Kua Nātou Fakatuʼutuʼu Moʼo Fai ʼo Te Finegalo ʼo Sehova
Kāpite 13
“Fai Ia Meʼa Fuli Moʼo Faka Kolōliaʼi Te ʼAtua”
NEʼE tou foaki totatou maʼuli ki te ʼAtua ke tou tauhi ki ai, ʼo tou fua tona huafa, koia ʼe maʼua ai ke tou fakatapa ia te kolōlia ʼo Sehova ʼi tatatou ʼu palalau pea mo tatatou ʼu gāue. Neʼe tuku mai e te ʼapositolo ko Paulo ia he pelesepeto ke tou mulimuli kiai, ʼi tana tohi ʼaenī: “Peʼe kotou kakai, peʼe kotou ʼiʼinu, peʼe ko he faʼahiga meʼa pē ʼe kotou fai, kotou fai ia meʼa fuli moʼo faka kolōliaʼi te ʼAtua.” (1 Ko. 10:31) Ko tona faka ʼuhiga, ʼe tonu ke tou pipiki maʼu ki te ʼu lēkula faitotonu ʼa Sehova, ʼaē ʼe ina fakatapa ia tona ʼuhiga haohaoa. (Kol. 3:10) ʼE tonu ke tou faʼifaʼitakiʼi ia te ʼAtua pea mo tou liliu ko ni ʼu hahaʼi māʼoniʼoni.—Efe. 5:1, 2.
Neʼe fakatokagaʼi e te ʼapositolo ko Petelo ia te kau Kilisitiano ki te maʼuhiga ʼo te faʼahi ʼaia, ʼo ina tohi fēnei: “Ohagē ko he ʼu fānau talagafua, ke ʼaua naʼa kotou toe maʼuli ʼo ʼalutahi mo te ʼu holi ʼaē neʼe kotou maʼu ʼi te temi muʼa, ʼi te temi ʼaē neʼe kei kotou nonofo ai ʼi te fakapōʼuli, kae ʼo ʼalutahi mo te Māʼoniʼoni ʼaē neʼe ina pāui koutou, mo koutou foki ke kotou liliu ʼo māʼoniʼoni ʼi takotou aga kātoa, he neʼe tohi fēnei: ‘ ʼE tonu ke kotou māʼoniʼoni, heʼe au māʼoniʼoni.’ ” (1 Pet. 1:14-16) Ohagē ko te kau Iselaele ʼo te temi muʼa, ʼe fakamaʼua ki te kōkelekāsio faka Kilisitiano ke natou māʼoniʼoni. ʼE tonu ke natou heʼe mele, ke ʼaua naʼa ʼulihi nātou e te agahala peʼe ko te manatu ʼo te mālamanei. Koia ʼe natou taputapu moʼo tauhi kiā Sehova.—Eke. 20:5.
ʼE tou taupau anai totatou ʼuhiga māʼoniʼoni ʼaki hatatou mulimuli ki te ʼu lao pea mo te ʼu pelesepeto ʼa Sehova, ʼaē ʼe hā lelei mai ʼi te Tohi-Tapu. (2 Tim. 3:16) ʼAki tatatou ako ia te Tohi-Tapu, kua tou ʼiloʼi ai ia Sehova pea mo tona ʼu ala, pea mo tou fia fakaovi kiā te ia. ʼE mole tou liliu ko hana ʼu kaugana ʼuhi pē he neʼe kua papitemaʼi tātou ʼi te vai ʼi tatatou kua tali ia te ʼu akonaki tāfito. Kae, ko tatatou akoʼi ia te Tohi-Tapu ʼaē neʼe tou mahino ai ki te maʼuhiga ʼo te kumi muʼa ʼo te Puleʼaga ʼo te ʼAtua pea mo fakamuʼamuʼa ʼi totatou maʼuli ia te fai ʼo te finegalo ʼo Sehova. (Mat. 6:33; Loma 12:2) Koia neʼe tonu ai leva ke tou teu ia te ʼulugaaga foʼou moʼo fakahoko ia te faʼahi ʼaia.—Efe. 4:22-24.
