe ina lau fakatomuʼa tana kapite, mo fakaʼiloga te ʼu tali, pea mo fakakaukauʼi peʼe feafeaʼi hana tali ʼaki tana ʼu faʼahiga palalau, pea ʼi te agamāhani ʼe tuputupu vave anai ʼi te faʼahi fakalaumālie. Koia, kapau kua fai tuʼumaʼu ia te ako Tohi-Tapu, pea koutou teuteuʼi mo ia he kapite moʼo fakahā age peʼe feafeaʼi tana teuteuʼi ia te ako. ʼI te agamāhani, ʼe ʼaoga ʼaupito anai ki takotou kau ako, ke koutou teuteuʼi fakatahi he kapite kātoa.

² Te Fakaʼiloga ʼo Te ʼu Tali Pea Mo Te Tohi ʼo Te ʼu Manatu: Koutou fakamahino age kiā ia ʼaē ʼe ako peʼe feafeaʼi hana maʼu te ʼu tali ki te ʼu fehuʼi. Koutou fakahā age kiā ia takotou tohi ako, ʼaē neʼe koutou fakaʼiloga ai pe te ʼu manatu tāfito. Lolotoga takotou vakaʼi ia te kapite, ʼe lagi fia faʼifaʼitaki anai kiā koutou, ʼo ina fakaʼiloga ʼi tana tohi te ʼu kupu pe ʼaē ka tokoni anai kiā ia ke ina manatuʼi te tali. (Luka 6:40) Pea koutou kole age ke ina fai hana tali ʼaki tana ʼu faʼahiga palalau. Kapau ʼe koutou fai feiā, pea ʼe feala ai anai ke koutou ʼiloʼi peʼe kua mahino lelei ki te ʼu meʼa ʼaē ʼe ina ako.

³ ʼE maʼuhiga ʼi tana teuteuʼi tana ako, ke ina vakaʼi fakalelei ia te ʼu vaega ʼaē ʼe mole tohi katoa ʼi te kapite. (Gaue 17:11) Koutou tokoni ke mahino kiā ia te pikipikiga ʼo te ʼu vaega Tohi-Tapu fuli pea mo te manatu ʼo te palakalafe. Koutou fakahā age peʼe feafeaʼi hana tohi he ʼu kiʼi manatu nounou ia tafa ʼo te ʼu pasina ʼo tana tohi ako, pea mo fakahā lelei age kiā ia ko te Tohi-Tapu ʼe ko te tafitoʼaga ʼo te ʼu meʼa ʼaē ʼe ina ako. Koutou fakaloto mālohiʼi ia ia ke ina fakaʼaogaʼi lahi te ʼu vaega Tohi-Tapu ʼi tana ʼu tali lolotoga te ako.

⁴ Vakaʼi Fakanounou Te ʼu Manatu ʼo Te Kapite Pea Mo Fai He Fakamanatu: ʼI muʼa ʼo te kamata teuteuʼi e ia ʼaē ʼe ako ia tana ʼu palakalafe, ʼe ʼaoga anai ke ina vakaʼi fakanounou te ʼu manatu ʼo te kapite. Fakahā lelei age kiā ia moʼo fai ia te faʼahi ʼaia, ʼe tonu ke ina vakaʼi fakanounou te kupu tāfito ʼo te kapite, te tahi ʼu kupu tāfito pea mo te ʼu paki. Fakamahino age kiā ia ʼi muʼa ʼo te fakaʼosi ʼo tana teuteuʼi tana ako, ʼe lelei ke ina toʼo he kiʼi temi nounou moʼo fakamanatuʼi te ʼu puani tāfito ʼo te kapite. Kapau ʼe ʼi ai te ʼu fehuʼi fakamanatu ʼaē ʼe ʼātakai, pea ʼe lagi feala ke ina fakaʼaogaʼi. ʼAki te fakamanatu ʼaia ʼe feala anai hana taupau lelei te ʼu meʼa ʼaē neʼe ina ako.

⁵ Ko te akoʼi kiā ia ʼaē ʼe ako ke ina teuteuʼi lelei tana ako, ʼe tokoni anai kiā ia ke fia fai hana ʼu tali ʼi te ʼu fono. ʼE toe tokoni anai kiā ia ke liliu ʼo māhani lelei ʼi te ako. ʼE ʼaoga anai kiā ia te faʼahi ʼaia ʼi te temi ʼaē ka ʼosi kātoa ai tana ako Tohi-Tapu mo koutou.