Koga Fitu: Tou Fai He ʼu Ako Tohi-Tapu ʼe Tuputupu

Tou Fai He Faikole ʼi Te Ako Tohi-Tapu

1. (a) He koʼe ʼe lelei ke tou kamata pea mo fakaʼosi he ako Tohi-Tapu ʼaki te faikole? (b) ʼE lava feafeaʼi hatatou kamata he ako Tohi-Tapu ʼaki te faikole?

¹ ʼE ʼaoga ke tapuakina e Sehova te kau ako Tohi-Tapu ke feala hanatou tuputupu ʼi te faʼahi fakalaumālie. (1 Ko. 3:6) Koia, ʼe lelei ke tou kamata pea mo fakaʼosi he ako Tohi-Tapu ʼaki te faikole. ʼI te agamāhani, ʼe feala ke tou fai te faʼahi ʼaia ʼi tatatou ʼuluaki fai te ako mo he ʼu hahaʼi lotu. ʼO ʼuhiga mo te tahi kau ako, ʼe lagi tonu ke tou vakaʼi te temi ʼaē kua feala ai ke tou fai ai he faikole. ʼE feala hakotou fakaʼaogaʼi ia Pesalemo 25:4, 5 pea mo 1 Soane 5:14 moʼo tokoni kiā ia ʼaē ʼe ako ke mahino pe koʼe ʼe tonu ke fai he kole, pea mo koutou toe fakaʼaogaʼi ia Soane 15:16 moʼo fakamahino age te maʼuhiga ʼaē ke tou faikole kiā Sehova ʼaki ia Sesu Kilisito.

2. Ka ʼalu he tēhina peʼe ko he kaugā fagona tagata mo he tuagaʼane ki he ako Tohi-Tapu, ko ai ʼaē ka ina fai te kole?

² Ko ai ʼaē ʼe tonu ke ina fai te kole ʼi te ako Tohi-Tapu? Kapau ʼe fai e he tuagaʼane he ako Tohi-Tapu mo he tēhina, pea ʼe ko te tēhina ʼaē ka ina fai te kole, kae ʼe feala ke fai e te tuagaʼane te ako kae ina pūlouʼi tona ʼulu. (1 Ko. 11:5, 10) ʼI te tahi age faʼahi, kapau ko he kaugā fagona tagata ʼe ʼalu mo he tuagaʼane ki te ako, pea ʼe ko te tuagaʼane ʼaē ka ina fai te kole. ʼI te ʼaluʼaga ʼaia, ʼe ina pūlouʼi tona ʼulu mokā faikole pea mo fai te ako.

3. Koteā te ʼu manatu lelei ʼaē ʼe feala ke tou talanoa kiai ʼi te ʼu faikole ʼaē ʼe tou fai ʼi he ako Tohi-Tapu?

³ Koteā ʼAē ʼe Feala Ke Tou Talanoa Kiai ʼi Te Faikole: Ko te ʼu faikole ʼi he ako Tohi-Tapu ʼe mole ʼaoga ke loaloaga, kae ʼe tonu ke talanoa ki he ʼu manatu tāfito. ʼE tou kole anai ke tapuakiʼi e te ʼAtua te ako pea mo fakamālo ki te ʼu moʼoni ʼaē neʼe tou ako, pea ʼe toe lelei ke tou vikiʼi ia Sehova, ia te Matapuna ʼo te Faiako. (Isa. 54:13) ʼE toe feala ʼi tatatou ʼu faikole ke tou fakahā tatatou fia tokoni moʼoni kiā ia ʼaē ʼe ako pea mo totatou loto fakafetaʼi ki te kautahi ʼaē ʼe fakaʼaogaʼi e Sehova. (1 Tes. 1:2, 3; 2:7, 8) Kapau ʼe tou kole ke tapuakina e Sehova te ʼu faiga ʼo ia ʼaē ʼe ako ke ina maʼuliʼi te ʼu meʼa ʼaē ʼe ina ako, pea ʼe lava tokoni kiā ia ke mahino ki te maʼuhiga ʼaē ke ina ‘maʼuliʼi te folafola.’—Skp. 1:22.

