ʼE KOUTOU ʼiloʼi pe koteā te meʼa ʼaē ʼe ʼui age e te kiʼi taʼahine? ʼE palalau ki te fafine ʼo ʼuhiga mo te polofeta ʼa Sehova ʼaē ko Eliseo, pea mo te ʼu meʼa fakaofoofo ʼaē neʼe ina fakahoko ʼaki te tokoni ʼa Sehova. ʼE mole ʼiloʼi e te fafine pe ko ai ia Sehova koteʼuhi ʼe mole ko he Iselaelite. Kae tou vakaʼi pe koʼe neʼe nofo te kiʼi taʼahine ʼi te ʼapi ʼo te fafine ʼaia.

Ko te fafine ʼaia ʼe ko he fafine Silia. Ko tona ʼohoana ʼe ko Naamane, te pule ʼo te kautau Silia. Neʼe puke e te kau Silia te kiʼi taʼahine Iselaelite ʼaia, pea neʼe nātou ʼave ia ia ki te ʼohoana ʼo Naamane ke kaugana ki ai.

Neʼe maʼu e Naamane te mahaki kovi ʼaē ko te kilia. Ko te mahaki ʼaia ʼe ina kaina te kakano. Koia neʼe ʼui age ai e te kiʼi taʼahine ki te ʼohoana ʼo Naamane: ‘ ʼE ʼau ʼamusia age ke ʼalu toku pule ki te polofeta ʼa Sehova ʼaē ʼe nofo ʼi Iselaele. ʼE ina fakamālōlō anai ia ia ʼi tona kilia.’ Ki muli age neʼe fakahā te ʼu palalau ʼaia ki te ʼohoana ʼo te fafine.

ʼE lotomālohi ia Naamane ke faitoʼo tona mahaki; pea neʼe ina fakatotonu ai ke ʼalu ki Iselaele. ʼI tana tau atu, neʼe ʼalu ia ki te ʼapi ʼo Eliseo. Neʼe fekauʼi e Eliseo tana kaugana ke ʼalu ʼo ʼui age kia Naamane ke ʼalu ʼo maʼanu tuʼa fitu ʼi te Vaitafe ʼo Solotane. Neʼe ʼita ʼaupito ai ia Naamane, pea neʼe ina ʼui fēnei: ‘Ko te ʼu vaitafe ʼo toku fenua ʼe lelei age ia ʼi te ʼu vaitafe ʼo Iselaele!’ ʼI tana ʼosi fai ia te ʼu palalau ʼaia, pea ʼalu ai ia Naamane.

Kae neʼe ʼui age e te tahi ʼi tana ʼu kaugana: ‘Tagata, kanapaula neʼe ʼui atu e Eliseo ke ke fai he meʼa ʼe faigataʼa, ʼe mole ke fai anai koa la te meʼa ʼaia? He koʼe ʼe mole ke ʼalu ʼo maʼanu, ohage ko te meʼa ʼaē neʼe ina ʼui atu?’ Neʼe fakalogo ia Naamane ki tana kaugana pea neʼe ʼalu ʼo uku tuʼa fitu ʼi te Vaitafe ʼo Solotane. ʼI tana fai te meʼa ʼaia, neʼe lelei ai tona kili pea mo puli ai tona mahaki!

Neʼe fiafia ʼaupito ia Naamane. Neʼe liliu ia kia Eliseo pea ina ʼui age: ‘ ʼI te temi nei ʼe ʼau ʼiloʼi papau ko te ʼAtua ʼo Iselaele ʼe ko te ʼAtua moʼoni pe ʼaia e tahi ʼi te kele katoa. Koia, fakalelei mai, ka ke toʼo te meʼa ʼofa ʼaenī.’ Kae neʼe tali age e Eliseo: ‘Kailoa, ʼe mole ʼau toʼo he meʼa.’ Neʼe ʼiloʼi e Eliseo ʼe mole lelei anai tana toʼo te meʼa ʼofa ʼaia, koteʼuhi neʼe ko Sehova ʼaē neʼe ina fakamālōlō ia Naamane. Kae ko te kaugana ʼa Eliseo ia Keasi neʼe fia fai ia ki te meʼa ʼofa ʼaia.

Pea neʼe fai e Keasi te meʼa ʼaenī. ʼI te ʼosi mavae ʼa Naamane, neʼe lele ia Keasi ke ina maʼu ia ia. Pea ina ʼui age: ʼE fekauʼi mai ʼau e Eliseo ke ʼau haʼu ʼo ʼui atu ke ke foaki mai he meʼa ʼofa maʼa tona ʼu kaumeʼa neʼe hoki ʼōmai pe ʼo ʼaʼahi mai.’ Kae neʼe ko tana loi. Pea neʼe mole ʼiloʼi e Naamane ʼe ina loiʼi ia ia; pea neʼe ina foaki age ai kia Keasi te ʼu meʼa ʼaia.

