Kua Nātou Fakatuʼutuʼu Moʼo Fai ʼo Te Finegalo ʼo Sehova
Kāpite 17
Nofo Ovi Ki Te Kautahi ʼa Sehova
NEʼE tohi fēnei e te tisipulo ko Sake: “Kotou fakaovi ki te ʼAtua, pea ʼe fakaovi atu anai kiā koutou.” (Sake 4:8) Koia, ʼe mole māʼoluga peʼe mamaʼo fau ia Sehova ke logo ki te ʼu meʼa ʼaē ʼe tou fia ʼui age logopē totatou heʼe haohaoa. (Gāue 17:27) ʼE fakaovi mai anai kiā tātou mo kapau ʼe tou faiga ke tou fakaovi kiā te ia. Ko te tupuʼaga lā ʼaia, ʼo te maʼua ʼaē ke tou taupau ia he ʼu felōgoi takitokotahi pea mo loloto mo ia, ʼaki he ʼu faikole fakamālotoloto. (Pes. 39:12) ʼE tou toe fakatuputupu anai tatatou felōgoi lelei mo te ʼAtua ʼaki ia te akoʼi liuliuga ʼo tana Folafola, ia te Tohi-Tapu. ʼAki te ʼatamai mālama pea mo he mahino loloto, ʼe tou ako ai ia te ʼiloʼi ʼo Sehova ʼAtua, tana ʼu fakatuʼutuʼu pea mo tona finegalo ʼo ʼuhiga mo tātou. (2 Tim. 3:16, 17) ʼE tou akoʼi anai ia te ʼofa ʼaē kiā Sehova pea mo tou taupau te manavasiʼi ʼaē naʼa tou fakaloto mamahiʼi ia ia.—Pes. 25:14.
Koia ʼe gata ʼaki pē tona ʼAlo, ia Sesu, ʼe feala ai hatatou fakaovi kiā Sehova. (Soa. 17:3; Loma 5:10) ʼE mole feala anai ki he tagata ke ina foaki mai he faʼahiga sio ʼe tāsilo ki te manatu pea mo te ʼu meʼa ʼaē ʼe ʼi te loto ʼo Sehova, gata pē kiā Sesu. Neʼe mahino lelei ki tana Tamai, ʼo ina ʼui fēnei: “ ʼE mole ʼi ai he tahi ʼe ina ʼiloʼi pe ko ai te ʼAlo, gata pē ki te Tamai; pea ʼe mole ʼi ai he tahi ʼe ina ʼiloʼi pe ko ai te Tamai, gata pē ki te ʼAlo, pea mo ia ʼaē ʼe lotolelei te ʼAlo ke ina fakahā ki ai.” (Luka 10:22) Kā tou akoʼi ia te ʼu meʼa ʼaē ʼe fakahā mai ʼi te ʼu Evaselio ʼo ʼuhiga mo te ʼu manatu pea mo te ʼu meʼa ʼaē neʼe logoʼi e Sesu, ʼi tona fakahagatonu ʼe tou akoʼi ai ia te ʼu manatu pea mo te ʼu meʼa ʼaē ʼe logoʼi e Sehova. Ko te ʼatamai mālama ʼaia ʼe ina faka fealagia mai ke tou fakaovi ki totatou ʼAtua.
ʼAki te takitaki ʼa te ʼAlo ʼo te ʼAtua, ʼe tou hikihiki ai ia tatatou faʼahiga felōgoi pea mo Sehova ʼo tou nonofo ovi ki te kautahi fakahāhā, ʼaē ʼi te temi nei ʼe ina akoʼi mai ia te fai ʼo Tona finegalo. Ohagē ko tona ʼui iā Mateo 24:45-47, ko te Pule, ia Sesu Kilisito, neʼe ina fakanofo ia “te tagata kaugana agatonu mo poto” ko tona faka ʼuhiga ko te toe ʼo te kau Kilisitiano fakanofo ʼi te kele, ke natou foaki ia te “meʼa kai ʼi tona temi totonu” ki te loto fale ʼo te tui. Iā ʼaho nei, ʼe foaki mai e te “kaugana” ʼaia ia te meʼa kai fakalaumālie ʼe mahu ʼaki te ʼu tohi ako Tohi-Tapu. ʼAki te ʼu felōgoi makehe ʼaia, ʼe fakaloto mālohiʼi tātou e Sehova ke tou lau ia tana Folafola ʼi te ʼaho fuli, ke tou kau ki te ʼu fono faka Kilisitiano pea mo tou gāue mālohi ʼi te faka mafola ʼo te “logo lelei o te Puleʼaga.” (Mat. 24:14; 28:19, 20; Sos. 1:8; Pes. 1:1-3) ʼE mole tou fia maʼu anai he faʼahiga manatu fakatagata ki te kautahi ʼaia, ʼo feala ai ke galo kiā tātou ko Sehova ʼaē ʼe ina takitaki ia tana kautahi, pea mo tou lītuʼa anai ki te ʼu faiga ʼaē ʼe ina fai moʼo taki ʼo tātou kiā te ia. ʼE tonu ke tou faiga ke tou nonofo ovi ki te kautahi fakahāhā ʼa Sehova pea mo tou fakalogo ki tana takitaki. ʼE tou fakaovi anai ki totatou ʼAtua, ia Sehova, pea ʼe tou mālolohi anai pea mo puipui ia tātou logopē te ʼu ʼahiʼahi.