TE MAʼA ʼI TE FAʼAHI FAKALAUMĀLIE PEA MO TE AGA ʼAĒ ʼE TONU KE FAI
ʼE mole faigafua tuʼumaʼu hatatou māʼuʼuli ʼo mulimuli ki te foaki ʼo totatou maʼuli kiā Sehova, pea mo pipiki tuʼumaʼu ki tana ʼu lēkula faitotonu. Ko totatou Fili lahi, ia Satana te Tevolo, ʼe ina faigaʼi ke ina fakamaliu tātou mai te moʼoni. Ko te ʼu fakaneke ʼo te mālama agakovi ʼaenī pea mo totatou ʼuhiga agahala, ʼe natou fakatupu iā tātou ia he ʼu fihifihia ʼi ʼihi temi. Koia ʼe tonu ai ke tou haga tau ʼi te faʼahi fakalaumālie. ʼE fakahā mai ʼi te Tohi-Tapu ke ʼaua naʼa tou tuʼania mokā ʼahiʼahiʼi peʼe fakatagaʼi tātou. ʼE tonu ke tou mamahi ʼuhi ko te faitotonu. (2 Tim. 3:12) Kae ʼe feala ke tou fiafia ʼi te ʼahiʼahi, heʼe tou fakahā ai ʼe tou fai ia te finegalo ʼo te ʼAtua.—1 Pet. 3:14-16; 4:14-16.
Logolā ia te haohaoa ʼo Sesu, kae neʼe ina ako ia te fakalogo ʼaki ia te ʼu mamahi ʼaē neʼe hoko ki ai. Neʼe mole mulimuli ia ki te ʼu fakahala ʼa Satana peʼe ki te ʼu holi ʼo te mālama ʼaenī. (Mat. 4:1-11; Soa. 6:15) Mole pē lā hake ʼi he temi ʼi tana manatu ke ina fakahoko he fakafeagai. Logolā tana agatonu kae neʼe fehiʼaʼinaʼi e te mālamanei ʼo pipiki tuʼumaʼu aipē ki te ʼu lēkula faitotonu ʼa Sehova. ʼI muʼa pē ʼo tana mate, neʼe ina fakatokaga tana kau tisipulo ʼuhi ʼaē neʼe fehiʼaʼinaʼi ia ia e te mālamanei he neʼe mole kau ki te mālama, ʼe toe fehiʼaʼinaʼi anai mo nātou. Talu mai ai, mo te fakatagaʼi pē ʼo te kau tisipulo ʼa Sesu Kilisito, kae neʼe natou lototoʼa, koteʼuhi ʼe natou ʼiloʼi neʼe mālo te ʼAlo ʼo te ʼAtua ʼi te mālamanei.—Soa. 15:19; 16:33; 17:16.
Ke tou mālo ʼi te mālamanei, ʼe tonu ke tou pipiki maʼu ki te ʼu lēkula faitotonu ʼa Sehova, ohagē ko totatou Pule. ʼE tonu ke tou fakamamaʼo mai te ʼu ʼaluʼaga fuli ʼaē ʼe pipiki ki te ʼu meʼa faka politike pea mo faka sōsiale ʼo te mālama, pea mo tana ʼu aga ʼaē ʼe kovi. ʼE tonu ke tou tokagaʼi fakamālotoloto ia te tokoni ʼaē ʼe tuku mai iā Sake 1:21: “Ke kotou liʼaki te aga heʼemaʼa fuli pea mo te agakovi ʼaē kua lahi ʼaupitō, pea mo kotou tali ʼaki he agamalū ke tō te folafola iā koutou, ʼaē ʼe feala ke ina haofaki tokotou ʼu nefesi.” Kapau ʼaki tatatou ako pea mo tatatou kau ki te ʼu fono, ʼe tou fakahū tuʼumaʼu ki totatou ʼatamai pea mo totatou loto ia te folafola ʼo te moʼoni, pea ʼe tou taupau anai ia he tui ʼe mālohi māʼiapē lā mokā hoko mai he ʼahiʼahi peʼe ko he ʼu fakataga. Logolā te mālohi ʼo te ʼu fakaneke ʼo te mālamanei kiā tātou, kae ʼaua naʼa kamata holi totatou loto ki te ʼu meʼa ʼe ina foaki mai. Koteā tona tupuʼaga? Ki te faʼahi ʼaia, ʼe tuku mai e te tisipulo ko Sakopo ia te fakatokaga ʼaenī: “ ʼE mole kotou ʼiloʼi koa lā ko te fakakaumeʼa mo te mālamanei ʼe ko he fehiʼa ia ki te ʼAtua? Ko ʼaē ʼe fia kaumeʼa mo te mālamanei ʼe liliu ia ko he fili ʼo te ʼAtua.” (Sake 4:4) ʼE ke mahino koa, pe koʼē ʼe fakaloto mālohiʼi tātou ʼi te Tohi-Tapu ke tou pipiki maʼu ki te ʼu lēkula faitotonu ʼa Sehova pea mo tou fakamamaʼo mai te mālama?
