Kua Nātou Fakatuʼutuʼu Moʼo Fai ʼo Te Finegalo ʼo Sehova
Kāpite 8
Ko He ʼu Minisi ʼo Te Logo Lelei
NEʼE momoli mai e Sehova tona ʼAlo, ke ina tuku mai he faʼifaʼitaki haohaoa ke tou mulimuli ki ai. (1 Pet. 2:21) Kā liliu he tahi ko hana tisipulo, pea ʼe tokoni ki ai ia Sesu ke liliu ko he minisi ʼa te ʼAtua ʼe ina faka mafola ia te logo lelei. Neʼe ʼui e Sesu ʼe ko he gāue ʼe kita maʼu ai he loto fīmālie fakalaumālie, he neʼe ʼui māʼana: “Kotou ʼomai kiā te au, ia koutou fuli ʼaē ʼe kinakina pea mo mafasia, pea ʼe au fakafimālie anai koutou. Kotou toʼo kiā koutou taku ʼakau ʼamo pea ke kotou ako iā te au, [peʼe “kotou liliu ko haku ʼu tisipulo,” nota] heʼe au agamalū pea mo loto agavaivai, pea ʼe kotou maʼu anai he fīmālie ki ʼokotou nefesi.” (Mat. 11:28, 29, MN ) Ko nātou fuli ʼaē neʼe natou tali ia te fakaafe ʼaia, kua natou sisio neʼe ina fakahoko tana fakapapau.
ʼI tona ʼuhiga Minisi Tāfito ʼo te ʼAtua, neʼe fakaafe e Sesu ni ʼu hahaʼi ke natou ʼomai ʼo mulimuli iā te ia. (Mat. 9:9; Soa. 1:43) Neʼe ina akoako nātou ʼo ʼuhiga mo te minisitelio, pea mo ina fekauʼi nātou ke natou mulimuli ki te gāue ʼaē neʼe ina fai. (Mat. 10:1–11:1; 20:28; Luka 4:43) Ki muli age, neʼe ina fekauʼi te tahi ʼu tisipulo e toko 70 ke natou ʼolo ʼo tala ia te logo lelei ʼo ʼuhiga mo te Puleʼaga ʼo te ʼAtua. (Luka 10:1, 8-11) ʼI te ʼaho ʼaē neʼe ina fekauʼi ai nātou, neʼe ʼui māʼana kiā nātou: “Ko ʼaē ʼe fagono kiā koutou, ʼe toe fagono ia kiā te au. Pea ko ʼaē ʼe mole ina toe tokagaʼi ia koutou, ʼe mole ina tokagaʼi mo au. Koia, ko ʼaē ʼe mole ina tokagaʼi au, ʼe mole ina tokagaʼi mo ia ʼaē neʼe ina fekauʼi mai au.” (Luka 10:16, MN ) Neʼe fakahā lelei ai e Sesu te maʼua mamafa ʼaē neʼe tuku age ki tana ʼu tisipulo: ko te fakafofoga ʼo te ʼAtua Māʼoluga. Neʼe foaki tatau ia te maʼua ʼaia kiā nātou fuli ʼaē neʼe natou tali ia te fakaafe ʼaenī ʼa Sesu: “Hau o mulimuli mai i te au,” pea ko te maʼua ʼaia ʼe kei tuʼu aipē ia ʼo aʼu mai ki totatou temi. (Luka 18:22) Kiā nātou fuli ʼaē ʼe natou tali ia te fakaafe ʼaia, ʼe fakatotonu age e te ʼAtua ke natou faka mafola ia te logo lelei ʼo te Puleʼaga pea mo natou fai ni ʼu tisipulo.—Mat. 24:14; 28:19, 20.
ʼI tatatou tali ia te pāui ʼa Sesu pea mo tana fakaafe ʼaē ke tou mulimuli iā te ia, neʼe tou maʼu te tapuakina ʼaē ko te ʼiloʼi ʼo Sehova ʼAtua pea mo Sesu Kilisito. (Soa. 17:3) Neʼe akoʼi mai kiā tātou ia te ʼu fakatuʼutuʼu ʼa Sehova. ʼAki tana tokoni, kua tou fakafoʼou totatou ʼatamai, mo fetogi totatou ʼulugaaga, pea mo faka ʼalutahi tatatou aga ʼaē ʼo te ʼaho fuli mo tana ʼu lēkula faitotonu. (Loma 12:1, 2; Efe. 4:22-24; Kol. 3:9, 10) Ko te loto fakafetaʼi moʼoni, ʼaē neʼe ina ʼekenaki tātou ke tou foaki totatou maʼuli kiā Sehova pea mo tou fakahā ia te faʼahi ʼaia ʼi tatatou papitema. Ko tatatou papitema, ʼe ko he fakaʼiloga ʼaia kua fakanofo tātou ko ni ʼu minisi.
Ke ʼaua naʼa galo kiā tātou, ʼe tonu ke tou tauhi ki te ʼAtua ʼaki he ʼu nima ʼe maʼa pea mo he loto ʼe maʼa. (Pes. 24:3, 4; Isa. 52:11; 2 Ko. 6:14–7:1) ʼAki tatatou tui ʼaē kiā Sesu Kilisito, kua tou aga fakahagatonu pea mo tou maʼu he leʼo ʼo loto ʼe maʼa. (Hep. 10:19-23, 35, 36; Apk. 7:9, 10, 14) Neʼe fakaloto mālohiʼi e Paulo te kau Kilisitiano, ke natou fai ia meʼa fuli ki te kolōlia ʼo te ʼAtua, ke ʼaua naʼa tūkia he tahi. Pea ko te ʼapositolo ko Petelo, neʼe ina ʼui ko te aga ʼaē ʼe lelei, ʼaē ʼe ʼiloga ai totatou ʼofa ki te ʼAtua, ʼe feala ke ina uga te hahaʼi ʼaē ʼe mole tui, ke natou faka tui ki te moʼoni. (1 Ko. 10:31, 33; 1 Pet. 3:1) ʼE feafeaʼi hatatou tokoni ki he tahi ke mulimuli ki te ʼu fakamaʼua faka Tohi-Tapu, ke feala hana liliu ko he minisi ʼo te logo lelei?