HE KO’Ē ʼE TUPUTUPU IA TE ʼU ʼAHIʼAHI
ʼE kua fualoa koa hau nofo ʼi te moʼoni? Ki te faʼahi ʼaia, ʼe lagi kua ke mahino ki te faka ʼuhiga ʼo te kātakiʼi ʼo te ʼu ʼahiʼahi ʼaē ʼe fakatupu kovi ki tau agatonu. Kae tatau aipē pe heʼeki faʼa fualoa tau kua mahino kiā Sehova pea mo tau kua kau ki tana hahaʼi, ʼe feala mo koe ke ke fakamoʼoni ʼe fakafeagai ia Satana te Tēvolo ki he tahi pē ʼe fakalogo ki te pule faʼitaliha ʼa Sehova. (2 Tim. 3:12) Kae kapau ʼe kei ke foʼofoʼou peʼe kua ke fualoa ʼi te moʼoni, ʼe mole he ʼuhiga ʼo hau tuʼania peʼe ke lotovaivai, koteʼuhi ʼe tokoni atu anai ia Sehova pea mo ina fakapale ia tau faʼa kātaki ʼo ina haofaki koe pea mo ina foaki atu ia te maʼuli heʼegata.—Hep. 13:5, 6; Fakh. 2:10.
Ko tātou fuli, ʼe tou felāveʼi tāfito anai mo he ʼu ʼahiʼahi faigataʼa ʼi te lolotoga ʼo te ʼu ʼaho fakamuli ʼo te tuʼu ʼa Satana. Talu mai te tau ʼaē neʼe hoko ʼi te lagi ʼi te hili ʼo te fakatuʼu ʼo te Puleʼaga ʼo te ʼAtua ʼi te taʼu 1914, neʼe mole kei fakagafua kiā Satana ke hū ki te ʼu lagi ʼa Sehova, neʼe kua lī ifo ia ki te kele, pea talu mai ai ʼe kei maʼuli fakatahi ai nei mo tana kau ʼāselo agakovi. Talu mai te taʼu ʼaia mo tatatou sisio ki te tuputupu ʼo te ʼu malaʼia, ʼo kau kiai ia te mālohi ʼo te fakatagaʼi ʼo te hahaʼi ʼaē kua foaki ia tonatou maʼuli kiā Sehova ke natou tauhi ki ai, ʼuhi pē ko te ʼita lahi ʼo Satana, pea mo te fakamoʼoni ʼaē ʼe tou māʼuʼuli nei ʼi te ʼu ʼaho fakamuli ʼo tana puleʼi ia te mālama ʼaki ia te agakovi.—Fakh. 12:1-12.
