MOLE kei matatāʼofi e Sosefo te ʼu meʼa ʼaē ʼi tona loto. Neʼe ina ʼui age ki tana ʼu tagata faifekau ke nātou mavae ʼi te kogafale. ʼI tana ʼāteaina pe ʼaē mo tona ʼu tēhina, neʼe tagi ia Sosefo. ʼE feala ke tou fakakaukauʼi te punamaʼuli ʼo tona ʼu tēhina, koteʼuhi neʼe mole nātou ʼiloʼi te tupuʼaga ʼo tana tagi. Pea neʼe ina ʼui age: ‘Ko ʼau ia Sosefo. ʼE kei maʼuli koa taku tāmai?’

ʼI te lahi ʼaupito ʼo te punamaʼuli ʼo tona ʼu tēhina neʼe mole kei feala ai hanatou palalau. Kua nātou matataku. Kae neʼe ʼui age e Sosefo: ‘Koutou ʼunuʼunu mai.’ ʼI tanatou ʼunuʼunu age, neʼe ina ʼui age: ‘Ko ʼau ia Sosefo, tokotou tēhina, ʼaē neʼe koutou fakatau ki Esipito.’

ʼE hoko atu te palalau ʼa Sosefo ʼo fēnei: ‘ ʼAua naʼa koutou ʼiʼita ʼi takotou fakatau ʼau. Neʼe ko te finegalo moʼoni ʼo te ʼAtua ke ʼau haʼu ki Esipito moʼo hāofaki ʼo te hahaʼi. Neʼe fakanofo ʼau e Falaone ke ʼau pule ki te fenua katoa. Koia ʼi te temi nei koutou foimo ʼolo ki taku tāmai pea koutou fakahā age ki ai te meʼa ʼaenī. Pea koutou ʼui age ki ai ke haʼu ʼo nofo ʼi henī.’

Pea neʼe fāʼufua ia Sosefo ki tona ʼu tēhina, pea neʼe ʼuma kia nātou fuli. ʼI te ʼiloʼi ʼaē e Falaone neʼe ʼōmai te ʼu tēhina ʼo Sosefo, neʼe ina ʼui age kia Sosefo: ‘Ke nātou toʼo he ʼu saliote pea ke nātou ʼolo ʼo ʼaumai tanatou tāmai pea mo tonatou ʼu famili pea ke nātou ʼōmai ki henī. ʼE ʼau foaki anai kia nātou te kele ʼaē ʼe lelei tokotahi ʼi te fenua ʼo Esipito.’

Pea neʼe nātou fai te meʼa ʼaia. ʼE feala ke koutou sio ʼi henī kia Sosefo ʼe faka felāveʼi ki tana tāmai ʼi tana kaku mai ki Esipito mo tona famili katoa.

Neʼe kaugamālie ʼaupito te famili ʼo Sakopo. ʼO fakatahitahi ia nātou fuli ʼe ko te toko 70 ʼaē neʼe ʼōmai ki Esipito, ko Sakopo pea mo tana fānau pea mo tona ʼu mokopuna. Kae neʼe ʼi ai foki mo tonatou ʼu ʼohoana pea lagi mo te ʼu hahaʼi faifekau e tokolahi. Ko nātou fuli ʼaia neʼe ʼōmai ki Esipito. Neʼe higoaʼi ia nātou ko te kau Iselaelite, koteʼuhi neʼe fetogi e te ʼAtua te higoa ʼo Sakopo ko Iselaele. Kua liliu te kau Iselaelite ko te hahaʼi makehe ʼaupito ʼa te ʼAtua, ohage ko te meʼa ka tou vakaʼi anai ki muli age.

ʼE KOUTOU ʼofa koa ki te tagata mahaki ʼaenī ʼe tuʼu ʼi te paki? Ko tona higoa ko Sopo, pea ko te fafine ʼaē ʼe koutou sio ki ai ʼe ko tona ʼohoana. ʼE koutou ʼiloʼi koa te meʼa ʼaē ʼe ina ʼui age kia Sopo? Neʼe ina ʼui age, ‘Laukovi ki te ʼAtua pea ke ke mate.’ Tou vakaʼi muʼa pe koteā te tupuʼaga ʼo tana palalau feiā, pea koteā te tupuʼaga ʼo te mamahi ʼaupito ʼo Sopo.