TE ʼU KAUGĀ FAGONA FOʼOU
ʼI te temi ʼaē ʼe kotou kamata ai he ako Tohi-Tapu ʼa he tahi, kotou fakaloto mālohiʼi ia ia ke ina faka mafola ki te hahaʼi ia te ʼu meʼa ʼaē ʼe ina ako. Kotou fakaloto mālohiʼi ia ia ke fai fagonogono faigamālie ki tona ʼu fāmili, mo tona ʼu kaumeʼa, mo tona ʼu kaugā gāue pea mo ʼihi age hahaʼi. ʼE ko he ʼaluʼaga maʼuhiga ʼaia moʼo akoʼi ʼo ia ke liliu ko he tisipulo ʼa Sesu Kilisito, ko he minisi ʼo te logo lelei. (Mat. 9:9; Luka 6:40) ʼI te fakahaʼuhaʼu ʼo tana tuputupu fakalaumālie pea mo tana faiva ʼi te fai fagonogono faigamālie, ʼe mahino ia ʼe ina fakahā atu anai tana fia fai faka mafola fakatahi mo te kokelekasio ki te hahaʼi.
TE ʼU FAKAMAʼUA ʼO ʼUHIGA MO TE FAI FAKA MAFOLA
ʼI muʼa ʼo hakotou kamata fakaafe he tahi ke kaugā gāue mo koutou ʼi te gāue fai faka mafola, pea mo ina momoli ki te kokelekasio hana kiʼi pepa tānaki gāue ʼo tana fai faka mafola, ʼe ʼi ai te ʼu fakamaʼua ʼe tonu ke mulimuli kiai. Heʼe ko he tahi ʼe kaugā gāue mo tātou ki te gāue faka mafola, ʼe ina fakahā ki te hahaʼi ʼe kua kau ia ki te kokelekasio ʼa te hahaʼi ʼa Sehova, ʼo mahino mai ʼe kua ʼosi faka ʼalutahi tona maʼuli mo te ʼu pelesepeto faitotonu ʼa Sehova, pea kua ʼiloga ki te kokelekasio kua feala ke kaugā fagona.
Kā kotou fai he ako ʼa he tahi pea mo palalau mo ia ʼo ʼuhiga mo te ʼu pelesepeto ʼo te Tohi-Tapu, ʼe faifai ʼaki te temi pea kotou ʼiloʼi lelei tona ʼu ʼaluʼaga. ʼE lagi kotou tokagaʼi anai ʼe kua ina maʼuliʼi ia te ʼu meʼa ʼaē ʼe ina ako ʼi te Tohi-Tapu. Kae ʼe kotou kaugā faifai palalau anai mo he ʼu tagata ʼāfea e toko lua pea mo ia, ʼo ʼuhiga mo ʼihi agaaga ʼo tona maʼuli, ʼi muʼa ʼo hakotou fakaafe ʼo ia ke kotou kaugā gāue ʼi te fai faka mafola pea mo te fai fagonogono ki te hahaʼi.
ʼE hinoʼi anai e te taupau pelesitā ia te ʼu tagata ʼāfea ʼaia e toko lua, pea ko he tahi iā nāua ʼe kau ʼi te Komitē Gāue ʼo te kokelekasio. ʼE natou vakavakaʼi anai ia te ʼu puani ʼaenī:
● ʼE hā koa ʼi tana ʼu palalau, ʼe tui ko te Tohi-Tapu ʼe ko te Folafola ʼa te ʼAtua? (2 Tim. 3:16)
● ʼE ina ʼiloʼi pea mo ina tali koa ia te ʼu akonaki tāfito ʼo te Tohi-Tapu, ke hoko la he temi ʼe lagaʼi age ai he ʼu fehuʼi, ʼe ina tali anai ʼo mulimuli ki te Tohi-Tapu, kae mole ina tali anai ʼaki tana ʼu manatu ʼa ia totonu, peʼe ʼaki te ʼu akonaki ʼa te ʼu lotu hala? (Mat. 7:21-23; 2 Tim. 2:15)
● Kapau ʼe haohaoa mai te mahaki pea mo faka fealagia e tona maʼuli, ʼe fakalogo koa ki te fakatotonu faka Tohi-Tapu, ʼaē ke kau fakatahi mo te hahaʼi ʼa Sehova ki te ʼu fono ʼo te kokelekasio? (Pes. 122:1; Hep. 10:24, 25)
● ʼE ina ʼiloʼi koa ia te ʼu pelesepeto faka Tohi-Tapu ʼo ʼuhiga mo te folonikasio, te tono, te polikami, pea mo te fai tagata ʼa he tagata? ʼE mulimuli koa ki te ʼu pelesepeto faka Tohi-Tapu ʼaia? Kapau kua nofo mo he fafine peʼe ko he tagata, ʼe kua nā ʼohoana koa ʼi te lao? (Mat. 19:9; 1 Ko. 6:9, 10; 1 Tim. 3:2, 12; Hep. 13:4)
● ʼE fakalogo koa ki te tapuʼi ʼaē ʼi te Tohi-Tapu ʼo te konahia? (Efe. 5:18; 1 Pet. 4:3, 4) ʼE kua ina tuku koa tana suluka, tana kai pata, pea mo tana fakaʼaogaʼi ʼaē ʼo he faʼahiga toloke pē? (2 Ko. 7:1)
● ʼE mahino koa ki te maʼuhiga ʼaē ke fakamamaʼo mai te ʼu fakakauga kovi? (1 Ko. 15:33)
● Kua mavae koa mai te ʼu lotu hala, ʼo mole kei kau pea mo lagolago ki tanatou ʼu fono pea mo tanatou ʼu fai toʼotoʼoga? (2 Ko. 6:14-18; Apk. 18:4)
● ʼE kua mavae mai ʼosi koa, mai te ʼu meʼa faka politike ʼo te mālamanei? (Soa. 6:15; 15:19; Skp. 1:27)
● ʼE faka tui pea mo mulimuli koa ki te ʼu palalau ʼa te Tohi-Tapu ʼaē ʼe tuʼu iā Isaia 2:4 ʼo ʼuhiga mo te ʼu meʼa ʼaē ʼe hoko ʼi te ʼu puleʼaga?