Ko te ʼu tokoni ʼaē ʼe tou maʼu ʼi te Folafola ʼa te ʼAtua ʼe fakatokaga mai kiā tātou ke ʼaua naʼa tou kau ki he aga fakaufiufi pea mo heʼeʼaoga. ʼE ina fakahā mai ko “te folonikāsio, mo te heʼemaʼa ʼi tona ʼu faʼahiga agaaga fuli pē, pea mo te mānumānu, ʼe mole tonu pē lā ke fai he talanoa kiai iā koutou, ohagē ko te aga ʼaē ʼe tāu mo he kau māʼoniʼoni.” ʼE mole tonu ke tou fakagafua ki totatou ʼatamai ke tuʼu ʼi he ʼu manatu heʼeʼaoga, fakaufiufi peʼe kovi, pea ʼe mole tonu anai ke tou hoʼi palalau noa ki te ʼu faʼahi ʼaia. ʼE tonu foki ke tou toe fakamamaʼo mai te ʼu meʼa ʼaē ʼe tou sisio kiai ʼe heʼeʼaoga pea mo heʼemaʼa. (Efe. 5:3-5) ʼE tou fakahā ai anai ʼe tou fia pipiki maʼu ki te ʼu lēkula faitotonu pea mo maʼa ʼa Sehova.
TE MAʼA ʼI TE FAʼAHI FAKASINO
ʼO hilifaki ki te maʼa ʼi te aga ʼaē ʼe tonu ke fai pea mo te faʼahi fakalaumālie, ʼe mahino ki te kau Kilisitiano ia te maʼuhiga ʼaē ke natou maʼa ʼi te faʼahi fakasino. ʼI te Iselaele ʼāfea, neʼe fakamaʼua e te ʼAtua māʼoniʼoni ke maʼa ia te nofoʼaga ʼo tana hahaʼi. (Teu. 23:14) Neʼe tonu ki te kau Iselaele ke natou mulimuli ki te ʼu pelesepeto ʼa Sehova ʼo ʼuhiga mo te agamaʼa. ʼO toe fēia mo tātou, ʼe tonu ko hatatou agamāhani ia te agamaʼa, ke ʼaua ‘naʼa sio mai ia Sehova ki he meʼa ʼe kovi iā tātou.’
Ko te Māʼoniʼoni pea mo te maʼa ʼi te faʼahi fakasino ʼe ko he ʼu faʼahi ʼe pipiki tahi ʼi te Tohi-Tapu. Ohagē lā, neʼe ʼui fēnei e Paulo: “Kāiga ʼofaina, tou fakamaʼa ia tātou mai te meʼa ʼuli fuli pē ʼo te kakano pea mo te laumālie, ʼo faka kātoa ia te māʼoniʼoni ʼi te manavasiʼi ki te ʼAtua.” (2 Ko. 7:1) Koia, ʼe tonu ai ki te kau Kilisitiano moʼoni ke natou haga taupau tanatou agamaʼa, ʼo natou fō tuʼumaʼu ʼonatou teu. Logopē lā ia te kehekehe ʼo te ʼu ʼaluʼaga ʼi te ʼu fenua fuli, kae ko te kau Kilisitiano, tagata pea mo fafine, ʼe natou maʼu ia he vai pea mo he ʼu topa ʼe feʼauga ke feala hanatou nonofo maʼa pea mo tōkakaga ke toe maʼa mo tanatou ʼu fānau.
ʼUhi ko tatatou gāue fai faka mafola, ʼe ʼiloʼi tātou ʼi te ʼu potu ʼaē ʼe tou māʼuʼuli ai. Kā maʼa pea mo tokalelei ia he ʼapi, ʼi loto fale pea mo tuʼa, pea ʼe ko he tahi ʼaia fakamoʼoni ko tātou ʼe ko te ʼu kaugana ʼa te ʼAtua. ʼE feala ki te fāmili kātoa ke natou lagolago ki te faʼahi ʼaia. ʼE tonu anai ki te ʼu tagata ʼohoana pea mo te ʼu tamai ke natou tōkakaga tāfito ki te fakatokatoka ʼo tonatou ʼu ʼapi pea mo tona ʼu tafaʼaki, heʼe natou ʼiloʼi ʼe ko he faʼifaʼitaki lelei ki te hahaʼi ʼo tuʼa hanatou sisio ki te maʼa ʼo te ʼapi pea mo tona ʼu tafaʼaki. ʼE ʼiloʼi e te ʼu pule fāmili kapau ʼe natou fai fēia, ʼo natou takitaki lelei ʼi te faʼahi fakalaumālie, ʼe hā ʼaki ai ʼe natou takitaki lelei tonatou loto fale. (1 Tim. 3:4, 12) Mo te ʼu fafine ʼohoana pea mo te ʼu faʼē, ʼe tonu foki mo nātou, ke natou tōkakaga ki te tahi age ʼu meʼa, tāfito lā ia te ʼu gāue ʼo te loto fale. (Tito 2:4, 5) Ko te ʼu fānau ʼaē ʼe lelei tonatou akoʼi, ʼe hā iā nātou totonu tanatou agamaʼa pea mo natou tōkakaga ke maʼa pea mo fakatoka lelei tonatou ʼu kogafale. Koia, ʼe feala ai anai ki te fāmili kātoa ke natou gāue fakatahi, ʼo natou maʼu he ʼu agamāhani ʼi te fakamaʼa, ʼe tuha mo te mālama foʼou ʼaē kā takitaki e te Puleʼaga ʼo te ʼAtua.
