ʼI TUʼA atu ʼo te ʼōloto ʼo Eteni, neʼe felāveʼi ia Atama mo Eva mo te ʼu tuʼuga faigataʼaʼia. Neʼe nā gāue kinakina ke nā maʼu hanā meʼa kai. Neʼe mole nā maʼu he ʼu fuaʼi ʼakau matalelei, kae neʼe nā sisio pe ki te ʼu ʼakau talatala ʼe tutupu ʼi ʼonā tafaʼaki. Ko te meʼa ʼaia neʼe hoko kia Atama mo Eva ʼi tanā talagataʼa ʼaē ki te ʼAtua, pea mo tanā mole kei kaumeʼa ʼaē mo te ʼAtua.

Kae ko te meʼa ʼaē neʼe kovi tāfito, he kua kamata mamate māmālie ia Atama mo Eva. Tou manatuʼi, neʼe fakatokagaʼi age e te ʼAtua kia nāua, ʼe nā mamate moʼoni anai mo kapau ʼe nā kai ki te fuaʼi ʼakau ʼaia. Koia ʼi te ʼaho ʼaē neʼe nā kai kiai, neʼe nā kamata mamate ai. ʼE ko he agavale tanā talagataʼa ʼaē ki te ʼAtua!

Ko te fānau ʼa Atama mo Eva neʼe tutupu fuli ʼi te ʼosi kapu e te ʼAtua tanatou ʼu mātuʼa mai te ʼōloto ʼo Eteni. Ko tona faka ʼuhiga, ʼe toe feiā aipe anai mo te ʼu tamaliki ʼe nātou matutuʼa anai pea mo mamate.

Kanapaula neʼe fakalogo ia Atama mo Eva kia Sehova, kanaʼauala neʼe nā maʼuʼuli fiafia pea mo tanā fānau. Neʼe feala ai ke nātou maʼuʼuli fiafia pea mo heʼegata ʼi te kele. Neʼe mole he tahi neʼe matuʼa, mo mahaki pea mo mate.

Neʼe loto te ʼAtua ke maʼuli fiafia te hahaʼi ʼo heʼegata, pea neʼe Ina fakapapau ʼe ina fakahoko anai te faʼahi ʼaia ʼi he ʼaho. ʼE mole gata ʼaki pe anai tana fakaliliu te kele katoa ʼo taulekaleka, kae ʼe toe maʼu anai e te hahaʼi fuli te maʼuli mālōlō. Pea ʼe toe fekaumeʼa leleiʼaki anai te hahaʼi ʼi te kele pea mo nātou toe kaumeʼa mo te ʼAtua.

Kae neʼe mole kei kaumeʼa ia Eva mo te ʼAtua. Koia ʼi te temi ʼaē neʼe ina fānauʼi ai tana ʼu tamaliki, neʼe mole faigafua kia ia. Neʼe mamahi ia. ʼE mahino papau ia ko tana talagataʼa ʼaē kia Sehova neʼe fakatupu ʼaki ai hana maʼu he ʼu lotomamahi.

Neʼe lahi te ʼu tama pea mo te ʼu taʼahine ʼa Atama mo Eva. ʼI te tupu ake ʼo tanā ʼuluaki tama, neʼe nā fakahigoaʼi ko Kaino. Neʼe nā fakahigoaʼi tanā lua tama ko Apele. Koteā te meʼa ʼaē neʼe hoko kia nāua? ʼE koutou ʼiloʼi koa?

KOUTOU sio kia Kaino mo Apele ʼi te temi ʼaenī. Kua nā lalahi. Kua liliu ia Kaino ko he tagata gāue kele. ʼE ina to te ʼu pulapula pea mo te ʼu fuaʼi ʼakau pea mo te ʼu lauʼakau.

Neʼe liliu ia Apele ko te tagata tauhi ōvi. ʼE ina leleiʼia te tokaga ʼaē ki te ʼu ʼuhiʼi akeno. ʼE nātou lalahi ake ko te ʼu ōvi, pea kua vave te maʼu e Apele he faga ōvi lahi ke ina taupau.

ʼI te tahi ʼaho neʼe fai e Kaino mo Apele te mōlaga ki te ʼAtua. Neʼe foaki e Kaino te ʼu magisi ʼaē neʼe ina to. Pea neʼe foaki e Apele te ʼu ōvi ʼaē ʼe lelei tokotahi ʼi tana faga ōvi. Neʼe leleiʼia e Sehova ia Apele pea mo tana mōlaga. Kae neʼe mole ina leleiʼia ia Kaino pea mo tana mōlaga. ʼE koutou ʼiloʼi pe koteā tona tupuʼaga?

Neʼe mole ina leleiʼia ia Apele ʼuhi pe he neʼe lelei age tana mōlaga ʼi te mōlaga ʼa Kaino. Kae neʼe ina leleiʼia he ko Apele neʼe ko te tagata agalelei. ʼE ʼofa ia kia Sehova pea mo tona tēhina. Kae ko Kaino neʼe ko te tagata agakovi; neʼe mole ʼofa ia ki tona tēhina.

Koia neʼe ʼui age e te ʼAtua kia Kaino ʼe tonu ke ina fetogi tana ʼu manatu. Kae neʼe mole fakalogo ia Kaino. Neʼe ʼita ʼaupito ia koteʼuhi neʼe leleiʼia e te ʼAtua ia Apele. Koia neʼe ʼui age ai e Kaino kia Apele, ‘Tā ʼolo ki te gāueʼaga.’ ʼI te temi ʼaē neʼe nā ʼāteaina ai, neʼe tāʼi e Kaino tona tēhina ko Apele. ʼI te mālohi fau ʼo tana tāʼi neʼe ina fakapogi ai tona tēhina. Neʼe mole fakamataku koa la te meʼa ʼaē neʼe fai e Kaino?

Logope la kua mate ia Apele, kae ʼe kei manatuʼi pe ia e te ʼAtua. Neʼe agalelei ia Apele, pea ʼe mole galoʼi anai e Sehova te taʼi tagata ʼaia. Koia ʼe toe fakatuʼuake anai e Sehova ʼAtua ia Apele mai te mate. ʼI te temi leva ʼaia ʼe mole toe mate anai ia Apele. ʼE feala anai tana maʼuli ʼo heʼegata ʼi te kele. ʼE mole ko he meʼa fakafiafia koa la hatatou felāveʼi mo he ʼu hahaʼi ohage ko Apele?

Kae ʼe mole leleiʼia e te ʼAtua te hahaʼi ʼaē ʼe hage ko Kaino. Koia ʼi te ʼosi matehi e Kaino tona tēhina, neʼe fakatūʼa e te ʼAtua ia ia, ʼo ina kapu ke mavae ʼi tona famili, ʼo ʼalu ʼo nofo mamaʼo. ʼI te ʼalu ʼa Kaino ʼo nofo ʼi te tahi potu ʼo te kele, neʼe ina ʼave tona tokolua, pea neʼe liliu ia ko tona ʼohoana.

ʼAki te temi neʼe maʼu te ʼu fānau ʼa Kaino pea mo tona ʼohoana. Ko te tahi ʼu tama pea mo te tahi ʼu taʼahine ʼa Atama mo Eva neʼe nātou feʼohoanaʼaki, pea neʼe maʼu foki mo tanatou ʼu fānau. Mole tuai pea kaugamālie te nofoʼi ʼo te kele. Tou vakaʼi muʼa te maʼuli ʼo ʼihi ia nātou ʼaia.