Ko He Tokoni Ki Te ʼu Fāmili

1. Neʼe feafeaʼi tona fua lelei ki te ʼu fāmili Iselaele tanatou mulimuli ki te Sāpato ʼi te vāhaʼa fuli?

¹ Ko te ʼaho ʼo te Sāpato neʼe ko he fakatuʼutuʼu ʼofa mai ia Sehova pea neʼe fua lelei ia ki te ʼu fāmili. Neʼe mālōlō ia te kau Iselaele ʼi tanatou ʼu gāue pea neʼe maʼu ai tonatou temi ke natou fakakaukauʼi te agalelei ʼo Sehova, pea mo tanatou ʼu felōgoi mo ia. Neʼe feala ke fakaʼaogaʼi e te ʼu mātuʼa te faigamālie ʼaia moʼo akoʼi te Lao ki te loto ʼo tanatou fānau. (Teu. 6:6, 7) ʼAki te fakatuʼutuʼu ʼaē ko te Sāpato, neʼe maʼu ai e te hahaʼi ʼa Sehova ʼi te vāhaʼa fuli he temi ke natou tōkakaga tāfito ki tanatou tauhi.

2. Koteā te ako ʼo ʼuhiga mo Sehova ʼe tou tāʼofi mai te lao ʼo te Sāpato?

² ʼE moʼoni ia, ʼe mole kei fakamaʼua e Sehova ke muliʼi e te ʼu fāmili ia te Sāpato. Kae ʼe ʼi ai te ako ʼo ʼuhiga mo totatou ʼAtua ʼe tou tāʼofi mai te lao ʼaia. ʼE tokaga lelei tuʼumaʼu pē ia Sehova ki te maʼuli fakalaumālie ʼo tana hahaʼi. (Isa. 48:17, 18) Iā ʼaho nei, ʼe fakahā e Sehova tana tokaga ʼofa ʼaki te fakatuʼutuʼu ʼaē ko te Tauhi Fakafāmili ʼi te afiafi.

3. Koteā te fakatuʼutuʼu ʼo te Tauhi Fakafāmili ʼaē ʼe fai ʼi te afiafi?

³ Koteā Te Fakatuʼutuʼu ʼo Te Tauhi Fakafāmili ʼAē ʼe Fai ʼi Te Afiafi? ʼI Sānualio 2009, neʼe kamata fai ia te Ako Tohi-Tapu ʼo Te Kōkelekāsio ʼi te afiafi ʼaē ʼe fai ai te Ako Fakateokalatike pea mo te Fono Gāue. Neʼe fai te fetogi ʼaia moʼo foaki ki te ʼu fāmili te faigamālie ʼaē ke mālohi age tanatou ʼu felōgoi mo Sehova, ʼaki hanatou fakatuʼutuʼu he afiafi ʼi te vāhaʼa fuli ki te tauhi fakafāmili. Neʼe fakalotomālohiʼi ia te ʼu fāmili takitahi ke natou fai ia tanatou ako fakafāmili ʼi te afiafi ʼaē neʼe fai māhani ai te ako tohi, mo kapau ʼe lelei age kiā nātou, pea mo fakaʼaogaʼi te temi ʼaia ke natou palalau faʼifaʼitaliha ki he kupu tāfito Fakatohi-tapu, pea ʼe ko he ako ʼe lava tokoni ai ki te fāmili.

4. ʼE tonu koa ke fakatuʼakoi e te fāmili tanatou fai palalau ki he hola e tahi? Kotou fakamahino.

