KOUTOU sio kia Sosue. ʼE ina ʼui fēnei: ‘Laʼā, tuʼu maʼu!’ Pea neʼe tuʼu maʼu te laʼā. ʼE tuʼu tonu te laʼā ʼi te lotomalie ʼo te lagi lolotoga te ʼaho katoa. Ko Sehova ʼaē neʼe ina fai te meʼa ʼaia! Kae tou vakaʼi muʼa pe koʼe neʼe loto ia Sosue ke haga mū te laʼā.

Ko te ʼu hau agakovi e toko nima ʼo te fenua ʼo Kanaane neʼe nātou kamata tauʼi te kau Kapaonite, koia neʼe fekauʼi ai e te kau Kapaonite te tagata ke ʼalu ʼo kole kia Sosue ke tokoni age kia nātou. Neʼe ina ʼui age: ‘Foimo haʼu ʼo hāofaki mātou! He kua ʼōmai te ʼu hau fuli ʼo te ʼu kolo ʼo te ʼu moʼuga ʼo tauʼi takotou ʼu hahaʼi kaugana.’

Neʼe ʼalu atu aipe ia Sosue pea mo tana ʼu tagata tau. Neʼe nātou haʼele ʼi te po katoa. ʼI tanatou tau atu ki Kapaone, neʼe matataku te ʼu tagata tau ʼa te ʼu hau ʼaē e toko nima pea neʼe nātou kamata feholaki. Pea neʼe fakatō ifo e Sehova te ʼuamaka lahi mai te lagi, pea neʼe lahi age ia nātou ʼaē neʼe mamate ʼi te ʼuamaka, ia nātou ʼaē neʼe tāmateʼi e te ʼu tagata tau ʼa Sosue.

Neʼe sio ia Sosue kua vave tō te laʼā. ʼE fakapōʼuli anai, pea ʼe lahi anai te ʼu tagata tau ʼa te ʼu hau agakovi ʼaē e toko nima ʼe feholaki anai. Koia neʼe faikole ai ia Sosue kia Sehova pea ina ʼui fēnei: ‘Laʼā, tuʼu maʼu!’ Pea ʼi te haga mū ʼo te laʼā, neʼe faigafua ai te mālo ʼa te kau Iselaelite ʼi te tau.

Neʼe lahi te ʼu hau agakovi ʼi Kanaane neʼe nātou fehihiʼa ki te hahaʼi ʼa te ʼAtua. Neʼe taʼu ono te tauʼi e Sosue pea mo tana ʼu tagata tau te ʼu hau e 31 ʼo te fenua. ʼI te ʼosi ʼo te faʼahi ʼaia, pea fakatokagaʼi e Sosue ʼe ʼaoga ke vahe te fenua ʼo Kanaane ki te ʼu telepi ʼaia ʼaē neʼe ʼaoga kia nātou he telituale.

Neʼe lahi te ʼu taʼu kua fakalaka, pea neʼe mate ia Sosue ʼi tona taʼu 110. ʼI te temi ʼaē neʼe maʼuli ai ia Sosue pea mo tona ʼu kaumeʼa, neʼe fakalogo te hahaʼi kia Sehova. Kae ʼi te mamate leva ʼo te ʼu tagata agalelei ʼaia, neʼe kamata fai e te hahaʼi, te ʼu meʼa ʼaē ʼe kovi pea neʼe hoko ai te ʼu fihifihia. ʼI te temi ʼaia neʼe ʼaoga moʼoni ai kia nātou te tokoni ʼa te ʼAtua.

