KO TE hau ko Nepukanesa neʼe ina toʼo te kau Iselaelite fuli ʼaē neʼe lelei tanatou ako ʼo ʼave ki Papiloni. Pea neʼe fili e te hau ʼi te kau Iselaelite ʼaia te ʼu tama ʼaē neʼe talavou pea mo popoto. Ko te toko fā ʼi te ʼu tama ʼaia ʼe koutou sio kiai ʼi henī. Ko Taniela, pea mo te toko tolu ʼe fakahigoaʼi e te kau Papiloni ko Satalake, mo Mesake pea mo Apeteneko.

Neʼe fakatuʼutuʼu e Nepukanesa ke gāue te ʼu tūpulaga ʼaia ʼi tona fale hau. ʼI te hili ʼo taʼu e tolu ʼo tonatou akoʼi, ʼe ina fili anai ia nātou ʼaē ʼe popoto ke tokoni kia ia moʼo fakatokatoka ʼo te ʼu fihifihia ʼo te puleʼaga. Neʼe loto te hau ke mālolohi te ʼu tama pea ke lelei tonatou maʼuli fakasino. Koia neʼe ina fekau ai tana kau kaugana ke nātou foaki ki te ʼu tūpulaga ʼaia te meʼa kai pea mo te vino ʼaē ʼe fakaʼaogaʼi ʼi tona fale hau.

Koutou sio ki te tūpulaga ko Taniela. ʼE koutou ʼiloʼi pe koteā te meʼa ʼaē neʼe ina ʼui age kia Apenasi te tagata pule ʼa te kau kaugana ʼa Nepukanesa? Neʼe ʼui age e Taniela ki ai ʼe mole fia kai ia ki te ʼu meʼa kai lelei ʼaē ʼe haʼu mai te laupapa ʼo te hau. Kae neʼe tuʼania ia Apenasi, ʼo ina ʼui age: ‘Neʼe fakatotonu e te hau te ʼu meʼa ʼaē ʼe tonu ke koutou kai pea mo te ʼu meʼa ʼaē ʼe tonu ke koutou ʼinu. Pea kapau ʼe mole koutou mālolohi ohage ko te tahi kau tūpulaga, pea ʼe feala ke ina matehi ʼau.’

Pea neʼe ʼalu ia Taniela ki te tagata leʼo ʼaē neʼe tuku age e Apenasi ke ina leʼoleʼohi ia ia pea mo tona ʼu kaumeʼa e toko tolu. Pea ina ʼui age ki ai: ‘Fakalelei tou loto ka ke ʼahiʼahiʼi mātou ia ʼaho e 10. Foaki mai kia mātou he ʼu lauʼakau ke mātou kai pea mo te vai ke mātou ʼinu. Pea ke fakatatau mātou mo ʼihi ʼu tūpulaga ʼaē ʼe nātou kai ki te meʼa kai ʼa te hau, pea ʼe ke sio ai anai pe ko ai ʼaē ʼe maʼuli lelei age.’

Neʼe fai ai e te tagata leʼo ia te meʼa ʼaia. Pea ʼi te hili ʼo te ʼu ʼaho e hogofulu, neʼe mālolohi age ia Taniela pea mo tona ʼu kaumeʼa e toko tolu ʼi te ʼu tūpulaga ʼaē. Pea neʼe tuku ai e te tagata leʼo ke hoko atu tanatou kai ki te ʼu lauʼakau kae mole nātou kai ki te meʼa kai ʼaē ʼe foaki age e te hau.

ʼI te ʼosi ʼo taʼu e tolu, pea neʼe ʼave te ʼu tūpulaga fuli kia Nepukanesa. ʼI tana ʼosi palalau mo nātou fuli, neʼe tokagaʼi e te hau ʼe popoto age ia Taniela pea mo tona ʼu kaumeʼa e toko tolu. Koia neʼe ina tāʼofi ai ia nātou ke nātou tokoni kia ia ʼi tona fale hau. Pea tatau aipe pe koteā te ʼu fehuʼi neʼe fai age e te hau kia Satalake, mo Mesake pea mo Apeteneko, neʼe tuʼa 10 age tanatou popoto ʼi te fakatokatoka ʼo te ʼu fihifihia ʼaia ʼi tana ʼu pelepitelo peʼe ko tana ʼu tagata popoto.