⁴ Ke feala hatatou kau ki te Ako Tohi ʼo Te Kōkelekāsio, neʼe tonu ke tou toʼo he temi ke tou teuteu ai, mo tou ʼolo ki te potu ʼaē neʼe fai ai, pea mo fai ʼihi atu ʼu meʼa. Maʼa te tokolahi iā tātou, neʼe lahi te temi ʼaē neʼe tou fakaʼaogaʼi ke feala hatatou kau ki te fono ʼaia ʼaē neʼe hola tahi. ʼAki te fetogi ʼo te polokalama ʼo tatatou ʼu fono, ʼe tou maʼu ʼi te temi nei ia te afiafi ʼaia moʼo tauhi fakafāmili kiā Sehova. Koia, ʼe mole ʼaoga ke tou fakatuʼakoi tatatou Tauhi Fakafāmili ʼi te afiafi ki he hola pē e tahi. Kae ʼe tonu ke tou fakakaukauʼi ʼo ʼuhiga mo te ʼu meʼa ʼaē ʼe ʼaoga ki totatou fāmili pea mo tonatou ʼu fealagia, pea mo fakaʼalutahi te temi ʼaē kā tou fakaʼaogaʼi.

5. ʼE tonu koa ke fakaʼaogaʼi te temi kātoa ki te fai palalau fakafāmili? Kotou fakamahino.

⁵ ʼE Tonu Koa Ke Fakaʼaogaʼi Te Temi Kātoa Ki Te Fai Palalau Fakafāmili? Kā fai palalau fakatahi te ʼu taumātuʼa pea mo te ʼu fāmili mo tanatou fānau ki he kupu tāfito Fakatohi-tapu, ʼe natou fefakalotomālohiʼaki ai. (Loma 1:12) ʼE felōgoi lelei ai te fāmili. Koia ʼaē ko te faʼahi ʼaē ʼe maʼuhiga ʼaupitō ʼi te Tauhi Fakafāmili ʼi te afiafi, ʼe ko te ʼu fai palalau Fakatohi-tapu. Kae ʼe feala pē foki kiā nātou ʼaē ʼo te fāmili ke natou tahi fakaʼaogaʼi hona temi ke ako tokotahi. Ohagē lā, hili te fai palalau fakafāmili, ʼe feala pē ke nonofo fakatahi te fāmili kae tahi hoko atu tana ako tokotahi, ʼe lagi tahi fakaʼosi tana teuteuʼi te ʼu fono peʼe ko te lau ʼo te ʼu nusipepa. Ko ʼihi fāmili ʼe natou filifili ke mole natou sioʼi te televisio ʼi te afiafi ʼaia.

6. ʼE feafeaʼi lā he fakahoko ʼo te fai palalau?

⁶ ʼE Feafeaʼi Lā He Fakahoko ʼo Te Fai Palalau? ʼE mole tonu ke fai tuʼumaʼu pē te fai palalau ʼaki he ʼu fehuʼi pea mo he ʼu tali. Ke fiafia pea mo fia ako te fāmili ʼi te Tauhi Fakafāmili, ʼe lahi te ʼu fāmili ʼe tatau tanatou polokalama mo tatatou fono ʼaē ʼe fai ʼi te lolotoga ʼo te vāhaʼa. ʼE ʼi ai te ʼu koga kehekehe ʼi tanatou fai palalau pea ʼe kehekehe tanatou fakahoko tanatou ʼu fai palalau ʼaia. Ohagē lā, ʼe feala ke natou lau fakatahi te Tohi-Tapu, mo teuteuʼi he koga ʼo te fono, pea mo fai he ʼu faʼifaʼitaki ki te fai fakamafola. ʼE foaki ʼi te pāsina 6 he ʼu tokoni.

