HILI kiai māhina e lua ʼi tanatou mavae mai Esipito, neʼe tau te kau Iselaelite ki te Moʼuga ʼo Sinai, ʼaē neʼe higoaʼi ko Holepe. Neʼe ko te potu tonu ʼaia ʼaē neʼe palalau ai ia Sehova kia Moisese ʼi te kiʼi fuʼu ʼakau ʼaē neʼe ulo. Neʼe nonofo ai te hahaʼi lolotoga he kiʼi temi.

Lolotoga te talitali ʼa te hahaʼi ʼi lalo, neʼe hake ia Moisese ki te moʼuga. ʼI tana kaku atu ki te tumutumu ʼo te moʼuga, neʼe tala age e Sehova kia Moisese ʼe ina loto ke fakalogo te kau Iselaelite kia te Ia, pea ke nātou liliu ko Tana hahaʼi makehe. ʼI te hifo mai ʼa Moisese, neʼe ina fakahā age ki te kau Iselaelite te meʼa ʼaē neʼe ʼui age e Sehova. Pea neʼe ʼui age e te hahaʼi ʼe nātou fakalogo anai kia Sehova, koteʼuhi ʼe nātou fia liliu ko tana hahaʼi.

ʼI te temi ʼaia neʼe fai ai e Sehova te meʼa faikehe. Neʼe ina fakakohu te tumutumu ʼo te moʼuga ko Sinai, pea mo ina fakaʼuʼulu te ʼu mana. Pea ina ʼui fēnei age ki te hahaʼi: ‘Ko ʼau ia Sehova tokotou ʼAtua ʼaē neʼe ina fakamavae koutou mai Esipito.’ ʼOsi ʼaia pea ina ʼui age: ‘ ʼE mole koutou atolasio anai ki he tahi age ʼu ʼatua gata pe kia te ʼau.’

Neʼe foaki e te ʼAtua ki te kau Iselaelite te tahi ʼu folafola e hiva, peʼe ko te ʼu lao. Neʼe matataku ʼaupito te hahaʼi. Neʼe nātou ʼui age kia Moisese: ‘Palalau mai koe kia mātou, koteʼuhi ʼe mātou matataku naʼa palalau mai te ʼAtua kia mātou pea mātou mamate ai.’

Ki muli age neʼe ʼui age e Sehova kia Moisese: ‘Hake mai kia te ʼau ki te moʼuga. ʼE ʼau foaki atu anai te ʼu maka e lua ʼaē neʼe ʼau tohi ai te ʼu lao ʼaē ʼe tonu ke mulimuli kiai te hahaʼi.’ Pea neʼe toe hake ia Moisese ki te moʼuga. Neʼe nofo ia ʼi te moʼuga ia ʼaho pea mo po e 40.

Neʼe lahi te ʼu lao ʼaē neʼe foaki e te ʼAtua ki tana hahaʼi. Neʼe tohi e Moisese te ʼu lao ʼaia. Neʼe toe foaki age e te ʼAtua kia Moisese te ʼu maka e lua. ʼI te ʼu maka ʼaia, neʼe tohi totonu ai e te ʼAtua te ʼu lao e 10 ʼaē neʼe ina fakahā age ki te hahaʼi fuli. Neʼe fakahigoaʼi te ʼu lao ʼaia, ko te ʼu Folafola e Hogofulu.

Ko te ʼu Folafola e Hogofulu ʼe ko te ʼu lao maʼuhiga. Kae ʼe toe maʼuhiga pe foki mo te tahi ʼu tuʼuga lao ʼaē neʼe foaki e te ʼAtua ki te kau Iselaelite. ʼE kau ai te lao ʼaenī: ‘ ʼE tonu ke ke ʼofa kia Sehova, tou ʼAtua, ʼaki tou loto katoa, mo tou ʼatamai katoa, mo tou nefesi katoa, pea mo tou mālohi katoa.’ Pea koʼeni te tahi lao: ‘ ʼE tonu ke ke ʼofa ki tou kāiga ohage pe ko koe totonu.’ Neʼe ʼui e Sesu Kilisito te ʼAlo ʼo te ʼAtua, ko te ʼu lao tāfito ʼaia e lua ʼaē neʼe foaki e Sehova ki tana hahaʼi ko Iselaele. Ki muli age, ʼe tou vakaʼi anai te tahi ʼu meʼa ʼo ʼuhiga mo te ʼAlo ʼo te ʼAtua pea mo tana ʼu akonaki.

KOTEĀ koa ʼaē ʼe lolotoga fai e te hahaʼi? ʼE nātou fetapā ki te ʼuhiʼi pipi! He koʼe ʼe nātou fai ia te faʼahi ʼaia?

ʼI te kua loaloaga fau ʼo te nofo ʼa Moisese ʼi te moʼuga, neʼe ʼui e te hahaʼi: ‘ ʼE mole tou ʼiloʼi te meʼa ʼaē kua hoko kia Moisese. Koia tou fai hotatou ʼatua ke ina fakamavae tatou ʼi te fenua ʼaenī.’

Pea neʼe ʼui e Alone te tēhina ʼo Moisese, ‘Koutou toʼo ʼokotou ʼu hau aulo, pea ke koutou ʼaumai kia te ʼau.’ ʼI te ʼosi ʼavage e te hahaʼi tonatou ʼu meʼa gigila, neʼe haka e Alone te ʼu meʼa ʼaia, pea ina faʼu ʼaki te ʼuhiʼi pipi aulo. Pea neʼe ʼui e te hahaʼi: ‘Koʼeni totatou ʼAtua, ʼaē neʼe ina fakamavae tatou mai Esipito!’ Pea neʼe fai e te kau Iselaelite te lafeti lahi, pea neʼe nātou atolasio ki te ʼuhiʼi pipi aulo.

ʼI te sio ʼa Sehova ki te faʼahi ʼaia, neʼe ʼita ʼaupito. Pea neʼe ina ʼui age kia Moisese: ‘Foimo hifo ki lalo. Kua kovi ʼaupito te aga ʼa te hahaʼi. Kua nātou galoʼi taku ʼu lao pea kua nātou tulolo ki te ʼuhiʼi pipi aulo.’

Neʼe foimo hifo atu aipe ia Moisese ʼi te moʼuga. Pea ʼi tana fakaōvi atu kiai, neʼe sio ia ki te ʼuhiʼi pipi. Neʼe hiva te hahaʼi pea mo nātou meʼe ia tafa ʼo te ʼuhiʼi pipi aulo! ʼI te ʼita ʼaupito ʼo Moisese, neʼe ina peheʼi ki lalo te ʼu maka e lua ʼaē neʼe tohi ai te ʼu lao, pea neʼe fasifasi liki. Pea neʼe ina toʼo te ʼuhiʼi pipi aulo ʼo haka. Pea neʼe ina momosi ke efu.

Neʼe kovi ʼaupito te aga ʼaē neʼe fai e te hahaʼi. Pea neʼe ʼui age e Moisese ki ʼihi ia nātou ke nātou toʼo tanatou ʼu heletā, ʼo ina ʼui fēnei: ‘Ko te hahaʼi agakovi ʼaē neʼe atolasio ki te ʼuhiʼi pipi aulo ʼe tonu ke nātou mamate.’ Pea ko te ʼu tagata ʼaia neʼe nātou matematehi te toko 3 000! ʼE mole ko he fakatokaga koa la ʼaia kia tatou ke tou atolasio kia Sehova tokotahi pe, kae mole tonu ke tou atolasio ki he ʼu ʼatua loi?