● ʼE fakaʼamu moʼoni koa ke liliu ko he Fakamoʼoni ʼa Sehova? (Pes. 110:3)
Kapau ʼe mole ʼiloʼi papau e te ʼu tagata ʼāfea tana manatu ʼo ʼuhiga mo ni ʼu fehuʼi ʼi te ʼu puani ʼaenī, ʼe nā kole age anai ke ina lau ia te ʼu vaega ʼaē ʼe ʼalutahi mo te ʼu fehuʼi, pea mo nā fakamahinohino anai ke feala hana mahino kiai. ʼE tonu ke mahino kiā te ia, ko he tahi ʼe fia kau fakatahi mo te kau Fakamoʼoni ʼa Sehova ʼi te gāue fai faka mafola, ʼe tonu ke mulimuli ki te ʼu meʼa ʼaē ʼe fakamaʼua mai ʼi te Tohi-Tapu. ʼAki tana ʼu tali, ʼe ʼiloʼi ai anai e te ʼu tagata ʼāfea peʼe kua mahino ki te ʼu meʼa ʼaē ʼe tonu ke ina fai pea mo nā fakafuafua lelei anai peʼe kua ʼalutahi tona maʼuli mo te ʼu fakamaʼua ʼaia, ke feala hana kamata gāue ʼi te minisitelio.
Kapau ʼe mulimuli ki te ʼu fakamaʼua ʼaia, pea ʼe tali leleiʼi anai ia ia e te ʼu tagata ʼāfea ke liliu ko he kaugā fagona ʼe gāue fakatahi mo te kau Fakamoʼoni ʼa Sehova. (Loma 15:7) ʼE fakaloto mālohiʼi anai ke kau ki te minisitelio mo kapau kua feala, pea mo ina ʼaumai tana kiʼi pepa tānaki gāue ʼi te fakaʼosi māhina. ʼE lava fakamahino age e te ʼu tagata ʼāfea, ko he tahi ʼe ako Tohi-Tapu ʼe ʼalutahi tona maʼuli mo te ʼu meʼa ʼaē ʼe fakamaʼua ki he kaugā fagona, pea mo ina tohi tana gāue ki he kiʼi pepa tānaki gāue, ʼe ʼi ai tana kate Activité du proclamateur (Fichier de la congrégation), ʼe tohi kiai tona higoa pea ʼe taupau ʼi te ʼu tōsie ʼo te kokelekasio. ʼE nā fakahā age anai, ʼe tokagaʼi e te kau tagata ʼāfea fuli ia te gāue fai faka mafola ʼo nātou fuli ʼo te kokelekasio.
Kā kita feʼiloʼi lelei ʼaki mo te kaugā fagona foʼou, pea mo kita tokagaʼi tana gāue ʼi te minisitelio, ʼe fua lelei anai kiā ia. Heʼe ko he fakaloto mālohi anai kiā ia ke haga faʼafai ʼi tana tauhi ʼaē kiā Sehova, pea mo ina tānaki ʼo foaki tana fai faka mafola ʼi te māhina fuli.—Filp. 2:4; Hep. 13:2.
Kapau kua mahino ki te ʼu tagata ʼāfea kua feala hana liliu ko he kaugā fagona, ʼe feala anai ke ʼavage hana tohi Organisés pour faire la volonté de Jéhovah. ʼI tana ʼosi ʼaumai ʼo tana ʼuluaki kiʼi pepa tānaki gāue, ʼe fai anai he kiʼi tala logo ki te kokelekasio, ʼo fakahā ʼe kua kaugā fagona.
HE TOKONI KI TE KAU TŪPULAGA
ʼE feala mo te kau tūpulaga ke natou mulimuli ki te ʼu fakamaʼua faka Tohi-Tapu ke feala hanatou faka mafola ia te logo lelei. Neʼe tali e Sesu ia te kihiʼi tamaliki ʼaē neʼe ʼomai kiā te ia, pea neʼe ina tapuakinaʼi nātou. (Mat. 19:13-15) Logolā ʼe ko he maʼua tāfito ʼa te ʼu mātuʼa ke natou tokoni ki tanatou ʼu fānau, kae ʼe toe feala pē foki ki ʼihi ʼo te kokelekasio ke natou tokoni ki te kau tūpulaga ʼaē ʼe natou fia kau moʼoni ki te gāue ʼaē ko te faka mafola ʼo te Puleʼaga. Kapau ʼe ʼi ai hakotou ʼu tamaliki, ko takotou faʼifaʼitaki lelei ʼi te fai faka mafola, ʼaē kā ina fakaloto mālohiʼi anai nātou ke natou faʼafai ʼi te gāue ʼaē ki te ʼAtua. Koteā ʼaē ʼe tou lava fai moʼo tokoni ki he tamasiʼi ʼe lelei tana aga pea ʼe ina uga ia ia e tona loto ke ina fakahā tana tui, ʼi te fagonogono ʼo te logo lelei ki te hahaʼi?
ʼE lelei anai ki he tahi ʼi te ʼu mātuʼa, ke ʼalu ki he tahi ʼi te ʼu tagata ʼāfea ʼaē ʼo te Komitē Gāue, ke nā palapalalau peʼe kua mulimuli peʼe kailoa te fānau ki te ʼu meʼa ʼaē ʼe fakamaʼua ki he tahi ke liliu ko he kaugā fagona. ʼE hinoʼi anai e te taupau pelesitā he ʼu tagata ʼāfea e toko lua, pea ko he tahi iā nāua ʼe kau ʼi te Komitē Gāue ʼo te kokelekasio. ʼE nā faifai palalau anai mo te tamasiʼi ʼaia, ʼo fakakau kiai mo he tahi ʼi te ʼu mātuʼa peʼe ko te ʼu mātuʼa toko lua. Kapau kua ʼiloʼi e te tamasiʼi ia te ʼu akonaki tāfito ʼo te Tohi-Tapu, pea mo ina fakahā ʼe fia kau ki te gāue ʼo te Puleʼaga, ʼe fakahā ai anai tana tuputupu fakalaumālie. ʼI te ʼosi vakaʼi ʼo te ʼu faʼahi ʼaia pea mo te ʼu fakamaʼua ʼaē ʼe fai kiā nātou lalahi, ʼe ʼiloʼi ai anai leva e te ʼu tagata ʼāfea peʼe kua feala ki te tamasiʼi ke liliu ko he kaugā fagona.—Luka 6:45; Loma 10:10.
