ʼI TE ʼosi matehi e Tavite ia Koliate, ko Apinea te pule ʼo te kautau neʼe ina ʼave ia ia kia Saulo. Neʼe leleiʼia e Saulo ia Tavite. Neʼe ina fakanofo ia ia ke pule ki tana kautau pea neʼe ina tāʼofi ia ia ke nofo ʼi te ʼapi ʼo te hau.

Ki muli age, ʼi te liliu mai ʼa te kautau mai tanatou tauʼi te kau Filisitini, neʼe hiva fēnei te hahaʼi fafine: ‘Neʼe matehi e Saulo te ʼu lauʼi afe, kae neʼe matehi e Tavite te ʼu lauʼi hogofulu afe.’ Neʼe tupu ai te maheka ʼa Saulo, koteʼuhi neʼe lahi age te faka maʼuhigaʼi ʼo Tavite. Kae neʼe mole maheka te foha ʼo Saulo ko Sonatane. Neʼe ʼofa mamahi ia kia Tavite, pea neʼe toe ʼofa foki mo Tavite kia Sonatane. Koia neʼe nā fefakapapauʼaki ai ʼe nā kaumeʼa tuʼumaʼu anai.

Neʼe poto lelei ia Tavite ʼi te tā alepa, pea neʼe leleiʼia e Saulo tana fai musika ʼaia. Kae ʼi te tahi ʼaho neʼe maheka ia Saulo pea neʼe ina fai te meʼa ʼe kovi. Lolotoga te tā alepa ʼa Tavite, neʼe toʼo e Saulo tana tao pea ina hokaʼi ia ia, ʼo ʼui maʼana: ‘ ʼE ʼau tutuki anai ia Tavite ki te kaupā!’ Kae neʼe kalo ia Tavite, pea neʼe hāo ai. Ki muli age neʼe toe hala aipe te hokaʼi e Saulo ia Tavite ʼaki tana tao. Pea neʼe ʼiloʼi ai e Tavite kua tonu ke nofo tokaga.

Kei koutou manatuʼi koa te fakapapau ʼaē neʼe fai e Saulo? Neʼe ina ʼui ʼe ina foaki anai tona ʼofafine ke ʼohoana mo te tagata ʼaē ka ina matehi anai ia Koliate. Neʼe ʼui age e Saulo kia Tavite ʼe feala tana foaki age kia ia tona ʼofafine ko Mikale, kae ʼe tonu muʼa ke ina matehi he ʼu tagata Filisitini e toko 100. Koutou fakakaukauʼi muʼa te meʼa ʼaia! Neʼe manatu ia Saulo ʼe matehi anai ia Tavite e te kau Filisitini. Kae neʼe mole hoko te faʼahi ʼaia, pea neʼe foaki ai e Saulo tona ʼofafine ke ʼohoana mo Tavite.

ʼI te tahi ʼaho neʼe fakahā e Saulo kia Sonatane pea mo tana ʼu kaugana fuli ʼe ina fia matehi ia Tavite. Kae neʼe ʼui age e Sonatane ki tana tāmai: ‘ ʼAua naʼa ke fai he meʼa ʼe kovi kia Tavite. Neʼe mole heʼeki ina fai he meʼa ʼe kovi kia koe. Kae ko meʼa fuli ʼaē neʼe ina fai neʼe ʼaoga ʼaupito kia koe. Neʼe feala ke hoko he tuʼutāmaki kia ia ʼi tana matehi ia Koliate, pea ʼi tau sio ki te meʼa ʼaia, neʼe ke fiafia ai.’

Neʼe fakalogo ia Saulo ki tona foha, pea neʼe ina fakapapau age ʼe mole ina matehi anai ia Tavite. Neʼe toe liliu mai ia Tavite, pea toe tauhi kia Saulo ʼi tona ʼapi ohage ko tana fai ʼi muʼa atu. Kae ʼi te tahi ʼaho, lolotoga te fai mahōlō ʼa Tavite, neʼe toe hokaʼi e Saulo tana tao kia Tavite. Neʼe kalo ia Tavite, pea neʼe ʼalu tana tao ʼo tuʼu ʼi te kaupā. Ko tona tuʼa tolu leva ʼaia! Kua ʼiloʼi leva e Tavite ʼe tonu ke foimo hola!

ʼI te po pe ʼaia neʼe ʼalu ai ia Tavite ki tona ʼapi. Kae neʼe fekauʼi e Saulo te ʼu tagata ke nātou ʼolo ʼo matehi ia ia. Neʼe ʼiloʼi e Mikale te ʼu fakatuʼutuʼu ʼa tana tāmai. Koia neʼe ina ʼui ai ki tona ʼohoana: ‘Kapau ʼe mole ke hola ʼi te po pe ʼaenī, pea ʼe ke mate anai ʼapogipogi.’ ʼI te po pe ʼaia neʼe tokoni ia Mikale kia Tavite ʼo fakahola ʼi te matapā fakamālama. Lolotoga taʼu e fitu, neʼe tonu ke feholaʼaki ia Tavite naʼa maʼu ia ia e Saulo.

