ʼE KOUTOU ʼiloʼi koa pe koʼe ʼe hae e te tagata ʼaenī tona kofu? Neʼe ko Sehova ʼaē neʼe ina ʼui age ke ina fai te faʼahi ʼaia. Ko te tagata ʼaia ʼe ko Aisa te polofeta ʼa te ʼAtua. ʼE koutou ʼiloʼi pe koteā te ʼuhiga ʼo he polofeta? ʼE ko he tagata ʼe fakahā fakatomuʼa ki ai e te ʼAtua te meʼa ʼaē ka hoko.

Ko te polofeta ko Aisa ʼe lolotoga palalau ʼi henī kia Selopoame. Ko Selopoame neʼe ko he tagata neʼe fakanofo e Salomone ke pule ki he koga ʼo tana gāue laga fale. ʼI te felāveʼi ʼa te polofeta ko Aisa mo Selopoame ʼi te ala, neʼe fai e Aisa te meʼa faikehe. Neʼe ina huʼi tona kofu foʼou pea ina hae ko te ʼu koga e 12. Neʼe ina ʼui fēnei kia Selopoame: ‘Toʼo te ʼu koga e 10 maʼa koe.’ ʼE koutou ʼiloʼi koa pe koʼe neʼe foaki e Aisa kia Selopoame te ʼu koga ʼaia e 10?

Neʼe fakamahino age e Aisa ʼe fakatuʼutuʼu e Sehova ke ina toʼo te puleʼaga ia Salomone. Neʼe ina ʼui age ʼe foaki anai e Sehova te ʼu telepi e 10 kia Selopoame. Ko tona faka ʼuhiga ʼe ko telepi pe e lua ʼaē ka toe anai ke puleʼi e te foha ʼo Salomone ko Lopoame.

ʼI te logo ʼa Salomone ki te meʼa ʼaē neʼe ʼui age e Aisa kia Selopoame, neʼe ʼita kovi ai. Neʼe ina faigaʼi ke ina matehi ia Selopoame. Kae neʼe hola ia Selopoame ki Esipito. Mole faʼa fualoa pea mate ia Salomone. Neʼe hau ia ia lolotoga taʼu e 40, kae ʼi te temi nei kua hau tona foha ko Lopoame. ʼI te logo ʼa Selopoame ki te mate ʼo Salomone, neʼe mavae mai Esipito ʼo toe liliu ki Iselaele.

Ko Lopoame neʼe mole ko he hau agalelei. Neʼe lahi age tana agakovi ki te hahaʼi ʼi te agakovi ʼa tana tāmai ʼaē ko Salomone. Ko Selopoame pea mo te tahi ʼu tagata maʼuhiga neʼe nātou ʼolo ki te Hau ko Lopoame, pea nātou kole ki ai ke ina gaohi fakalelei te hahaʼi. Kae neʼe mole fia logo ia Lopoame. ʼI tona fakahagatonu, neʼe toe ʼāsili agakovi age ia. Koia neʼe fakanofo ai e te hahaʼi ia Selopoame ke hau ki te ʼu telepi e 10, kae ki te ʼu telepi e lua ʼo Pesamino pea mo Suta ko tonatou hau neʼe ko Lopoame.

Neʼe mole loto e Selopoame ke hake tana hahaʼi ki Selusalemi ʼo atolasio ʼi te fale lotu ʼo Sehova. Pea neʼe ina faʼu te ʼu pipi aulo e lua pea neʼe ina ʼave ki te puleʼaga ʼo te ʼu telepi e 10 ke nātou tauhi kiai. Mole tuai pea lahi te fai fakapō pea mo te agamālohi ʼi te fenua.

Neʼe toe hoko foki mo te ʼu fihifihia ʼi te puleʼaga ʼo te ʼu telepi e lua. Hili kiai taʼu e nima ʼo te hau ʼa Lopoame, neʼe haʼu te hau ʼo Esipito ʼo tauʼi ia Selusalemi. Neʼe lahi te ʼu koloā ʼaē neʼe ina toʼo ʼi te fale lotu ʼo Sehova. Koia neʼe mole taupau fualoa te ʼuhiga moʼoni ʼo te fale lotu, ohage ko tona kamata ʼi te temi ʼaē neʼe laga ai.

