KO TE tahi koga meʼa ʼaē neʼe ʼolo te hahaʼi ʼo nonofo ai ʼi te ʼosi ʼo te Tulivio, neʼe ko Ule. Neʼe liliu ia Ule ko he kolo maʼuhiga mo tona ʼu ʼapi matalelei. Kae neʼe tauhi te hahaʼi ʼo te kolo ʼaia ki te ʼu ʼatua loi. Ko te faʼahiga aga ʼaia neʼe tatau mo te aga ʼaē neʼe fai ʼi Papele. Ko te hahaʼi ʼaē neʼe nonofo ʼi Ule pea mo Papele neʼe mole nātou tatau mo Noe pea mo tona foha ko Semi, ʼaē neʼe nā tauhi kia Sehova.

Ki muli age, ʼi te hili ʼo taʼu e 350 ki te tulivio, neʼe mate leva te tagata agatonu ko Noe. Hili taʼu e lua ki te mate ʼo Noe pea tupu te tagata ʼaē ʼe koutou sio kiai ʼi te paki ʼaenī. Neʼe makehe ʼaupito te tagata ʼaia ki te ʼAtua. Ko tona higoa ko Apalahamo. Neʼe nofo ia mo tona famili ʼi te kolo ʼaia ko Ule.

ʼI te tahi ʼaho neʼe ʼui age e Sehova kia Apalahamo: ‘Mavae ʼi Ule pea mo tou ʼu kāiga, pea ke ʼalu ki te fenua ʼaē ka ʼau fakahā atu.’ Neʼe fakalogo koa ia Apalahamo ki te ʼAtua pea mo ina tuku te ʼu koloā fuli ʼo Ule? Ei. Pea ʼi te fakalogo tuʼumaʼu ʼa Apalahamo ki te ʼAtua, neʼe liliu ia ko te kaumeʼa ʼo te ʼAtua.

Ko ʼihi ʼi te famili ʼo Apalahamo neʼe ʼolo mo ia ʼi te temi ʼaē neʼe mavae ai ʼi Ule. Neʼe kau ai mo tana tāmai ko Tela. ʼO kau ai mo tana fakafotu ko Lote, pea mo Sala te ʼohoana ʼo Apalahamo. ʼI tanatou tau atu ki te koga meʼa ʼaē ʼe higoa ko Halane, neʼe mate ai ia Tela. Neʼe kua nātou mamaʼo ʼi Ule.

ʼI te mavae ʼa Apalahamo pea mo tona famili ʼi Halane, neʼe nātou ʼolo ki te fenua neʼe higoa ko Kanaane. Neʼe ʼui age e Sehova: ‘Ko te fenua ʼaenī ʼe ʼau foaki atu anai maʼa tau fānau.’ Neʼe maʼuli ia Apalahamo ʼi Kanaane pea neʼe nofo ʼi te ʼu falelā.

Neʼe kamata tokoni ai te ʼAtua kia Apalahamo, ke lahi tana faga ōvi pea mo te tahi ʼu manu pea mo tana ʼu kaugana ʼe lauʼi teau. Kae neʼe mole ʼi ai hana fānau mo Sala.

ʼI te taʼu 99 ʼo Apalahamo, neʼe ʼui age leva e Sehova: ‘ ʼE ʼau fakapapau atu ʼe ke liliu anai ko te tāmai ʼa te hahaʼi ʼo te ʼu puleʼaga kehekehe.’ Kae ʼe lava hoko feafeaʼi koa ia te faʼahi ʼaia, he neʼe kua matutuʼa ʼaupito ia Apalahamo mo Sala, ʼo mole kei feala hanā maʼu fānau?

ʼE KOUTOU sio koa ki te meʼa ʼaē ʼe ʼamanaki fai e Apalahamo? ʼE ina toʼo te hele, pea ʼe ʼamanaki ke ina matehi tona foha. He koʼe koa ʼe ina fai te faʼahi ʼaia? Tou vakaʼi muʼa pe neʼe maʼu feafeaʼi e Apalahamo mo Sala tanā tama.