ʼE ʼiloʼi e Satana kua nounou tona temi, pea ʼe fakatupu ʼita kiai ia te faʼahi ʼaia. Pea tahi meʼa, ʼaki te tokoni ʼa tana kau temonio, ʼe ina fai ia meʼa fuli moʼo tāʼofi ia te gāue fai faka mafola pea mo te ako ʼaē ʼe fai e te ʼu kaugana ʼa Sehova, pea mo maumauʼi ia tanatou logotahi. Ko nātou ʼaia, ʼe natou teuteu ki te tau fakalaumālie ʼaē ʼe fakamatalatala iā Efesi 6:12, ohagē ko he “tau, ʼe mole fai ʼo fakafeagai ki te toto pea mo te kakano, kae ʼe fakafeagai ki te ʼu puleʼaga, ʼe fakafeagai ki te kau takitaki, ʼe fakafeagai ki te kau pule ʼo te mālama ʼo te fakapōʼuli, ʼe fakafeagai ki te ʼu mālohi fakalaumālie agakovi ʼaē ʼe nonofo ʼi te ʼu potu ʼo te lagi.” ʼE iku anai ia te tau ʼaia ki te mamahi lahi, ʼaē kua ovi mai. Kapau ʼe tou fia kau kiā nātou ʼaē ʼe mālo, iā tafa ʼo Sehova, ʼe mole tonu ke tou holomuli ʼi tatatou tau, kae ʼe tonu ke tou haga tui ia totatou teu tau fakalaumālie pea mo tou haʼele ki muʼa ʼi te tau ʼaia ʼaki he fia mālo ʼo tou fakafeagai ki te ʼu gāue kovi ʼa te Tēvolo. (Efe. 6:10-17) Koia ʼe ʼaoga ai ke tou faʼa kātaki, ʼo tou haga fakahoko ia te minisitelio ʼaē neʼe foaki mai. Kae koteā koa ia te faʼa kātaki ʼaia, pea ʼe feafeaʼi anai hatatou lava kātakiʼi ia te ʼu ʼahiʼahi?
KE TOU AKO IA TE FAʼA KĀTAKI
Ko te faʼa kātaki ʼe faka ʼuhiga “ki tatatou lava kātakiʼi ia te mamahi, te fakafeagai, peʼe ko te loto hoha.” ʼI te faʼahi fakalaumālie, ʼe faka ʼuhiga ia te faʼahi ʼaia ki takita nofo mālohi ʼi te fai ʼo te meʼa ʼaē ʼe lelei logopē te ʼu faigataʼaʼia, te fakafeagai, te fakataga peʼe ko ʼihi atu ʼu ʼaluʼaga ʼe ina fakamaliu tātou mai tatatou agatonu ki te ʼAtua. Ko te faʼa kātaki faka Kilisitiano ʼe ko he meʼa ʼe tonu ke tou ako, pea ʼe ʼaoga kiai ia he temi loaloaga. ʼE ʼāʼāsili anai tatatou faʼa kātaki mo kapau ʼe tou tuputupu ʼi te faʼahi fakalaumālie. Kapau neʼe tou kātakiʼi ia te ʼu kiʼi ʼahiʼahi ʼo tatatou tui pea mo tou pipiki maʼu ki tatatou fakapapau ʼaē ki te ʼAtua ʼi tatatou kei foʼofoʼou, ʼe tou liliu anai ʼo mālohi, ʼo feala ai ke tou kātakiʼi ia te ʼu ʼahiʼahi faigataʼa ʼaē ʼe tou ʼiloʼi ʼe hoko mai anai. ʼE mole tou fakatuʼutuʼu anai ke tou nonofo mālolohi ʼi te tui mokā hoki hoko mai pē te ʼu ʼahiʼahi lalahi. ʼE maʼua ke tou fai fakatomuʼa ia te fakatuʼutuʼu ʼaia ʼi muʼa ʼo te hoko mai ʼo te faʼahi ʼaia. Neʼe fakahā mai e te ʼapositolo ko Petelo ʼe tonu ke tou maʼu ia te faʼa kātaki ohagē pē ko tatatou maʼu ia ʼihi atu ʼu kalitātē fakaʼatua. ʼE tou lau fēnei: “ ʼAki takotou lagolago ʼaē ʼo fai he ʼu faiga mālohi, fakatahiʼi ki takotou tui te vilitūtē, ki takotou vilitūtē te ʼatamai mālama, ki tokotou ʼatamai mālama te loto lolomi, ki takotou loto lolomi te faʼa kātaki, ki takotou faʼa kātaki te aga fakalotu, pea ki takotou aga fakalotu te agalelei fakatautehina, ki takotou agalelei fakatautehina te ʼofa.”—2 Pet. 1:5-7; 1 Tim. 6:11.