TE MOMOLI ʼO KITA PEA MO TE PAPITEMA
ʼI te temi nei ʼaē kua kotou maʼu ai ia te ʼatamai mālama totonu pea mo takotou fakahā tokotou ʼofa ki te ʼAtua, ʼo mulimuli ki tana ʼu fakamaʼua pea mo takotou kua kau ki te minisitelio, ʼe tonu ke kotou toe faka mālohiʼi age takotou ʼu felōgoi mo Sehova. ʼO feafeaʼi? ʼO kotou momoli ia koutou kiā te ia ʼi te faikole, pea mo kotou fakahā ia te faʼahi ʼaia ʼi takotou papitema.—Mat. 28:19, 20.
Ko te momoli ʼo kita, ʼe ko he fakaʼaogaʼi makehe ʼo kita ki he gāue taputapu. Ko te momoli ʼo tokita maʼuli ki te ʼAtua, ʼe ko he faikole kiā te ia, ʼo fakapapau age ʼe kita fakaʼaogaʼi anai tokita maʼuli moʼo tauhi kiā te ia pea mo haʼele agatonu ʼi tona ʼu ala, ʼo tou tauhi ʼāteaina pē kiā te ia ʼo talu ai. (Teu. 5:9) ʼE feiā te momoli ʼo kita ki te ʼAtua. ʼE ko he tonu ʼe fai e kita totonu, pea ʼe mole feala ki he tahi age ke ina fai te potu ʼaia maʼa kita.
Kae ʼe mole tonu ke gata ʼaki pē takotou fakahā ʼāteaina age kiā Sehova ʼe kotou fia momoli age tokotou maʼuli kiā te ia. ʼE tonu ke kotou fakahā ki te hahaʼi kua kotou foaki tokotou maʼuli kiā te ia. Moʼo fai ia te faʼahi ʼaia, ʼe tonu anai ke kotou papitema ʼi te vai, ohagē ko Sesu. (1 Pet. 2:21; 3:21) Kapau kua kotou fakatuʼutuʼu ke kotou tauhi kiā Sehova pea mo papitema, koteā ʼaē ʼe tonu ke kotou fai? ʼE kotou fakahā anai ia te faʼahi ʼaia ki te taupau pelesitā ʼo te kokelekasio ʼaē ʼe kotou kau ki ai. ʼE ina fai anai he ʼu fakatuʼutuʼu ke kotou fai palalau mo ni ʼu tagata ʼāfea, ke feala hanatou ʼiloʼi pe kua kotou mulimuli ki te ʼu fakamaʼua fakaʼatua ʼaē ʼo ʼuhiga mo te papitema. ʼE kotou maʼu anai te tahi ʼu fakamahino ʼi te koga ʼaē ko tona kupu tāfito ʼaenī: “À lʼattention du proclamateur non-baptisé” (Ki Te Kaugā Fagona) ʼaē kā ke maʼu anai ʼi te ʼu pāsina 180 ʼo aʼu ki te 182 ʼo te tohi Organisés pour faire la volonté de Jéhovah (Kua Natou Fakatuʼutuʼu Moʼo Fai ʼo Te Finegalo ʼo Sehova), ʼo feiā pea mo te ʼu “Questions pour ceux qui désirent être baptisés,” (Te ʼu Fehuʼi Kiā Nātou ʼAē ʼe Fia Papitema) ʼi te ʼu pāsina 182 ʼo aʼu ki te 215.
KO HE FAKAMATALA ʼO ʼUHIGA MO TE TUPUTUPU ʼO TE FAI FAKA MAFOLA
Neʼe lotomālohi te ʼu kaugana ʼa Sehova ʼi te temi fuli pē ʼaki te ʼu tānaki gāue faka mālamanei ʼo te mafola ʼo te tauhi maʼa. Talu pē te temi ʼaē neʼe fakahā ai e Sesu ki te kau tisipulo ko te logo lelei ʼe faka mafola anai ʼi te kele kātoa, pea neʼe tōkakaga tāfito ia te kau Kilisitiano moʼoni peʼe feafeaʼi anai ia te fakahoko ʼo te gāue ʼaia.—Mat. 28:19, 20; Mko. 13:10; Gaue 1:8.
Neʼe maʼuhiga ki te ʼu ʼuluaki tisipulo ʼa Sesu Kilisito ia te tuputupu ʼo te gāue fai faka mafola. (Mko. 6:30) Koia ʼe tou lau ʼi te tohi faka Tohi-Tapu ʼo Gaue, ʼi te ʼosi tuku ifo ʼo te laumālie māʼoniʼoni ki te ʼu tisipulo ʼi te Penikosite, neʼe ko te toko 120 hahaʼi. Mole fualoa pea aʼu te kaugamālie ʼaia ki te toko 3 000, pea hiki ʼaia ki te toko 5 000. ʼE hā ʼi te tahi fakamatala “i te aho fuape nee fakatahiʼi age e te Aliki ia natou kua haofaki ki te kautahi” pea “nee talagafua mo he tokolahi o te faahiga pelepitelo ki te tui.” (Gaue 1:15; 2:5-11, 41, 47; 4:4; 6:7) Neʼe lagi ko he fakaloto mālohi lahi neʼe maʼu e te kau tisipulo ʼi te ʼu tuputupu ʼaia! ʼE lagi ko te ʼu fakamatala fakaloto mālohi ʼaia neʼe natou uga ia nātou ke natou faka haʼele ki muʼa ia te gāue ʼaē neʼe tuku age e te ʼAtua kiā nātou, logolā te ʼu fakataga ʼaē neʼe fakaneke e te kau takitaki lotu.
ʼI te lagi taʼu 60 peʼe ko te taʼu 61 ʼo totatou temi, neʼe fakamatala e Paulo ʼi tana tohi ki te kau Kolose, ko te logo lelei kua “fua mo lakalaka ki mua i te malama-nei katoa” pea “kua fakaha ki te keleatula fuape o te lalo lagi.” (Kol. 1:5, 6, 23) Ko te kau ʼuluaki Kilisitiano neʼe natou talagafua ki te Folafola, pea ko te laumālie māʼoniʼoni neʼe ina fakamālohiʼi ia nātou moʼo fakahoko te gāue fai faka mafola ʼi te mālamanei kātoa ʼi muʼa ʼo te hoko mai ʼo te fakaʼosi ʼo te tuʼu faka Sutea ʼi te taʼu 70 ʼo totatou temi. Logolā tona mata faigataʼa kae neʼe hoko te gāue. ʼI meʼa fakaloto mālohi ki te kau fai faka mafola agatonu ʼaia ʼi tanatou logo ki te ʼu fakamatala ʼo ʼuhiga mo te ʼu gāue ʼaē neʼe fakahoko!
