Kua Ōvi Mai Te ʼAho ʼo Sehova

¹ Kua fakaʼamu ʼaupito e te kau Kilisitiano ke hoko mai la te ʼaho ʼo Sehova, ʼaē ka fakaʼauha ai anai te ʼu faʼahiga meʼa ʼo te tuʼu ʼaenī pea mo fakatuʼu ai ia te mālama foʼou pea mo faitotonu. (2 Pet. 3:12, 13) ʼE mole tou ʼiloʼi peʼe ko te ʼaho fea ʼaē ka hoko ai te ʼu meʼa ʼaia, koia ʼe tonu ai ke tou nonofo ʼalaʼala pea mo tou tokoni ki te hahaʼi ke nātou nonofo ʼalaʼala mo nātou. (Esk. 33:7-9; Mat. 24:42-44) ʼE toe mālohi anai tatatou tui moʼoni ko “te ʼaho lahi ʼo Sehova kua ōvi mai,” mo kapau ʼe tou metitāsioʼi te Folafola faka polofeta ʼa te ʼAtua.—Sofo. 1:14.

² Te Fefakahoahoaʼaki ʼa Te ʼu Mālohi Faka Malamanei: Iā Apokalipesi 17:9-11 (MN), ʼe talanoa ai te ʼapositolo ko Soane ʼo ʼuhiga mo “te ʼu hau e [toko] fitu,” ʼe nātou fakatātā te fefakahoahoaʼaki ʼa te ʼu mālohi faka malamanei e fitu. ʼE toe talanoa ia Soane ki “te valu hau,” ʼaē ʼe ina fakatātā ʼi te temi nei ia te Kautahi ʼo te ʼu Puleʼaga Fakatahi. ʼE ʼi ai koa he tahi ʼu mālohi faka malamanei ʼe tonu ke tou toe fakatalitali kiai? Kailoa, heʼe ʼui ʼi te lea faka polofeta ʼaia, ko te valu hau ʼe “ʼalu ia ki te fakaʼauha,” pea ʼe mole toe talanoa ia ki he tahi age ʼu hau ʼi te kele. Kua lagi koutou mahino ʼaki te lea faka polofeta ʼaia, kua nounou te temi.

³ Iā Taniela 2:31-45, ʼe tou mahino ai kua ōvi mai te ʼaho ʼo Sehova. ʼI te lea faka polofeta ʼaia, ko te fakatātā lahi ʼaē neʼe sio kiai ia Nepukanesa ʼi tana moemisi, ʼe ina fakatā te fefakahoahoaʼaki ʼo te ʼu mālohi faka malamanei. Kua ʼosi fakatuʼu takitahi ia te ʼu mālohi ʼaia. Ko ai te mālohi ʼaē ʼe ina lolotoga takitaki nei ia te malamanei? Ko te mālohi ʼo te temi nei, ʼe fakatā e te ʼu vaʼe ʼo te fakatātā. ʼE fakahā ʼi te lea faka polofeta te meʼa ʼaē ka hoko mai. ʼE fakaʼauha kātoa anai ia te ʼu puleʼaga fakatagata, pea ʼe fakatuʼu anai “he puleʼaga ʼe mole pulihi anai ʼi he temi.” ʼE koutou mahino koa ʼaki te lea faka polofeta ʼaia ko te ʼaho ʼo Sehova kua ōvi mai?

⁴ Te Tahi Fakamoʼoni: ʼE tou sio mata ʼi te temi nei ki te tahi fakamoʼoni ʼo ʼuhiga mo te kua ōvi mai ʼo te ʼaho ʼo Sehova. ʼE tou sio ki te hoko ʼo te ʼu meʼa ʼaē neʼe fakakikite e te ʼapositolo ko Paulo ʼo ʼuhiga mo te ʼu agaaga ʼa te hahaʼi “i te u aho fakamuli.” (2 Tim. 3:1-5) Pea ʼe tou kau ki te fagonogono ʼaē ʼe tonu ke fai ʼi te malamanei kātoa ʼi muʼa ʼo te hoko mai ʼo te fakaʼosi. (Mat. 24:14) ʼOfa pe ke ʼiloga ʼi tatatou minisitelio te maʼuhiga ʼo te ʼu palalau ʼaenī ʼa te kau ʼāselo: “Koutou tuania te Atua, koutou foaki kia te ia te kololia, koteuhi kua hoko mai te hola o tana fakamau.”—Apk. 14:6, 7.

