NEʼE kei tūpulaga ia Salomone ʼi te temi ʼaē neʼe fakanofo ai ke hau. Neʼe ʼofa ia kia Sehova, pea neʼe mulimuli ia ki te ʼu tokoni lelei ʼaē neʼe foaki age e tana tāmai ko Tavite. Neʼe ʼofa ia Sehova kia Salomone, pea ʼi te tahi po neʼe ina ʼui age ki ai ʼi te moemisi: ‘Salomone, koteā te meʼa ʼaē ʼe ke loto ke ʼau foaki atu?’

Neʼe tali age e Salomone: ‘Sehova toku ʼAtua, ʼe kei ʼau tūpulaga pea ʼe mole ʼau ʼiloʼi peʼe feafeaʼi te fai ʼo toku tuʼulaga hau. Koia ke ke foaki mai kia ʼau te poto ke feala haku takitaki lelei tau hahaʼi.’

Neʼe tali e Sehova te meʼa ʼaē neʼe kole age e Salomone. Pea neʼe Ina ʼui age: ‘ ʼUhi ko tau kole mai te poto kae mole ko he maʼuli fualoa peʼe ko he ʼu koloā, koia ʼe ʼau foaki atu anai he poto ʼe lahi age ʼi te poto ʼo te tagata fuli pe. Kae ʼe ʼau toe foaki atu anai kia koe mo te meʼa ʼaē neʼe mole ke kole mai, te ʼu koloā pea mo te kolōlia.’

Mole faʼa fualoa, pea ʼōmai te ʼu fafine e lua kia Salomone mo tonā fihifihia lahi. Neʼe fakamahino fēnei age e te tahi fafine: ‘ ʼE ma nonofo fakatahi mo te fafine ʼaenī ʼi te ʼapi pe e tahi. Neʼe ʼau fānauʼi taku kiʼi tama, pea hili kiai ʼaho e lua pea ina toe fānauʼi mo tana kiʼi tama. ʼI te tahi po neʼe mate leva tana kiʼi tama. Kae ʼi taku lolotoga moe, neʼe ina toʼo tana kiʼi tamasiʼi ʼaē kua mate ʼo tuku ʼi ʼoku tafa pea ina toʼo taku kiʼi tamasiʼi. ʼI taku ʼala ake pea ʼi taku sio ki te kiʼi tamasiʼi ʼaē kua mate, neʼe ʼau ʼiloʼi ai ʼe mole ko taku kiʼi tamasiʼi ʼaia.’

Kae neʼe ʼui age e te lua fafine: ‘Kailoa! Ko taku kiʼi tamasiʼi ʼaē ʼe kei maʼuli, pea ko tana tamasiʼi ʼaē kua mate!’ Neʼe tali age e te ʼuluaki fafine: ‘Kailoa! Ko tau kiʼi tamasiʼi ʼaē kua mate, pea ko taku tamasiʼi ʼaē ʼe kei maʼuli!’ Neʼe nā fefihiʼaki ai. Koteā anai te meʼa ʼaē ka fai e Salomone?

Neʼe ina fekauʼi ke ʼaumai he heletā, pea ʼi tona ʼaumai, neʼe ina ʼui fēnei: ‘Tuʼusi lua te tamasiʼi, pea foaki ki te ʼu fafine ʼaenī ke nā takitahi te faʼahi.’

Neʼe kalaga ai te faʼe totonu ʼa te tamasiʼi: ‘Kailoa! Fakalelei kae ʼaua naʼa ke matehi te tamasiʼi. Foaki age te tamasiʼi ki te fafine ʼaē!’ Kae neʼe ʼui e te fafine ʼaē: ‘Ke ʼaua naʼa foaki ki he tahi ia māua; tuʼusi lua te tamasiʼi.’

Pea neʼe ʼui age e Salomone: ‘Tuku te matehi ʼo te tamasiʼi! Foaki age ki te ʼuluaki fafine. ʼE ko ia te faʼe totonu.’ Neʼe ʼiloʼi e Salomone te faʼahi ʼaia koteʼuhi ko te faʼe totonu ʼe ʼofa mamahi ia ki tana tamasiʼi, koia neʼe ina loto ai ke foaki te tamasiʼi ki te lua fafine ke ʼaua naʼa matehi. ʼI te logo ʼa te hahaʼi ki te meʼa ʼaē neʼe fai e Salomone moʼo fakatokatoka ʼo te fihifihia ʼaia, neʼe nātou fiafia ai he neʼe nātou maʼu te hau poto.