KUA hili kiai taʼu e 10 ki te temi ʼaē neʼe ʼave ai e te Hau ko Nepukanesa ia te kau Iselaelite ʼaē neʼe popoto lelei ki Papiloni. Pea ʼi temi nei koutou sio ki te meʼa ʼaē ʼe hoko! Kua vela ia Selusalemi. Pea ko te kau Iselaelite ʼaē neʼe mole matehi neʼe ʼave ke pilisoniʼi ʼi Papiloni.

Koutou manatuʼi, neʼe fakahā e te ʼu polofeta ʼa Sehova ʼe hoko anai te faʼahi ʼaia mo kapau ʼe mole fetogi e te hahaʼi tanatou ʼu aga ʼaē ʼe kovi. Kae neʼe mole fakalogo te kau Iselaelite ki te kau polofeta. Neʼe hoholo atu pe tanatou atolasio ki te ʼu ʼatua loi ka mole nātou atolasio kia Sehova. Koia neʼe tonu ai ke fakatūʼa te hahaʼi. ʼE tou ʼiloʼi te faʼahi ʼaia koteʼuhi neʼe fakahā e te polofeta ʼa te ʼAtua ko Esekiele, ia te ʼu meʼa kovi ʼaē neʼe fai e te kau Iselaelite.

ʼE koutou ʼiloʼi koa pe ko ai ia Esekiele? Neʼe ko he tūpulaga neʼe kau ia nātou ʼaē neʼe ʼave e te Hau ko Nepukanesa ki Papiloni ia taʼu e 10 ki muʼa atu ʼo te fakaʼauha katoa ʼo Selusalemi. Ko Taniela pea mo tona ʼu kaumeʼa e toko tolu, ko Satalake, mo Mesake pea mo Apeteneko, neʼe toe ʼave mo nātou ʼi te temi ʼaia ki Papiloni.

Lolotoga te nofo ʼa Esekiele ʼi Papiloni, neʼe fakahā age e Sehova ki ai te ʼu meʼa kovi ʼaē ʼe hoko ʼi te fale lotu ʼi Selusalemi. Neʼe fai e Sehova te faʼahi ʼaia ʼaki he milakulo. ʼI te nofo ʼa Esekiele ʼi Papiloni, neʼe faka fealagia age e Sehova kia ia ke sio ki te ʼu meʼa ʼaē ʼe lolotoga fai ʼi te fale lotu. Pea neʼe sio ia Esekiele ki te ʼu meʼa fakalialia!

Neʼe ʼui age e Sehova kia Esekiele: ‘Sio ki te ʼu meʼa fakalialia ʼaē ʼe fai e te hahaʼi ʼi te fale lotu. Sio ki te ʼu kaupā ʼaē ʼe togi ai te ʼu paki ʼo te ʼu gata pea mo te tahi ʼu manu. Pea sio ki te kau Iselaelite ʼe nātou atolasio ki te ʼu paki ʼaia!’ Neʼe sio ia Esekiele ki te ʼu meʼa ʼaia, pea neʼe ina tohi te ʼu meʼa ʼaia ʼaē neʼe lolotoga hoko.

Neʼe fehuʼi age e Sehova kia Esekiele: ‘ ʼE ke sio koa la ki te meʼa ʼaē ʼe fai fakafūfū e te ʼu tagata takitaki ʼo Iselaele?’ ʼIo, neʼe feala ke toe sio ki te ʼu faʼahi ʼaia. Neʼe ʼi ai te ʼu tagata e toko 70, pea neʼe nātou atolasio fuli ki te ʼu ʼatua loi. Neʼe nātou ʼui fēnei: ‘ ʼE mole sio mai ia Sehova kia tatou. Kua mavae ia ʼi te fenua.’

