NEʼE ʼi ai te ʼohoana ʼo Noe pea mo tona ʼu foha e tolu. Ko te ʼu higoa ʼo tona ʼu foha ko Semi, mo Kami pea mo Safeti. Pea neʼe nātou takitahi mo tona ʼohoana. Koia, ko te famili ʼo Noe neʼe ko te toko valu.

ʼI te temi nei ʼe ʼui age e te ʼAtua kia Noe ke ina fai te meʼa ʼe mata faikehe. Neʼe ina ʼui age ke ina faʼu he aleka lahi. Ko te aleka ʼaia neʼe laulahi ohage ko he sitima, kae ko tona agaaga neʼe hage ia ko he foʼi puha lahi. Neʼe ʼui age e te ʼAtua ‘ke ina fai he ʼu laufata e tolu ʼo te aleka, pea ke ina faʼu ʼi te ʼu laufata ʼaia he ʼu kogafale.’ Ko te kogafale maʼa Noe pea mo tona famili, pea mo te kogafale maʼa te ʼu manu, pea mo te kogafale moʼo tānaki ai te meʼa kai ʼaē ka ʼaoga kia nātou.

Tahi ʼaē meʼa, neʼe ʼui age e te ʼAtua kia Noe ke ina gaohi fakaleleiʼi te aleka naʼa hū te vai ki loto. Neʼe ʼui age e te ʼAtua: ‘ ʼE ʼau tuku atu anai he tulivio lahi, pea ʼe ina fakaʼauha anai te kele katoa. Ko ʼaē ʼe mole nofo ʼi te loto aleka ʼe mate anai ia.’

Ko Noe pea mo tona ʼu foha neʼe nātou fakalogo kia Sehova pea neʼe nātou kamata faʼu te aleka. Kae neʼe vāʼi nātou e te hahaʼi. Neʼe nātou haga fai aipe tanatou agakovi. Neʼe mole tui he tahi kia Noe ʼi tana ʼui age ʼaē kia nātou te meʼa ʼaē ka ʼamanaki fai e te ʼAtua.

Neʼe loaloaga te faʼu ʼo te aleka koteʼuhi neʼe lahi ʼaupito. Pea hili kiai ni ʼu taʼu, pea ʼosi leva te faʼu ʼo te aleka. ʼI te temi ʼaia neʼe ʼui age ai e te ʼAtua kia Noe ke ina fakahū te ʼu manu ki te aleka. Neʼe ʼui age e te ʼAtua ke ina toʼo taki toko lua mai te ʼu manu, ko te manu tagata pea mo te manu fafine. Kae ʼo ʼuhiga mo te tahi ʼu faʼahiga manu, neʼe ʼui age e te ʼAtua kia Noe ke ina toʼo he ʼu manu e fitu. Neʼe toe ʼui age foki e te ʼAtua kia Noe ke ina fakahū mo he ʼu manulele ʼo te ʼu faʼahiga kehekehe. Neʼe mulimuli aipe ia Noe ki te meʼa ʼaē neʼe ʼui age e te ʼAtua.

Ki muli age, neʼe hū foki mo Noe pea mo tona famili ki te aleka. Pea neʼe pupunu e te ʼAtua te matapā. Ko Noe pea mo tona famili neʼe nātou talitali ʼi te loto aleka. Koutou fakakaukauʼi age muʼa mo kapau neʼe koutou fakatalitali mo nātou ʼi te aleka. ʼE hoko moʼoni anai koa te tulivio ohage ko tona ʼui e te ʼAtua?

ʼI TUʼA ʼo te aleka, neʼe maʼuli pe te hahaʼi ohage ko te agamāhani. Neʼe mole nātou faka tui ʼe hoko anai he Tulivio. Neʼe ʼāsili age tanatou vāvā. Kae kua vave hoko mai te temi ʼaē ka fakagata ai tanatou vāvā.

Fokifā pe kua tō te ʼua. Neʼe tō te ʼua mai te lagi ohage ko hakotou huaʼi he pākete vai. Neʼe moʼoni te meʼa ʼaē neʼe fakahā e Noe! Kae ʼi te temi nei kua tauhala, ʼe mole kei feala ke hū he tahi ki te aleka. Neʼe fakamaʼu te matapā e Sehova.

Neʼe mole tuai pea ʼaofi te kele e te vai. Kua liliu te vai ko he ʼu vaitafe lalahi. Neʼe tokahi e te vai te ʼu fuʼu ʼakau, pea mo fakateka te ʼu foʼi maka lalahi, pea neʼe logoaʼa ʼaupito. Neʼe matataku te hahaʼi. Neʼe nātou fekākeʼi ki te ʼu faʼahi ʼaē ʼe māʼoluga. Lagi neʼe nātou fakahemala ʼi tanatou mole fakalogo kia Noe pea mo nātou hū ki te aleka ʼi te temi ʼaē neʼe kei ava ai te matapā! Kae ʼi te temi nei kua tauhala.