Tokolahi te ʼu kaugana ʼa Sehova ʼe natou fakaʼaogaʼi ʼi te temi nei ia he motokā ke natou ʼolo ai ki te ʼu fono peʼe ki te fai faka mafola. ʼI ʼihi fenua, ʼe maʼuhiga ʼaupitō ia he motokā ki te gāue faka minisitelio. ʼE ʼaoga anai ke kita tokaga ke maʼa pea mo haʼele lelei tuʼumaʼu ia te motokā. ʼE tonu ke ʼiloga ʼi totatou ʼapi pea mo tatatou motokā ʼe tou kau ki te hahaʼi maʼa pea mo māʼoniʼoni ʼa Sehova.
ʼE tonu anai ki totatou faʼahiga teu pea mo te faʼahiga gaohi ʼo totatou ʼulu ke ʼalutahi mo te ʼu pelesepeto fakaʼatua. ʼE mole tou ʼolo anai ki he tahi ʼe maʼu tuʼulaga, mo he ʼu teu ʼe mole fakapoipoi peʼe heʼe fakaʼapaʼapa. ʼO mulimuli ki te faʼahi ʼaia, ʼe mole tonu koa lā ke tou tōkakaga ki totatou faʼahiga teu mokā tou tauhi kiā Sehova, mokā tou fakafofoga ia ia ʼi te fai faka mafola peʼe mai te faiakonakiʼaga? ʼAki te faʼahiga gaohi ʼo totatou ʼulu pea mo tatatou faʼahiga teu ʼe feala ai ki te hahaʼi ke natou maʼu he faʼahiga manatu ʼo ʼuhiga mo te tauhi ʼaē kiā Sehova. ʼE mole tonu anai ke tou fia popoto fau pea mo fakalainoaʼi ia te hahaʼi. (Mik. 6:8; 1 Ko. 10:31-33; 1 Tim. 2:9, 10) Kā tou teuteu ke tou kau ki te gāue faka minisitelio peʼe ki te ʼu fono ʼo te kōkelekāsio, ki te ʼu fakatahi faka silikō peʼe ki te ʼu fakatahi lalahi, ʼe tonu ke tou manatuʼi peʼe koteā ʼaē ʼe ʼui ʼi te Tohi-Tapu ʼo ʼuhiga mo te agamaʼa pea mo te fakapoipoi ʼo te teu, ke feala ai hatatou fakaʼapaʼapaʼi pea mo faka kolōliaʼi tuʼumaʼu ia Sehova.
ʼE toe ʼaoga ia te ʼu pelesepeto ʼaia mokā tou ʼaʼahi ia te Petele. Ke ʼaua naʼa galo kiā tātou ko te faka ʼuhiga ʼo te kupu Petele ʼe ko te “ ʼApi ʼo Te ʼAtua.” Koia ʼe tou ʼamanaki ai ʼo ʼuhiga mo te faʼahiga gaohi ʼo te ʼulu, te faʼahiga teu pea mo te faʼahiga aga ʼe tou muliʼi pē anai ia te ʼu lēkula ʼaē mokā tou kau ki te ʼu fono ʼi te Fale ʼo Te Puleʼaga.
HE ʼU TEMI MĀLŌLŌ PEA MO HE ʼU TEMI FAKAFIAFIA ʼE LELEI
ʼE ʼaoga kiā tātou ke tou mālōlō pea mo tou fakafiafia. Koia ʼi te tahi ʼaho, neʼe fakaafe ai e Sesu ia tana ʼu tisipulo ke natou ʼolo mo ia ki he koga meʼa lāvaki ke ʼai ‘hanatou kiʼi mālōlō.’ (Mko. 6:31) ʼE tou fīmālie anai mo kapau ʼe tou mālōlō peʼe tou fakafiafia. ʼE feala ai hatatou toe mālolohi ʼi te faʼahi fakasino moʼo hoko atu tatatou ʼu gāue māhani.