7. Ko te ʼaluʼaga fea ʼe tonu ke faiga kiai te ʼu mātuʼa lolotoga te ako?

⁷ ʼE Tonu Ke Faiga Te ʼu Mātuʼa Ke Feafeaʼi Te ʼAluʼaga ʼo Te Fai Palalau? ʼE lahi anai te ʼu meʼa kā akoʼi fakalelei e tokotou fāmili mo kapau ʼe natou logoʼi te ʼofa pea mo natou logo fīmālie. ʼI ʼihi temi ʼe feala ke mole kotou fai takotou ako fakafāmili ʼi te loto fale kae ke fai ʼi tuʼa mo kapau ʼe lāulelei te temi. Kotou ʼai hakotou ʼu kiʼi tuʼu mokā ʼe ʼaoga. Ko ʼihi fāmili ʼe natou teuteuʼi hanatou ʼu kiʼi meʼa ʼinu ʼi te ʼosi ʼo te polokalama. Logolā ʼe mole fakaʼaogaʼi anai e te ʼu mātuʼa te Tauhi Fakafāmili ʼi te afiafi moʼo munaʼi peʼe moʼo fakatonutonuʼi te fānau, kae ʼe lagi ʼaoga ke nā fakaʼaogaʼi he kiʼi temi moʼo palalau ki he aga peʼe ko he fihifihia neʼe nā tokagaʼi. Kae ʼe lagi lelei age ke nā fai palalau ʼāteaina mo he tamasiʼi ki he aga neʼe ina fai, ʼi he tahi age temi ʼo te vāhaʼa, ke mole ufiufi ai iā muʼa ʼo tona ʼu tehina mo tuagaʼane. ʼE mole tonu ke liliu te Tauhi Fakafāmili ko he lakaga ʼe fakapiko ki te fānau peʼe fefeka fau te ako ʼa te ʼu mātuʼa, kae ʼe tonu ke hā ai te ʼAtua fiafia ʼaē ʼe tou tauhi ki ai.—1 Tim. 1:11.

8, 9. Koteā te teuteu ʼaē ʼe maʼua ke fai e te ʼu pule fāmili?

⁸ ʼE Lava Teuteuʼi Feafeaʼi e Te Pule Fāmili Te Ako? ʼE fua lelei lahi anai te ako ki te fāmili, mo kapau ʼe teuteuʼi fakatomuʼa e te pule fāmili te Tauhi Fakafāmili ʼaē ʼe fai ʼi te afiafi, ʼaki hana ʼiloʼi ʼaē pe koteā ʼaē ʼe tonu ke natou palalau kiai pea mo tona faʼahiga fai ʼaē ʼe lelei age. (Taag. 21:5) ʼE lelei ke kumi e te tagata ʼohoana ia te manatu ʼo tona ʼohoana ʼo ʼuhiga mo te faʼahi ʼaia. (Taag. 15:22) ʼU pule fāmili, peʼe ā lā ʼi ʼihi temi, hakotou fakalavelave age ki takotou fānau peʼe koteā tanatou manatu? Kapau ʼe kotou fai te faʼahi ʼaia, ʼe kotou ʼiloʼi lelei anai te ʼu meʼa ʼaē ʼe natou fia ako pea mo tanatou ʼu tuʼania.

⁹ ʼI ʼihi ʼu vāhaʼa, ʼe mole ʼaoga anai ke lahi fau te temi ʼaē ʼe fakaʼaogaʼi e te pule fāmili moʼo teuteuʼi te ako fakafāmili. ʼE mahino ia, ʼe fiafia anai te fāmili ʼi te mulimuli tuʼumaʼu pē ki he fakatuʼutuʼu ʼe tatau, pea ʼe mole ʼaoga anai ki te pule fāmili ke ina fetogi te polokalama ʼi te vāhaʼa fuli. ʼE lagi ina tokagaʼi anai ʼe fua lelei mokā ʼe ina teuteuʼi ʼi te ʼosi pē ʼo te ako fakafāmili, heʼe kei ina manatuʼi lelei ia te ʼu meʼa ʼaē ʼe ʼaoga ki tona fāmili. Ko ʼihi pule fāmili ʼe natou tohi he kaletalio pea mo natou pulusi ʼi he faʼahi ʼe faigafua te sio kiai ʼa te fāmili, ohagē lā ʼi te ʼaisi. ʼE fakatupu fakafiafia ai pea mo fakaʼamu te fāmili ki te ako, pea ʼe tuku ai he temi ke natou teuteu mo kapau ʼe ʼaoga.

