NEʼE ko te lauʼi afe hahaʼi ʼaē neʼe fagona mai Papiloni ʼo ʼolo ki Selusalemi. Kae ʼi tanatou tau atu, neʼe lāvaki ia Selusalemi. Neʼe mole nofo ai he tahi. Neʼe tonu ke toe laga e te kau Iselaelite te kolo katoa.

Ko te ʼuluaki meʼa ʼaē neʼe nātou laga ʼe ko te ʼaletale. Neʼe ko te meʼa ʼaia ʼaē neʼe feala ke nātou fai ai tanatou ʼu sakilifisio manu, peʼe ko tanatou ʼu mōlaga kia Sehova. ʼI te hili ʼo he ʼu kiʼi māhina, neʼe kamata laga e te kau Iselaelite te fale lotu. Kae ko te ʼu fili ʼaē neʼe nonofo ʼi te ʼu fenua ʼi te ʼu tafaʼaki neʼe mole nātou loto ke laga e te kau Iselaelite te fale lotu. Koia neʼe nātou fakamatakuʼi ia nātou ke mole nātou laga te fale lotu ʼaia. Pea ko te ʼu fili ʼaia neʼe nātou fakaʼui ki te hau foʼou ʼo Pelesia ke ina fai he lao moʼo fakagata ʼo te gāue ʼaia.

ʼI te temi ʼaia, neʼe kua hili taʼu e 17 ki te temi ʼaē neʼe mavae ai te kau Iselaelite mai Papiloni. Neʼe fekauʼi e Sehova tana ʼu polofeta ko Asea pea mo Sakalia ke nā tala ki te hahaʼi ke nātou kamata laga te fale lotu. Neʼe falala te hahaʼi ki te tokoni ʼa te ʼAtua, pea neʼe nātou fakalogo ki te ʼu polofeta. Neʼe nātou kamata laga ai te fale lotu, logope la neʼe fai te lao ʼaē ʼe ina tapuʼi ai tanatou fai te gāue ʼaia.

Koia neʼe haʼu ai te tagata pule ʼo Pelesia neʼe higoa ko Tatenai pea ina fehuʼi ki te kau Iselaelite pe ko ai ʼaē neʼe ina fakatotonu age kia nātou ke nātou laga te fale lotu. Neʼe ʼui age e te kau Iselaelite ki ai ʼi te temi ʼaē neʼe nātou nonofo ai ʼi Papiloni, neʼe ʼui age e te hau ko Siliusi kia nātou: ‘Koutou ʼolo, ʼi te temi nei, ʼo laga ia Selusalemi pea mo te fale lotu ʼo Sehova, tokotou ʼAtua.’

Neʼe faitohi ia Tatenai ki Papiloni pea ina fehuʼi pe neʼe fakatotonu moʼoni e Siliusi ʼaē kua ʼosi mate, ia te meʼa ʼaia. Mole tuai pea tau mai te tohi ʼa te hau foʼou ʼo Pelesia. Neʼe fakahā ai neʼe fakatotonu moʼoni e Siliusi ke nātou fai te meʼa ʼaia. Pea neʼe ʼui fēnei e te hau: ‘Tuku te kau Iselaelite ke nātou laga te fale lotu ʼo tonatou ʼAtua. Pea ʼe ʼau fakatotonu atu ke koutou tokoni kia nātou.’ Neʼe ʼosi te laga ʼo te fale lotu ʼi te ʼosi ʼo taʼu e fā, pea neʼe fiafia ʼaupito ai te kau Iselaelite.

Kua lahi te ʼu taʼu kua fakalaka. Kua teitei ke katoa kiai taʼu e 48 ki te temi ʼaē neʼe ʼosi laga ai te fale lotu. Neʼe māsisiva te hahaʼi ʼi Selusalemi, pea ko te kolo pea mo te fale lotu ʼo te ʼAtua neʼe mole matalelei. ʼI Papiloni, neʼe ʼiloʼi e te Iselaelite ko Esitalasi ʼe tonu ke fakamataleleiʼi te fale lotu ʼo te ʼAtua. Koia ʼe koutou ʼiloʼi pe koteā te meʼa ʼaē neʼe ina fai?

Neʼe ʼalu ia Esitalasi kia Artaxerxès, te hau ʼo Pelesia, pea neʼe foaki age e te hau agalelei ʼaia kia Esitalasi te ʼu tuʼuga meʼa ʼofa ke toe liliu mo ia ki Selusalemi. Neʼe kole age e Esitalasi ki te kau Iselaelite ʼaē neʼe nonofo ʼi Papiloni ke nātou tokoni age kia ia ki te fetuku ʼo te ʼu meʼa ʼofa ʼaia ki Selusalemi. Neʼe ko te toko 6 000 ʼaē neʼe nātou ʼui ʼe nātou ʼolo anai mo ia. Neʼe nātou ʼave te siliva pea mo te aulo pea mo te tahi ʼu meʼa maʼuhiga.

Neʼe tuʼania ia Esitalasi, he neʼe feala ke nātou felāveʼi mo he ʼu tagata agakovi ʼi te ala. Neʼe feala ki te ʼu tagata ʼaia ke nātou faʼao te siliva pea mo te aulo, pea ʼe nātou matehi anai mo nātou. Koia neʼe ʼui age e Esitalasi ki te hahaʼi ke nātou fakatahitahi, ohage ko te meʼa ʼe koutou sio kiai ʼi te paki. Pea neʼe nātou faikole kia Sehova ke ina puipui tanatou fagona ʼaē ki Selusalemi.