Ko Sopo neʼe ko te tagata agatonu mo fakalogo kia Sehova. Neʼe nofo ʼi te fenua ko Usa, ʼaē ʼe mole mamaʼo ʼi Kanaane. Neʼe lahi ʼaupito te ʼofa ʼo Sehova kia Sopo, kae ʼe ʼi ai te tahi kehe neʼe fehiʼa ki ai. ʼE koutou ʼiloʼi pe ko ai?

Ko Satana te Tevolo. Tou manatuʼi, ko Satana ʼe ko te ʼaselo agakovi ʼaē ʼe fehiʼa kia Sehova. Neʼe lava tana fakahalaʼi ia Atama mo Eva ke nā talagataʼa kia Sehova, pea ʼi tana manatu ʼe toe feala anai ke ina fakalotoʼi te hahaʼi fuli ke nātou talagataʼa kia Sehova. Kae neʼe hoko koa tana manatu ʼaia? Kailoa. Tou manatuʼi te ʼu tagata pea mo te ʼu fafine agatonu ʼaē neʼe kua tou talanoa kiai. Ko te tokofia ʼe koutou ʼiloʼi tonatou ʼu higoa?

ʼI te ʼosi mate ʼo Sakopo pea mo Sosefo ʼi Esipito, ko Sopo neʼe ko te tagata pe ʼaia neʼe makehe tana agatonu kia Sehova ʼi te kele katoa. Neʼe loto ia Sehova ke ʼiloʼi e Satana ʼe mole feala tana fakalotoʼi te hahaʼi fuli ke nātou agakovi, pea neʼe ina ʼui age: ‘Sio kia Sopo. ʼE agatonu kia te ʼau.’

Pea ʼui fēnei e Satana, ‘ ʼE agatonu ia koteʼuhi neʼe ke tapuakiʼi ia ia pea ʼe lahi tona ʼu koloā. Kapau ʼe ke toʼo te ʼu meʼa ʼaia, ʼe laukovi anai kia te koe.’

Pea neʼe ʼui age ai e Sehova: ‘ ʼE ʼau fakagafua atu kia te koe, ke ke toʼo fuli tana ʼu meʼa. Fai kia Sopo te ʼu meʼa kovi fuli ʼaē ʼe ke loto kiai. ʼE tā ʼiloʼi ai anai peʼe laukovi anai kia te ʼau. Kae tokaga pe naʼa ke matehi ia ia.’

ʼUluaki, neʼe uga e Satana te ʼu tagata kaihaʼa ke nātou kaihaʼa te ʼu manu ʼa Sopo, tana ʼu kamelo, pea mo matematehi tana ʼu ōvi. Pea ʼaki te afā, neʼe ina matehi tana ʼu toe e toko 10. Ki muli age, neʼe fakahoko e Satana te mahaki fakalialia kia Sopo. Neʼe lahi ʼaupito te mamahi ʼo Sopo. Ko te tupuʼaga la ʼaia ʼo te ʼui fēnei e te ʼohoana ʼo Sopo: ‘Laukovi ki te ʼAtua pea ke ke mate.’ Kae neʼe mole fai e Sopo te meʼa ʼaia. Pea neʼe ʼōmai mo tona ʼu kaumeʼa ʼe toko tolu pea nātou ʼui age ki ai neʼe mole lelei te ʼu meʼa ʼaē neʼe ina fai ʼi tona maʼuli. Kae neʼe nofo agatonu aipe ia Sopo.

Ko te faʼahi ʼaia neʼe fiafia ʼaupito ai ia Sehova, pea neʼe ina tapuakina ia Sopo ki muli age, ohage ko takotou sio kiai ʼi te paki. Neʼe ina fakamālōlō ia ia ʼi tona mahaki. Neʼe toe maʼu e Sopo tana fānau matalelei e toko 10, pea neʼe lahi ʼaupito age tana ʼu manu, tana ʼu ōvi pea mo tana ʼu kamelo ʼi te ʼu manu ʼaē neʼe ina maʼu ʼi muʼa atu.

ʼE koutou nonofo agatonu tuʼumaʼu anai koa kia Sehova ohage ko Sopo? Kapau ʼe koutou nonofo agatonu, ʼe toe tapuakina anai mo koutou e te ʼAtua. ʼE feala anai ke koutou maʼuʼuli ʼo heʼegata ʼi te temi ʼaē ka liliu ai anai te kele katoa ʼo matalelei ohage ko te ʼōloto ʼo Eteni.