10. ʼE lava fakaʼaogaʼi feafeaʼi e nātou ʼaē ʼe māʼuʼuli tokotahi ia te Tauhi Fakafāmili ʼi te afiafi?

¹⁰ ʼE Feafeaʼi Mo Kapau ʼe Au Tokotahi? Ko nātou ʼaē ʼe māʼuʼuli tokotahi ʼe feala ke natou fakaʼaogaʼi te Tauhi Fakafāmili ʼi te afiafi ke natou fai ai tanatou ako takitokotahi. Ke fua lelei ki he tahi tana polokalama ako takitokotahi, ʼe feala ke ina fakatuʼutuʼu ke ina lau te Tohi-Tapu, mo teuteuʼi te ʼu fono, pea mo lau Te Tule Leʼo pea mo te Réveillez-vous ! Ko ʼihi kaugā fagona ʼe natou hilifaki kiai hanatou fia ako he kupu tāfito. ʼI ʼihi temi, ʼe lagi natou fia fakaafe he tahi kaugā fagona peʼe ko he fāmili ke natou fai palalau fakatahi ki he manatu Fakatohi-tapu ʼe fakalotomālohi.

11, 12. Koteā ʼihi fua lelei ʼe tou maʼu ʼi te fai tuʼumaʼu ʼo te Tauhi Fakafāmili ʼi te afiafi?

¹¹ Koteā Te ʼu Lelei ʼo Te Fai Tuʼumaʼu ʼo Te Tauhi Fakafāmili ʼi Te Afiafi? Ko nātou ʼaē ʼe natou tauhi ʼaki he loto kātoa ʼi te tauhi moʼoni ʼe natou fakaovi lelei kiā Sehova. Tahi ʼaē meʼa, ko te ʼu fāmili ʼaē ʼe natou tauhi fakatahi ʼe mālohi tanatou ʼu felōgoi fakafāmili. Neʼe tohi fēnei e te taumātuʼa ʼo ʼuhiga mo te ʼu lelei ʼaē ʼe nā maʼu: “Ko māua ʼe mā pioniē tokolua pea ʼe mole hamā fānau, pea ʼe mā fakaʼamu moʼoni ke hoko mai te Tauhi Fakafāmili ʼi te afiafi. ʼE mā logoʼi ʼe mā felōgoi lelei age pea mo toe lahi age tamā felōgoi mo tatatou Tamai. ʼI te temi nei, ʼi tamā ala ake ʼi te ʼaho ʼaē ʼe tonu ke fai ai tamā ako, ʼe mā feʼuiʼaki fēnei: ‘ ʼE ke ʼiloʼi lā pe koteā kā hoko afiafi? Ko te Tauhi Fakafāmili!’ ”

¹² Ko te fakatuʼutuʼu ʼaē ke ʼi ai he afiafi ke fai ai te tauhi fakafāmili ʼe toe tokoni foki ki te ʼu fāmili ʼaē ʼe maʼumaʼua ʼaupitō. Neʼe tohi fēnei e te faʼē ʼe ina taupau tokotahi tana ʼu tama e toko lua pea ʼe pioniē kātoa: “ ʼI te temi muʼa, neʼe faigataʼa te fai ʼo tamatou ako fakafāmili. Neʼe mole fai tuʼumaʼu pea neʼe mole hona fua koteʼuhi neʼe au gaʼegaʼe. Neʼe mole feala haku ʼiloʼi peʼe feafeaʼi haku fakahoko taku ʼu gāue fuli. Koia ʼe au faitohi atu moʼo fakamālo ʼaupitō atu ʼo ʼuhiga mo te Tauhi Fakafāmili ʼi te afiafi. Kua feala ke matou fai tuʼumaʼu te ako fakafāmili pea mo maʼu ai te ʼu lelei.”