ʼE toe feiā mo te kautahi ʼa Sehova iā ʼaho nei, ʼe faiga ke ina fakamatala fakalelei ia te gāue ʼaē neʼe fai ʼo mulimuli pē ki te koga tohi ʼo Mateo 24:14, ʼaē ʼe ʼui fēnei: “Ka fagonogono anai te Logolelei aeni o te Puleaga ki te kelekele katoa, ko he fakamooni ki te hahai . . . fuape pea e hoko anai mo te fakaosi.” ʼI totatou ʼuhiga kaugana kua foaki totatou maʼuli ki te ʼAtua, ʼe ʼi ai tatatou gāue ʼe tonu ke tou foimo fakahoko. ʼE tonu ke tou faiga takitokotahi ke tou fakahoko lelei te gāue ʼaia ʼi muʼa ʼo te hoko mai ʼo te fakaʼosi. ʼE tokaga anai ia Sehova ke fakahoko kātoa ia te gāue ʼaia; pea kapau ʼe tou kau kiai, ʼe ina tapuakina anai ia tātou.
TE PEPA TĀNAKI GĀUE ʼO TAKOTOU FAI FAKA MAFOLA
Koteā koa ʼaē ʼe tonu ke tou tohi? ʼI te kiʼi Pepa Tānaki Gāue ʼaē ʼe tufa mai e te kautahi, ʼe tuʼu ai te ʼu meʼa ʼaē ʼe tonu ke tou tohi, kae kapau ʼe ʼi ai he tahi age ʼu meʼa pea mo he tahi ʼu fakamahino ʼaoga, ʼe hoki fakahā anai ʼi Te Minisitelio ʼo Te Puleʼaga.
ʼI lalo ʼo te ʼu kupu “Tohi,” “Kaupepa” pea mo te “Nusipepa,” tohi kiai te tānaki kātoa ʼo te ʼu tohi kehekehe ʼaē neʼe tuku ki te hahaʼi ʼaē ʼe mole ko he kau Fakamoʼoni kua foaki tonatou maʼuli kiā Sehova pea mo papitema.
ʼI te kupu “ ʼAʼahi”, tohi kiai ia te tānaki kātoa ʼo te ʼu ʼaʼahi ʼaē neʼe ke fai moʼo fakatupu ia te fia logo ʼo te hahaʼi ʼaē ʼe mole ko he kau Fakamoʼoni kua foaki tonatou maʼuli kiā Sehova pea mo papitema. Ke feala hau lau ko he ʼaʼahi, ʼe tonu muʼa ke ke felāveʼi mo te tagata ʼaia ʼaē neʼe fia logo ʼi tau ʼuluaki fakalaka iō ia. Kā ke fai he ako mo he tehina peʼe ko he tuagaʼane kua fualoa tana mole kei fai faka mafola he neʼe kole atu e he tahi ʼo te Komitē Gāue ʼo Te Kōkelekāsio, ʼe ke lau anai ko he ʼaʼahi. ʼE toe feala pē foki ke ke lau ko he ʼu ʼaʼahi te ʼu temi fuli ʼaē neʼe ke fai ai he ako mo ni hahaʼi neʼe hoki papitema pea ʼe kei ʼaoga ʼi he kiʼi temi ke tokoniʼi. ʼE kita fai he ʼaʼahi ki he tahi mokā neʼe kita ʼalu ki tona ʼapi, peʼe kita faitohi ki ai, peʼe mo telefoni ki ai, peʼe kita fakalaka iō ia ʼo tuku ki ai hana tohi, ohagē lā ko te ʼu nusipepa fakamuli. ʼI te temi fuli pē ʼe ke fai ai he ako Tohi-Tapu, ʼe tonu ke ke lau ko he ʼaʼahi.
Logolā ʼi te agamāhani ko te ʼu ako Tohi-Tapu ʼe fai tuʼa tahi ʼi te vāhaʼa, kae ʼe tohi tuʼa tahi pē ia ʼi te māhina. ʼI te ʼu fenua ʼaē ʼe fakaʼaogaʼi ai te Pepa Tānaki Ako, ʼe tohi anai e te kau fai faka mafola te ʼu ako ʼaē neʼe natou fai lolotoga te māhina mo he ʼu hahaʼi ʼe mole ko he kau Fakamoʼoni kua foaki tonatou maʼuli kiā Sehova pea mo papitema, peʼe ko he ʼu hahaʼi ʼe ʼalutahi tonatou faʼahiga maʼuli mo te ʼu manatu ʼaē ʼo te palakalafe ʼaē kā hoa mai. Kā kua ke tohi tau ʼu ako Tohi-Tapu fuli, pea ke tohi leva te kātoa ʼo te ʼu ako ʼaia ʼi te faʼahi mataʼu ʼaē ʼe tafa ki lalo ʼo tau kiʼi pepa tānaki gāue. Ko te tānaki ʼaia ʼe tonu ke ʼalutahi mo te lahi ʼo tau ʼu Pepa Tānaki Ako ʼaē neʼe ke tohi.