Pea neʼe fakahā age e Sehova kia Esekiele te ʼu fafine neʼe heheka ʼi te matapā ʼo te potu tokelau ʼo te fale lotu. Neʼe nātou heheka ʼo atolasio ki te ʼatua loi ko Tamuse. Pea neʼe sio ia ki te ʼu tagata ʼaē ʼe tutuʼu ʼi te hūʼaga ʼo te fale lotu ʼo Sehova! Ko te toko 25. Neʼe sio ia Esekiele kia nātou, ʼe nātou tuʼutuli ʼo nātou haga ki te potu hahake pea ʼe nātou atolasio ki te laʼā!

Neʼe ʼui age e Sehova: ‘ ʼE mole fakaʼapaʼapa te ʼu hahaʼi ʼaia kia te ʼau. ʼE mole gata pe ʼi tanatou fai te ʼu meʼa kovi, kae ʼe nātou ʼolo ki toku fale lotu pea ʼe nātou fai ai te ʼu meʼa ʼaia!’ Koia neʼe fakapapau age e Sehova: ‘ ʼE nātou logoʼi anai te mālohi ʼo toku ʼita. Pea ʼe mole ʼau toe ʼofa anai kia nātou ʼi te temi ʼaē ka fakaʼauha ai nātou.’

ʼI te hili pe ʼo taʼu e tolu ki te meʼa ʼaē neʼe fakahā e Sehova kia Esekiele, neʼe agatuʼu te kau Iselaelite ki te Hau ko Nepukanesa. Pea neʼe ina tauʼi ai nātou. ʼI te hili ʼo te taʼu katoa vaelua pea maumauʼi e te kau Papiloni te ʼu kaupā ʼo Selusalemi pea mo nātou tutu te kolo. Neʼe tokolahi te hahaʼi neʼe matematehi pe neʼe ʼave ke pilisoniʼi ʼi Papiloni.

He koʼe neʼe fakagafua e Sehova ke hoko te fakaʼauha fakamataku ʼaia ʼo te kau Iselaelite? Koteʼuhi neʼe mole nātou fakalogo kia Sehova, pea neʼe mole nātou fakalogo ki tana ʼu lao. Ko te meʼa ʼaia ʼe hā ai ʼe maʼuhiga ke tou fai tuʼumaʼu te meʼa ʼaē ʼe ʼui mai e te ʼAtua.

ʼI te kamata, neʼe tokosiʼi te hahaʼi ʼaē neʼe fakagafua ke nonofo ʼi te fenua ʼo Iselaele. Neʼe fakanofo e te Hau ko Nepukanesa te tagata Sutea ko Ketalia ke pule ki te hahaʼi ʼaia. Kae neʼe matehi e ʼihi Iselaelite ia Ketalia. ʼI te temi ʼaia neʼe matataku ai te hahaʼi ki te kau Papiloni naʼa nātou ʼōmai ʼo fakaʼauha ia nātou fuli ʼuhi ko te meʼa kovi ʼaē neʼe hoko. Koia neʼe nātou fakakinauʼi ia Selemia ke ʼalu mo nātou, pea neʼe nātou feholaki ki Esipito.

Neʼe nātou mavae fuli ʼi te fenua ʼo Iselaele. Lolotoga taʼu e 70 neʼe mole kei ʼi ai he tahi ʼi te fenua. Kua lāvaki katoa. Kae neʼe fakapapau ia Sehova ʼe ina ʼaumai anai tana hahaʼi ki te fenua ʼi te hili ʼo taʼu e 70. ʼI te temi ʼaia, koteā te meʼa neʼe fai e te hahaʼi ʼa te ʼAtua ʼi Papiloni ʼi te temi ʼaē neʼe ʼave ai ia nātou kiai? Tou vakaʼi te faʼahi ʼaia.