KOTEĀ te meʼa ʼaē ʼe kehe ai te paki ʼaenī? ʼIo, ʼe tuʼu ai te ʼu hahaʼi. Ko te ʼuluaki tagata pea mo te ʼuluaki fafine. Ko ai ʼaē neʼe ina fakatupu ia nāua? Neʼe fakatupu nāua e te ʼAtua. ʼE koutou ʼiloʼi koa tona huafa? Ko tona huafa ko Sehova. Pea ko te higoa ʼo te tagata mo te fafine ʼe ko Atama mo Eva.

Neʼe fēnei te fakatupu ʼo Atama e Sehova ʼAtua. Neʼe ina toʼo te efu mai te kele pea ʼaki te efu ʼaia neʼe ina faʼu te sino haohaoa, ko te sinoʼi tagata. ʼOsi ʼaia pea ina pupuhi te mānava ki te ihu ʼo te tagata, pea maʼuli ai ia Atama.

Neʼe fakatuʼutuʼu e Sehova ʼAtua te gāue maʼa Atama. Neʼe ina ʼui age kia Atama ke ina foaki he ʼu higoa ki te ʼu manu kehekehe. Neʼe lagi sioʼi e Atama te ʼu manu ʼi he temi loaloaga ke feala ai hana foaki he ʼu higoa ʼe tāu mo nātou fuli. ʼI te lolotoga ʼo te fakahigoaʼi ʼaē e Atama te ʼu manu neʼe ina kamata fakatokagaʼi te meʼa. ʼE koutou ʼiloʼi koa pe koteā te meʼa ʼaia?

Ko te ʼu manu fuli neʼe ʼi ai tonatou ʼu hoa. Neʼe ʼi ai te ʼu alefani tagata pea mo te ʼu alefani fafine, pea neʼe ʼi ai mo te ʼu laione tagata pea mo te ʼu laione fafine. Kae neʼe mole ʼi ai he hoa ʼo Atama. Koia neʼe fakamoe ai e Sehova ia Atama, pea ina toʼo te hui mai tona vakavaka. ʼAki te hui ʼaia, neʼe faʼu e Sehova te fafine maʼa Atama, pea neʼe liliu ko tona ʼohoana.

Neʼe kua fiafia leva ia Atama ʼi te moʼi temi ʼaia! Pea koutou fakakaukauʼi muʼa te fiafia ʼaē neʼe maʼu e Eva ʼi tana maʼuli ʼi te ʼōloto taulekaleka ʼaia! ʼI te temi ʼaia neʼe feala ke nā maʼu hanā fānau pea ke nātou maʼuli fakatahi ʼi te fiafia.

Neʼe loto ia Sehova ke maʼuli heʼegata ia Atama mo Eva. Neʼe ina loto ke nā fakaliliu te kele katoa ke matalelei ohage ko te ʼōloto ʼo Eteni. ʼE mahino ia neʼe fiafia ʼaupito ia Atama mo Eva ʼi tanā ʼiloʼi te faʼahi ʼaia! Neʼe koutou fia kau koa ki te fakaliliu ʼo te kele ko he ʼōloto matalelei? Kae neʼe mole fualoa te maʼuli fiafia ʼo Atama mo Eva. Tou vakaʼi tona tupuʼaga.

ʼE KOUTOU sio ki te meʼa ʼaē kua hoko. Neʼe kapu ia Atama mo Eva ʼi te ʼōloto taulekaleka ʼo Eteni. ʼE koutou ʼiloʼi koa pe koteā tona tupuʼaga?

Neʼe kapu ia nāua koteʼuhi neʼe nā fai te meʼa ʼe kovi ʼaupito. Pea koia la ʼaē neʼe fakatūʼa ai nāua e Sehova. ʼE koutou ʼiloʼi koa pe koteā te meʼa kovi ʼaē neʼe fai e Atama mo Eva?

Neʼe nā fai te meʼa neʼe tapuʼi age e te ʼAtua ke ʼaua naʼa nā fai. Neʼe ʼui age e te ʼAtua kia nāua ʼe feala tana kai ki te ʼu fua ʼo te ʼu fuʼu ʼakau ʼo te ʼōloto. Kae ki te fuʼu ʼakau e tahi, neʼe ʼui age e te ʼAtua ke ʼaua naʼa nā kai kiai, heʼe feala anai ke nā mamate ai. Neʼe ina taupau te fuʼu ʼakau ʼaia maʼana. Pea ʼe tou ʼiloʼi ai ʼe kovi tatatou toʼo he meʼa ʼa he tahi. Koteā koa te meʼa ʼaē neʼe hoko?

ʼI te tahi ʼaho neʼe nofo tokotahi ai ia Eva ʼi te ʼōloto, neʼe palalau age te gata kia ia. Koutou fakakaukauʼi muʼa te meʼa ʼaia! Neʼe ina ʼui age kia Eva ke ina kai te fuaʼi ʼakau ʼo te fuʼu ʼakau ʼaē neʼe tapuʼi age e te ʼAtua kia nāua. ʼI te temi ʼaē neʼe fakatupu ai e Sehova te ʼu gata neʼe mole ina fakatupu ia nātou mo te fealagia ʼaē ke nātou palalau. Koia ʼe feala ke tou ʼui ai neʼe faka palalauʼi te gata e he tahi. Ko ai koa ʼaē neʼe ina fai te faʼahi ʼaia?

Neʼe mole ko Atama. Neʼe ko he tahi ia nātou ʼaē neʼe fakatupu e Sehova ʼi muʼa ʼo tana fakatupu ia te kele. Ko nātou ʼaia ko te kau ʼaselo, pea ʼe mole feala hatatou sio kia nātou. Neʼe ko he ʼaselo neʼe liliu ʼo fialahi ʼaupito. Neʼe ina kamata fakakaukauʼi ʼe tonu anai ke ina maʼu te tuʼulaga pule ohage ko te ʼAtua. Pea neʼe loto ia ke fakalogo age te hahaʼi kia ia ka mole nātou fakalogo kia Sehova. Neʼe ko te ʼaselo ʼaia ʼaē neʼe ina faka palalauʼi te gata.

Neʼe iku te kākā ʼa te ʼaselo kia Eva. ʼI te temi ʼaē neʼe ina ʼui age ai ʼe liliu anai ia ia ʼo tatau mo te ʼAtua mo kapau ʼe ina kai te fuaʼi ʼakau, neʼe faka tui ia Eva kiai. Koia neʼe ina kai ai te fuaʼi ʼakau, ʼo kau ki ai mo Atama. Neʼe talagataʼa ia Atama mo Eva ki te ʼAtua, pea ko te tupuʼaga la ʼaia ʼo tonā fakamavae ʼi tonā nofoʼaga taulekaleka ʼaia.

Kae ʼi he temi ki ʼamuli, ʼe toe haga anai te ʼAtua ʼo fakaliliu te kele katoa ke matalelei ohage ko te ʼōloto ʼo Eteni. Ki muli age ʼe tou ako anai peʼe feafeaʼi hatatou kau ki te fai ʼo te faʼahi ʼaia. Kae ʼi te temi nei, ʼe tou vakaʼi pe koteā te meʼa ʼaē neʼe hoko kia Atama mo Eva.