“Nee Fafaga Aki Te u Folafola o Te Tui”

¹ Kapau ʼe tou fia pipiki tuʼumaʼu ki te ʼAtua pea ʼe tonu ke tou gāue mālohi. (1 Tim. 4:​7-​10) ʼE tou vaivai pea mo higa vave anai mo kapau ʼe tou fai ʼaki totatou mālohi totonu. (Isa. 40:29-​31) Ke feala hatatou maʼu ia te mālohi mai ia Sehova, ʼe tonu ke “fafaga [tatou] aki te u folafola o te tui.”​—1 Tim. 4:6.

² Te Meʼa Kai Lahi Fakalaumālie: ʼAki tana Folafola pea mo tana “tagata kaugana agatonu mo poto,” ʼe foaki mai e Sehova ia te meʼa kai lahi fakalaumālie. (Mat. 24:45, MN ) ʼE tou faiga mālohi koa ke tou maʼu ia tona ʼu lelei? ʼE tou lau koa ia te Tohi-Tapu ʼi te ʼaho fuli? ʼE tou tuku koa hotatou temi ki tatatou ako takitokotahi pea mo te metitāsio? (Pes. 1:​2, 3) Ko te taʼi kai fakalelei ʼaia ʼi te faʼahi fakalaumālie, ʼe ina fakamālohiʼi tatou pea mo puipui tatou mai te ʼu ʼaluʼaga fakatupu vaivai ʼo te mālama ʼa Satana. (1 Soa. 5:​19) Kapau ʼe tou fakafonu totatou ʼatamai ʼaki te ʼu meʼa lelei pea mo maʼuliʼi ia te ʼu meʼa ʼaia, ʼe tapuakina anai tatou e Sehova.​—Filp. 4:​8, 9.

³ ʼE toe fakamālohiʼi tatou e Sehova ʼaki te ʼu fono ʼo te kokelekasio. (Hep. 10:24, 25) Ko te ʼu akonaki fakalaumālie pea mo te ʼu fakakaugā lelei ʼaē ʼe tou maʼu ʼi te ʼu fakatahi ʼaia, ʼe nātou fakamālohiʼi tatou ke tou nonofo agatonu ʼi te ʼu temi fihifihia. (1 Pet. 5:​9, 10) Neʼe ʼui fēnei e te kiʼi finemui: “ ʼE au ako ʼi te ʼaho kātoa, pea ʼe ko he ʼaluʼaga fakatupu mafasia kiā au. Kae ko te ʼu fono ʼe hage ko he matapuna vai ʼi te toafa, ʼe au maʼu ai te mālohi moʼo tauʼi ia te ʼu fihifihia ʼaē ka tau mo au ʼi te faleako.” ʼE tapuakinaʼi tatou ʼi tatatou ʼu faiga ʼaē ke tou kau ki te ʼu fono!

⁴ Tou Tala Ia Te Moʼoni: Kiā Sesu neʼe hage ko hana meʼa kai ia tana fai faka mafola ʼaē ki te hahaʼi, he neʼe mālohi ai. (Soa. 4:​32-​34) ʼO toe feiā pe mokā tou fakahā ki te hahaʼi te ʼu fakapapau taulekaleka ʼo te ʼAtua, ʼe tou toe mālohi ai. ʼAki tatatou maʼumaʼua ʼi te minisitelio, ʼe puipui ai totatou loto pea mo totatou ʼatamai, heʼe tou tōkakaga tuʼumaʼu ai ki te Puleʼaga pea mo te ʼu tapuakina ʼaē ka tou ʼamanaki maʼu, pea ʼe ina fakaloto mālohiʼi tatou.​—Mat. 11:28-​30.

⁵ ʼE tapuakinaʼi lahi ia tatou, heʼe lahi te meʼa kai fakalaumālie ʼaē ʼe foaki mai e Sehova ki tana hahaʼi ia ʼaho nei! ʼOfa pe ke tou haga kalagaʼi fakafiafia ia tona kolōlia.​—Isa. 65:13, 14.

