ʼI TE toe liliu mai ʼa Moisese ki Esipito, neʼe ina fakamatala ki tona tēhina ko Alone te ʼu milakulo fuli ʼaia. Pea ʼi te fakahā age e Moisese pea mo Alone te ʼu milakulo ʼaia ki te kau Iselaelite, neʼe tui te hahaʼi fuli ʼe kau ia Sehova mo nātou.

Pea neʼe ʼolo ia Moisese pea mo Alone kia Falaone. Neʼe nā ʼui age fēnei ki ai: ‘Ko Sehova te ʼAtua ʼo Iselaele neʼe ina ʼui fēnei, “Tuku taku hahaʼi ke ʼolo ia ʼaho e tolu, ke feala hanatou atolasio kia te ʼau ʼi te toafa.” ’ Kae neʼe tali maʼa Falaone: ‘ ʼE mole ʼau tui kia Sehova. Pea ʼe mole ʼau tuku anai ia Iselaele ke ʼalu.’

Neʼe ʼita ia Falaone, koteʼuhi neʼe loto te hahaʼi ki honatou temi mālōlō ke nātou ʼolo ai ʼo atolasio kia Sehova. Koia neʼe ina fakamālohiʼi ia nātou ke nātou gāue kinakina. Neʼe laukovi te kau Iselaelite kia Moisese ʼo ʼuhiga mo tonatou gaohi koviʼi, pea neʼe lotomamahi ia Moisese. Kae neʼe ʼui age e Sehova ki ai ke tuku tana lotomamahi. Neʼe ina ʼui fēnei: ‘ ʼE ʼau fai anai he meʼa ke tuku e Falaone taku hahaʼi ke ʼolo.’

Neʼe toe ʼolo ia Moisese pea mo Alone kia Falaone. ʼI te temi ʼaia neʼe nā fai te milakulo. Neʼe lī e Alone tona tokotoko ki lalo, pea neʼe liliu te tokotoko ʼaia ko te gata lahi. Kae neʼe toe lī e te ʼu tagata popoto ʼa Falaone tonatou ʼu tokotoko ki lalo, pea neʼe liliu te ʼu tokotoko ʼaia ko te ʼu gata. Kae neʼe folo e te gata ʼa Alone te ʼu gata ʼa te ʼu tagata popoto. Kae ʼo toe tatau aipe, neʼe mole fakagafua e Falaone ke mavae te kau Iselaelite.

Koia kua hoko leva te temi ʼaē ke fakahā ai e Sehova he ako kia Falaone. ʼE koutou ʼiloʼi pe koteā ʼaē neʼe ina fai? Neʼe ina fakahoko te ʼu tautea e 10 ki Esipito, peʼe ko te ʼu malaʼia lalahi e hogofulu.

ʼI te hili ʼo he ʼu tautea, neʼe pāuiʼi e Falaone ia Moisese, pea ina ʼui age: ‘Fakagata te tautea, pea ʼe ʼau tuku atu anai ia Iselaele ke ʼalu.’ Kae ʼi te fakagata ʼo te tautea, neʼe mole fetogi te manatu ʼa Falaone. Neʼe mole ina fakagafua ke mavae te hahaʼi. Kae ʼi te hili ʼo te 10 tautea, neʼe hoki fakagafua ai leva e Falaone ke mavae te kau Iselaelite.

ʼE koutou ʼiloʼi koa te ʼu tautea ʼaia e 10? Koutou fuli te pasina pea ʼe koutou ʼiloʼi ai leva pe koteā te ʼu tautea ʼaia.

KOUTOU sio ki te ʼu paki. ʼE hā ʼi te ʼu paki takitahi te ʼu tautea ʼaē neʼe fakahoko e Sehova ki Esipito. ʼI te ʼuluaki paki, ʼe koutou sio kia Alone ʼe ina tāʼi te Vaitafe ko Nilo ʼaki tona tokotoko. ʼI te temi ʼaē neʼe ina fai ai te meʼa ʼaia, neʼe liliu te vai ʼo te vaitafe ko te toto. Neʼe mamate te ʼu ika, pea kua kamata mamanu te vaitafe.

Pea neʼe fakahake e Sehova te ʼu kelenui mai te Nilo. Neʼe nātou leta haʼele—ʼi te ʼu gutuʼumu, ʼi te ʼu pa taʼo pane, ʼi te ʼu palepale ʼo te hahaʼi—ʼi te ʼu potu fuli. ʼI te mate ʼo te ʼu kelenui, neʼe tae e te kau Esipito pea kua mamanu te ʼu manu ʼaia ʼi te fenua.

Pea neʼe tāʼi e Alone te kele ʼaki tona tokotoko, pea neʼe liliu te efu ʼo te kele ko te ʼu namu. Ko te ʼu namu liliki ʼe usiʼusi. Ko te tolu tautea ʼaia ki te fenua ko Esipito.

Ko te tahi ʼu tautea neʼe nātou fakamamahiʼi pe te kau Esipito, kae neʼe mole lave ki te kau Iselaelite. Ko te fā tautea neʼe ko te ʼu foʼi lago lalahi neʼe nātou hūfi te ʼu ʼapi ʼo te kau Esipito. Ko te nima tautea neʼe ina tāmateʼi te ʼu manu. Neʼe lahi ʼaupito te ʼu manu mo te ʼu ōvi pea mo te ʼu tao ʼa te kau Esipito neʼe mamate ai.

Pea neʼe toʼo e Moisese pea mo Alone te lefulefu pea nā lī ki ʼoluga. Neʼe maʼu e te hahaʼi pea mo te ʼu manu te ʼu foʼi polo lalahi. Ko te ono tautea ʼaia.

Pea neʼe hiki e Moisese tona nima ki te lagi, pea neʼe fakatō ifo e Sehova te mana pea mo te ʼuamaka. Neʼe mole heʼeki tō he ʼuamaka feiā ʼi Esipito.

Ko te valu tautea neʼe ko te ʼu heʼe. Neʼe mole heʼeki hoko he meʼa feiā ʼi muʼa atu. Neʼe kai e te ʼu heʼe te ʼu meʼa fuli ʼaē neʼe mole maumauʼi e te ʼuamaka.

Ko te hiva tautea neʼe ko te fakapōʼuli. ʼI te lolotoga ʼo te ʼu ʼaho e tolu neʼe fakapōʼuli ai te fenua, kae neʼe mālama pe te potu ʼaē neʼe nonofo ai te kau Iselaelite.

Pea neʼe ʼui e te ʼAtua ki tana hahaʼi, ke nātou vali ki tonatou ʼu kaumatapā te toto ʼo he tao tagata kei mui peʼe ʼo he akeno tagata. Pea neʼe fakalaka te ʼaselo ʼa te ʼAtua ʼi Esipito. Kapau neʼe sio ki he kaumatapā neʼe vali kiai te toto, pea neʼe mole ina matehi he tahi ʼi te ʼapi ʼaia. Kae ko te ʼu ʼapi ʼaē neʼe mole vali toto tonatou ʼu kaumatapā, ʼe matehi ai anai e te ʼaselo ʼa te ʼAtua te ʼu ʼuluaki tupu ʼa te tagata pea mo te ʼu manu. Neʼe ko te 10 tautea ʼaia.

ʼI te ʼosi ʼo te tautea fakamuli ʼaia, neʼe ʼui age leva e Falaone ki te kau Iselaelite ke nātou ʼolo. Neʼe kua tokalelei fuli te hahaʼi ʼa te ʼAtua, pea ʼi te po pe ʼaia neʼe nātou mavae ai ʼi Esipito.