Lolotoga te nofo hau ʼa Salomone, neʼe tapuakiʼi e te ʼAtua te hahaʼi ʼo ina fakahomo te ʼu meʼa ʼo te kele ʼo nātou mahu ʼi te fulumeto pea mo te olose, te ʼu vite pea mo te ʼu fiku pea mo te tahi ʼu faʼahiga meʼa kai. Neʼe matalelei te ʼu mutuʼi meʼa ʼo te hahaʼi, pea neʼe nātou nonofo ʼi te ʼu ʼapi matalelei. Neʼe mahu ʼaupito te ʼu meʼa lelei ʼaē neʼe maʼu e te hahaʼi fuli.

ʼI MUʼA ʼo te mate ʼo Tavite, neʼe ina foaki kia Salomone te ʼu pepa ʼe tuʼu ai te fakatuʼutuʼu mai te ʼAtua ʼo ʼuhiga mo te laga ʼo tona fale lotu. ʼI te taʼu fā ʼo tana nofo hau, neʼe kamata laga ai e Salomone te fale lotu, pea neʼe ʼosi ia taʼu e fitu vaelua. Ko te ʼu lauʼi hogofulu afe tagata neʼe gāue ʼi te fale lotu, pea neʼe lahi ʼaupito te ʼu meʼa ʼaē neʼe fakaʼaogaʼi kiai pea toe lahi foki mo te paʼaga. Neʼe hoko te faʼahi ʼaia, he neʼe lahi te aulo pea mo te siliva ʼaē neʼe fakaʼaogaʼi ki te laga ʼo te fale lotu ʼaia.

Ko te fale lotu neʼe ko tona ʼu kogafale tāfito e lua, ohage pe ko te fai ʼo te tapenakulo. Kae ko te ʼu kogafale ʼaia neʼe laulahi age ʼi te ʼu kogafale ʼo te tapenakulo. Neʼe tuku e Salomone te aleka ʼo te fuakava ki te kogafale taupotu ʼo te fale lotu, pea ʼi te tahi kogafale neʼe tuku ai te tahi ʼu meʼa ʼaē neʼe tuku ʼi te tapenakulo.

ʼI te ʼosi laga ʼo te fale lotu, neʼe fai te lafeti lahi. ʼE koutou sio ʼi te paki, neʼe tuʼutuli ia Salomone ʼi muʼa ʼo te fale lotu pea neʼe faikole. Neʼe ʼui fēnei e Salomone kia Sehova: ‘Māʼia mo te lagi, ʼe mole faʼa laulahi ke ke hāo ai, pea feafeaʼi age leva la te fale lotu ʼaenī ʼaē neʼe ʼau laga maʼa koe. Kae, Ê toku ʼAtua, fakalelei ka ke fagono mai ki tau hahaʼi mokā nātou faikole atu anai kia te koe ʼi te fale ʼaenī.’

ʼI te ʼosi faikole ʼa Salomone, neʼe hifo ifo te afi mai te lagi. Neʼe ulo ai te ʼu sakilifisio manu ʼaē neʼe fai e te hahaʼi. Pea neʼe fonu te fale lotu ko te mālama gigila neʼe haʼu mai ia Sehova. Neʼe hā ʼaki ai neʼe tali e Sehova, pea neʼe ina leleiʼia te fale lotu pea mo te faikole ʼa Salomone. Ko te fale lotu, kae mole ko te tapenakulo, ʼaē ka liliu ʼi te temi ʼaia ko te potu ʼaē ka ʼolo kiai te hahaʼi ʼo fai ai tanatou tauhi.

Lolotoga he temi fualoa neʼe hau ai ia Salomone ʼaki te poto, pea neʼe fiafia ai te hahaʼi. Kae neʼe ʼohoana leva ia Salomone mo te ʼu fafine tokolahi mai te tahi ʼu fenua neʼe mole nātou atolasio kia Sehova. ʼE koutou sio koa ki te fafine ʼaē ʼe tauhi ki te tamapua? Pea neʼe fakalotoʼi e te ʼu fafine ʼaia ia Salomone ke tauhi mo ia ki te tahi ʼu ʼatua. ʼE koutou ʼiloʼi pe koteā te meʼa ʼaē neʼe hoko ʼi te fai e Salomone ia te faʼahi ʼaia? Neʼe mole kei ina gaohi fakaleleiʼi te hahaʼi. Neʼe liliu ia ʼo ʼitaʼita, pea neʼe mole kei maʼuli fiafia te hahaʼi.

Neʼe ʼita ai ia Sehova kia Salomone, pea ina ʼui age ki ai: ‘ ʼE ʼau toʼo anai te puleʼaga ia koe pea ʼe ʼau foki anai ki he tahi tagata. ʼE mole ʼau fai anai te faʼahi ʼaia ʼi tou temi maʼuli, kae ʼi te temi ʼaē ka hau ai tou foha. Kae ʼe mole ʼau toʼo fuli anai te hahaʼi ʼi te puleʼaga ʼo tou foha.’ Tou vakaʼi pe neʼe hoko feafeaʼi te meʼa ʼaia.