ʼo te ’Ēkelesia”? Neʼe maʼu e Falani te kaugamālie ʼaupito ʼo te kau Katolika ʼaē neʼe papitema ʼo aʼu ki te taʼu 1938. ʼI te temi nei kua tuʼulaga ono, kae muʼa te ʼu fenua ohage ko Filipine pea mo Amelika. Ko te toko 45 miliona kau Katolika ʼi Falani, kae ko te toko 6 miliona pe ʼe ʼolo tuʼumaʼu ʼo misa. Neʼe fakahā e te sivi mole heʼeki faʼa fualoa ʼo ʼuhiga mo te kau Falani Katolika, ko te toko 65 ʼi te teau “ ʼe mole nātou mulimuli ki te akonaki ʼa te ʼēkelesia ʼo ʼuhiga mo te ʼu felāveʼi fakasino,” pea maʼa te toko 5 ʼi te teau ia nātou ʼaia, ko Sesu ‘ ʼe mole hona ʼuhiga kia nātou.’ Ko te ʼu taʼi aga ʼaia ʼaē neʼe ina uga te tuʼi tapu ke ina lagaʼi te fehuʼi ʼaenī lolotoga tana ʼaʼahi ʼi Falani ʼi te taʼu 1980: “Falani, ʼe ʼifea takotou ʼu fakapapau ʼaē neʼe koutou fai ʼi takotou papitema?”

Te ʼu Fehuʼi ʼa Te Kau Lautohi

ʼE tonu koa te ʼui ʼaē ko te manavaʼofa ʼo Sehova ʼe ina fakamalū tana faitotonu?

Logola ʼe fai te ʼu taʼi palalau ʼaia, kae ʼe lagi lelei tona mole fakaʼaogaʼi koteʼuhi ʼe hage ia ʼe fakamalū e te manavaʼofa ʼo Sehova ia tana faitotonu, ohage ia ʼe maʼuhiga age tona manavaʼofa ʼi te kalitate fefeka ʼaē ko te faitotonu. Kae ʼe hala te manatu ʼaia.

Ko te kupuʼi palalau faka Hepeleo ʼaē neʼe fakaliliu ʼaki te kupu “faitotonu” ʼi te Tohi-Tapu Traduction du monde nouveau, ʼe toe feala pe foki ke faka ʼuhiga ki te “fakamāu.” Ko te faitotonu ʼe pipiki tahi mo te agatonu. Kae ko te faitotonu ʼe pipiki tuʼumaʼu ki te ʼu lekula. Kae ʼe mole feiā tuʼumaʼu ki te agatonu. ʼE moʼoni ʼe feala ke fakahoko e te faitotonu ʼa Sehova he tūʼa ʼe mata feʼauga mo te faʼahi ʼaia, kae ʼe toe feala pe foki ke faka ʼuhiga ki te hāofaki ʼo nātou ʼaē ʼe tau mo te potu ʼaia. (Senesi 18⁠:​20-32; Isaia 56⁠:1; Malakia 4⁠:⁠2) Koia, ʼe mole tonu ai ke faka ʼuhiga ʼe fefeka te faitotonu ʼa Sehova peʼe tonu ke fakamalū.

Ko te kupuʼi palalau Faka Hepeleo ʼaē neʼe fakaliliu ki te “manavaʼofa,” ʼe feala pe ke faka ʼuhiga ki te fakahoko peʼe ko te tāʼofi ʼo he fakamāu. ʼE toe faka ʼuhiga pe foki ki te fakahoko ʼo te lotoʼofa, moʼo fakafimālie ia ia ʼaē ʼe tau mo he faʼahiga mamahi.​—Teutalonome 10⁠:18; Luka 10⁠:​29-37.

Ko Sehova ʼe ko he ʼAtua ʼo te faitotonu pea mo te manavaʼofa. (Ekesote 34⁠:​6, 7; Teutalonome 32⁠:4; Pesalemo 145⁠:⁠9) Ko tana faitotonu pea mo tona manavaʼofa ʼe nā haohaoa toko lua, pea ʼe nā gāue lelei pea mo gāue fakatahi. (Pesalemo 116⁠:5; Osea 2⁠:19) Ko te ʼu kalitate ʼaia e lua ʼe nā fefakafuafua lelei ʼaki peʼe fefakakatoaʼaki. Koia, kapau ʼe tou ʼui ʼe fakamalū te manavaʼofa ʼo Sehova e tana faitotonu, pea ʼe tonu ke tou toe ʼui ko tana faitotonu ʼe fakamalū e tona manavaʼofa.

Neʼe fakakikite fēnei e Isaia: “ ʼE haga talitali anai ia Sehova ke ina fakahā atu tona ʼofa, pea ʼe tuʼu ake anai moʼo fakahā atu tona manavaʼofa. He ko Sehova ʼe ko he ʼAtua ʼo te fakamāu [“faitotonu,” The New English Bible].” (Isaia 30⁠:18) ʼE fakahā ʼi henī e Isaia, ʼe ʼalutahi te faitotonu ʼa Sehova mo te manavaʼofa, kae ko tona manavaʼofa ʼe mole ina fakamalū peʼe ina fakatātāʼofi tana faitotonu. ʼE fakahā e Sehova tona manavaʼofa koteʼuhi ʼe agatonu pea mo ʼofa.

ʼE moʼoni neʼe tohi fēnei e te tagata faitohi ʼo te Tohi-Tapu ko Sakopo: “ ʼE mālo te manavaʼofa ʼi te fakamāu.” (Sakopo 2⁠:13b, MN ) Kae ʼi te ʼu vaega ki muʼa atu ʼe mole talanoa kia Sehova, kae ʼe talanoa ki te kau Kilisitiano ʼaē neʼe nātou manavaʼofa kia nātou ʼaē neʼe tau mo te mamahi pea mo te kau māsisiva. (Sakopo 1⁠:27; 2⁠:​1-9) Ka tonu anai ke fakamāuʼi ia nātou ʼaia neʼe nātou manavaʼofa, ʼe tokagaʼi anai e Sehova tanatou ʼu aga pea mo ina fakahā anai tona manavaʼofa ʼo fakamolemole age kia nātou ʼaki te sakilifisio ʼo tona ʼAlo. Ko tanatou aga ʼaē neʼe nātou fakahā ai te manavaʼofa, ʼe mālo anai ʼi he faʼahiga fakamāu ʼe feala ke hoko kia nātou.​—Tāʼaga Lea 14⁠:21; Mateo 5⁠:7; 6⁠:12; 7⁠:⁠2.

Koia, ʼe mole tonu te ʼui ʼaē ko te fakamāu ʼa Sehova ʼe fakamalū e tona manavaʼofa, ohage ʼe tou fia ʼui ʼe tonu ke fakamalū tana faitotonu e te manavaʼofa. ʼE fakaʼaogaʼi fakatatau e Sehova tana ʼu kalitate ʼaia e lua. ʼE nā fefakafuafua lelei ʼaki ohage ko tanā fakafuafua lelei mo te tahi ʼu kalitate ʼa Sehova, ohage ko te ʼofa pea mo te agapoto.