ʼE maʼuhiga ke ke tohi fakalelei tau ʼu “Hola Gāue.” ʼI tona fakahagatonu, ko te kupusiga palalau ʼaia ʼe faka ʼuhiga ki te temi ʼaē neʼe fakaʼaogaʼi ki te gāue fai faka mafola ʼi te ʼu matapā, mo tau fagonogono ʼi te ala, mo tau fai te ʼu ʼaʼahi, mo te ʼu ako Tohi-Tapu, peʼe ko tau fagonogono faigamālie ki he ʼu hahaʼi ʼe mole ko he ʼu Fakamoʼoni kua foaki tonatou maʼuli kiā Sehova pea mo papitema. ʼE feala foki ke ke lau mo te temi ʼaē neʼe fai ai he ako mo he tehina peʼe ko he tuagaʼane kua fualoa tana mole kei fai faka mafola pea neʼe kole atu e he tahi ʼo te Komitē Gāue ʼo Te Kōkelekāsio. Pea tahi ʼaē meʼa, ʼe lelei ke ke tohi mo te temi ʼaē neʼe ke fai ai he ako mo ni hahaʼi neʼe hoki papitema atu pē, pea ʼe kei ʼaoga kiā nātou he tokoni faka temi ʼi te faʼahi fakalaumālie. Kapau ʼe fai faka mafola fakatahi he ʼu kaugā fai faka mafola, pea ʼe nā lau anai tonā temi, mo kapau neʼe nā palalau toko lua ʼi tanā gāue. ʼE ʼi ai te tahi age ʼu gāue maʼuhiga ʼe mole lau anai te temi ʼaē neʼe fakaʼaogaʼi moʼo teuteuʼi ki te fai faka mafola, ki te fono vahe gāue, pea mo te ʼalu pea mo te liliu mai te telituale.
ʼE hoki kamata lau te temi fai faka mafola mokā kua ke kamata fagonogono pea ʼe fakaʼosi mokā mole kei ke fagonogono. Kapau ʼe ke mālōlō peʼe ke kai lolotoga te fai faka mafola, pea ʼe mole lau anai te temi ʼaia. Pea ʼe fakamaʼua te ʼu hola ke fai e te kau pionie vaeluaʼi temi, mo te kau pionie kātoa, pea mo te kau pionie makehe. Pea ki te kau fai faka mafola ʼo te kōkelekāsio, ʼe toe fakaloto mālohiʼi mo nātou ke natou fakamuʼamuʼa ia te ʼu gāue ʼo te Puleʼaga pea ke lahi tanatou kau ki te gāue fai faka mafola. ʼE faiga te ʼu kaugana fuli ʼa Sehova ke natou kau ki te minisitelio. (Kol. 3:23) Ko te ʼu tehina ʼaē ʼe faiakonaki ki te kaugamālie ʼe natou lau anai tonatou temi; ko he tamai peʼe ko he faʼē ʼe ina lau leva tona temi ʼaē ʼe ina fakaʼaogaʼi moʼo akoʼi ʼo tana fānau ʼaē ʼe mole heʼeki foaki tonatou maʼuli kiā Sehova, kae ʼe ina tohi pē anai te hola e tahi ʼi te vāhaʼa.
Ko te temi ʼaē neʼe fakaʼaogaʼi ki te fai faka mafola ʼe tohi pē anai te hola kae tuku te lau ʼo tona ʼu minuta. ʼE mole tatau leva mo he kaugā fai faka mafola ʼe matuʼa, peʼe nofo pē ʼi tona ʼapi, peʼe nofo ʼi he fale mahaki, peʼe māʼimoa hona koga ʼo mole feala ai hana feʼaluʼaki. Ko te kaugā fai faka mafola ʼaia ʼe feala anai ʼi te māhina ke ina tohi minuta e 15. Tatau aipē mo kapau ʼi te māhina kātoa neʼe fagonogono iā minuta e 15, kae ʼe ina tohi anai tona ʼu minuta ʼaia, ke fakahā ai ʼe kei kau ʼi te kau fai faka mafola ʼo te Puleʼaga. Ko te fakatuʼutuʼu ʼaia ʼe toe lelei pē foki ki he kaugā fai faka mafola ʼe faka temi pē tana mole lava gāue lahi, ʼuhi heʼe mole feala hana feʼaluʼaki lolotoga he māhina peʼe laka atu heʼe mahaki peʼe lavea. Kae ko te fakatuʼutuʼu ʼaia ʼe ʼaoga pē ia kiā nātou ʼaē ʼe fakatuʼakoi tanatou gāue. ʼE fakalogo anai ki te Komitē Gāue ʼo Te Kōkelekāsio ia te vakaʼi peʼe feala ke ʼaoga te fakatuʼutuʼu ʼaia ki he kaugā fai faka mafola.
TE KATE GĀUE ʼO TE KAUGĀ FAI FAKA MAFOLA (PEPA ʼO TE KŌKELEKĀSIO)
Ko tau kiʼi pepa tānaki gāue ʼo te māhina fuli ʼe hiki ki te kate Gāue ʼo Te Kaugā Fagona (Pepa ʼo Te Kōkelekāsio), pea ʼe taupau ʼi te ʼu pepa ʼo te kōkelekāsio. ʼE mole nofo te ʼu kate ʼaia mo te ʼu kaugā fai faka mafola. Kapau ʼe ke fetogi kōkelekāsio, ʼe tonu ke ke fakahā ia te faʼahi ʼaia ki te ʼu tagata ʼāfea. Ko te sikalaipe ʼo te kōkelekāsio ʼaē kā ke kau anai kiai ʼe ina fakaʼui anai ke ina maʼu tau kate Gāue ʼo Te Kaugā Fagona (Pepa ʼo Te Kōkelekāsio). Kapau ʼe ʼiloʼi e te sikalaipe ʼo te kōkelekāsio ʼaē neʼe ke kau ai ia te kōkelekāsio ʼaē kā ke kau ai, pea ʼe feala anai hana momoli te kate ʼaia mo he tohi ʼe fakamatalatala ai tau fetogi kōkelekāsio. ʼE feala ai anai ki te ʼu tagata ʼāfea ʼo tau kōkelekāsio foʼou ke natou ʼiloʼi lelei ai ia koe pea mo natou tokoni atu ʼi te faʼahi fakalaumālie mo kapau ʼe ʼaoga kiā koe. Kapau ʼe ke puli ʼi tau kōkelekāsio iā māhina e tolu peʼe siʼi ifo, tokaga ʼo ʼave tuʼumaʼu tau kiʼi pepa tānaki gāue ki te kōkelekāsio ʼaē ʼe kei ke kau ai.
TE TUPUʼAGA ʼO TATATOU TOHI TATATOU GĀUE FAI FAKA MAFOLA
ʼE tau galo koa iā koe te ʼave ʼo tau kiʼi pepa tānaki gāue? ʼE mahino ia ʼe ʼaoga kiā tātou fuli ke tautau fakamanatu mai ia te faʼahi ʼaia. Kae kapau ʼe mahino lelei kiā tātou ia te maʼuhiga ʼo te tohi ʼo tatatou gāue, pea ʼe faigafua anai kiā tātou hatatou foaki tautonu tatatou kiʼi pepa tānaki gāue.