Neʼe fakahā mai e Sake ia te maʼuhiga ʼo te fakatuputupu ʼo te faʼa kātaki, ʼo ina tohi fēnei: “Kotou faka ʼuhigaʼi te faʼahi ʼaia ohagē ko he fiafia kātoa, ʼoku ʼu tehina, mokā kotou felāveʼi mo he ʼu faʼahiga ʼahiʼahi kehekehe, ʼi takotou ʼiloʼi ʼaē ko te maʼuhiga ʼo takotou tui ʼaē kua ʼahiʼahiʼi ʼe ina fakatupu ia te faʼa kātaki. Kae ke fai e te faʼa kātaki hana gāue kātoa, ke feala hakotou kātoa pea mo haohaoa ia faʼahi fuli, ʼo mole puli iā koutou he meʼa.” (Sake 1:2-4) ʼE ʼui e Sake ʼe tonu ki te kau Kilisitiano ke natou tali ʼaki he fiafia ia te ʼu ʼahiʼahi, koteʼuhi ʼe tokoni anai kiā nātou ke natou fakatuputupu ia te faʼa kātaki. ʼE fēia koa tau faʼahiga sio ʼo ʼuhiga mo te ʼaluʼaga ʼaia? ʼI te temi ʼaia neʼe fakahā ai e Sake ʼe tonu ki te faʼa kātaki ke ina fai he gāue ke feala hatatou fakahoko kātoa ia totatou ʼuhiga Kilisitiano pea mo fai ia meʼa fuli ʼe leleiʼia e te ʼAtua. ʼIo, ʼaki te tuputupu ʼo tatatou faʼa kātaki ʼi te ʼaho fuli, ʼe tou lava kātakiʼi ai ia te ʼu fakafeagai pea mo te ʼu ʼahiʼahi lalahi pea mo liliki. ʼE foaki mai e te faʼa kātaki ia he tahi age ʼu kalitātē ʼe lelei pea mo ʼaoga kiā tātou. Kapau ʼe tou fakatafa mai te ʼu ʼahiʼahi liliki, ʼe feala anai ke mole tou lava tauʼi ia te ʼu ʼahiʼahi ʼaē ʼe lalahi age.—Luka 16:10.
ʼE leleiʼia e Sehova ia tatatou faʼa kātaki, ʼe ina uga anai ia ia ke ina foaki mai ia te fakapale ʼaē ko te maʼuli heʼegata. ʼE hoko atu fēnei e Sake: “Manūʼia te tagata ʼaē ʼe ina faʼa kātakiʼi te ʼahiʼahi, koteʼuhi ʼi tana liliu ko he tagata kua leleiʼia, ʼe ina maʼu anai te kolona ʼo te maʼuli ʼaē neʼe fakapapauʼi e Sehova kiā nātou ʼe haga ʼofa kiā te ia.” (Sake 1:12) Koia, ʼe ko tatatou manatuʼi ia te maʼuli ʼaē ʼe feala ai ke tou kātakiʼi te ʼu ʼahiʼahi. Kapau ʼe mole tou maʼu ia te faʼa kātaki, ʼe mole tou nonofo fualoa anai ʼi te moʼoni. Kapau ʼe tou tō ki te ʼu fakaneke ʼo te mālama ʼaenī, ʼe ina uga anai tātou ke tou toe liliu mai kiā te ia. Kapau ʼe mole tou maʼu ia te faʼa kātaki, ʼe mole tou toe maʼu anai ia te laumālie ʼo Sehova, pea ʼe mole tou toe fakatupu anai tona fua ʼi totatou maʼuli.
Kapau ʼe tou fia haga kātakiʼi ia te ʼu ʼahiʼahi ʼi te ʼu ʼaho faigataʼa ʼaenī, pea ʼe tonu ke tou maʼu ia he manatu ʼe lelei ʼo ʼuhiga mo te ʼu mamahi ʼaē ʼe tou tau mo ia, koteʼuhi ko tātou ko te kau Kilisitiano. Manatuʼi neʼe tohi fēnei e Sake: “Kotou faka ʼuhigaʼi te faʼahi ʼaia ohagē ko te fiafia kātoa.” ʼE lagi mole faigafua, koteʼuhi ʼe feala ke faka ʼuhiga ia te ʼu ʼahiʼahi ki he ʼu mamahi ʼi te faʼahi fakasino peʼe ʼi te ʼatamai, kae ʼaua naʼa galo kiā koe ʼe feala ke tuʼutāmakiʼia tou maʼuli ʼi te kā haʼu. ʼE faigafua anai hatatou mahino peʼe feafeaʼi hatatou fiafia ʼi te ʼu mamahi ʼaki hatatou tokagaʼi ia te ʼu meʼa ʼaē neʼe hoko ki te kau ʼapositolo. ʼE fakamatala ia te faʼahi ʼaia ʼi te tohi ʼo Gāue, ʼo ʼui fēnei: “Neʼe natou ʼaumai ia te kau ʼapositolo, ʼo natou tā, pea mo fakatotonu age kiā nātou ke natou fakagata ia tanatou palalau ki te huafa ʼo Sesu pea mo tuku age nātou. Ko nātou ʼaia neʼe natou mavae ʼi muʼa ʼo te Sanetualio, ʼo natou fakafiafia he neʼe tāu mo nātou tonatou fakalainoaʼi ʼuhi ko tona huafa.” (Gāue 5:40, 41) Neʼe mahino kiai te kau ʼapositolo, ko tonatou ʼu mamahi ʼe ko he fakamoʼoni ʼaia neʼe natou fakalogo ki te fakatotonu ʼa Sesu pea ʼe leleiʼia ia nātou e Sehova. ʼI te ʼu taʼu ki muli age, ʼi tana tohi ia tana ʼuluaki tohi ʼaki te takitaki fakaʼatua, neʼe talanoa ai ia Petelo ki te maʼuhiga ʼo te ʼu mamahi ʼaē ʼe tou tau mo ia ʼuhi ko te faitotonu. Haga ʼo lau tana ʼu palalau iā 1 Petelo 4:12-16.
