Tou “Fagonogono Te Folafola ʼa Te ʼAtua ʼo Mole [Tou] Mātataku”
1 ʼE kotou lotolotolua koa ʼi ʼihi temi ʼi te palalau ki takotou tui ʼi te faleako peʼe ʼi te gāue? ʼE faigataʼa koa kiā koutou hakotou fagonogono ki tokotou ʼu kāiga pea mo tokotou ʼu vāhaʼa fale peʼe ki te ʼu hahaʼi ʼaē ʼe mole kotou ʼiloʼi? Koteā ʼaē kā tokoni mai kiā tātou fuli ke tou fakaʼaogaʼi te ʼu faigamālie moʼo “fagonogono te folafola ʼa te ʼAtua ʼo mole [tou] mātataku”?—Filp. 1:14.
2 ʼAua Naʼa Tou Lotolotolua: ʼE kotou lotolotolua anai koa ʼo palalau moʼo haofaki hokotou kaumeʼa peʼe ko hokotou kāiga neʼe tukugākoviʼi hala? Lolotoga te ʼu sēkulō, neʼe lahi te ʼu loi neʼe lau ʼo ʼuhiga mo Sehova, totatou Kaumeʼa lelei. ʼE ko te pilivilēsio ʼaenī e tahi ʼe tou maʼu ke tou fagonogono ʼo ʼuhiga mo totatou ʼAtua lahi! (Isa. 43:10-12) Ko totatou ʼofa lahi kiā Sehova ʼe tokoni mai anai ke ʼaua naʼa tou ufiufi peʼe tou mātataku, kae ina uga tātou ke tou palalau, ke mole tou lotolotolua kae tou lototoʼa ʼo faka mafola ia te moʼoni.—Gāue 4:26, 29, 31.
3 Kotou manatuʼi ko tatatou logo ʼe ko he logo lelei. Ko tatatou tala ia te logo ʼaia ʼe ina foaki ai anai ki te hahaʼi ʼaē kā natou tali ia he ʼu lelei heʼegata. Kapau ʼe tou tōkakaga tāfito ki te maʼuhiga ʼo te gāue fai faka mafola kae mole tou tōkakaga tāfito pē kiā tātou peʼe ki te hahaʼi fakafeagai, pea ʼe tokoni mai anai ke tou faka mafola ʼaki he lototoʼa.
4 Te Faʼifaʼitaki ʼa ʼIhi Atu: ʼE feala ke tou maʼu he mālohi mai te nofo agatonu ʼa ʼihi ʼaē neʼe nātou lototoʼa ʼo palalau ʼo ʼuhiga mo te folafola ʼa te ʼAtua. Ohagē ko Enoke, neʼe lototoʼa ʼo tala te fakamāu ʼa Sehova ki te hahaʼi agahala ʼaē neʼe mole pipiki ki te ʼAtua. (Suta 14, 15) Ko Noe, neʼe agatonu ʼo fai faka mafola ki te hahaʼi ʼaē neʼe mole fia logo kiā ia. (Mat. 24:37-39) Ko te kau Kilisitiano ʼo te ʼuluaki sēkulō ‘neʼe mole natou ako pea neʼe ko te ʼu tagata ohagē pē ko te hahaʼi fuli,’ kae neʼe natou haga fai faka mafola logolā te fakafeagai mālohi. (Gāue 4:13, 18-20) ʼE tau maʼu ʼi tatatou ʼu tohi te ʼu fakamatala ʼo te maʼuli ʼo te ʼu tehina mo tuagaʼane ʼo totatou temi, neʼe natou tauʼi te mataku ki te tagata pea mo natou faʼafai ʼi te fai faka mafola, he neʼe natou tui kiā Sehova.
5 ʼE feala ke tou lototoʼa mo kapau ʼe tou lau ia te hisitolia ʼo te maʼuli ʼo te ʼu kaugana agatonu ʼo te temi muʼa ʼaē neʼe hoko kiā nātou he ʼu ʼaluʼaga faigataʼa. (1 Hau 19:2, 3; Mko. 14:66-71) Neʼe natou “lototoʼa ʼuhi ko totatou ʼAtua,” pea neʼe mole natou mātataku ʼi te palalau. ʼE feala ke tou fai fēia mo tātou!—1 Tes. 2:2.