Koga Ono: Tou Fai He ʼu Ako Tohi-Tapu ʼe Tuputupu

Kapau ʼe Lagaʼi He ʼu Fehuʼi e Ia ʼAē ʼe Ako

¹ Kapau kua haʼele lelei he ako Tohi-Tapu, ʼi te agamāhani ʼe lelei age hakita vakaʼi māmālie ia te ʼu akonaki faka Tohi-Tapu ʼi hata hiki fakavilivili ki he tahi akonaki. ʼE feala ai anai kiā ia ʼaē ʼe ako ke ina maʼu he fakatafito lelei ʼo te ʼatamai mālama pea mo tuputupu ʼi te faʼahi fakalaumālie. (Kol. 1⁠:​9, 10) Kae lolotoga te ako ʼe tautau lagaʼi e te kau ako Tohi-Tapu ia te ʼu fehuʼi ki te ʼu faʼahiga puani kehekehe. ʼE tonu koa ke tou tali ki te ʼu fehuʼi ʼaia?

² Tou Fakasiosio Poto: Ko te ʼu fehuʼi ʼaē ʼe ʼalutahi mo te ʼu meʼa ʼaē ʼe tou lolotoga ako mo ia, ʼe feala hata foimo tali age ki ai. Kae kapau ko he fehuʼi ʼo ʼuhiga mo he puani ʼe hoki vakaʼi anai ki muli age ʼi te tohi, ʼe lagi lelei ke tou ʼui age ʼe hoki tou vakaʼi anai te faʼahi ʼaia ki muli age. Kae kapau ko he fehuʼi ʼe mole ʼi ai hona pikipikiga mo te ʼu meʼa ʼaē ʼe kita ako mo ia peʼe tonu anai ke kita fai he ʼu kumi moʼo tali fakalelei kiai, ʼe lagi lelei ke tou vakaʼi te fehuʼi ʼaia ʼi te ʼosi ʼo te ako peʼe ʼi he tahi age lakaga. Ko ʼihi ʼe nātou tohi te fehuʼi ke ʼiloʼi e ia ʼaē ʼe ako ʼe vakaʼi anai tana fehuʼi, kae ʼe nā hoko atu nāua tanā ako ʼo te kapite ʼaē ʼe nā lolotoga vakaʼi.

³ ʼE lahi te ʼu akonaki faka Tohi-Tapu ʼe tali fakanounou kiai te ʼu tohi ako faka Tohi-Tapu. Kapau ʼe faigataʼa ki he tahi hana tali he akonaki peʼe tui mālohi ki he akonaki hala, koteā ʼaē ka tou fai ʼi te temi ʼaia? ʼE lagi lelei ke vakaʼi he tahi tohi ʼe talanoa ai ki te manatu ʼa te Tohi-Tapu ʼo ʼuhiga mo te faʼahi ʼaia. Kapau ʼe kei faigataʼa aipe tana mahino ki te faʼahi ʼaia, pea tou tuku ki he tahi temi kae tou hoko atu tana ako. (Soa. 16⁠:12) Ka lahi anai tana mahino ki te Tohi-Tapu pea mo tuputupu ʼi te faʼahi fakalaumālie, ʼe feala ai anai ke mahino ki te akonaki faka Tohi-Tapu ʼaia.

⁴ Tou Agavaivai: Kapau ʼe mole koutou ʼiloʼi lelei te tali ki he fehuʼi, koutou tōkakaga naʼa koutou foaki age he tali ʼe hala. (2 Tim. 2⁠:15; 1 Pet. 4⁠:11) Fakahā age ʼe koutou fai anai he ʼu kumi ki tana fehuʼi pea hoki koutou toe liliu mai anai mo tona tali. ʼE lagi lelei ke koutou fakaʼaogaʼi te faigamālie ʼaia moʼo akoʼi ki ai te fai ʼo te ʼu kumi. ʼAki te temi, koutou fakahā age peʼe feafeaʼi te fakaʼaogaʼi ʼo te ʼu tohi faka Tohi-Tapu kehekehe ʼaē neʼe foaki mai e te kautahi ʼa Sehova. ʼE feala ai anai kiā ia hana maʼu totonu te ʼu tali ki tana ʼu fehuʼi.​—⁠Gaue 17⁠:11.