Tou vakaʼi ia te tahi age ʼaluʼaga neʼe felāveʼi mo Paulo pea mo Silasi. Lolotoga tanā gāue faka misionea ʼi Filipe, neʼe puke ia nāua, pea mo tukugākoviʼi ia nāua ʼe nā fakatupu tokakovi ki te kolo pea mo palalau ki te ʼu agaʼi fenua neʼe mole fakagafua e te lao. ʼUhi ko te faʼahi ʼaia, neʼe kovi ʼaupitō tonā tā pea mo pilisoniʼi ai ia nāua. ʼE fakahā mai ʼi te Tohi-Tapu, ʼi tanā kei ʼi te fale pilisoni, neʼe mole heʼeki faitoʼo tonā ʼu lavea, pea “ ʼi te vaelua mālie ʼo te pōʼuli, ko Paulo pea mo Silasi, neʼe nā faikole pea mo hiva fakavikiviki ki te ʼAtua; ʼeī, ko te kau pilisoni neʼe nātou logoʼi tanā hiva.” (Gāue 16:16-25) Neʼe mole faka ʼuhiga pē e Paulo pea mo tona kaugā gāue ia te ʼu mamahi ʼaē neʼe nā tali maʼa Kilisito ohagē ko he fakamoʼoni ʼo tanā agatonu iā muʼa ʼo te ʼAtua pea mo te tagata, kae ʼe ko he fealagia ke nā tuku ia he fakamoʼoni kiā nātou ʼaē ʼe lotolelei ke natou fakalogo ki te logo lelei. Koteʼuhi neʼe tuʼutāmakiʼia ia te maʼuli ʼo ʼihi atu. Ki muli age, neʼe fakalogo kiai ia te tagata leʼo ʼo te fale pilisoni mo tona kaugā ʼapi pea natou liliu ai ko he ʼu tisipulo. (Gāue 16:26-34) Neʼe falala ia Paulo pea mo Silasi kiā Sehova, neʼe nā toe falala ki tona mālohi pea mo tona loto ʼaē ke tokoni age kiā nāua ʼi tonā ʼu mamahi. Neʼe mole tō hala tanā falala.
ʼO toe fēia pē iā ʼaho nei, ʼe foaki mai e Sehova ia meʼa fuli ʼe ʼaoga kiā tātou ke tou nonofo mālolohi lolotoga te ʼu ʼahiʼahi, koteʼuhi ʼe ina loto ke tou kātakiʼi ia te ʼu ʼahiʼahi ʼaia. Neʼe ina foaki mai ia tana Folafola ke feala hatatou maʼu ia te ʼatamai mālama ʼo ʼuhiga mo tana ʼu fakatuʼutuʼu. Ko te ʼatamai mālama ʼaia ʼe ina fakamālohiʼi tatatou tui. ʼE feala ke tou fakatahitahi mo te ʼu tehina mo tuagaʼane, ʼo akoʼi ia te Folafola ʼa te ʼAtua pea mo fakahoko ia he tauhi taputapu. ʼE tou toe maʼu foki mo te pilivilēsio ʼaē ko te taupau ʼo he ʼu felōgoi fakahagatonu pea mo Sehova totonu ʼi te faikole. ʼE fakalogo ia Sehova ki tatatou ʼu fakavikiviki pea mo tatatou ʼu faikole fakamālotoloto ʼaē ʼe tou kole ai ke tokoni mai ke tou nonofo maʼa ʼi ʼona muʼa. (Filp. 4:13) ʼAua naʼa galo kiā tātou ia te mālohi ʼaē ʼe tou maʼu ʼi tatatou taupau ia te ʼamanaki ʼo ʼuhiga mo tana ʼu fakapapau.—Mat. 24:13; Fakh. 21:1-4.