Koia ʼi te lahi ʼaupitō ʼo te ʼu faʼahiga fakafiafia, ʼe tonu ki te kau Kilisitiano ke natou tōkakaga pea mo natou fakaʼaogaʼi ia te poto ʼaē ʼe haʼu mai te ʼAtua ʼo ʼuhiga mo te ʼu faʼahi ʼaia. ʼIo, ʼe lelei pea mo ʼaoga ia he fakafiafia, kae ʼe mole ko he faʼahi ʼe maʼuhiga tāfito ki totatou maʼuli. Neʼe fakatokagaʼi tātou ʼi “te ʼu ʼaho fakamuli,” ko te hahaʼi ʼe natou liliu anai ʼo “kaumeʼa mo te ʼu fakafiafia kae mole kaumeʼa mo te ʼAtua.” (2 Tim. 3:1, 4) ʼE lahi ʼi te temi nei te ʼu fakafiafia ʼe mole tali ʼe nātou ʼaē ʼe natou fia pipiki maʼu ki te ʼu lēkula faitotonu ʼa Sehova.
Neʼe tonu ki te kau ʼuluaki Kilisitiano ke natou tauʼi ia te ʼu aga heʼeʼaoga ʼo te mālama ʼaē ʼe natou kumi tāfito ia te ʼu fakafiafia. ʼI te ʼu gaoʼi ʼa te kau Loma, ʼe fakafiafia ia te hahaʼi mamata ʼi tanatou sisio ki te mamahi ʼo ʼihi. Ko te fakafiafia ʼa te hahaʼi ʼe ʼiku tuʼumaʼu pē ki te agamālohi, ki te ligitoto pea mo te ʼu felāveʼi fakasino heʼeʼaoga, kae neʼe ʼāteaina ia te kau ʼuluaki Kilisitiano mai te faʼahi ʼaia. ʼE fēia iā ʼaho nei te ʼu fakafiafia ʼi te mālamanei, pea ʼe leleiʼia e te ʼuhiga agahala ʼo te tagata. ʼE ʼaoga kiā tātou ke tou “tōkakaga fakalelei ki [tatatou] faʼahiga haʼele,” pea mo tou liʼaki ia te ʼu fakafiafia ʼaē ʼe fakatupu kovi. (Efe. 5:15, 16; Pes. 11:5) Pea tatau aipē mo kapau ko he fakafiafia ʼe mole kovi kiā tātou, kae ʼi te agamāhani ko te fakakauga kiā nātou ʼaē ʼe mole ko he kau Fakamoʼoni pea mo tanatou ʼu fakaneke ʼe feala ke fua kovi kiā tātou.—1 Pet. 4:1-4.
ʼE feala ki te kau Kilisitiano ke natou maʼu he ʼu faʼahiga mālōlō pea mo he ʼu fakafiafia ʼe lelei, ke natou toe mālolohi ai ʼi te faʼahi fakasino pea mo fakafīmālie tonatou ʼu fealagia fakakaukau. Tokolahi neʼe natou maʼu he ʼu fua lelei ʼaki tanatou mulimuli ki te ʼu tokoni ʼa te Tohi-Tapu pea mo te ʼu manatu lelei ʼaē ʼe tou maʼu ʼi te ʼu tohi ʼa te kau Fakamoʼoni ʼa Sehova.
ʼI ʼihi temi, ʼe tou fakaafe ai he ʼu kiʼi fāmili ki totatou ʼapi ke tou fakatahitahi faka Kilisitiano ai. Ko ʼihi tehina mo tuagaʼane, ʼe feala ke fakaafe nātou ki he fai ʼohoana peʼe ki he kaitahi pē. (Soa. 2:2) ʼI tona fakahagatonu, ko nātou ʼaē neʼe fai fakaafe ʼi te ʼu fakafiafia ʼaia ʼaē ʼe tonu ke tōkakaga ki te ʼu meʼa ʼaē kā hoko. ʼI tanatou ʼiloʼi ia te faʼahi ʼaia, ʼe mahino ai ki te kau Kilisitiano ʼaē ʼe fakasiosio poto, ʼe tonu ke fakatuʼakoi te kau fakaafe pea mo te loaloaga ʼo te ʼu taʼi fakatahi ʼaia. Kapau ʼe fakaʼaogaʼi ai ia te kava, ʼe tonu anai ke fakaʼaogaʼi fakapotopoto. (Filp. 4:5) Kapau ko meʼa fuli ʼe fai ke liliu ia te ʼu taʼi fakafiafia faka Kilisitiano ʼaia ke lelei pea mo fakaloto mālohi ʼi te faʼahi fakalaumālie, pea ʼe mole ko te kai mo te ʼinu ʼaē kā faka maʼuhiga anai.