Tou manatuʼi, neʼe fakapapau age e te ʼAtua kia nāua, ʼe nā maʼu anai tanā tama. Kae neʼe mata faigataʼa te faʼahi ʼaia, koteʼuhi neʼe kua matutuʼa ia Apalahamo mo Sala. Kae neʼe tui ia Apalahamo ʼe feala ke fakahoko e te ʼAtua te meʼa ʼaē ʼe mata faigataʼa kia nāua. Neʼe koteā te meʼa ʼaē neʼe hoko?

ʼI te ʼosi fai e te ʼAtua tana fakapapau, neʼe hili kiai te taʼu katoa. Pea ʼi te taʼu 100 ʼo Apalahamo mo te taʼu 90 ʼo Sala, neʼe maʼu ai tanā tama ʼo nā fakahigoaʼi ko Isaake. Neʼe fakahoko e te ʼAtua tana fakapapau!

Kae ʼi te lahi ake ʼo Isaake, neʼe ʼahiʼahiʼi e Sehova te tui ʼa Apalahamo. Neʼe fēnei tana pāui age: ‘Apalahamo!’ Pea neʼe tali age e Apalahamo: ‘Koʼeni ʼau!’ Pea ʼui age e te ʼAtua: ‘Toʼo tou foha, tou foha ʼulu tokotahi, ko Isaake, pea ke hake ki te moʼuga ʼaē ka ʼau fakahā atu anai. Pea ʼi te potu ʼaia ʼe ke matehi ai anai tou foha pea ke mōlagaʼi ia ia ko he sakilifisio.’

Neʼe fakaloto mamahi ʼaupito te ʼu palalau ʼaia kia Apalahamo, koteʼuhi neʼe ʼofa mamahi ia Apalahamo ki tona foha. Pea tou manatuʼi, neʼe fakapapau age e te ʼAtua, ʼe nonofo anai te ʼu fānau ʼa Apalahamo ʼi te fenua ʼo Kanaane. Kae ʼe hoko feafeaʼi anai te fakapapau ʼaia mo kapau ʼe matehi ia Isaake? Neʼe mole mahino ia Apalahamo, kae neʼe hoko atu aipe tana fakalogo ki te ʼAtua.

ʼI tana kaku ki te moʼuga, neʼe haʼi e Apalahamo ia Isaake pea ina hili ia ia ki te ʼaletale ʼaē neʼe ina fai. Pea ina toʼo te hele ke ina matehi ai tona foha. Kae ʼi te temi pe ʼaia neʼe pāui ai te ʼaselo ʼa te ʼAtua ʼo ina ʼui fēnei: ‘Apalahamo, Apalahamo!’ Pea neʼe tali age e Apalahamo: ‘Koʼeni ʼau!’

Neʼe ʼui fēnei e te ʼAtua: ‘ ʼAua naʼa ke fai he meʼa ʼe kovi ki te tama pea ʼaua naʼa ke fai ki ai he meʼa. ʼI te temi nei kua ʼau ʼiloʼi ʼe ke tui kia te ʼau, koteʼuhi neʼe mole ke fakafisi ki te foaki mai ʼo tou foha maʼa ʼaku, tou foha ʼulu tokotahi.’

ʼI lahi leva ʼo te tui ʼa Apalahamo ki te ʼAtua! Neʼe faka tui ia ʼe mole he meʼa ʼe faigataʼa kia Sehova, pea neʼe feala ke fakatuʼuake e Sehova ia Isaake mai te mate. Kae neʼe mole ko te finegalo moʼoni ʼo te ʼAtua ke matehi e Apalahamo ia Isaake. Koia ʼo mole mamaʼo ʼi te potu ʼaia, neʼe fakaʼefihia e te ʼAtua te akeno ʼi te ʼulu ʼakau talatala, pea ina ʼui age kia Apalahamo ke ina sakilifisioʼi te manu ʼaia kae ina tuku tona foha ke maʼuli.