TOU KĀTAKIʼI TE ʼU ʼAHIʼAHI KEHEKEHE
Ko te ʼu ʼahiʼahi ʼaē ʼe tonu ke tou tauʼi iā ʼaho nei ʼe tatau mo ʼaē neʼe hoko ki te kau ʼuluaki tisipulo ʼa Sesu Kilisito. ʼI totatou temi, ʼe felāveʼi ia te kau Fakamoʼoni ʼa Sehova mo te ʼu laukovi pea mo te gaohi koviʼi ʼo nātou ʼuhi pē ko te mahino hala ʼa te kau fakafeagai. Ohagē pē ko te temi ʼo te kau ʼapositolo, ʼe lahi te ʼu fakafeagai ʼuhi pē ko te ʼu fakaneke ʼa te lotu ʼaē ʼe fai fakamālohi ohagē ko te ʼu akonaki hala pea mo te ʼu gāue kovi ʼaē neʼe fakahā ʼaki ia te tala ʼo te logo lelei ʼo te Puleʼaga. (Gāue 17:5-9, 13) ʼI ʼihi temi, neʼe maʼu e te ʼu kaugana ʼa Sehova ia he faʼahiga fīmālie ʼi tanatou kole ke foaki age e te puleʼaga faka politike ia tonatou ʼu faka fealagia ʼaē ʼe tuʼu ʼi te lao. (Gāue 22:25; 25:11) Kae ʼe feala foki ki te kau takitaki ke natou tapuʼi ia tatatou gāue pea mo faiga fakamālotoloto ke natou fakagata ia totatou minisitelio faka Kilisitiano. (Pes. 2:1-3) Kā hoko ia te faʼahi ʼaia, ʼe tou muliʼi ia te faʼifaʼitaki ʼo te agatonu ʼa te kau ʼapositolo pea mo tou haga “fakalogo ki te ʼAtua, ohagē ko he fakalogo ki he pule, ʼi he fakalogo ia ki te tagata.”—Gāue 5:29.
ʼUhi ko te tuputupu ʼo te tauhi fakavale ki te fenua ʼi te kele kātoa, ʼe lahi anai ia te fakaneke ʼe fai ki te kau fai faka mafola ʼo te logo lelei ke natou liʼaki ia tanatou gāue faka minisitelio ʼaē neʼe tuku age e te ʼAtua kiā nātou. ʼE mahino lahi age ia te ʼu kaugana ʼa te ʼAtua ki te fakatokaga ʼaē ʼe tuʼu iā Fakahā 14:9-12 ʼo ʼuhiga mo te tauhi ki “te manu fekai pea mo tona fakatātā.” ʼE tou tāʼofi ia te maʼuhiga ʼo te ʼu palalau ʼa Soane: “ ʼE ko henī ʼaē ʼe tonu ke faʼa kātaki ai ia te kau māʼoniʼoni, ia nātou ʼaē ʼe natou mulimuli ki te ʼu fakatotonu ʼa te ʼAtua pea mo te tui ʼa Sesu.”
ʼE feala ke faigataʼa ia tau haga fai ia tau tauhi faka Kilisitiano ʼuhi pē ko te tau, te ʼu fetogi, te ʼu fakataga fakahagatonu peʼe ko te ʼu tapu ʼaē ʼe fai e te kau takitaki. ʼE feala ki te ʼu ʼaluʼaga ʼaia ke ina tāʼofi ia te fai ʼo te ʼu fono ʼo te kōkelekāsio. Peʼe lagi fakagata fakatemi anai ia te ʼu felōgoi mo te filiale pea mo te ʼu ʼaʼahi ʼa te ʼu taupau ʼo te silikō. ʼE lagi mole kei feala anai hau maʼu he ʼu tohi foʼou. Koteā ʼaē ʼe tonu anai ke ke fai?
