NEʼE kua koutou fai koa he fakapapau pea ki muli age neʼe koutou fakatokagaʼi ʼe faigataʼa tona fakahoko? Neʼe hoko te faʼahi ʼaia ki te tagata ʼaē ʼe tuʼu ʼi te paki ʼaenī, pea ko te tupuʼaga la ʼaia ʼo tana lotomamahi. Ko te tagata ʼaia neʼe ko te tuʼi fakamāu lototoʼa neʼe higoa ko Sefeteo.

Neʼe maʼuli ia Sefeteo ʼi te temi ʼaē neʼe mole kei tauhi ai te kau Iselaelite kia Sehova. Neʼe nātou toe fai te ʼu meʼa ʼaē ʼe kovi. Koia neʼe tuku ai e Sehova ke gaohi koviʼi ia nātou e te hahaʼi ʼo te fenua ko Amoni. Ko te faʼahi ʼaia neʼe ina uga ai te kau Iselaelite ke nātou pāui kia Sehova: ‘Neʼe mātou agahala kia te koe. Fakalelei, ka ke hāofaki mātou!’

Neʼe fakahemala te hahaʼi ʼi te ʼu aga kovi ʼaē neʼe nātou fai. Neʼe nātou fakahā tonatou loto fakahemala ʼo nātou toe tauhi kia Sehova. Pea neʼe toe tokoni ai ia Sehova kia nātou.

Neʼe fili e te hahaʼi ia Sefeteo ke ina tauʼi te kau Amonite agakovi. Neʼe loto ʼaupito ia Sefeteo ke tokoni age ia Sehova kia ia ʼi te tau. Pea neʼe ina fakapapau fēnei kia Sehova: ‘Kapau ʼe ke tuku mai ke ʼau mālo ʼi te kau Amonite, pea ko ia ʼaē ka ʼuluaki hū mai ki tuʼa mai toku ʼapi ʼo faka felāveʼi mai kia ʼau ʼi taku liliu mai te tau, ʼe ʼau foaki atu anai maʼa koe.’

Neʼe fagono ia Sehova ki te fakapapau ʼa Sefeteo, pea neʼe tokoni kia ia ke ina maʼu te mālo. ʼI te liliu mai ʼa Sefeteo ki tona ʼapi, ʼe koutou ʼiloʼi la pe ko ai ʼaē neʼe ʼuluaki hū mai ki tuʼa ʼi tona ʼapi ʼo faka felāveʼi mai kia ia? Neʼe ko tona ʼofafine, tana tamasiʼi ʼulu tokotahi. Neʼe kalaga ia Sefeteo: ‘E, toku ʼofafine! ʼE ke fakaloto mamahiʼi ʼau. Neʼe ʼau fai taku fakapapau kia Sehova, pea ʼe tonu ke ʼau fakahoko te fakapapau ʼaia.’

ʼI te ʼiloʼi e te ʼofafine ʼo Sefeteo te fakapapau ʼaia, ʼi te kamata neʼe lotomamahi. Koteʼuhi ʼe tonu anai ke mavae ʼi tana tāmai pea mo tona ʼu kaumeʼa. Kae ʼe ina fakaʼaogaʼi anai tona maʼuli katoa moʼo tauhi kia Sehova ʼi te tapenakulo ʼaē ʼi Silo. Pea neʼe ina ʼui age ai ki tana tāmai: ‘Kapau neʼe ke fai he fakapapau kia Sehova, pea ʼe tonu ke ke fakahoko.’

Pea neʼe ʼalu te ʼofafine ʼo Sefeteo ki Silo, pea neʼe ina foaki tona maʼuli moʼo tauhi kia Sehova ʼi tona tapenakulo. ʼI te taʼu fuli lolotoga ʼaho e fā ʼe ʼolo te ʼu taʼahine ʼo Iselaele ʼo ʼaʼahi ia ia, pea ʼe nātou fakafiafia fakatahi ʼi te temi ʼaia. Neʼe ʼoʼofa te hahaʼi ki te ʼofafine ʼo Sefeteo, koteʼuhi neʼe ko he kaugana lelei ʼa Sehova.

