ʼI TE fakahaʼuhaʼu ʼo kaugamālie ia te hahaʼi ʼo te kele, ko te tokolahi ia nātou neʼe nātou fai te ʼu meʼa ʼaē ʼe kovi ohage pe ko Kaino. Kae ko te tagata pe e tahi neʼe kehe ia nātou ʼaia. Ko te higoa ʼo te tagata ʼaia ko Enoke. Ko Enoke neʼe ko te tagata lototoʼa. Ko te hahaʼi ʼaē ʼi ʼona tafaʼaki neʼe nātou fai te ʼu meʼa ʼe kovi ʼaupito, kae neʼe haga tauhi aipe ia Enoke ki te ʼAtua.

ʼE koutou ʼiloʼi koa pe koʼe neʼe lahi ʼaupito te agakovi ʼa te hahaʼi ʼaia? ʼE kei koutou manatuʼi pe ko ai ʼaē neʼe ina fakaneke ia Atama mo Eva ke nā talagataʼa ki te ʼAtua, pea ke nā kai te fuaʼi ʼakau ʼaē neʼe tapuʼi age e te ʼAtua kia nāua? ʼIo, neʼe ko te ʼaselo agakovi. ʼE fakahigoa e te Tohi-Tapu ko Satana. Pea ʼe ina faigaʼi ke agakovi te hahaʼi fuli.

ʼI te tahi ʼaho neʼe fakahā e Sehova ʼAtua kia Enoke ke ina tala ki te hahaʼi te meʼa ʼe mole nātou fia logo kiai. Koʼeni te meʼa ʼaē neʼe ina ʼui age: ‘ ʼE hoko mai anai te ʼaho ʼe fakaʼauha ai anai e te ʼAtua te hahaʼi agakovi fuli.’ Neʼe lagi ʼiʼita ʼaupito te hahaʼi ʼi tanatou logo ki te meʼa ʼaia. Neʼe lagi nātou faigaʼi ke nātou matehi ia Enoke. Koia neʼe tonu ai ke lototoʼa ʼaupito ia Enoke ʼi tana fakahā ki te hahaʼi te meʼa ʼaē ka ʼamanaki fai e te ʼAtua.

Neʼe mole tuku e te ʼAtua ia Enoke ke maʼuli fualoa ʼi te lotolotoiga ʼo te hahaʼi agakovi ʼaia. Neʼe maʼuli ia Enoke ia taʼu pe e 365. He koʼe koa ʼe tou ʼui “ia taʼu pe e 365”? Koteʼuhi ko te ʼu tagata ʼo te ʼu temi ʼaia neʼe mālolohi age ʼi te ʼu tagata ʼo te temi ʼaenī, pea neʼe nātou maʼuʼuli fualoa. Koia, neʼe maʼuli te foha ʼo Enoke ko Metusela ia taʼu e 969!

ʼI te ʼosi mate ʼo Enoke, neʼe toe ʼāsili age te agakovi ʼa te hahaʼi. ʼE ʼui fēnei e te Tohi-Tapu ‘ko tanatou ʼu fakakaukau fuli neʼe kovi ʼi te temi fuli pe,’ pea ‘neʼe kua fonu te agakovi ʼi te kele.’

ʼE koutou ʼiloʼi koa pe koʼe neʼe lahi ʼaupito te agakovi ʼi te temi ʼaia? Koteʼuhi neʼe maʼu e Satana te puleʼaki foʼou moʼo fakaneke ʼo te hahaʼi ke nātou fai te ʼu meʼa ʼaē ʼe kovi. ʼE tou vakaʼi anai te faʼahi ʼaia ʼi te pasina ʼaē ka hoa mai.

KAPAU neʼe fakaōvi atu he tahi kia koutou pea ʼe māʼoluga age ia ʼi te fata ʼo tokotou ʼapi, koteā anai takotou manatu? Ko te tagata ʼaia ʼe ko he tagata lahi ʼaupito! Neʼe ʼi ai te temi neʼe maʼuli moʼoni ai te ʼu tagata lalahi ʼaupito ʼi te kele. ʼE fakahā mai e te Tohi-Tapu ko tanatou ʼu tāmai neʼe ko te kau ʼaselo mai te lagi. Kae neʼe hoko feafeaʼi te faʼahi ʼaia?

ʼE tou manatuʼi, ko te ʼaselo agakovi ʼaē ko Satana neʼe lahi ʼaupito te ʼu maveuveu ʼaē neʼe ina fai. Neʼe ina toe faigaʼi foki ke toe agakovi mo te kau ʼaselo ʼa te ʼAtua. ʼAki te temi, neʼe kamata fakalogo ʼihi ʼaselo kia Satana. Neʼe nātou līaki te gāue ʼaē neʼe tuku age e te ʼAtua ke nātou fai ʼi te lagi. Pea neʼe nātou hihifo mai ki te kele, ʼo nātou kofuʼi te ʼu sinoʼi tagata. ʼE koutou ʼiloʼi koa pe koteā tona tupuʼaga?

ʼE ʼui mai e te Tohi-Tapu neʼe nātou fai te faʼahi ʼaia koteʼuhi neʼe sio ifo te ʼu foha ʼo te ʼAtua ki te ʼu taʼahine ʼo te kele ʼe finemui pea neʼe nātou fia nonofo mo nātou. Koia neʼe nātou hihifo mai ai ki te kele pea neʼe nātou ʼohoana mo te ʼu taʼahine ʼaia. ʼE ʼui mai e te Tohi-Tapu neʼe kovi te meʼa ʼaia, koteʼuhi neʼe fakatupu e te ʼAtua te kau ʼaselo ke maʼuʼuli ʼi te lagi.

ʼI te temi ʼaē neʼe maʼu ai te ʼu fānau ʼa te kau ʼaselo pea mo tonatou ʼu ʼohoana, neʼe kehe te ʼu tamaliki ʼaia. ʼI tonatou fānauʼi age neʼe mole ʼiloga te faʼahi ʼaia. Kae ʼi tanatou lahilahi ake, neʼe nātou mālolohi, ʼo nātou liliu ko te ʼu tagata lalahi ʼaupito.

Ko te ʼu tagata lalahi ʼaupito ʼaia neʼe agakovi. Pea ʼi tonatou lalahi pea mo tonatou mālolohi, neʼe nātou gaohi koviʼi te hahaʼi. Neʼe nātou fakamālohiʼi te hahaʼi ke agakovi ohage ko nātou.

Kua mate ia Enoke, kae neʼe ʼi ai te tagata agalelei ʼi te kele ʼi temi ʼaia. Ko te higoa ʼo te tagata ʼaia ko Noe. Neʼe ina fai tuʼumaʼu pe te meʼa ʼaē neʼe loto kiai te ʼAtua.

ʼI te tahi ʼaho neʼe ʼui age e te ʼAtua kia Noe, ʼe Ina fakaʼauha anai te hahaʼi agakovi fuli. Kae ʼe ina hāofaki anai ia Noe, mo tona famili pea mo te ʼu faga manu. Tou vakaʼi pe neʼe fakahoko feafeaʼi e te ʼAtua te faʼahi ʼaia.