13. Koteā ʼaē ʼe fakalogo kiai te ʼu lelei ʼaē kā maʼu anai e tokotou fāmili mai te fakatuʼutuʼu ʼaia?

¹³ Ohagē ko te Sāpato, ko te Tauhi Fakafāmili ʼi te afiafi ʼe ko he meʼa ʼofa mai tatatou Tamai ʼaē ʼi selō ʼaē ʼe lava tokoni ki te ʼu fāmili. (Sake 1:17) Ko te ʼu lelei fakalaumālie ʼaē neʼe maʼu e te ʼu fāmili Iselaele neʼe fakalogo ki tanatou faʼahiga fakaʼaogaʼi ia te fakatuʼutuʼu ʼo te Sāpato. ʼO toe fēia pē, ko te ʼu lelei ʼaē kā maʼu anai e totatou fāmili ʼe fakalogo pē anai ki tatatou fakaʼaogaʼi ia te afiafi ʼaē neʼe foaki mai ke tou fai tatatou tauhi fakafāmili. (2 Ko. 9:6; Kal. 6:7, 8; Kol. 3:23, 24) Kā kotou fakaʼaogaʼi fakalelei ia te fakatuʼutuʼu ʼaia, ʼe toe maʼu anai e tokotou fāmili ia te ʼu manatu ʼaenī ʼa te tagata fai pesalemo: “Kae kiā te au, ʼe ko he meʼa lelei haku fakaovi ki te ʼAtua. Neʼe au kumi toku holaʼaga ki te Tuʼi ʼAliki ko Sehova.”—Pes. 73:28.

[Fakamatala ʼo te pasina 5]

ʼE mole tonu ke liliu te Tauhi Fakafāmili ʼi te afiafi ko he lakaga ʼe fakapiko ki te fānau peʼe fefeka fau, kae ʼe tonu ke hā ai te ʼAtua fiafia ʼaē ʼe tou tauhi ki ai

[Talanoa ʼo te pasina 6]

KE TAUPAU

Ko He ʼu Manatu Ki Te Tauhi Fakafāmili ʼi Te Afiafi

Te Tohi-Tapu:

• Kotou lau fakatahi he koga ʼo te lautohi ʼo te Tohi-Tapu ki te vāhaʼa. Kapau ʼe fakamatala ai he hisitolia, pea ʼe feala ke fai e he tahi ia ia ʼaē ʼe ina fakamatala te hisitolia, pea ko ʼihi atu e natou fai te ʼu hahaʼi kehekehe.

• Ke gaoʼi e te fāmili ia he fakamatala ʼo te koga tohi ʼo te lautohi ʼo te Tohi-Tapu.

• Hinoʼi fakatomuʼa ki te takitahi ʼo te fāmili ke natou lau te ʼu kāpite ʼo te Tohi-Tapu ʼaē ʼe tonu ke lau, pea ke natou tohi he fehuʼi e tahi peʼe lua ʼo ʼuhiga mo te ʼu kāpite ʼaē neʼe lau. Pea fai fakatahi leva te ʼu fekumi ʼo ʼuhiga mo te ʼu fehuʼi ʼa nātou takitahi ʼo te fāmili.

• ʼI te vāhaʼa fuli, teuteuʼi he kate ʼe tohi ai he vaega Tohi-Tapu pea faiga ke maʼu loto pea mo fakamahino te vaega ʼaia. Tānaki ia te ʼu kate ʼaia, pea kotou toe vakaʼi ʼi te vāhaʼa fuli ke kotou ʼiloʼi peʼe ko vaega Tohi-Tapu e fia ʼe kotou lava manatuʼi.

• Kotou fakalogo ki te puke ʼo te lautohi ʼo te Tohi-Tapu pea mo kotou mulimuli ʼi takotou Tohi-Tapu.

Te ʼu Fono:

• Kotou teuteuʼi fakatahi he koga ʼo te ʼu fono.

• Kotou akoako te ʼu kātiko ʼaē kua fakatuʼutuʼu ki te vāhaʼa kā hoa mai.