ʼE KOUTOU ʼiloʼi koa pe ko ai te fafine finemui ʼaē ʼe haʼu ʼo faka felāveʼi mai kia Tavite? ʼE higoa ko Apikaela. Neʼe agapoto, pea neʼe ʼalu ʼo tāʼofi ia Tavite ke ʼaua naʼa ina fai he meʼa ʼe kovi. Kae ʼi muʼa ʼo hatatou ʼiloʼi pe koteā te meʼa ʼaia, tou vakaʼi muʼa pe koteā te meʼa ʼaē neʼe hoko kia Tavite.

ʼI te ʼosi hola ʼa Tavite mai ia Saulo, neʼe ʼalu ia ʼo nono ʼi te ʼana. Ko tona ʼu tēhina pea mo te toe ʼo tona famili neʼe nātou ʼōmai ʼo nonofo mo ia. Ko te ʼu tagata e toko 400 neʼe ʼōmai ʼo kau mo ia, pea neʼe liliu ia Tavite ko tonatou tagata takitaki. Pea neʼe ʼalu ia Tavite ki te hau ʼo Moape pea ina ʼui fēnei: ‘Fakalelei siʼou loto ka ke fakagafua mai ke nonofo taku tāmai mo taku faʼe mo koutou ʼo aʼu ki taku ʼiloʼi pe koteā te meʼa ʼaē ka hoko kia ʼau.’ Ki muli age neʼe ʼalu ia Tavite pea mo tana ʼu tagata ʼo fenonoʼi ʼi te ʼu moʼuga.

ʼI te ʼosi ʼo te faʼahi ʼaia pea felāveʼi ia Tavite mo Apikaela. Ko tona ʼohoana ko Napale neʼe ko he tagata neʼe lahi ʼaupito tona ʼu kele. Neʼe ʼi ai tana ʼu ōvi e 3 000 pea mo tana ʼu tao e 1 000. Ko Napale neʼe ko he tagata agakovi, kae neʼe finemui tona ʼohoana ko Apikaela. Tahi ʼaē meʼa, neʼe poto ʼi te fai ʼo te meʼa ʼaē ʼe totonu. ʼI te tahi ʼaho neʼe ina hāofaki tona famili. Tou vakaʼi pe neʼe ina fakahoko feafeaʼi.

Neʼe agalelei ia Tavite pea mo tana ʼu tagata kia Napale. Neʼe nātou puipui tana faga ōvi. Koia ʼi te tahi ʼaho neʼe fekauʼi e Tavite tana ʼu tagata ke nātou ʼolo ʼo kole meʼa kai kia Napale. Neʼe tau atu te ʼu tagata ʼa Tavite kae nātou lolotoga kosi te fulu ʼo te ʼu ōvi. Neʼe ko he ʼaho fakafiafia ʼaia, pea neʼe lahi ʼaupito te ʼu meʼa kai lelei ʼa Napale. Pea neʼe ʼui fēnei e te ʼu tagata ʼa Tavite: ‘Neʼe mātou agalelei kia koe. Neʼe mole mātou kaihaʼa hau ōvi, kae neʼe mātou taupau ia nātou. ʼI te temi nei, fakalelei siʼou loto, ka ke foaki mai hamatou meʼa kai.’

Neʼe ʼui age e Napale: ‘ ʼE mole ʼau foaki atu anai taku meʼa kai maʼa ni tagata ohage ko koutou.’ Neʼe kovi ʼaupito tana palalau, pea neʼe ina lau te ʼu meʼa kovi ʼo ʼuhiga mo Tavite. ʼI te liliu ʼa te ʼu tagata ʼaia ʼo fakahā kia Tavite te meʼa ʼaē neʼe hoko, neʼe ʼita ʼaupito ia Tavite. Neʼe ina ʼui age ki tana ʼu tagata: ‘Toʼo ʼakotou ʼu heletā!’ Pea kamata ai tanatou fagona ke nātou ʼolo ʼo matehi ia Napale pea mo tana ʼu tagata.

ʼI te logo ʼa te tahi tagata ʼa Napale ki te leakovi ʼa Napale, neʼe ʼalu ia ʼo fakahā kia Apikaela te meʼa ʼaē neʼe hoko. ʼI te moʼi temi pe ʼaia, neʼe teuteuʼi ai e Apikaela te meʼa kai. Neʼe ina ʼai ki tana ʼu asino pea ʼalu ai tona fagona. ʼI tana felāveʼi mo Tavite, neʼe hifo ifo ia ʼi tana asino, ʼo tulolo pea ina ʼui age: ‘Fakalelei mai, ʼaua naʼa ke tokagaʼi toku ʼohoana ko Napale. ʼE ko he vale ia, pea ʼe aga fakavale ia. Koʼeni te meʼa ʼofa. Fakalelei ka ke toʼo, pea ke fakamolemole mai kia mātou ʼo ʼuhiga mo te meʼa ʼaē neʼe hoko.’

Neʼe tali age e Tavite: ‘ ʼE ke agapoto. Neʼe ke tāʼofi ʼau ke ʼaua naʼa ʼau matehi ia Napale moʼo totogi ʼaki tana agakovi. ʼAlu ki tou ʼapi ʼi te tokalelei.’ Ki muli age, ʼi te mate ʼo Napale, neʼe liliu ia Apikaela ko te ʼohoana ʼo Tavite.