Neʼe puipui e Sehova ia nātou. ʼI te hili ʼo māhina e fā, pea neʼe nātou kaku haohaoa ki Selusalemi. ʼE mole hā ʼaki mai koa la, ʼe feala ke puipui e Sehova ia nātou ʼaē ʼe falala ki tana tokoni?

TOU toe liliu ki he ʼu taʼu ki muʼa atu, ka heʼeki ʼalu ia Esitalasi ki Selusalemi. Ko Maletokeo pea mo Esitele neʼe ko he ʼu Iselaelite maʼuhiga ʼi te puleʼaga ʼo Pelesia. Ko Esitele neʼe ko te fineʼaliki, pea ko tona tokolua mataʼi tama ko Maletokeo neʼe tuʼulaga lua ʼo hoa atu ki te hau. Tou vakaʼi te meʼa ʼaē neʼe hoko.

Neʼe mate te ʼu mātuʼa ʼa Esitele ʼi tana kei veliveli, pea neʼe taupau ia ia e Maletokeo. Ko Asuelusi, te hau ʼo Pelesia, neʼe ʼi ai tona fale hau ʼi te kolo ko Suse, pea ko Maletokeo neʼe ko tana tagata kaugana. ʼI te tahi ʼaho, neʼe mole fia fakalogo ia Vasiti, te ʼohoana ʼo te hau, pea neʼe fili ai e te hau tona tahi ʼohoana ke liliu ko he fineʼaliki. ʼE koutou ʼiloʼi koa pe ko ai te fafine ʼaē neʼe ina fili? Ei, neʼe ko te finemui ko Esitele.

ʼE koutou sio ki te tagata fiatuʼu ʼaenī ʼaē ʼe tulolo ki ai te hahaʼi? Ko Amane. Neʼe ko te tagata maʼuhiga ʼaupito ʼi Pelesia. Neʼe loto ia Amane ke toe tulolo mo Maletokeo kia ia, ʼaē ʼe koutou sio ki ai ʼe heka. Kae neʼe mole fai ʼe Maletokeo te faʼahi ʼaia. Neʼe mole fia tulolo ia ki te tagata agakovi ʼaia. Neʼe tupu ʼaki ai te ʼita ʼo Amane. Pea neʼe ina fakahoko tona ʼita ʼaia.

Neʼe fasituʼu ia Amane ki te hau ʼo ʼuhiga mo te kau Iselaelite. Neʼe ina ʼui fēnei age: ‘ ʼE ko te hahaʼi agakovi ʼe mole nātou fia fakalogo ki tau ʼu lao. ʼE tonu ke matehi ia nātou.’ Neʼe mole ʼiloʼi e Asuelusi ko tona ʼohoana ko Esitele neʼe ko he fafine Iselaelite. Pea neʼe mulimuli ia ki te meʼa ʼaē neʼe ʼui age e Amane, pea neʼe ina fai te lao ke ʼi ai he ʼaho ʼe matehi fuli ai te kau Iselaelite.

ʼI te ʼiloʼi e Maletokeo ia te lao ʼaia, neʼe lotomamahi ʼaupito. Neʼe ina fakahā te logo kia Esitele: ‘ ʼE tonu ke ke palalau ki te hau, pea ke ke kole ki ai ke ina hāofaki tatou.’ Neʼe fakatuʼutuʼu e te lao ʼo Pelesia ʼe hoki ʼalu he tahi ki te hau mo kapau neʼe fakaafe ia ia. Kae neʼe ʼalu ia Esitele ki te hau ka neʼe mole fakaafe ia ia. ʼI tana sio atu ʼaē ki ai neʼe faoʼi e te hau tona tokotoko aulo, ko tona faka ʼuhiga ʼe mole matehi anai ia ia. Neʼe fakaafe e Esitele te hau pea mo Amane ki te kaitahi. Neʼe fehuʼi age e te hau kia Esitele pe koteā te meʼa ʼaē ʼe loto ki ai. Neʼe ʼui age e Esitele ʼe hoki ina ʼui age anai ki ai mo kapau ʼe toe haʼu ia ia mo Amane ki te kaitahi ʼi te ʼaho ake.

ʼI te kaitahi ʼaia neʼe ʼui age e Esitele ki te hau: ‘ ʼE matehi anai ʼau pea mo taku hahaʼi.’ Neʼe ʼita ai te hau, pea ina fehuʼi age: ‘Ko ai ʼaē ʼe pātapāta ke ina fai te meʼa ʼaia?’

Neʼe ʼui age e Esitele: ‘Ko te tagata ʼaia, ko te fili, ʼe ko te tagata agakovi ʼaenī ko Amane!’

ʼI te temi ʼaia neʼe kua ʼita ʼaupito ai te hau. Neʼe ina fakatotonu ai ke matehi ia Amane. Ki muli age, neʼe fakanofo e te hau ia Maletokeo ki te tuʼulaga lua ʼo hoa atu kia ia. Pea neʼe fai e Maletokeo te lao foʼou ʼo faka fealagia ai ki te kau Iselaelite ke nātou fai he meʼa moʼo hāofaki ʼo nātou ʼi te ʼaho ʼaē neʼe fakatotonu ke matehi ai ia nātou. Mai tona ʼaluʼaga ʼaē ko Maletokeo neʼe ko he tagata maʼuhiga ʼi te temi ʼaia, ko te tokolahi neʼe nātou tokoni ki te kau Iselaelite, pea neʼe hāofaki ai ia nātou mai tonatou ʼu fili.