ʼE Koutou Fakapotopoto Koa?

ʼI TANA fakanofo te ʼu tuʼi faka-māu ʼi Iselaele, neʼe faigaʼi e Moisese ke ina maʼu “he ʼu tagata popoto, mo fakapotopoto, pea mo māhani.” (Teutalonome 1⁠:13) Ko te māhani, ʼaē ʼe hoki maʼu pe ʼaki te temi, neʼe mole ko te fakamaʼua tāfito pe ʼaia e tahi. Neʼe toe maʼuhiga mo te poto pea mo te fakapotopoto.

Ko he tahi ʼe fakapotopoto ʼe ina fakafuafua lelei tana ʼu palalau pea mo tana aga. ʼE ʼui e te tikisionalio Webster’s Ninth New Collegiate Dictionary, ko he tahi ʼe fakapotopoto ʼe ina toe “lavaʼi foki mo te nofo fakalogologo.” Ei, ʼe ʼi ai “te temi moʼo palalau,” pea mo “te temi moʼo fakalogologo,” pea ko ia ʼaē ʼe fakapotopoto ʼe mahino ki te kehekehe ʼo te ʼu ʼaluʼaga ʼaia. (Tagata Tānaki 3⁠:⁠7) ʼI te agamāhani ʼe lelei age te fakalogologo, koteʼuhi ʼe ʼui fēnei e te Tohi-Tapu: “ ʼI te mahu ʼo te ʼu palalau ʼe mole masiva ai te agahala, kae ko ʼaē ʼe ina tāʼofi tona ʼu laugutu ʼe fakapotopoto ia.”​—⁠Tāʼaga Lea 10⁠:⁠19.

ʼE tokakaga te kau Kilisitiano ke nātou fakapotopoto ʼi tanatou ʼu felogoi. Ko ia ʼaē ʼe gutu palalau peʼe mālohi ʼi te palalau ʼe mole ko ia tuʼumaʼu ʼaē ʼe maʼuhiga ʼaupito peʼe ʼaoga tāfito. Koutou manatuʼi, ko Moisese neʼe “mālohi ʼi tana ʼu lea,” kae neʼe hoki feala tana takitaki te hahaʼi ʼo Iselaele ʼi tana hoki maʼuliʼi te faʼa kātaki, te agamālū, pea mo te loto lolomi. (Gaue 7⁠:22) Koia, ko nātou ʼaē neʼe hinoʼi ke nātou takitaki te hahaʼi, ʼe tonu ke nātou faiga tāfito ke nātou loto fia mālalo pea mo fakapotopoto.​—⁠Tāʼaga Lea 11⁠:⁠2.

Kia nātou ʼaē neʼe tuku age ki ai e Sesu Kilisito “ona u koloa fuape,” ʼe ʼui e te Folafola ʼa te ʼAtua ʼe nātou “agatonu mo fakapotopoto.” (Mateo 24⁠:​45-47) ʼE mole nātou fiameʼalahi ʼo nātou fia matamuʼa ia Sehova; peʼe nātou fakatotoho ʼi muli mokā mole nātou mahino lelei ki te takitaki ʼa te ʼAtua ʼo ʼuhiga mo he faʼahiga meʼa. ʼE nātou ʼiloʼi te temi ʼaē ʼe tonu ai ke nātou palalau pea mo temi ʼaē ʼe tonu ke nātou fakatalitali fakalogologo ai ki he tahi fakamahino. ʼE mole tonu pe ki te kau Kilisitiano fuli ke nātou faʼifaʼitakiʼi tanatou tui, kae ʼe toe maʼua foki ke nātou fakapotopoto ohage ko te kalasi ʼo te kaugana.​—⁠Hepeleo 13⁠:⁠7.

ʼE Koutou Loto Koa Ki He ʼAʼahi?

ʼI te mālama maveuveu ʼaenī, ʼe feala hakotou fiafia mo kapau ʼe koutou maʼu te ʼatamai mālama ʼaē ʼe foaki mai e te Tohi-Tapu ʼo ʼuhiga mo te ʼAtua, mo tona Puleʼaga, pea mo tana fakatuʼutuʼu fakaofoofo ʼaē neʼe ina fai ʼo ʼuhiga mo te malamanei. Kapau ʼe koutou fia ʼiloʼi he tahi ʼu meʼa ʼo ʼuhiga mo te faʼahi ʼaia, peʼe koutou loto ke fai hakotou ako Tohi-Tapu, koutou faitohi ki te Sosiete “Les Témoins de Jéhovah,” B.P. 1741, 98874 Mont Dore, Nouvelle-Calédonie, peʼe vakaʼi te lisi ʼaē ʼi te pasina 2.