ʼI te liliu mai ʼa Keasi, neʼe kua ʼiloʼi e Eliseo te meʼa ʼaē neʼe ina fai. Neʼe fakahā age e Sehova ki ai. Koia neʼe ina ʼui fēnei ai: ‘ ʼUhi ko tau fai te meʼa kovi ʼaia, ko te kilia ʼo Naamane ʼe tō anai kia koe.’ Pea neʼe hoko atu aipe ʼi te moʼi temi ʼaia!

Koteā te meʼa ʼaē ʼe akoʼi mai e te hisitolia ʼaia? ʼUluaki, ʼe tonu ke tou palalau ʼo ʼuhiga mo Sehova, ohage ko te meʼa ʼaē neʼe fai e te kiʼi taʼahine. ʼE tou maʼu ai anai hona ʼu fua lelei. Lua, ʼe mole tonu ke tou fiatuʼu ohage ko Naamane, kae ʼe tonu ke tou fakalogo ki te ʼu kaugana ʼa te ʼAtua. Pea tolu leva, ʼe mole tonu ke tou loi ohage ko Keasi. ʼE mole lahi koa la te ʼu meʼa ʼe tou ako ʼi tatatou lau ia te Tohi-Tapu?

ʼE KOUTOU sio ki te tagata ʼaē ʼe ʼi te vai. ʼE tau mo te fihifihia lahi. Ko te ika ʼaē ʼe koutou sio kiai ʼe ʼamanaki ke ina folo ia ia! ʼE koutou ʼiloʼi koa pe ko ai te tagata ʼaia? ʼE higoa ko Sonasi. Tou vakaʼi pe koʼe neʼe hoko te fihifihia lahi ʼaia kia ia.

Ko Sonasi neʼe ko he polofeta ʼa Sehova. Mole faʼa fualoa ʼi te mate ʼo te polofeta ko Eliseo, pea ʼui age e Sehova kia Sonasi: ‘ ʼAlu ki te kolo lahi ko Ninive. ʼE lahi ʼaupito te agakovi ʼa te hahaʼi ʼo te kolo ʼaia, pea ʼe ʼau loto ke ke fakahā age kia nātou tanatou aga.’

Kae neʼe mole fia ʼalu ia Sonasi. Pea neʼe heka ia ki te vaka ʼe mole ʼalu ki Ninive. Neʼe mole fiafia ia Sehova ʼi te hola ʼa Sonasi. Koia neʼe ina fakahoko ai te afā lahi. ʼI te mālohi ʼo te afā, neʼe ʼamanaki moū te vaka. Neʼe matataku ʼaupito te ʼu hahaʼi ʼo te vaka, pea neʼe nātou kalaga ki tonatou ʼu ʼatua ke tokoni age kia nātou.

Pea neʼe ʼui age e Sonasi kia nātou: ‘ ʼE ʼau atolasio kia Sehova, te ʼAtua ʼaē neʼe ina fakatupu te lagi pea mo te kele. Pea neʼe ʼau hola heʼe mole ʼau fia fai te meʼa ʼaē neʼe fakatotonu mai e Sehova.’ Pea neʼe fehuʼi age e te ʼu tagata ʼo te vaka ʼaia: ‘Koteā koa te meʼa ʼe tonu ke mātou fai ke gona ai te afā?’

Neʼe ʼui age e Sonasi: ‘Koutou lī ʼau ki te tai, pea ʼe totofu lelei ai anai te tai.’ Neʼe mole fia fai e te ʼu tagata ʼo te vaka te meʼa ʼaia, kae ʼi te ʼāsili kovi ʼo te afā neʼe nātou lī ai leva ia Sonasi ki te tai. ʼI te moʼi temi pe ʼaia neʼe gona ai te afā, pea neʼe totofu lelei ai te tai.

ʼI te moū ʼa Sonasi ʼi te loto tai, neʼe folo ia ia e te toe ika lahi. Kae neʼe mole mate ia. Lolotoga ʼaho e tolu pea mo po e tolu neʼe nofo ia ʼi te fatu ʼo te ika. Neʼe lotomamahi ʼaupito ia Sonasi he neʼe talagataʼa ia kia Sehova ʼi tana mole ʼalu ki Ninive. Pea ʼe koutou ʼiloʼi pe koteā te meʼa ʼaē neʼe ina fai?

Neʼe faikole ia Sonasi kia Sehova ke tokoni age ki ai. Pea neʼe fai e Sehova ke luaʼi e te ika ia Sonasi ki te mataʼone. ʼOsi ʼaia pea ʼalu ia Sonasi ki Ninive. ʼE mole akoʼi mai koa la e te hisitolia ʼaenī te maʼuhiga ʼaē ke tou fai te meʼa ʼaē ʼe fakatotonu mai e Sehova?