4. Koteā te ʼu lelei ʼe tou maʼu ʼi tatatou kamata pea mo fakaʼosi he ako Tohi-Tapu ʼaki he faikole?

⁴ ʼE lahi te ʼu lelei ʼe tou maʼu mai te faikole. ʼE tou maʼu ai te tapuakina ʼa te ʼAtua. (Luka 11:13) ʼE hā ʼaki te faikole ia te maʼuhiga ʼo te ako ʼo te Folafola ʼa te ʼAtua. Ka fakalogo ia ia ʼaē ʼe ako ki tatatou ʼu faikole, ʼe ina ako ai peʼe feafeaʼi hana faikole. (Luka 6:40) Tahi ʼaē meʼa, ko te ʼu kole ʼaē ʼe haʼu mai he loto ʼe fonu ai te ʼofa ki te ʼAtua pea mo te fakafetaʼi ki tana ʼu kalitātē, ʼe tokoni kiā ia ʼe ako ke ina maʼu hana ʼu felogoi mo Sehova.

He ʼu Manatu ʼo ʼUhiga Mo Te ʼu Nusipepa

Te Tule Leʼo ʼaho 15 ʼo Mal.

“Ko te hahaʼi ʼi te malamanei kātoa ʼe nātou vikiʼi te ʼu akonaki ʼaē neʼe fai e Sesu. [Lau age te ʼu palalau ʼaē ʼe tuʼu ʼi te pasina 3, palakalafe 1.] Kae ʼi tau manatu, ʼe kei ʼaoga koa te ʼu akonaki ʼaia ʼi totatou temi, ohage la ko tana ʼu palalau ʼaē ʼe tou maʼu ʼi te vaega ʼaenī? [Lau age ia Mateo 5:21, 22a. Pea koutou tuku ke fai mai hana tali.] ʼE fakamatala ʼi te nusipepa ʼaenī ia te ʼu akonaki ʼaē neʼe fai e Sesu pea mo nātou lava ʼaoga feafeaʼi kiā tatou.”

Réveillez-vous! ʼaho 22 ʼo Mal.

“Tokolahi te hahaʼi ʼe nātou leleiʼia te ʼu moʼuga heʼe ko he ʼu koga meʼa matalelei, kae ʼe ke ʼiloʼi koa ʼe maʼuhiga te ʼu moʼuga ki te maʼuli ʼi te kele? [Tuku ke fai mai hana tali.] ʼE fakamahino ʼi te nusipepa ʼaenī pe koʼe ʼe ʼaoga kiā tatou te ʼu moʼuga pea koteā ʼaē ʼe hoko kiā nātou ia ʼaho nei. ʼE toe fakahā ai peʼe hāofaki feafeaʼi anai e te Tupuʼaga te matapuna lahi ʼaia ʼo te maʼuli.” Lau age ia Pesalemo 95:4.

Te Tule Leʼo ʼaho 1 ʼo ʼApe.

“Neʼe kua ke logo koa ki te ʼui ʼaē ʼe fefakafeagaiʼaki ia te ʼu meʼa fakapoto lalahi pea mo te Tohi-Tapu? [Tuku ke fai mai hana tali.] ʼE fakamahino ʼi te nusipepa ʼaenī ia te kamataʼaga ʼo te tokakovi ʼa te ʼu meʼa fakapoto lalahi pea mo te lotu. Kae ʼe toe fakahā ai mo te ʼu fakamoʼoni ko te ʼu meʼa fakapoto lalahi ʼe felogoi tahi mo te Tohi-Tapu.” Fakahā te pasina 6 mo te 7. Pea koutou lau age ia Tagata Tānaki 1:7.

Réveillez-vous! ʼaho 8 ʼo ʼApe.

“ ʼE ke manatu koa ʼe feala ke tokoni ia te ʼu mātuʼa ki tanatou fānau ke mole hoko kiā nātou te ʼu fihifihia ʼo te temi tūpulaga ʼaē ʼe faigataʼa? [Tuku ke fai mai hana tali. Pea koutou lau age ia Isaia 48:17, 18] ʼE fakahā mai ʼi te nusipepa ʼaenī peʼe lava feafeaʼi, ʼaki te maʼuliʼi ʼo te ʼu tokoni ʼa te Tohi-Tapu, ke felogoi lelei te ʼu mātuʼa mo tanatou fānau pea mo fai he ʼu fakatuʼutuʼu fakapotopoto.”