ʼI TE ʼosi mate ʼo te Hau ko Selopoame, neʼe ko te ʼu hau agakovi fuli ʼaē neʼe nātou pule ʼi te puleʼaga ʼo te ʼu telepi e 10 ʼo Iselaele ʼi te Potu Tokelau. Ko te hau ko Akape neʼe agakovi ʼaupito ia nātou fuli ʼaia. ʼE koutou ʼiloʼi pe koteā tona tupuʼaga? Ko te tupuʼaga tāfito, he ko tona ʼohoana, neʼe ko te fineʼaliki agakovi ko Sesapele.

Ko Sesapele neʼe mole ko he fafine Iselaelite. Neʼe ko te ʼofafine ʼo te hau ʼo Sitoni. Neʼe tauhi ki te ʼatua loi ko Paale, pea neʼe ina fakalotoʼi ia Akape pea mo te tokolahi ʼo te kau Iselaelite ke nātou toe tauhi mo nātou kia Paale. Neʼe fehiʼa ia Sesapele kia Sehova pea neʼe ina matehi te tokolahi ʼo tana kau polofeta. Ko ʼihi neʼe tonu ke nātou fenonoʼi ʼi te ʼu ʼana naʼa matehi ia nātou. Kapau neʼe loto ia Sesapele ki he meʼa, pea neʼe feala ke ina matehi he tahi ke ina maʼu te meʼa ʼaia.

ʼI te tahi ʼaho neʼe lotomamahi ʼaupito ai te hau ko Akape, pea fehuʼi age e Sesapele ki ai: ‘He koʼe ʼe ke lotomamahi ʼi te ʼaho nei?’

Neʼe tali age e Akape: ‘ ʼUhi ko te meʼa ʼaē neʼe ʼui mai e Napote. Neʼe ʼau fia totogi tana vite, kae neʼe ina ʼui mai ʼe mole feala ke ina fakatau.’

Neʼe ʼui age e Sesapele: ‘ ʼAua naʼa ke tuʼania. ʼE ʼau toʼo anai maʼa koe te vite.’

Pea neʼe faitohi ia Sesapele ki te ʼu tagata pule ʼo te kolo ʼaē neʼe nofo ai ia Napote. Neʼe ina ʼui age kia nātou: ‘Koutou toʼo he ʼu tagata agakovi ʼo koutou ʼui age kia nātou ke nātou tala neʼe leakovi ia Napote ki te ʼAtua pea mo tona hau. Pea koutou ʼave ia Napote ki te tuʼa kolo pea ke koutou taumakaʼi ʼo aʼu ki tona mate.’

ʼI te ʼiloʼi e Sesapele kua mate ia Napote, neʼe ʼui maʼana kia Akape: ‘ ʼI te temi nei ʼalu ʼo toʼo tana vite.’ ʼI takotou manatu, ʼe mole tonu koa la ke fakatūʼa ia Sesapele ʼi tana agakovi ʼaia?

Koia, ʼaki te temi, neʼe fekauʼi e Sehova te tagata ko Sehu ke ʼalu ʼo fakatūʼa ia ia. ʼI te logo ʼa Sesapele ki te haʼu ʼa Sehu, neʼe ina vali ʼona mata pea neʼe ina faʼu fakalelei tona lauʼulu. Kae ʼi te kaku atu ʼa Sehu pea sio ia kia Sesapele ʼi te matapā fakamālama, neʼe pāui ki te ʼu tagata ʼo te fale hau: ‘Lī ifo ia ia ki lalo!’ Neʼe fakalogo te ʼu tagata ʼaia ki te meʼa ʼaē neʼe fakatotonu age, ohage pe ko takotou sio kiai ʼi te paki. Neʼe nā lī ifo ia ia ki lalo, pea neʼe mate ai. Ko te fakaʼosi ʼaia ʼo te fineʼaliki agakovi ko Sesapele.