‘Ke Konakonaʼi Takotou ʼu Palalau ʼAki Te Māsima’
1. Koteā te fakaʼuhiga ʼo te ‘konakonaʼi ʼo tatatou ʼu palalau ʼaki te māsima’?
1 “Kotou fai ke lelei tuʼumaʼu takotou ʼu palalau pea ke konakonaʼi ʼaki te māsima, ke kotou ʼiloʼi te tali ʼaē ʼe tonu ke kotou fai ki te hahaʼi takitokotahi.” (Kol. 4:6) Ko te konakonaʼi ʼo tatatou ʼu palalau ʼaki te māsima, ko tona fakaʼuhiga ke tou filifili lelei te ʼu kupu ʼaē kā tou fakaʼaogaʼi pea ke leleiʼia tatatou faʼahiga palalau e te hahaʼi ʼaē ʼe fakalogo mai. ʼE maʼuhiga ʼaupitō ia te faʼahi ʼaia mokā tou kau ki te minisitelio.
2. He koʼē neʼe feala kiā Sesu ke fai fakamafola ki te fafine Samalitana?
2 Te Faʼifaʼitaki ʼa Sesu: ʼI tana lolotoga mālōlō ʼo ovi ki te vai keli, neʼe ko Sesu ʼaē neʼe ʼuluaki palalau ki te fafine Samalitana ʼaē neʼe ʼalu age ʼo ʼohu vai. Tuʼa lahi ʼi te fai palalau, neʼe talanoa te fafine ʼo ʼuhiga mo te fefehiʼaʼaki talu mai fualoa ʼa te kau Sutea pea mo te kau Samalitana. Neʼe ina toe fakahā tana tui ʼaē ki te hifo ʼo te hōloga ʼo te kau Samalitana mai iā Sakopo, kae ʼi te manatu ia ʼa te kau Sutea neʼe hifo mai te hōloga ʼo te kau Samalitana mai ni ʼu hahaʼi neʼe mole ko he kau Sutea. Neʼe mole fakafihiʼi e Sesu tana ʼu palalau, kae neʼe talanoa ia ki he ʼu manatu neʼe fia logo kiai te fafine. Koia, neʼe feala ai hana fai fakamafola ki te fafine ʼaia, ʼo fua lelei ai ki te fafine pea mo te hahaʼi ʼo te kolo.—Soa. 4:7-15, 39.
3. ʼE feafeaʼi hatatou faʼifaʼitakiʼi ia Sesu mokā ʼe tou kau ki te minisitelio?
3 Kā tou fai fakamafola, tou manatuʼi ia tatatou fakatuʼutuʼu ʼaē ke tou “tala te ʼu logo lelei ʼo te ʼu meʼa lelei!” (Loma 10:15) ʼE tou fia vaevae mo ia ʼo te ʼapi he manatu fakatohi-tapu ʼe fakalotofiafia pea mo fakalotomālohi, kae ʼe mole tonu ke manatu ia ʼe tou fia fakafihiʼi ki te ʼu akonaki ʼaē ʼe tui kiai. Kapau ʼe ina fakahā mai ia he manatu ʼe hala, ʼaua naʼa tou foimo fakafihiʼi atu aipē tana manatu. ʼE ʼi ai koa he manatu ʼi tana ʼu palalau ʼe feala ke tou felōgoi mo ia peʼe ke tou fakaʼaogaʼi moʼo vikiʼi fakamālotoloto ia ia? ʼE lagi feala ke tou lau age he vaega, ʼo tou ʼui fēnei age: “Neʼe mole heʼeki ke manatu koa lā ʼe feala ke hoko ia te faʼahi ʼaenī?”
4. Koteā ʼaē ʼe tonu ke tou fai mo kapau ʼe palalau kovi mai ia ia ʼo te ʼapi?
4 ʼE feafeaʼi mo kapau ʼe palalau kovi mai ia ia ʼo te ʼapi peʼe tou fakatokagaʼi ʼe fia fakafihi pē ia ki he ʼu manatu? ʼE tonu tuʼumaʼu pē ke tou agalelei pea mo agamalū ʼi tatatou ʼu aga pea mo tatatou ʼu palalau. (2 Tim. 2:24, 25) Kapau ʼe mole fia logo he tahi ki te logo ʼo ʼuhiga mo te Puleʼaga, pea ʼe lelei age ke tou mavae mai ai, ʼaki he aga fakaʼapaʼapa.—Mat. 7:6; 10:11-14.
5. Neʼe maʼu feafeaʼi e te tuagaʼane te ʼu fua lelei ʼi tana tali ʼaki he aga fakaʼapaʼapa?
5 Te ʼu Fua Lelei: ʼI te faiga ʼa te tuagaʼane ke fai fakamafola ki te fafine ʼo tona vāhaʼa fale, neʼe ʼita ʼaupitō te fafine pea mo ina tauveleʼi te tuagaʼane. ʼAki he agalelei, neʼe ʼui fēnei age e totatou tuagaʼane: “Fakalelei age pē he neʼe mole au loto ke ke ʼita. Kae ke nofo lā koe.” Hili vāhaʼa e lua, ko te fafine neʼe ina fisifisi te matapā ʼo te tuagaʼane, ʼo faifakalelei age ʼo ʼuhiga mo tana aga, pea mo ina ʼui age ʼe fia logo ki te ʼu manatu ʼaē neʼe fia palalau age kiai. ʼI te agamāhani, kā fai he tali ʼaki he aga fakaʼapaʼapa pea ʼe ʼi ai te ʼu fua lelei ʼe tou maʼu ai.—Taag. 15:1; 25:15.
6. He koʼē ʼe maʼuhiga ke konakonaʼi tatatou ʼu palalau ʼaki te māsima mokā ʼe tou kau ki te minisitelio?
6 Tou faiga ke konakonaʼi tatatou ʼu palalau ʼaki te māsima mokā tou tala ia te logo lelei. Tatau aipē peʼe mole loto kiai ia ia ʼo te ʼapi, kae ʼe lagi fia fakalogo anai ʼi he tahi age temi mokā ʼolo age te kau Fakamoʼoni ʼa Sehova.