Koga Hiva: Tou Fai He ʼu Ako Tohi-Tapu ʼe Tuputupu

Tou Teuteuʼi Te Kau Ako Tohi-Tapu Ke Nātou Fagonogono Faigamālie

¹ ʼI te ʼiloʼi ʼaē e Atelea pea mo Filipo ko Sesu neʼe ko te Mesia, neʼe mole nā nonofo mo te logo ʼaia, kae neʼe nā ʼolo ʼo tala ki te hahaʼi. (Soa. 1:40-45) ʼE toe feiā iā ʼaho nei, ka kamata tui te kau ako Tohi-Tapu ki te ʼu meʼa ʼaē ʼe nātou ako, ʼe nātou fia fakahā ia te ʼu meʼa ʼaia ki te hahaʼi. (2 Ko. 4:13) E feafeaʼi hatatou fakaloto mālohiʼi ia nātou ke nātou fakaʼaogaʼi ia te ʼu temi faigamālie moʼo fai ʼo te fagonogono pea mo teuteuʼi nātou ke nātou fakahoko lelei ia te faʼahi ʼaia.

² ʼE lagi lelei ke koutou fakalavelave age kiā ia peʼe kua palalau mo he tahi ʼo ʼuhiga mo te ʼu meʼa ʼaē ʼe ina ako ʼi te Tohi-Tapu. Lagi ʼe ʼi ai hona ʼu kaumeʼa, mo hona ʼu kāiga ʼe ina fia fakaafe ki tana ako. Koutou fehuʼi age peʼe fia logo ki te logo lelei, tona ʼu kaugā gāue, mo tona ʼu kaugā ako, peʼe ko niʼihi age ʼe feʼiloʼiʼaki mo ia. Kapau ʼe ina fai ia te ʼu fehuʼi ʼaia, pea ʼe feala anai ke ina kamata he fagonogono. Koutou tokoni ki ai ke ina maʼu te fakasiosio tonu pea mo aga fakaʼapaʼapa pea mo agalelei mokā palalau mo te hahaʼi ʼo ʼuhiga mo Sehova ʼAtua pea mo tana ʼu fakatuʼutuʼu.—Kol. 4:6; 2 Tim. 2:24, 25.

³ Ke Nātou Fakahā Te ʼu Akonaki ʼAē ʼe Nātou Tui Kiai: ʼE maʼuhiga tāfito ke tou fakahā ki te kau ako Tohi-Tapu ia te maʼuhiga ʼaē ʼo te fakaʼaogaʼi ʼo te Folafola ʼa te ʼAtua mokā nātou fakahā ki ʼihi ia te ʼu akonaki ʼaē ʼe nātou tui kiai. Koutou filifili he ʼu puani lolotoga te ako, pea koutou fehuʼi age ki ai: “E feafeaʼi anai hau fakaʼaogaʼi te Tohi-Tapu moʼo fakamahino te moʼoni ʼaenī ki tou famili?” peʼe tou fai age te fehuʼi ʼaenī: “Ko te vaega Tohi-Tapu fea ʼaē ka ke fakaʼaogaʼi anai moʼo fakamoʼoni ia te faʼahi ʼaē ki hou kaumeʼa?” Koutou fakalogo ki tana tali, pea koutou fakahā age peʼe feafeaʼi hana fakatafito tana ʼu akonaki ki te Tohi-Tapu. (2 Tim. 2:15) Kapau ʼe koutou tokoni feiā ki ai, ʼe koutou teuteuʼi anai ia ia ke ina fakaʼaogaʼi ia te ʼu temi faigamālie moʼo fai ʼo te fagonogono pea ke kau ki te fai faka mafola mo te kokelekasio mo kapau kua fealagia ki te faʼahi ʼaia.

⁴ ʼE lelei ke koutou fakahā age ki takotou kau ako Tohi-Tapu ʼe nātou fēlaveʼi anai mo he ʼu fakafeagai. (Mat. 10:36; Luka 8:13; 2 Tim. 3:12) ʼE ko he faigamālie ki te kau ako ke nātou fai fagonogono mo kapau ʼe lagaʼi e te hahaʼi ni ʼu fehuʼi peʼe nātou fai he ʼu talanoa ʼo ʼuhiga mo te kau Fakamoʼoni ʼa Sehova. Ko te kaupepa lahi Te Kau Fakamoʼoni ʼa Sehova​— Logo Tahi Moʼo Fai ʼo Te Finegalo ʼo Te ʼAtua ʼi Te Malamanei ʼe ina teuteuʼi te kau ako ke nātou “nonofo teuteu tuʼumaʼu moʼo tali” kiā nātou ʼaē ʼe faifehuʼi age. (1 Pet. 3:15, MN) Ko te kaupepa ʼaia ʼe ina fakamahino lelei ia tatatou kautahi, pea ʼe lava fakaʼaogaʼi e te kau ako foʼou moʼo fakamahino ki tonatou ʼu kaumeʼa pea mo tonatou ʼu kāiga ʼaē ʼe nātou fia logo moʼoni, ia te ʼu akonaki faka Tohi-Tapu pea mo tatatou ʼu gāue.