ʼE lagaʼi anai te fehuʼi ʼaenī e niʼihi: “Kapau ʼe ʼiloʼi lelei e Sehova te gāue ʼaē ʼe au fai maʼa ia, he koʼē ʼe tonu ke au fakahā taku gāue ki te kōkelekāsio?” ʼE moʼoni, ʼe ʼiloʼi e Sehova ia te meʼa ʼaē ʼe tou fai, pea ʼe ina ʼiloʼi lelei peʼe tou fakahoko tatatou gāue mo totatou loto kātoa, peʼe tou gāue ʼaki he loto tātāʼofi, logolā tatatou lava fai ke lahi age tatatou gāue. Kae ʼaua naʼa galo iā koe neʼe haga ia Sehova ʼo tohi ia te ʼu ʼaho fuli ʼaē neʼe nofo ai ia Noe ʼi te loto ʼaleka pea mo te ʼu taʼu ʼaē neʼe feʼoloʼaki ai te kau Iselaele ʼi te toafa. Neʼe ina toe tohi mo te kaugamālie ʼo nātou ʼaē neʼe natou agatonu pea mo natou ʼaē neʼe agatuʼu. Neʼe ina toe tohi te ʼu mālo hoholo ʼa te kau Iselaele ʼi tanatou tauʼi te fenua ko Kanaane, ʼo fēia mo ʼaē ʼa te kau tuʼi fakamāu agatonu. ʼEī, neʼe ina fakatuʼutuʼu ke tohi te ʼu agaaga kehekehe ʼo te ʼu gāue pea mo te ʼu aga ʼo tana ʼu kaugana. ʼAki tana takitaki te tohi ʼo te ʼu fakamatala ʼaia ʼaki tona laumālie, neʼe ina faka fealagia mai he mahino lelei ki te maʼuhiga ʼo te fakamatala leleiʼi ʼo he ʼu meʼa neʼe hoko.
Ko te ʼu meʼa ʼaē neʼe hoko ʼi te hisitolia pea neʼe tohi ʼi te Tohi-Tapu ʼe natou fakamoʼoni ki te totonu ʼo te ʼu fakamatala ʼaē neʼe fai e te hahaʼi ʼaē ʼe natou fua te huafa ʼo Sehova. ʼE lahi te ʼu ʼaluʼaga, kanapau lā neʼe mole tohi fakalelei ʼi te Tohi-Tapu ia te ʼu meʼa totonu ʼaē neʼe hoko, lagi ʼe mole tou mahino kātoa anai kiai. Ohagē lā, ko te ʼu faʼifaʼitaki ʼaē ʼe tou maʼu ʼi te ʼu koga tohi ʼaenī: Senesi 46:27 pea mo Ekesote 12:37; Kau Tuʼi Fakamāu 7:7; 2 Hau 19:35; 2 Fakamatala 14:9-13; Soane 6:10; 21:11; Gaue 2:41; 19:19.
Iā ʼaho nei, ʼe lahi te ʼu tupuʼaga ke tou fakahā ai tatatou gāue fai faka mafola. Logolā ʼi te ʼu kiʼi pepa tānaki gāue ʼaia ʼe mole tou fakahā fuli tatatou gāue ʼaē ʼe tou fai ʼi te tauhi kiā Sehova, kae ʼe ʼaoga ʼaupitō kiā nātou fuli ʼe kau ʼi te kautahi ʼa Sehova, ʼo feiā mo te kau tagata ʼāfea ʼo totatou kōkelekāsio.
ʼI ʼihi temi, ʼe tou lava ʼiloʼi ʼaki te ʼu pepa tānaki gāue ʼaia, ʼe ʼi ai te tokoni ʼe tonu ke fai ʼi he faʼahi ʼo tatatou minisitelio. ʼE tou lava ʼiloʼi ʼaki te ʼu tānaki gāue ia te lelei ʼo he faʼahiga gāue peʼe kailoa, ohagē lā ko te tuputupu ʼo te kau fai faka mafola. ʼE lagi fakaloto mālohiʼi anai te kau fai faka mafola peʼe tonu anai ke kumi he puleʼaki ki he faʼahiga fihifihia. Ko te ʼu tagata taupau ʼe natou vakaʼi anai te ʼu tānaki gāue ʼaia, pea mo faigaʼi anai ke natou maʼu ni ʼu puleʼaki moʼo fakatokatoka te ʼaluʼaga ʼaia ʼaē ʼe ina lava tāʼofi ia te tuputupu ʼo he kau fai faka mafola peʼe ko te kōkelekāsio kātoa.
Tahi ʼaē meʼa, ʼe feala ke ʼiloʼi te tokoni ʼaē ke foaki ki te kau fai faka mafola ʼaki te ʼu tānaki ʼaoga ʼaia ʼe fai e te kautahi. Kofea ʼapē te ʼu telituale ʼaē ʼe tuputupu tāfito ai te gāue? Ko te telituale fea ʼaē ʼe mole lahi ai te tuputupu ʼo te gāue? Ko te ʼu tohi faka Tohi-Tapu fea ʼaē ʼe ʼaoga tāfito ki te hahaʼi ke natou ʼiloʼi ai te moʼoni? ʼE feala anai ki te kautahi ʼa Sehova ke ina teuteuʼi fakatomuʼa he ʼu tohi ke feʼauga ki he ʼu telituale kehekehe ʼo te kele, ke ʼaua naʼa hoko mai te temi ʼaē ke tufa ai te ʼu tohi ʼaia ki te telituale ʼe mole feʼauga te ʼu Tohi-Tapu peʼe ko he ʼu tohi faka Tohi-Tapu ki te fai faka mafola.
