Tou Haga Tala Te Folafola ʼa Te ʼAtua ʼAki He Lototoʼa
1 ʼI totatou ʼuhiga minisi Kilisitiano, ʼe tou ʼiloʼi ʼe mole tali anai e te hahaʼi fuli ia tatatou fai faka mafola. (Mat. 10:14) Kae ʼe mole tou tuku anai tatatou kalagaʼi ia te logo lelei ʼuhi ko te mole tali lelei ʼa ʼihi ia te gāue ʼaia. (Taag. 29:25) Koteā ʼaē ʼe ʼaoga kiā tatou, ke tou haga tala te folafola ʼa te ʼAtua ʼaki he lototoʼa?
2 Neʼe maʼuhiga ki te ʼapositolo ko Paulo ia “te ʼuhiga māʼoluga ʼo te ʼiloʼi ʼaē ʼo Kilisito Sesu.” Ko te faʼahi ʼaia neʼe ina uga ia ia ke palalau ʼaki “he tui papau.” (Filp. 3:8, MN; 1 Tes. 1:5) Logola ko ʼihi neʼe nātou lau ko te logo ʼaē neʼe ina faka mafola neʼe vaivai pea mo fakavale, kae neʼe mahino kiā ia, ko te logo ʼaia neʼe “ko te mālohi ʼo te ʼAtua moʼo fakamaʼuli te tagata fuape ʼaē ʼe tui.” (Loma 1:16, MN ) Koia, logola te ʼu fakafeagai ʼaē neʼe hoko kiā ia, neʼe haga “palalau ʼaki he lototoʼa [tupu] ko te mālohi ʼo Sehova.”—Gaue 14:1-7, MN; 20:18-21, 24.
3 Te Matapuna ʼo Totatou Mālohi: Ko te fai fagonogono ʼa Paulo ʼaki he lototoʼa, neʼe mole ina fai ʼaki tona mālohi fakatagata. Neʼe ina ʼui fēnei ʼo ʼuhiga mo ia pea mo Silasi: “ ʼI te hili ʼo tamā tali mamahi pea mo gaohi koviʼi ʼi Filipe, . . . neʼe mā maʼu te lototoʼa mai totatou ʼAtua, moʼo tala atu kiā koutou ia te logo lelei ʼo te ʼAtua ʼi te ʼu tuʼuga faigataʼaʼia.” (1 Tes. 2:2, MN; Gaue 16:12, 37) Tahi ʼaē meʼa, ʼi tana nofo ʼi te fale pilisoni ʼi Loma, neʼe kole e Paulo ki tona ʼu tēhina mo tuagaʼane ke nātou hūfakiʼi ia ia, ke feala hana hoko atu te tala ʼo te logo lelei “ ʼaki he lototoʼa.” (Ef. 6:18-20, MN ) ʼI tana falala kiā Sehova kae mole falala kiā ia totonu, neʼe feala ai kiā Paulo ke ina haga tala ia te folafola ʼa te ʼAtua ʼaki he lototoʼa.—2 Ko. 4:7; Filp. 4:13.
4 ʼE toe feiā ʼi totatou temi. Neʼe faigataʼa ʼaupito ki te tēhina tana fakahā ʼi tana fale gāue ko ia ko he Fakamoʼoni ʼa Sehova, pea mo fai fagonogono faigamālie. Pea neʼe faikole kiā Sehova ʼo ʼuhiga mo te faʼahi ʼaia ʼo kamata fai fagonogono ai. ʼI te kamata, neʼe ʼi ai tana kaugā gāue neʼe fakafeagai ki tana fai fagonogono, kae ʼi tana palalau age ʼo ʼuhiga mo te ʼamanaki ʼo te fakatuʼuake, neʼe tali ai e te tagata ke fai hana ako Tohi-Tapu. Talu mai te ʼaho ʼaia, kua fakaʼaogaʼi e te tēhina ia te ʼu faigamālie fuli moʼo fai fagonogono. ʼI tana tahi gāue, lolotoga taʼu e 14, neʼe tokoni ki te toko 34 hahaʼi ke nātou kaku ki te papitema. ʼO toe feiā aipe, ʼe tou lava falala ʼe foaki mai anai e Sehova ia te mālohi ke feala hatatou ‘haga tala tana folafola ʼaki he lototoʼa.’—Gaue 4:29.