ʼE mahino ia kā kaugamālie fau pea ʼe tonu ke leʼoleʼo lelei. ʼI te kua fakaʼauʼauganoa ʼo te ʼatamai ʼi te taʼi fakafiafia ʼaia, neʼe tupu ai te ʼiʼinu ʼa ʼihi pea mo kakai fakavale, ʼo hoko ai ʼi ʼihi temi mo te ʼu agahala mamafa, ʼo mole kei maʼu ai ia te ʼu aga ʼaē ʼe tuha mo he Kilisitiano.
ʼE lelei ke tou maʼu ia te kalitātē ʼaē ko te tali kāiga. (1 Pet. 4:9) Kā tou fakaafe niʼihi ki totatou ʼapi ki he meʼa kai, ki he ʼinu ʼo he foʼi niu peʼe ki he māʼanu, ʼe tou manatuʼi tuʼumaʼu anai ia te hahaʼi ʼaē ʼe fakaʼofaʼofa ʼi te kōkelekāsio. (Luka 14:12-14) Kapau ʼe fakaafe tātou, ʼe tou muliʼi anai ia te tokoni ʼaē ʼe tuku mai iā Maleko 12:31. ʼE lelei ke tou loto fakafetaʼi tuʼumaʼu ki te ʼofa ʼaē ʼe foaki mai.
ʼE fakafiafia ia te kau Kilisitiano ʼi te lahi ʼo te ʼu meʼa ʼofa ʼaē ʼe haʼu mai te ʼAtua, heʼe natou ʼiloʼi, ʼe natou lava ‘kakai, pea mo ʼiʼinu, pea mo mamata ki te lelei ʼo tanatou gāue kinakina kātoa.’ (Tnk. 3:12, 13) Kapau ʼe natou tōkakaga ki te ʼu faʼahi ʼaia, pea mo ʼihi atu faʼahi, ke fai tuʼumaʼu moʼo faka kolōliaʼi ia te ʼAtua, ʼe ko nātou ʼaē neʼe fai fakaafe pea mo te kau fakaafe, kā natou manatuʼi tanatou ʼu fakatahitahi ʼaia, ʼe mole natou fakahemala anai kae ʼe natou fiafia heʼe neʼe natou mālolohi ai ʼi te faʼahi fakalaumālie.
TE ʼU GĀUE ʼI TE FALEAKO
ʼE maʼu e te ʼu fānau ʼa te kau Fakamoʼoni ʼa Sehova ia he ʼu fua lelei mai te ʼu meʼa ʼaē ʼe natou akoʼi ʼi te ʼu kalasi liliki. ʼI tonatou temi ako, ʼe tonu ke natou popoto ʼi te lautohi pea mo te faitohi. Ko ʼihi faʼahi, ʼe vakaʼi ʼi te ʼu kalasi liliki pea mo lalahi, ʼe toe ʼaoga ki te kau tūpulaga moʼo fakahoko ia tanatou ʼu fakatuʼutuʼu fakalaumālie. ʼI tonatou temi ako, ʼe faiga mālohi ia te kau tūpulaga ke natou ‘manatuʼi tonatou Tupuʼaga’ pea mo fakamuʼamuʼa ʼi tonatou maʼuli ia te ʼu gāue fakalaumālie.—Tnk. 12:1.
Kapau ko koe ko he tūpulaga Kilisitiano kei ke ako, ʼe tonu anai ke ke nofo tokaga. ʼE mole tonu anai ke ke fakakauga ki te tamaliki ʼo te mālama mokā natou fai he ʼu aga ʼe hā ai ʼe heʼe fakatātāʼofi ia tanatou agatuʼu. (2 Tim. 3:1, 2) ʼI te ʼu faʼahiga ʼaluʼaga ʼaia, ʼe lahi te ʼu koga ʼe feala ke ke fai mōʼou haofaki mai te ʼu fakaneke ʼa te mālama. ʼE mole lītuʼa ia Sehova ki he tahi iā tātou mokā tou tuʼutāmakiʼia. (Pes. 23:4; 91:1, 2) Koia, fakaʼaogaʼi ia te ʼu faigamālie fuli ʼaē ʼe tuku atu e Sehova, koteʼuhi ʼe natou haofaki anai koe.—Pes. 23:5.