Koga Nima: Tou Fai He ʼu Ako Tohi-Tapu ʼe Tuputupu

Ko Palakalafe e Fia ʼe Tonu Ke Fai ʼi Te Ako

¹ ʼI te ʼu temi ʼaē neʼe faiako ai Sesu ki tana ʼu tisipulo, neʼe ina tokagaʼi tonatou ʼu tuʼakoi, “ ʼo fakafuafua pe ki tanatou faʼa fakalogo.” (Mko. 4:​33, MN; Soa. 16:12) ʼO feiā mo te kau faiako ʼo te Folafola ʼa te ʼAtua ia ʼaho nei, ʼe tonu ke nātou fakafuafua lelei, peʼe ko palakalafe e fia ʼaē ʼe tonu ke nātou fai ʼi te ako Tohi-Tapu. ʼE fakalogo anai ia te lahi ʼo te ʼu palakalafe ʼaē ka fai ki te fealagia pea mo te ʼu ʼaluʼaga ʼo ia ʼaē ʼe faiako pea mo ia ʼaē ʼe ako.

² Tou Faʼufaʼu He Tui ʼe Mālohi: Ko te kapite e tahi ʼe lagi feala anai ki ʼihi ke nātou fai ʼi he hola kātoa, kae ko ʼihi leva ʼe lagi tonu anai ke fai tuʼa lua peʼe tuʼa tolu. ʼAua naʼa tou faiga ke tou foimo fakaʼosi fakavilivili ia he kapite, kae mole mahino lelei kiai ia ia ʼaē ʼe ako. ʼE tonu ke fakatafito lelei ia te tui foʼou ʼa te kau ako fuli ʼo te Folafola ʼa te ʼAtua.​—Taag. 4:7; Loma 12:2.

³ Kapau ʼe koutou fai ia te ako ʼi te vāhaʼa fuli, koutou faiga fakalelei ke koutou tokoni kiā ia ʼaē ʼe ako ke mahino pea mo ina tali ia te ʼu meʼa ʼaē ʼe ina ako ʼi te Folafola ʼa te ʼAtua. ʼAua naʼa koutou fakaviliviliʼi te ako naʼa feala ai ke puli ia ia te maʼuhiga ʼo te ʼu moʼoni ʼaē ʼe tonu ke ina akoʼi. Koutou fakaʼaogaʼi he temi feʼauga moʼo fakamahino ia te ʼu puani tāfito, pea mo vakaʼi ia te ʼu vaega faka Tohi-Tapu maʼuhiga ʼaē ʼe fakatafito kiai ia te ʼu akonaki.​—2 Tim. 3:​16, 17.

⁴ ʼAua Naʼa Lahi Fau Ia Te ʼu Meʼa ʼAē ʼe Tou Palalau Kiai: ʼE mole tonu ke tou fakaviliviliʼi ia te ako, pea ʼe mole tonu foki ke tou palalau ki he ʼu tuʼuga meʼa ʼe mole pipiki ki te ʼu meʼa ʼaē ʼe ako. Kapau ko ia ʼaē ʼe ako ʼe lahi tāfito tana palalau ki he ʼu faʼahi ʼo ʼuhiga mo ia totonu, ʼe lagi lelei ke hoki tou palalau ki te ʼu faʼahi ʼaia mokā ʼosi ia te ako.​—Tnk. 3:1.

⁵ Tahi ʼaē meʼa, ʼe feala ke lahi fau takita palalau lolotoga te ako heʼe tou leleiʼia ʼaupito ia te ʼu moʼoni ʼaē ʼe tou talanoa kiai. (Pes. 145:​6, 7) ʼE feala ʼi ʼihi temi lolotoga te ako, ke hilifaki kiai he puani peʼe ko he meʼa neʼe hoko, kae ʼe mole tonu leva ke lahi fau peʼe loaloaga fau, ʼo mole kei feala ai leva kiā ia ʼaē ʼe ako ke ina maʼu ia te ʼatamai mālama totonu ʼo te ʼu akonaki tāfito ʼo te Tohi-Tapu.

⁶ Kapau ʼe tou faka feʼauga lelei ia te ʼu palakalafe ʼi te ʼu ʼaho ʼaē ʼe fai ai te ako, ʼe tou tokoni ai anai ki te kau ako Tohi-Tapu ke nātou “haʼele ʼi te mālama ʼa Sehova.”​—Isa. 2:5.