Neʼe ʼāsili hake te vai. Neʼe ʼua lolotoga ʼaho e 40 pea mo po e 40. Neʼe aʼu te loloto ʼo te vai ki te tumutumu ʼo te ʼu moʼuga, pea māʼia mo te ʼu moʼuga māʼoluga neʼe ʼaofi katoa e te vai. Ohage pe ko te meʼa ʼaē neʼe tala e te ʼAtua, neʼe mamate te hahaʼi fuli pea mo te ʼu manu fuli ʼaē neʼe mole hū ki te aleka. Kae neʼe hāo pe ia nātou ʼaē neʼe nonofo ʼi te loto aleka.

Ko Noe pea mo tona ʼu foha neʼe lelei tanatou faʼu te aleka. ʼI te temi ʼaē neʼe lagaʼi ai e te vai ia te aleka, neʼe maʼanu te aleka ʼi te vai. Pea ʼi te tahi ʼaho, ʼi te ʼosi ʼo te ʼua, neʼe kamata gigila te laʼā. ʼI meʼa fakaofoofo! Neʼe ko he moana lahi. Pea ko te meʼa e tahi neʼe feala hakita sio kiai, ʼe ko te aleka.

ʼI te temi nei kua pupuli te ʼu tagata lalahi ʼaupito. ʼE mole kei ʼi ai anai he tahi ia nātou ʼe nātou toe fakamamahi te hahaʼi. Kua nātou mamate fuli, mo tanatou ʼu faʼe pea mo te hahaʼi agakovi. Kae koteā te meʼa ʼaē neʼe hoko ki tanatou ʼu tāmai?

Ko te ʼu tāmai ʼa te ʼu tagata lalahi ʼaupito ʼaia neʼe mole ko ni tagata ohage ko tatou. Neʼe ko te ʼu ʼaselo neʼe hihifo mai selo ʼo maʼuʼuli ʼi te kele ohage ko he ʼu tagata. Koia ʼi te hoko mai ʼo te Tulivio, neʼe mole nātou mamate mo te hahaʼi. Neʼe nātou tuku tonatou ʼu sinoʼi tagata ʼaē neʼe nātou kofuʼi, kae nātou toe liliu ki te lagi ki tonatou ʼuhiga ʼaselo. Kae neʼe mole kei fakagafua kia nātou, ke nātou kau ki te famili ʼo te kau ʼaselo ʼa te ʼAtua. Koia neʼe nātou liliu ai ko te kau ʼaselo ʼa Satana. ʼE fakahigoaʼi nātou ʼi te Tohi-Tapu ko te kau temonio.

ʼI te temi ʼaia neʼe faka agi ai e te ʼAtua te matagi ki te kele, pea neʼe hifohifo māmālie ai te ʼu vai ʼo te tulivio. Pea ʼosi kiai māhina e nima, pea tau te aleka ki te tumutumu ʼo te moʼuga. Neʼe lahi te ʼu ʼaho neʼe fakalaka, pea ko nātou ʼaē neʼe nonofo ʼi te aleka neʼe hoki feala leva ke nātou sisio ki tuʼa pea neʼe nātou sisio ki te ʼu tumutumu ʼo te ʼu moʼuga. Kae neʼe hifohifo aipe te vai.

Pea neʼe tuku e Noe te kolevo ki tuʼa ʼi te aleka. Neʼe ʼalu te kolevo pea ʼi tana mole maʼu he potu ke tau kiai neʼe toe liliu mai ki te aleka. Neʼe liuliuga tana ʼalu pea mo tana haʼu ki te aleka.

Neʼe fia ʼiloʼi e Noe peʼe kua maha ia te kele, koia neʼe ina toe tuku te lupe ki tuʼa ʼi te aleka. Kae neʼe toe liliu mai pe te lupe koteʼuhi neʼe mole ina maʼu he potu ke tau kiai. Neʼe toe tuku age e Noe te lupe ki tuʼa, pea neʼe ina ʼaumai te lauʼi oliveto ʼi tona gutu. Pea neʼe ʼiloʼi ai e Noe kua maha te vai. Neʼe toe tuku e Noe te lupe ke ʼalu, ko tona tuʼa tolu leva ʼaia, pea neʼe ina maʼu ai te faʼahi ʼe moamoa ke tau kiai pea neʼe mole toe liliu mai.

ʼI te temi ʼaia neʼe folafola age te ʼAtua kia Noe. Neʼe ina ʼui age: ‘Haʼu ki tuʼa mai te aleka. Fakahū mai ki tuʼa tou famili katoa pea mo te ʼu manu fuli.’ Neʼe nātou nonofo ʼi te aleka ʼo fakalaka ʼi te taʼu katoa. Koia ʼe feala ke tou fakakaukauʼi tonatou fiafia ʼi tanatou toe fakatahi maʼuʼuli ʼaē ʼi te kele!