Kapau ʼe natou fia nonofo mamaʼo mai te mālama lolotoga te temi ʼaē ʼe kei natou ako ai, ʼe tonu anai ke tōkakaga ia te kau tūpulaga ʼaē kua Fakamoʼoni kiā Sehova ki te ʼu tuʼutāmaki ʼaē ʼe pipiki ki te ʼu gāue ʼi tuʼa atu ʼo te faleako. ʼE lagi ko tou ʼu kaugā ako pea mo tau ʼu faiako ʼe mole natou mahino tuʼumaʼu ki tau mole fia kau ki te ʼu gāue ʼaia. Kae, ko te meʼa ʼaē ʼe maʼuhiga ko tau fakafiafiaʼi te ʼAtua. Pea ki te faʼahi ʼaia, ʼe tonu ke ke fakaʼaogaʼi ia tou leʼo ʼo loto ʼaē neʼe akoʼi ʼaki te Tohi-Tapu pea mo ke taupau maʼu ia te tonu ʼaē neʼe ke toʼo ke ʼaua naʼa ke tō ki te manatu fakataupiepie ʼo te mālama ʼaenī peʼe mo kau ki te ʼu gāue faka puleʼaga ʼaē ʼe fakafeagai ki te ʼu pelesepeto faka Tohi-Tapu. (Kal. 5:19, 26) Kapau ʼi tou ʼuhiga tūpulaga, ʼe ke fakalogo ki te ʼu tokoni faka Tohi-Tapu ʼaē ʼe foaki atu ʼe tau ʼu mātuʼa, ʼaē ʼe pipiki ki te ʼAtua, pea mo ke leleiʼia ia te ʼu fakakauga lelei pea mo te ako ʼaē ʼe foaki atu e te kōkelekāsio, ʼaki ia te ʼu faʼahi ʼaia, ʼe faigafua anai kiā koe hau mulimuli ki te ʼu lēkula faitotonu ʼa Sehova.
TE GĀUE PEA MO TE ʼU FELŌGOI PEA MO ʼIHI
ʼI te Tohi-Tapu, ʼe fakamaʼua ki te ʼu pule fāmili ke natou tōkakaga ki te ʼu meʼa ʼaē ʼe ʼaoga ki tonatou ʼu loto fale. (1 Tim. 5:8) Kae ʼi tonatou ʼuhiga minisi Kilisitiano, ʼe mahino kiā nātou ʼe tonu ke natou fakamuʼamuʼa tāfito ia te ʼu gāue ʼo te Puleʼaga ʼi tanatou ʼu gāue faka mālama. (Mat. 6:33; Loma 11:13) ʼAki ia tanatou pipiki ki te ʼAtua pea mo tanatou maʼuli faka feʼauga ʼi te meʼa kai pea mo te meʼa lāofi, ʼe mole natou taʼomia ʼi te ʼu tuʼania pea mo te ʼu hele ʼaē ʼe maʼu ʼi te mālama fia maʼu koloa ʼaenī.—1 Tim. 6:6-10.
ʼO mole gata ʼaki pē te ʼu pule fāmili kae ko te kau Kilisitiano fuli ʼaē kua foaki tonatou maʼuli ki te ʼAtua, pea mo ʼaoga kiā nātou hanatou gāue, ʼe tonu ke natou taupau maʼu ʼi tonatou ʼatamai ia te ʼu pelesepeto faka Tohi-Tapu. Ko tatatou gāue fakahagatonu, ʼe ko tatatou fakafisi ki te ʼu gāue ʼaē ʼe fakafeagai ki te lao ʼa te ʼAtua pea mo ʼaē ʼo te fenua. (Loma 13:1, 2; 1 Ko. 6:9, 10) Tahi ʼaē faʼahi, ʼe ʼaoga ke tou mahino tuʼumaʼu ki te ʼu tuʼutāmaki ʼo te ʼu fakakauga kovi. ʼI totatou ʼuhiga tagata sōlia ʼa Kilisito, ʼe mole tou kau anai ki he ʼu gāue fai koloa ʼe fakafeagai ki te ʼu pelesepeto faka Kilisitiano peʼe fakatupu tuʼutāmaki ki totatou maʼuli fakalaumālie. (2 Tim. 2:4) Tou toe fakamamaʼo foki mai iā meʼa ʼo “Papiloni Lahi” ia te fili fakalotu ʼo te ʼAtua.—Fakh. 18:2, 4; 2 Ko. 6:14-17.