ʼE KOUTOU ʼiloʼi koa pe ko ai te higoa ʼo te tagata ʼaē neʼe mālohi tokotahi ʼi te tagata fuli pe? Neʼe ko te tuʼi fakamāu neʼe higoa ko Samisoni. Neʼe ko Sehova ʼaē neʼe ina foaki kia Samisoni tona mālohi. ʼI muʼa ʼo te tupu ʼo Samisoni, neʼe ʼui age e Sehova ki tana faʼe: ‘ ʼE mole kei tuai pea ʼe ke maʼu anai hau tamasiʼi tagata. ʼE ina hāofaki anai ia Iselaele ʼi te kau Filisitini.’

Ko te kau Filisitini neʼe ko te ʼu hahaʼi agakovi neʼe nonofo ʼi Kanaane. Neʼe lahi ʼaupito tanatou ʼu tagata tau, pea neʼe nātou gaohi koviʼi te kau Iselaelite. ʼI te tahi ʼaho, neʼe ʼalu ia Samisoni ki te koga meʼa ʼaē neʼe nonofo ai te kau Filisitini, pea neʼe ʼoho age te laione kia ia. Kae neʼe matehi e Samisoni te laione ʼaki pe tona ʼu nima. Neʼe ina toe matehi foki mo te ʼu Filisitini agakovi ʼe lauʼi teau.

Ki muli age neʼe manako ia Samisoni ʼi te fafine neʼe higoa ko Talila. Neʼe fakapapau age e te ʼu tagata takitaki ʼo te kau Filisitini kia Talila, ʼe nātou takitahi foaki anai kia ia he ʼu foʼi piesi siliva e 1 100, mo kapau ʼe ina fakahā age kia nātou te meʼa ʼaē ʼe tupu ai te mālohi ʼaupito ʼo Samisoni. Neʼe fia fai ia Talila ki te falā ʼaia. Neʼe mole ʼofa moʼoni kia Samisoni, pea mo te hahaʼi ʼa te ʼAtua. Pea neʼe ina fakafehuʼi tuʼumaʼu ia Samisoni pe koteā te meʼa ʼaē ʼe tupu ai tona mālohi.

Pea neʼe fakahā age leva e Samisoni kia Talila te meʼa ʼaē ʼe tupu ai tona mālohi. Neʼe ina ʼui age: ‘Ko toku ʼulu neʼe mole heʼeki kosi. ʼI te temi ʼaē neʼe ʼau tupu ai, neʼe fili ʼau e te ʼAtua ke ʼau liliu ko he kaugana makehe, ko he Nasilea. Kapau ʼe kosi toku ʼulu, pea ʼe puli ai anai toku mālohi.’

ʼI te ʼiloʼi e Talila te faʼahi ʼaia, neʼe ina fakamoe ia Samisoni ʼi ʼona tuli. ʼOsi ʼaia pea ina pāuiʼi te tagata ke haʼu ʼo kosi tona ʼulu. ʼI te ʼala ake ʼa Samisoni, kua puli tona mālohi. Pea neʼe ʼōmai ai te kau Filisitini ʼo puke ia ia. Neʼe nātou fakakiviʼi ʼona mata, pea nātou fakaliliu ia ia ko tanatou tagata kaugana.

ʼI te tahi ʼaho neʼe fai ai te fakafiafia lahi ʼa te kau Filisitini ʼo nātou tauhi ki tonatou ʼatua ko Takone, pea neʼe nātou ʼaumai ia Samisoni mai te fale pilisoni ke nātou fakalainoaʼi. ʼI te temi ʼaia, neʼe kua toe loloa te ʼulu ʼo Samisoni. Neʼe ʼui age e Samisoni ki te kiʼi tama ʼaē ʼe ina takitaki ia ia ʼaki tona nima: ‘Tuku muʼa ke ʼau fāfā ki te ʼu pou ʼo te fale.’ Pea neʼe faikole ia Samisoni kia Sehova ke ina foaki age tona mālohi, pea neʼe kapa ki te ʼu pou. Neʼe kalaga fēnei: ‘Ke ʼau mate mo te kau Filisitini.’ Neʼe ko te toko 3 000 Filisitini ʼaē neʼe kau ʼi te lafeti, pea ʼi te temi ʼaē neʼe kapa ai ia Samisoni ki te ʼu pou ʼo te fale, neʼe holo ai te fale pea neʼe mamate fuli ai te hahaʼi agakovi ʼaia.