Tou Faiga Ke Toe Hoko Atu He Fagonogono Kiā Nātou

¹ Ka tou faka mafola te logo lelei, ʼe tou tautau felāveʼi mo te hahaʼi ʼe mole nonofo ʼi totatou telituale, peʼe ko he ʼu hahaʼi matāpule, peʼe ko he ʼu hahaʼi ʼe nātou palalau ki te lea ʼa te kau tuli. Pea ʼe feala kiā nātou ʼaē neʼe tautau fai palalau mo tatou ki te Tohi-Tapu, ke nātou hiki ki he tahi telituale. Koteā te fakatuʼutuʼu ʼaē ʼe feala ke tou fai ke toe hoko atu he fagonogono kiā nātou? Tou fakaʼaogaʼi te kiʼi pepa Veuillez suivre lʼintérêt (S-43).

² ʼI te agamāhani ʼe fia logo te hahaʼi ki te logo lelei mo kapau ʼe fakahā age ʼi tanatou lea. (Gaue 22⁠:​1, 2) Koia ʼe lahi ai te ʼu ʼaluʼaga, ka tou felāveʼi mo he matāpule, ʼe tonu anai ke tou tohi te kiʼi pepa ʼaia, tatau aipe peʼe mole ina tali te logo ʼo te Puleʼaga. Kae ʼi te potu ʼaē ʼe kaugamālie ai te hahaʼi matāpule pea ʼe fai tuʼumaʼu ai te fai faka mafola ʼi tanatou lea, ʼe mole tou tohi anai te hahaʼi fuli ʼaia ʼi te kiʼi pepa, gata pe mo kapau neʼe tali e he tahi ia te logo.

³ Tou Tohi Te Kiʼi Pepa: Tou faiga fakalelei ke tou tohi tona higoa, mo tona tuʼasila, pea mo tona numelo telefoni. Tou tohi mo te ʼu meʼa ʼaē ʼe fia palalau kiai, mo te temi ʼaē ka maʼu atu ai ki tona ʼapi, mo te tohi ʼaē neʼe tou tuku ki ai peʼe neʼe loto kiai, pea mo te lea ʼaē ʼe mahino lelei kiai. Kapau kua tohi te ʼu meʼa fuli ʼaia ki te kiʼi pepa, tou foimo foaki ki te sikalaipe ʼo te kokelekasio, ke ina momoli ki te kokelekasio ʼo te telituale ʼaia.

⁴ Te Momoli ʼo Te Kiʼi Pepa: Kapau ko te sikalaipe ʼe mole ina ʼiloʼi te kokelekasio ʼaē ke momoli kiai te kiʼi pepa ʼaia peʼe ko tona tuʼasila, ʼe feala ke telefoni ki te Pilo Selevisi ʼo te filiale ʼo ʼuhiga mo te faʼahi ʼaia. Ka kua momoli te kiʼi pepa, ʼe mole kei ʼaoga ke fakahā ki te taupau kolo.

⁵ Ka maʼu e he kokelekasio te kiʼi pepa Veuillez suivre lʼintérêt, ʼe tonu ke ina foimo fai te ʼu fakatuʼutuʼu moʼo ʼaʼahi te hahaʼi. Kapau ʼe tou tahi lagolago lelei ki te faʼahi ʼaia, ʼe tou lava falala ko Sehova ʼe ina avahi anai te loto ʼo te hahaʼi ʼaē ʼe nātou “lotolelei ki te maʼuli heʼegata.”​—⁠Gaue 13⁠:​48, MN.