Kapau ʼe tou mulimuli ki te ʼu lēkula faitotonu ʼa te ʼAtua, ʼe mole tou fakatahi pē anai mo ʼotatou tehina ʼuhi ke tou fakatuputupu totatou ʼu koloa takitokotahi pe ko te ʼu koloa ʼo ʼihi atu. ʼI te temi ʼaē ʼe tou felāveʼi ai mo totatou ʼu tehina ʼi te ʼu fono ʼo te kōkelekāsio, peʼe ʼi he ʼu fakatahi faka silikō peʼe ʼi he ʼu fakatahi faka tisitilike, ʼuhi pē ke tou tauhi kiā Sehova, ke tou kakai ki tona laupapa fakalaumālie pea mo tou fefakaloto mālohiʼaki. (Loma 1:11, 12; Hep. 10:24, 25) ʼE tonu ke tou haga taupau ia te maʼuhiga fakalaumālie ʼo te ʼu fakatahi ʼaia.
TOU TAUPAU IA TE LOGOTAHI FAKA KILISITIANO
Ko te ʼu lēkula faitotonu ʼaē neʼe foaki e Sehova ki tana ʼu kaugana, neʼe fakamaʼua kiā nātou ke natou ‘taupau ia te logotahi ʼo te ʼatamai ʼi te noʼo ʼo te tokalelei.’ (Efe. 4:1-3) Koia ʼe mole tou kumi pē ia te lelei ʼaē kiā tātou totonu, kae ʼe tou tahi faiga anai ke tou fai ia te meʼa ʼaē ʼe lelei ki ʼihi. ʼE mahino papau ia, ko te faʼahiga manatu ʼaia neʼe ke fakatokagaʼi ʼi tau fakatahi ʼaē ki te kōkelekāsio. Tatau aipē ia te kehekehe ʼo ʼotatou lanu mo totatou ʼuhiga faka puleʼaga peʼe faka sōsiale, te ʼaluʼaga ʼo totatou maʼuli peʼe ko te faʼahiga ako ʼaē neʼe tou maʼu, ʼe tou fakalogo fuli ki te ʼu lēkula faitotonu. Māʼia mo te hahaʼi ʼo te mālama, ʼe natou fakatokagaʼi ia te makehe ʼo te aga ʼo te hahaʼi ʼa Sehova.—1 Pet. 2:12.
ʼO ʼuhiga mo te fakatafitoʼaga ʼo tatatou logotahi, neʼe tohi fēnei e te ʼapositolo ko Paulo: “E ko he sino e tahi mo he Laumalie e tahi, pea hage ko toutou pauiʼi e [tokotou] vokasio ki he falala e tahi. Ko te Aliki e tahi, ko te tui e tahi, ko te papitema e tahi. Ko te Atua e tahi pea ko te Tamai a te meafuape, e maoluga i te meafuape, mo gaue aki te meafuape pea e afio i te meafuape.” (Efe. 4:4-6, Tauhi Foou) ʼE ko he faʼahi ʼe tonu ai ke tou logotahi ʼi tatatou mahino ki te ʼu akonaki tāfito pea mo ako faka Tohi-Tapu loloto, ʼaki ia tatatou fakalogo ki te finegalo pea mo te pule faʼitaliha ʼo Sehova! ʼE mahino ia, neʼe foaki e Sehova ki tana ʼu kaugana ia te lea maʼa ʼo te moʼoni, ʼo faka fealagia ai kiā nātou ke natou fetokoniʼaki ʼi te gāue.—Sofo. 3:9.
ʼE mahino ia ko te logotahi pea mo te tokalelei ʼaē ʼe maʼu ʼi te kōkelekāsio iā ʼaho nei, ʼe ko he matapuna fakaloto fiafia kiā nātou fuli ʼaē ʼe tauhi kiā Sehova. Neʼe tou fakatokagaʼi ia te fakahoko ʼo te fakapapau ʼa Sehova ʼaenī: “ ʼE au fakatahiʼi anai nātou ke natou logotahi ohagē ko he kiʼi faga manu ʼi he lotoʼā.” (Mik. 2:12) ʼE tou fia taupau anai ia te taʼi logotahi pea mo tokalelei ʼaia, ʼo tou māʼuʼuli ʼi te ʼaho fuli ohagē ko ni hahaʼi māʼoniʼoni, ʼo tou pipiki maʼu ki te ʼu lēkula faitotonu ʼa Sehova.
Manūʼia ia nātou ʼaē neʼe tali ʼi te kōkelekāsio maʼa ʼa Sehova! Ko te fua ʼo te huafa ʼo Sehova ʼe maʼuhiga age ʼi te ʼu sākilifisio fuli ʼaē ʼe feala ke tou fai. ʼAki tatatou taupau ia tatatou ʼu felōgoi maʼuhiga pea mo Sehova, ʼe tou faiga anai ke tou pipiki maʼu ki tana ʼu lēkula faitotonu pea mo tou fakaloto mālohiʼi ʼihi ke natou mulimuli kiai.—2 Ko. 3:18.