Ko te tali: Ke ke faiga mo tou mālohi kātoa ke ke fakahoko ia te tauhi maʼa ʼi te ʼu ʼaluʼaga faigataʼa ʼaia. ʼE tonu ke ke faʼafai ʼi tau ako tokotahi. ʼI te agamāhani ʼe feala ki he kiʼi kūtuga ke natou fakatahitahi ʼo akoʼi te Tohi-Tapu ʼi he loto fale. ʼE feala anai ke tou fakaʼaogaʼi ʼi tatatou ʼu kiʼi fakatahi ʼaia ia te Tohi-Tapu pea mo te ʼu tohi neʼe kua vakaʼi ʼi muʼa atu. ʼAua naʼa ke hoha pea mo ke tuʼania. ʼI te agamāhani, ʼe feala anai ki te Kolesi Pule ke ina maʼu he tonu fakavilivili ke felōgoi mo te ʼu tehina takitaki.
Kae tatau aipē mo kapau ʼe ke nofo mamaʼo mai tou ʼu tehina Kilisitiano, ʼaua naʼa galo kiā koe ʼe mole ke mamaʼo mai ia Sehova peʼe ko tona ʼAlo, ia Sesu Kilisito. ʼE feala ke ke taupau ia he ʼamanaki ʼe mālohi. ʼE feala tuʼumaʼu pē kiā Sehova ke logo ki tau ʼu faikole pea mo fakaloto mālohiʼi koe ʼaki ia tona laumālie. Kumi ia tana takitaki. Manatuʼi ʼe ko koe ko te kaugana ʼa Sehova pea mo te tisipulo ʼa Sesu Kilisito, koia kā maʼu pē hou fealagia, tuku ia he fakamoʼoni ki ʼihi atu. ʼE tapuakina anai e Sehova ia tau ʼu faiga, pea ʼe lagi feala pe ko ai ʼe ina ʼiloʼi ʼi he kiʼi temi siʼi ke fakatahi anai mo ʼihi kiā te koe ʼi te tauhi moʼoni.—Gāue 4:13-31; 5:27-42; Filp. 1:27-30; 4:6, 7; 2 Tim. 4:16-18.
Tatau aipē, peʼe fakatagaʼi koe ʼo kākusia ai mo te lau ke matehi koe, ohagē ko te faʼifaʼitaki ʼa te kau ʼapositolo pea mo ʼihi atu kau Kilisitiano, tuku ia tau falala ki “te ʼAtua ʼaē ʼe ina fakatuʼuake ia te kau mate.” (2 Ko. 1:8-10) Ko tau tui ki te fakapapau ʼo ʼuhiga mo te fakatuʼuake ʼe tokoni atu anai ke ke faʼa kātaki logopē te ʼu fakafeagai ʼaē ʼe fefeka ʼaupitō. (Luka 21:19) Neʼe tuku mai e Sesu Kilisito ia te faʼifaʼitaki, neʼe ina ʼiloʼi ʼaki tana agatonu ʼi te ʼahiʼahi, ʼe ina tuku anai ki tana kau tisipulo ia te mālohi moʼo kātakiʼi ia te ʼu fihifihia. ʼE feala kiā koe, ke ke fakaloto mālohiʼi tou ʼu tehina ʼaki hau fai fēia.—Soa. 16:33; Hep. 12:2, 3; 1 Pet. 2:21.
ʼO mole gata ʼaki pē ia te fakataga peʼe ko te fakafeagai ʼi totatou minisitelio, ʼe lagi tonu anai ke ke kātakiʼi he tahi age ʼu ʼaluʼaga faigataʼa. Logolā tatatou maʼu ia te fiafia ʼi te ʼāteaina ʼo tatatou fai faka mafola, kae ʼe ʼi ai ʼihi kua natou lotovaivai pea mo natou fakagata ia tanatou tauhi kiā Sehova ʼuhi pē ko te lotonoa ʼo te hahaʼi ʼo tona telituale. Ko ʼihi ʼe tonu ke natou tauʼi ia te mahaki ʼi te faʼahi fakasino pea mo te fakakaukau peʼe ko tanatou kātakiʼi ia te ʼu tuʼakoi ʼo te pelepelegesi ʼo te tagata. Neʼe kātakiʼi e te ʼapositolo ko Paulo ia te ʼahiʼahi ʼaē neʼe fakatupu kovi ki tana selevisi, peʼe lagi fakapiko kiai ʼi ʼihi temi. (2 Ko. 12:7) ʼO toe fēia foki mo Epafolotito, te Kilisitiano ʼo te ʼuluaki sēkulō, mai Filipe, neʼe “lotovaivai ʼaupitō heʼe neʼe kotou fagono neʼe mahaki.” (Filp. 2:25-27) ʼE feala ke faigataʼa ia tatatou kātakiʼi ia te ʼu fihifihia tāfito ʼo totatou ʼuhiga heʼe haohaoa pea mo ʼaē ʼo ʼihi atu. ʼE feala ʼaki totatou ʼuhiga heʼe haohaoa ke tupu ai he ʼu fihifihia ʼi te lotolotoiga ʼo te kau Kilisitiano. Kae ʼe feala ki te ʼu fihifihia ʼaia ke kātakiʼi peʼe tali ʼe nātou ʼaē ʼe mulimuli ki te ʼu tokoni o te Folafola ʼa Sehova.—Esk. 2:3-5; 1 Ko. 9:27; 13:8; Kol. 3:12-14; 1 Pet.4:8.