Ki te tokolahi iā tātou, ʼe ko he meʼa fakaloto mālohi kiā tātou ia te ʼu tānaki gāue ʼaia. ʼE mole koa lā tou fiafia mokā tou logo ki te ʼu gāue lelei ʼaē neʼe fai e ʼotatou tehina ʼi te kele kātoa ʼi te tala ʼo te logo lelei? Ko te ʼu tuputupu ʼi te kaugamālie ʼo te kau fai faka mafola, ʼe tokoni mai ki te maʼuhiga ʼo te tuputupu ʼo te kautahi ʼa Sehova. Pea ʼe tou toe lotomālohi ʼaki te ʼu fakamatala ʼa te kau fai faka mafola pea mo fakatupu iā tātou te fia faʼafai, ʼo ina uga tātou ke tou faʼafai ʼi te gāue fai faka mafola. (Gaue 15:3) Koia ʼe maʼuhiga ai ke tou kaugā gāue fakatahi mo te kōkelekāsio, ʼo tou tohi tatatou gāue fai faka mafola, pea mo tou fakahā totatou ʼofa ki totatou ʼu tehina ʼi te mālamanei kātoa. Kā tou fai te faʼahi ʼaia, ʼe tou fakahā ai tatatou fakalogo ki te fakatuʼutuʼu ʼaē neʼe fai e Sehova ʼi tana kautahi.—Mat. 24:45-47.
TOU FAI HATATOU ʼU FAKATUʼUTUʼU TAKITOKOTAHI
ʼE mole tonu ke tou fakatatau tatatou gāue fai faka mafola pea mo te gāue ʼa he tahi kehe. (Kal. 5:26; 6:4) ʼE kehekehe te ʼaluʼaga ʼo te tagata takitokotahi, koia ʼaē ʼe mole lelei anai te fakatatau ʼo he gāue ʼa he tahi ki he tahi. Kae ʼe lagi lelei ke tou tahi fai takitokotahi he ʼu fakatuʼutuʼu fakapotopoto ʼe tou lava fakahoko. ʼAki te ʼu fakatuʼutuʼu ʼaia, ʼe tou lava ʼiloʼi ai te ʼu faʼahi ʼo te minisitelio ʼaē ʼe tou tuputupu ai. Koia, kapau ʼe tou fai tatatou ʼu fakatuʼutuʼu ʼo mulimuli pē ki totatou ʼu ʼaluʼaga takitokotahi, ʼe tou fiafia anai ʼi tatatou fakahoko te ʼu fakatuʼutuʼu ʼaia.
TOU KAU KI HE TĀNAKI FAKAʼOSI
ʼO ʼuhiga mo te gāue fakatā ʼaē ko te fai faka mafola ʼaē ʼe tou fakahoko iā ʼaho nei, ʼe tonu ke fai he tānaki mokā kua ʼosi te gāue. ʼI te lea faka polofeta, neʼe sio Esekiele ki te ʼu tagata e toko ono mo tanatou ʼu mahafu ʼi ʼonatou nima moʼo laliki, neʼe natou ʼomai moʼo fakahoko he tautea ki te Selusalemi ʼapositā. Neʼe toe sio te polofeta ki te fitu tagata. Ko te tagata ʼaia neʼe ʼi ai tana vaitohi ʼo te tagata sikalaipe, pea neʼe fakatotonu fēnei age ki ai: “Fakalaka ʼi te loto kolo, ʼi te lotolotoiga ʼo Selusalemi, pea ʼe tonu anai ke ke fakaʼiloga ʼi te laʼe ʼo te hahaʼi ʼaē ʼe natou goʼegoʼe pea mo lotomamahi ʼo ʼuhiga mo te ʼu meʼa fakalialia fuli ʼaē ʼe hoko ʼi te loto kolo ʼaia.” ʼI tana ʼosi tohi te fakaʼiloga kiā nātou fuli ʼaē neʼe tonu ke haofaki mai te tautea ʼa te ʼu tagata ʼaē neʼe ʼi ai tanatou ʼu mahafu moʼo laliki, neʼe liliu mai te tagata mo te vaitohi ʼo te tagata sikalaipe, pea neʼe ina fakamatala mo ʼui māʼana: “Neʼe au fakahoko pē ohagē ko tau fakatotonu mai.”—Esk. 9:1-11.
ʼE mole tou ʼiloʼi peʼe koteā te fakamatala fakaʼosi ʼaē kā fakaʼui mai anai e Sehova ʼo ʼuhiga mo te gāue fai faka mafola lahi, ʼo mulimuli ki te koga tohi ia Mateo 24:14. Kae ʼe tou lava fakahā totatou loto fakafetaʼi ʼo ʼuhiga mo te kiʼi koga veliveli ʼaē neʼe tuku mai ke tou kau ʼi te minisitelio, mo kapau ʼi te māhina fuli ʼe tou tohi fakalelei tatatou gāue fai faka mafola. ʼE tonu anai ki te kau fai faka mafola fuli ke natou foimo tohi tanatou gāue fai faka mafola ʼi te fakaʼosi ʼo te māhina fuli. Kapau ʼe tou fai feiā, pea ʼe loto fakafetaʼi anai te ʼu tehina ʼaē neʼe fakatuʼutuʼu ke natou tānaki kātoa te gāue fai faka mafola ʼo te kōkelekāsio ke momoli ki te filiale.
Kua ʼiloga lelei ko Sehova ʼi te temi nei kua ina lolotoga fakaviliviliʼi ia te fakamāʼopoʼopo ʼo te hahaʼi ʼaē kā ina haofaki anai ʼi te “mamahi lahi.” ʼE tou māʼuʼuli nei ʼi te temi ʼaē ʼe fakahoko ai te lea faka polofeta ʼo Isaia: “Ko te tokosiʼi ʼe liliu anai ko te lauʼi afe, pea ko ia ʼaē ʼe veliveli ʼe liliu anai ko te puleʼaga mālohi. Ko au, Sehova, ʼe au fakaviliviliʼi anai te faʼahi ʼaia ʼi tona temi totonu.” (Apk. 7:9, 14; Isa. 60:22) Mai te ʼaluʼaga ʼaē ʼe tou kau ki te kautahi faka mālamanei ʼaē ʼe tuku age kiai ia te minisitelio, ʼe tou fia fakaʼaogaʼi kiā tātou ia te ʼu palalau ʼa te tagata mo te vaitohi ʼo te tagata sikalaipe, ʼaē neʼe sio kiai ia Esekiele pea mo ʼui fēnei: “Neʼe au fakahoko pē ohagē ko tau fakatotonu mai.”