• Kapau ko he tahi ʼe ʼi ai hana kiʼi akonaki peʼe ko hana kiʼi fai palalau ʼi te Ako Fakateokalatike peʼe ko he faʼifaʼitaki ʼi te Fono Gāue, kotou fai palalau ki te ʼu manatu ʼaē ʼe feala ke fakaʼaogaʼi, peʼe kotou toe akoako iā muʼa ʼo te fāmili.

Te ʼu Meʼa ʼAē ʼe ʼAoga Ki Te Fāmili:

• Kotou vakaʼi te ʼu ʼalatike ʼo te tohi Les jeunes sʼinterrogent peʼe ko te tohi Écoute le grand Enseignant.

• Fai he ʼu kiʼi faʼifaʼitaki moʼo fakahā ai peʼe lava tali feafeaʼi e te fānau mokā hoko he ʼaluʼaga ʼi te faleako.

• Kotou fetogi tokotou ʼu tuʼulaga. ʼE kumi e te fānau he manatu tāfito pea ʼe natou vakavakaʼi leva mo te ʼu mātuʼa.

Te Minisitelio:

• Fakaʼaogaʼi he ʼu temi ako moʼo teuteuʼi te ʼu ʼuluaki fai palalau ki te Moeaki mo te ʼAhotapu.

• Fai palalau ki te ʼu fakatuʼutuʼu ʼaē ʼe feala ke fakahoko moʼoni e te fāmili ke lahi age tanatou kau ki te minisitelio ʼi te temi ʼo te ʼAho Fakamanatu peʼe ʼi te ʼu temi mālōlō.

• Tuku he ʼu kiʼi minuta kiā nātou takitokotahi ʼo te fāmili ke natou kumi peʼe feafeaʼi hanatou tali ki he ʼu fehuʼi kehekehe ʼe feala ke lagaʼi ʼi te minisitelio, pea fai leva he ʼu faʼifaʼitaki.

Te Tahi ʼu Tokoni:

• Kotou lau fakatahi he ʼalatike neʼe toʼo mai te ʼu nusipepa fakamuli.

• Ke tahi lau fakatomuʼa e nātou ʼo te fāmili he ʼalatike ʼe ina leleiʼia tāfito ʼi te ʼu nusipepa fakamuli, pea ke tahi fai hana fakamatala kiai ʼi te Tauhi Fakafāmili ʼi te afiafi.

• Kotou fakaafe ʼi ʼihi temi he kaugā fagona peʼe ko he taumātuʼa ki takotou Tauhi Fakafāmili ʼaē ʼi te afiafi, pea lagi feala ke kotou fakafehufehuʼi.

• Kotou sioʼi he ʼata ʼi tatatou ʼu ʼata viteo pea mo kotou fai palalau kiai.

• Kotou fai palalau fakatahi ki te ʼu ʼalatike “Les jeunes sʼinterrogent” peʼe “Apprenons en famille” ʼi te Réveillez-vous !

• Kotou fai palalau fakatahi ki te ʼu ʼalatike “Enseignez vos enfants” peʼe “Pour nos jeunes lecteurs” ʼi Te Tule Leʼo Fakafalani.

• Lau pea mo fai palalau ki he koga ʼo te Annuaire ʼo te taʼu, peʼe ko he tohi ʼi te ʼu tohi foʼou ʼaē neʼe tou maʼu ʼi te fakatahi fakatisitilike fakamuli.

• Hili he fakatahi, toe vakaʼi te ʼu manatu maʼuhiga.

• Kotou mamata ki te ʼu meʼa ʼaē neʼe fakatupu e Sehova pea kotou fai palalau ki te ʼu meʼa ʼaē ʼe kotou ako ai ʼo ʼuhiga mo Sehova.

• Kotou gāue fakatahi ki he fakatuʼutuʼu, ohagē lā ko te fai ʼo he mape peʼe ko te faʼu ʼo he maquette.