KE MĀLOHI TATATOU HAGA NOFO AGATONU
ʼE tonu ke tou haga pipiki maʼu kiā ia ʼaē neʼe fakanofo e Sehova ko he Pule ʼo te kōkelekāsio, ia Sesu Kilisito. (Kol. 2:18, 19) ʼE ʼaoga ke tou gāue fakahagatonu mo “te tagata kaugana agatonu mo poto” pea mo nātou neʼe hinoʼi ko he ʼu taupau. (Hep. 13:7, 17) Kapau ʼe tou mulimuli lelei ki te ʼu fakatuʼutuʼu faka teokalatike pea kapau ʼe tou gāue fakatahi mo nātou ʼaē ʼe natou takitaki ia tātou, ʼe tou kātoa lelei anai ki te fai ʼo te finegalo ʼo Sehova. ʼE ʼaoga anai ke tou fakaʼaogaʼi lelei ia te pilivilēsio ʼaē ko te faikole. Manatuʼi, ʼe mole feala anai ki te ʼu kaupā ʼo te fale pilisoni peʼe ko te nofo fakamaʼu tokotahi ke ina tāʼofi ia tatatou ʼu felōgoi mo tatatou Tamai manavaʼofa ʼaē ʼi selō, peʼe ina tāʼofi ia tatatou logotahi mo totatou ʼu tehina Kilisitiano.
ʼAki he lotomālohi pea mo he faʼa kātaki, tou fai ia meʼa fuli ke fakahoko ia te maʼua ʼaē neʼe foaki mai, te fai faka mafola, pea ke tou haga kātaki ʼi te gāue ʼaē neʼe tuku e Sesu Kilisito ki tana kau tisipulo fuli ʼi te hili ʼo tona fakatuʼuake: “Kotou ʼolo pea ke kotou fai ni ʼu tisipulo ʼi te hahaʼi ʹo te ʼu fenua fuli pē, ʼo papitemaʼi ia nātou ʼi te huafa ʼo te Tamai pea mo te ʼAlo pea mo te laumālie māʼoniʼoni, ʼo kotou akoʼi ia nātou ke natou mulimuli ki te ʼu meʼa fuli pē ʼaē neʼe au fakatotonu atu kiā koutou.” (Mat. 28:19, 20) Ohagē ko Sesu, tou kātakiʼi te ʼu ʼahiʼahi pea mo tou taupau ia tatatou faʼahiga sio ki te ʼamanaki ki te Puleʼaga pea mo te maʼuli heʼegata. (Hep. 12:2) ʼI totatou ʼuhiga tisipulo ʼa Kilisito kua papitema, ʼe tou maʼu ia te pilivilēsio ʼaē ko te kau ki te fakahoko ʼo te lea faka polofetā ʼaē neʼe talanoa kiai ʼo ʼuhiga mo “te fakaʼosi ʼo te tuʼu ʼo te ʼu faʼahiga meʼa ʼaenī.” ʼE ʼui fēnei ai: “Pea ko te logo lelei ʼaenī ʼo te puleʼaga ʼe faka mafola anai ʹi te kele kātoa, ko he meʼa fakamoʼoni ia ki te ʼu puleʼaga kātoa; pea hoko mai ai leva te fakaʼosi.” (Mat. 24:3, 14) Kapau, ʼaki totatou loto kātoa, ʼe tou mulimuli ʼo fakahoko lelei ia te gāue ʼaia ʼi te temi nei, ʼe tou maʼu anai te fiafia ʼi hatatou māʼuʼuli ʼo heʼegata ʼi te mālama foʼou ʼo te faitotonu ʼaē kā fakatuʼu e Sehova!