ʼI TE ʼu temi ʼaē neʼe fihifihia ai te kau Iselaelite, neʼe nātou pāui kia Sehova. Neʼe tali e Sehova tanatou pāui ʼo ina foaki age te ʼu tagata takitaki lototoʼa moʼo tokoni kia nātou. ʼE fakahigoa e te Tohi-Tapu te ʼu tagata takitaki ʼaia ko te ʼu tuʼi fakamāu. Ko Sosue neʼe ko te ʼuluaki tuʼi fakamāu, pea ko ʼihi tuʼi fakamāu neʼe hoa atu ki ai, ko Oteniele, mo Ehuti pea mo Samekale. Kae ko te toko lua ʼi te ʼu hahaʼi ʼaē neʼe tokoni ki Iselaele, ko te ʼu fafine neʼe higoa ko Tepola pea mo Saele.

Ko Tepola neʼe ko te fafine polofeta. Neʼe fakahā age e Sehova kia ia te ʼu meʼa ʼaē ka hoko, pea neʼe tonu ke ina fakahā ki te hahaʼi te ʼu meʼa ʼaē neʼe ʼui age e Sehova. Neʼe toe kau foki mo Tepola ki te ʼu tuʼi fakamāu. Neʼe heka ia ʼi te lalo fuʼu palema ʼo te kolo, pea neʼe ʼōmai te hahaʼi ʼo kumi tokoni kia ia ʼo ʼuhiga mo tonatou ʼu fihifihia.

ʼI te temi ʼaia ko Sapini ʼaē neʼe hau ʼi Kanaane. Neʼe ko tana ʼu saliote e 900. ʼI te mālohi ʼaupito ʼo tana kautau neʼe tokolahi te kau Iselaelite neʼe ʼave fakakinau ke nātou kaugana kia Sapini. Ko te pule ʼo te kautau ʼa Sapini neʼe higoa ko Sisela.

ʼI te tahi ʼaho, neʼe fekau e Tepola te tuʼi fakamāu ko Palake pea ina ʼui age: ‘Neʼe ʼui fēnei e Sehova: “Toʼo he ʼu tagata e toko 10 000 pea ke taki ia nātou ki te Moʼuga ko Tapō. ʼI te koga meʼa ʼaia ʼe ʼau taki mai anai ia Sisela kia koe. Pea ʼe ʼau tuku atu anai te mālo kia koe pea mo tau kautau.” ’

Neʼe ʼui age e Palake kia Tepola: ‘ ʼE ʼau ʼalu anai mo kapau ʼe ke haʼu mo ʼau.’ Neʼe ʼalu ai ia Tepola mo ia, kae neʼe ina ʼui age kia Palake: ‘ ʼE mole ke maʼu anai te mālo, koteʼuhi ʼe tuku anai e Sehova ia Sisela ki he fafine.’ Pea neʼe hoko te meʼa ʼaia.

Neʼe hifo ia Palake mai te Moʼuga ko Tapō ʼo faka felāveʼi mo te kautau ʼa Sisela. Fokifā pe kua fakahoko e Sehova te puvai, pea neʼe malemo ai te tokolahi ʼo te ʼu kautau. Kae neʼe hifo ia Sisela ʼi tana saliote ʼo hola.

ʼOsi ʼaia pea tau atu ia Sisela ki te falelā ʼo Saele. Neʼe fakaafe e Saele ia Sisela ke hū age, pea neʼe ina foaki age te huʼa pipi ke ina ʼinu. Neʼe tupu ai tona fia moe, pea mole tuai pea māʼumoea. ʼOsi ʼaia pea ʼalu ia Saele ʼo toʼo te moʼi ukamea hunuki ʼo te falelā pea ina fakaulu ki te foʼi ʼulu ʼo te tagata agakovi ʼaia ʼaki te hāmale. Ki muli age, ʼi te haʼu ʼa Palake, neʼe ina fakahā age ia Sisela kua mate! Koia ʼe koutou fakatokagaʼi ai neʼe hoko moʼoni te meʼa ʼaē neʼe ʼui e Tepola.

Pea neʼe toe matehi mo te Hau ko Sapini, pea neʼe maʼu e te kau Iselaelite te tokalelei lolotoga he ʼu kiʼi temi.